CHIDZIDZO 2

Kuita Seuri Kutaurirana Nevateereri

2 VaKorinde 2:17

PFUPISO YECHIDZIDZO: Taura sezvaunoita mazuva ese, uchinyatsoratidza kuti unonzwa sei nezvenyaya yacho uye nezvevateereri vako.

Nyatsogadzirira uye nyengetera. Nyengeterera kuti uise pfungwa dzako pamashoko auri kuda kutaura, kwete pauri. Nyatsoziva pfungwa huru dzauri kuda kutaura. Shandisa mashoko ako; usangodzokorora mashoko akanyorwa sezvaari.

Kana uchizoverenga Bhaibheri kana kuti chimwe chinyorwa, gadzirira zvizere mashoko acho kusvika wava kuaziva kuti uzoverenga uchitsetsenura. Kana uchiverenga mashoko akataurwa nemumwe munhu, averenge zvine upenyu asi usazonyanyisa.
Taura zvichibva pamwoyo. Funga kuti nei vateereri vako vachifanira kunzwa zvauri kuda kutaura. Isa pfungwa dzako pavari. Kana ukadaro, mamiriro ako, zvaunoita nhengo dzemuviri uye chiso chako, zvichabva zvaratidza kuti une ushamwari uye uri kutaura zvichibva pamwoyo.

Kunyange zvazvo uchifanira kutaura sezvaunoita mazuva ese, usabva wazoita zvinoita kuti shoko rako risaremekedzwe. Ita kuti vanhu varambe vachiremekedza shoko rako kuburikidza nekutaura mashoko akajeka uchitevedzera mitemo yemutauro.
Tarisa vateereri vako. Ramba uchitarisa vateereri vako kana zvisingazovavhiringi. Kana uchipa hurukuro, tarisa muteereri mumwe chete wozoenda pane mumwe, pane kungovatarisa seboka kana kuti kungokanda maziso pavari.