Georgette Douwma/Stone via Getty Images
VANHU VACHAPARADZA NYIKA HERE?
MAKUNGWA
MUMAKUNGWA ndimo munobva zvinhu zvakawanda zvatinodya uye zvinhu zvakawanda zvinoshandiswa pakugadzira mishonga yekurapa. Mumakungwa ndimo munobva inopfuura hafu yemhepo yatinofema, oxygen, uye ndimo munoenda magasi anokuvadza akadai secarbon. Makungwa anoitawo kuti mamiriro ekunze agare akanaka.
Kukanganiswa Kuri Kuitwa Makungwa
Kuchinja kuri kuita mamiriro ekunze kuri kukanganisa zvinhu zvinogara mugungwa zvakadai semashellfish, tumwe tumhuka tudiki tunonzi macoral, nezvimwewo. Nyanzvi dzesainzi dzinofungidzira kuti panozopera makore 30, zvinhu zvinoraramisa inenge 25% yezvisikwa zvemugungwa zvinogona kunge zvisisipo.
Nyanzvi dzinofungidzira kuti inenge 90% yeshiri dzinowana zvekudya zvadzo mugungwa dzinogona kunge dzakadya mapurasitiki, uye zvinofungidzirwa kuti mamiriyoni emhuka dzinogara mugungwa anofa gore rega rega nemhaka yekudya mapurasitiki.
Muna 2022, munyori mukuru wesangano reUnited Nations anonzi António Guterres akati: ‘Hatisi kuchengetedza makungwa saka ndinofunga kuti tinotofanira kuona zvekuita nekukurumidza kuti tiachengetedze.’
Nyika Yedu Yakasikwa Kuti Irambe Iripo Nekusingaperi
Makungwa nezvinhu zvipenyu zviri maari zvakasikwa zvichikwanisa kuzvichenesa zvega kana vanhu vakasanyanya kuzvisvibisa. Bhuku rinotaura nezvenyaya dzekuchinja kwemamiriro ekunze rinonzi Regeneration: Ending the Climate Crisis in One Generation rinotsanangura kuti kana vanhu vakasasvibisa makungwa, “anokwanisa kuzvichenesa ega.” Ona zvinotevera:
Tumwe tupukanana tudikidiki twemugungwa tunonzi maphytoplankton tunodya nekuchengeta carbon dioxide, iyo inofungidzirwa kuti ndiyo inonyanya kukonzera kuti kunze kuwedzere kupisa. Maphytoplankton anochengeta carbon dioxide yakawanda kungofanana neinochengetwa nemiti yese, uswa, nezvimwe zvinhu zvese zvinomera panyika zvabatanidzwa.
Tumwe tupukanana tudikidiki tunodya ganda nemabhonzo ehove dzakafa, izvo zvinogona kusvibisa makungwa. Tupukanana itwotwo tunozodyiwawo nezvimwe zvisikwa zvemugungwa. Imwe website inonzi Smithsonian Institution Ocean Portal inoti izvi zvinoita kuti “makungwa agare akachena.”
Magayiro anoita dzimwe hove zvekudya anoderedza acid iri mumvura yemugungwa, iyo inogona kukuvadza zvimwe zvisikwa zvemugungwa zvakadai semacoral, mashellfish, nezvimwewo.
Zviri Kuedza Kuitwa Nevanhu
Kushandisa mabhegi nemabhodhoro anoshandisika kakawanda kunobatsira kuderedza mapurasitiki anozopedzisira ava mumakungwa
Kana tisingadi kuzochenesa makungwa, hatifaniriwo kuasvibisa. Saka nyanzvi dzesainzi dziri kukurudzira vanhu kuti vashandise mabhegi, mabhodhoro nemimwewo midziyo inogona kushandiswa kakawanda pane kungoshandisa zvinhu zvepurasitiki kamwe chete vobva vangozvirasa.
Asi pane zvimwewo zvakawanda zvinoda kuitwa. Munguva ichangobva kupfuura, rimwe sangano rinoona nezvekuchengetedzwa kwenharaunda rakanhonga marara anosvika matani 9 200 akanga angosiyiwa pamhenderekedzo dzegungwa mugore rimwe chete munyika 112. Asi marara iwayo angori chikamu chidikidiki chemarara anopinda mumakungwa gore rega rega.
Magazini yeNational Geographic yakati “acid iri [mumakungwa] yawanda zvekuti zvinogona kusagadzirisika.” Vanhu vari kunyanya kupisa zvinhu zvakadai semarasha neoiri zvekuti zvisikwa zvemugungwa hazvichakwanisa kuchenesa makungwa sezvazvinofanira kuita.”
Bhaibheri Rinotii?
“Nyika yakazara nezvinhu zvamakaita. Kune gungwa, iro rakakura uye rakafara kwazvo, rakazara nezvinhu zvipenyu zvisingaverengeki, zvikuru nezvidiki.”—Pisarema 104:24, 25.
Musiki wedu akasika makungwa achikwanisa kuzvichenesa. Funga izvi: Kana achiziva zvakawanda kudaro nezvemakungwa nezvisikwa zvese zvirimo, angatadza here kugadzirisa dambudziko iri rekusvibiswa kwemakungwa? Ona nyaya yakanzi “Mwari Anovimbisa Kuti Nyika Haisi Kuzoparadzwa,” iri papeji 15.