Wɛ nkoka nkindjɛ kaanga ntsha opomana l’akambo wakɔlɛmbɛ

1. Esako ɛmɔtshi wɛkɔnge w’owaso má wopo w’oyɛso l’eteyi kɛ olonghanyelo wɔ Yehova?

TOLEKƆ nsɔsɔlɔ la mpeyi kɛ ndjala l’anteyi k’olonghanyelo wɔ Yehova l’etsho w’ekomo wɛ wolo wɛnɛ. Winá w’akambo w’andja wanɛ yotaleke ntshitana, Yehova ambɔtɔpɛyɛ nkfumbo k’osanga kɛ nyuma kɛ wananyɔ l’ankaana. (Yee. 133:1) Nde ntokotshɛka djɛ ndjala la djokanelo djɛ wolo lá nkfumbo kɛkɔ. (Ɛfɛ. 5:33–6:1) Edjinge nde ntɔpɛyɛka alako wa balo w’oyɛso la djonyi djɛ ndjala la vu djɛ nsɔsɔlɔ djɛ l’eteyi.

2. Kɛkɔnge k’oyɛso ladjɛ nangha, ko lamo?

² Koko, iso ladjɛ nangha la wolo djɛ nkindjɛ nkambela Yehova la nkɔmano. Lamo? Ladjikɛnde lá winá ɛmɔtshi tokoka nkiyana m’ɔtɛ w’evunga wɛ anto amɔtshi. Tokoka lonkina ndɛmba winá w’onanghaso evunga, pekapeka ntsha tɔkfɔ l’evunga wɛkɔ mbala la mbala. Iso ladjɛ nkindjɛ l’olemo wɔ Yehova 1) winá wɔ winaso ondjawodji otokiyanyɛnde, 2) winá w’ebula kɛso otokiyanyɛnde, edjinge 3) winá w’ɔlɛmbaso ntsha tombonangha evunga. Lá djamba djɛnɛ tongoshishima akambo ankfumɔ wasɔ. Tongoshishima lonkina elakanyelo w’okokaso mba me anto wa nkɔmano w’otepelawɔ lá Bible.

YALA LA NKƆMANO LE YEHOVA KAANGA WINÁ WƆ WINAKO ONDJAWODJI OKOKIYANYƐNDE

3. Ekakasano wɛkɔnge wepomaná la enkambi wɛ Yehova?

³ Okakasano. Winaso andjawodji amɔtshi walekɔ la nanghedji djetokiyanyɛ. Ankina nkoka ntɔpɛyɛ nsɔnyi, ntonanghela akambo ipa la nkanela kana la wopo wɔ nyɛtshi. Wananyɔ walɔndjɛ nkoka nangha evunga. Akambo wasɔ nkoka nkomɛ anto amɔtshi dj’iwɔ ndjila ehamo ambɔ topalekɔ lá olonghanyelo wɔ Ndjambe. L’edjena k’iwɔ nkindjɛ nkambela Ndjambe ‘mpɛka la mpɛka’ la wananyɔ l’ankaana, iwɔ nkoka ntshika nsanghana la waakiyanyisá ole kaanga ntshika ndjingela nsanghanyɛ. (Sef. 3:9) Ɔsɔ alekɔ nkambo djɛ balo? Tokolenda olakanyelo w’okokaso mba me onto w’otepelawɔ lá Bible w’opomanisá l’ekakasano wɛ nghɔsɔ.

4. Ekakasano wɛkɔnge w’epomanisá l’ɔpɔstɔlɔ Poolo?

⁴ Ndjɔmbɔmba kɛ Bible. Ɔpɔstɔlɔ Poolo ewaki ante wananyɔ l’ankaana yɛnde y’Akristo wayalaki anto wa ntshamba djɛ djɔ. Ndjɔmbɔmba, Akristo amɔtshi w’otshumano wɔ Jerusalɛmɛ watawolaki ambɔ nde ambokoma Okristo winá wɔ ndatateyɛ nsanghana lawɔ. (Ele. 9:26) M’ɔkɔngɔ, anto amɔtshi wɔtɛndaki djɛ ndotshitela lokumu. (2 Kɔ. 10:10) Poolo ɛnaka wɔnanyɔ ɔmɔtshi w’oyalaki l’edjito ɔsa nkano djekokisá ntakanyɛ anto ankina. (Nga. 2:11, 12) Edjinge Marko, winande ɔmɔtshi w’olemo, okiyanyɛka efula. (Ele. 15:37, 38) Poolo akokaka ndjawola nkambo mɔtshi l’anteyi kɛ akambo wasɔ ndotshinda djɛ ntona nsanghana la wookiyanyisá. Koko, nde alamaka ikanyi yɛ wɔlɔ lá nkambo djɛ wananyɔ l’ankaana yɛnde edjinge akindjɛka l’olemo wɔ Yehova. Kɛkɔnge kekotshisá Poolo djɛ nkindjɛ?

5. Kɛkɔnge kekotshisá Poolo dj’ipa mpekɔ wananyɔ l’ankaana yɛnde? (Kɔlɔsɛ 3:13, 14) (Lenda edjinge ntshango.)

⁵ Poolo akɔpaki wananyɔ l’ankaana yɛnde. Ngandji kɛ Poolo ndokaka anto ankina k’okotshɛka djɛ ndjila yimba ape ngo lá evunga wɛwɔ toko, koko ole lá wekeka wawɔ wa wɔlɔ. Ngandji kekotshɛ́ka Poolo djɛ nyimeyɛ anto ankina etengo ndatepela lá Kɔlɔsɛ 3:13, 14. (Wala.) Tokolenda wopo wɔ Poolo ndakambe la dako djɛnde djɛsɔ lá nkambo djɛnde la Marko. Kaanga Marko ndakadjɛ Poolo lá lɔkɛndɔ lɔnde lɔ ntondo lɔ missiɔnɛrɛ, Poolo atowombela onkomba. M’ɔkɔngɔ, winá wɔ Poolo ndoofunela ase Kɔlɔsɛ onkanda, nde awandjɛka Marko ante: ‘Winande w’olemo wɔ ntshina, ‘ikɔkɔ yɛ lokembo l’efula.’ (Kɔl. 4:10, 11) Winá wɔ ndayalaka lá lokando lá Ɔrɔma, Poolo alɔmbaka dj’iwɔ ndoyakala Marko djɛ nde ndookotshɛ́. (2 Ti. 4:11) Nyɛnamaka papoo ente, Poolo imeyɛka wananyɔ wande la atshikalaka imama lawɔ. Olakanyelo wɔkɔnge w’okokaso mba me Poolo?

6-7. Wopo wɔkɔnge w’okokaso nyɛnyɛ wananyɔ l’ankaana ngandji ayale kaanga otonaghelawɔ evunga? (1 Djɔanɛ 4:7)

⁶ Olakanyelo. Yehova nkɔpaka iso nyɛnyɛ wananyɔ l’ankaana yɛso ngandji. (Wala 1 Djɔanɛ 4:7.) Ntsha wɔnanyɔ la nkaana kɛso kɛmɔtshi apatonanghelisa akambo etengo Okristo, iso nkoka ndjala l’eshikikelo ente nde apalekɔ la mposɛ kɛ ntokiyanyɛ la ilá welo djɛ nangha kɛnɛ kɛ Yehova ɔtɔlɔmbande. (Woo. 12:18) Ndjambe nkɔpaka enkambi wɛnde wɛ nkɔmano kaanga onanghawɔ evunga. Nde apatokadjɛka winá w’onanghaso evunga edjinge apatowombelaka onkomba. (Yee. 103:9) Ɔsɔ ngo oyɛwɔ djonyi ndjokola Papa kɛso kimeyanaka!​—Ɛfɛ. 4:32–5:1.

⁷ Tovungɔ lonkina ente, winá wɔ ekomo k’andja wanɛ yotaleke nsukana, iso ladjɛ nama djokanelo djɛ wɔlɔ la wananyɔ l’ankaana yɛso. Tewa ente mbala imɔtshi l’etsho weyaye lɔnyɔkɔ longetela. Tokoka kaanga ndjingela nkando m’ɔtɛ wɔ djawo djɛso. Ntsha akambo wa nghɔsɔ wambotokomela, tongoyala la djonyi djɛ wananyɔ l’ankaana ndeka ntondo. (Woo. 17:17) Tokolenda kɛnɛ kekomelisá Josep,a ikokolo imɔtshi y’Espagne. Nde nya wananyɔ ankina wingelaka lokando m’ɔtɛ wɔ yatone ndɔsa opiko lá wayi w’andja. Nde atepela ante: “Lá lokando, mbamba yɛ nkiyanyɛ winako yayalaki efula ladjikɛnde sayalaka ngo edjena kɛmɔ. Tayalaki ladjɛ ndawila l’edjena k’anto ankina la nyimeyana l’oloko ɔmɔ. Kɛsɔ ketokotshɛ́ka djɛ nama osanga wɔso la nkotshana l’anteyi kɛso. Todjingamaka m’anto wapakambela Yehova. Lá mbamba kɛmɔtshi mpotalaka la lɔwɔ la ntakokaki kaanga nangha ekete mɔmɛlɛ. Koko wɔnanyɔ ɔmɔtshi ansolelaki ntshendja la anseyɛki ehomba wɛmi enkina. Nyɛnaka ngandji kɛ nsɔsɔlɔ winá wɔ mayalaka la djonyi.” Ɔsɔ ngo donga dj’okotshɛso djɛ nkandola ekakasano l’anteyi kɛso má winá wɔsɔ!

KINDJƐ KAANGA WINÁ WƆ EBULA KƐKO OKOKIYANYƐNDE

8. Ekakasano wɛkɔnge wepomana la ampɛtshɛki?

⁸ Okakasano. Awala ankfumɔ walekɔ ngo l’ekakasano. Bible ntepelaka papoo ante ampɛtshɛki wangoyala la ‘ekakasano lá alemba wawɔ.’ (1 Kɔ. 7:28) Ladjikɛnge? Ladjikɛnde bala nsanghanyɛka anto ape wa ntshamba djɛ djɔ, onto l’onto la nanghedji djetshikitanyi, djɛ wɔlɔ la djɛ nyɛtshi. Ampɛtshɛki nkoka ndjɛ má djena la nkfumbo ntshikitanyi. L’ilá k’etsho, wakoka ndoposɛ djalelo djɛ yisaka lá ntondo k’iwɔ ntshukana. Akambo ankfumɔ wasɔ nkoka mposɛ ekakasano. L’edjena kɛ onto l’onto ndjawola evunga wɛnde edjinge nangha la wolo djɛ nkandola ekakasano weposa má evunga wɛkɔ, wakoka mpɛlana l’anteyi kɛwɔ. Wakoka kaanga ndɛna ambɔ nkando kɛ wɔlɔ nde nkapwana kana ndjaka bala. Nkambo djɛsɔ ngoyakala ampɛtshɛki osasa?b Nyontshɔ tokolenda olakanyelo w’okokaso mba me omoto ɔmɔtshi w’otepelawɔ lá Bible w’okindjisá ndjala lá bala djeyalaki l’ekakasano wɛ nkekete efula.

9. Okakasano wɔkɔnge w’opomanisá la Abigayɛlɛ?

⁹ Ndjɔmbɔmba kɛ Bible. Abigayɛlɛ apɛtshɛka nya Nabalɛ, kanga Bible etande ante onto w’akambo wolo la wɔ nanghedji djɛ pɔlɔ. (1 Sa. 25:3) Ayalaki okakasano w’ekekete le Abigayɛlɛ djɛ ndjitansɛ l’onto wɔ nghɔsɔ. Abigayɛlɛ akokaka mba yopo imɔtshi yɛ wɔdju yɛ ndjaka bala djɛnde djɛsɔ? Nde awaka mbamba winá wɔ Davidɛ, kanga loyisá ndoyala nkfumi kɛ Isariyɛlɛ, ndakɔpɛ ntoyaka womɛnde lá wopo wɔ ndotole nde l’ampame yɛnde. (1 Sa. 25:9-13) Abigayɛlɛ akokaka ndota ko ntshika Davidɛ nkotshɛ ikanyi yɛnde. Koko, nde atshɔka ntosawola la Davidɛ ko owawoyɛka djɛ ntshika Nabalɛ la lowiko. (1 Sa. 25:23-27) Kɛkɔnge k’otshindisá djɛ nangha nghɔsɔ?

10. Kɛkɔnge kekotshisá Abigayɛlɛ djɛ nkindjɛ lá bala djɛnde kaanga ndapomanaka l’ekakasano?

¹⁰ Abigayɛlɛ akɔpaki Yehova la alɛmɛyɛki ɛlɛmbɛ wɛnde welendana la bala. Ape l’ehamo nde ewaki kɛnɛ kɛ Ndjambe ndashimela Adama l’Eva winá wɔ ndakfumbe bala djɛ ntondo. (Ewa. 2:24) Abigayɛlɛ ewaki ante Yehova ndɔsaka bala etengo nonghanyi k’ekina. Nde akɔpaki nsasangɛ Ndjambe, ko kɛsɔ k’otshindaka djɛ nangha kenkfumɔ kɛ ndakoke nangha djɛ mbikɛ nkfumbo kɛnde, ndjila ole womɛnde. Nde ananghaka lankeke djɛ nshimba Davidɛ dj’ipa nde ndjaka Nabalɛ. Nde ayalaka ole entshupa djɛ ndɔmba imeyelo lá ovunga wɔ ndotanangha. Ndjokamaka papoo ente, Yehova akɔpaki omoto w’oloko wolo la wotayalaki la lokaki wɔsɔ. Olakanyelo wɔkɔnge wadji la wome okokawɔ mba má ndjɔmbɔmba kɛ Abigayɛlɛ?

11. a) Kɛkɔnge kɛ Yehova ɔlɔmbande ampɛtshɛki dj’iwɔ nangha? (Ɛfɛsɛ 5:33) b) Olakanyelo wɔkɔnge ngombowa má wopo wɔ Carmen ndananghe la wolo djɛ nama bala djɛnde? (Lenda edjinge ntshango.)

¹¹ Olakanyelo. Yehova nkɔpaka djɛ ampɛtshɛki nɛmɛyɛ nonghanyi kɛ bala kaanga ntsha bula djɛwɔ walekɔ nkɔmɔ nyɛtshi. Ɔsɔ ngo Ndjambe oyɛnde ladjɛ ndjala l’osasa winá w’ɛnande antshukami wanangha la wolo djɛ nkandola ekakasano la nyɛnyɛ dilɛmɛlɔ ole ngandji kepalekɔ́ la lokaki. (Wala Ɛfɛsɛ 5:33.) Tokolenda ndjɔmbɔmba kɛ Carmen. Ɛnɔnyi etengo esamalo m’ɔkɔngɔ wɔ nde mpɛtshɛ bala, Carmen awangaka ndjeka Bible la Ewakɛ wɛ Yehova ko manyi alongolaka batisimo. Carmen atepela ante: “Womɛmi atakɔpa nkano djɛmi. Nde atateyɛka ndjoka Yehova djewɔ. Nde antolaki la anyanaka djɛ ntona lemi.” Kaanga yayale nghɔsɔ, Carmen akindjɛka lá bala djɛnde. L’ilá k’ɛnɔnyi 50, ananghaki la wolo djɛ ngandji la dilɛmɛlɔ ndjala la bala djɛnde. Nde atepela ante: “L’ilá k’ɛnɔnyi, ndjekaka djɛ ndeka ndjala la ntɔnɔ ole ndjewa nsawola la womɛmi lá wopo wɔ wɔlɔ. Etengo mewaka ente bala dekɔ ekina lá wiso wa Yehova, lananghaki kenkfumɔ keyalaki lá wolo wɔmi djɛ nama bala djɛmi. Ntasɛsa kaanga ndambo daambi djɛ ntona womɛmi ladjikɛnde nkɔpa Yehova.”c Ntsha ekakasano wemboposa lá bala djɛko, yala l’eshikikelo ente Yehova angokosuka la angokokotshɛ djɛ wɛ nkindjɛ.

KINDJƐ KAANGA NTSHA OMBONANGHA EVUNGA WƐ NKEKETE

12. Okakasano wɔkɔnge w’okoka mpomana laso ntsha tombonangha mpekanto k’ekekete?

¹² Okakasano. Tokoka ndɛmba efula ntsha tombonangha mpekanto k’ekekete. Bible ndjawolaka ante mpekanto yɛso nkoka ntokomɛ djɛ ndawoka etengo onto wɔ ‘yombatshatshɛ la wɔ yɔmbɔsɛpɛtanyɛ.’ (Yee. 51:17) Wɔnanyɔ wetawɔ Robert anangaka la wolo djɛ nkoma onkambi wokotshɛ́. Koko, ayɛka ndonangha mpekanto k’ekekete ko ɛnaka ante ambotona Yehova. Nde atepela ante: “Winá wɔ masipisoyɛ kɛnɛ kɛ mananghe, nkfum’oloko kɛmi kemfutanyɛka efula. Ndjokaka djodjo efula l’oloko. Ndelaka la ndɔmbaka Yehova. Mvungɔ ente lakanelaki ente Ndjambe apangoka alɔmbɛlɔ wami lonkina, ladjikɛnde ndokiyanyɛka.” Ntsha tombonangha mpekanto kɛmɔtshi, tokoka ndjoka etengo tɔmbɔlɛmba efula ladjikɛnde oloko wɔso wombatshɛ́, wawola ente Yehova ambototona. (Yee. 38:4) Ntsha olawoka nghɔsɔ, koolenda wopo wɔ onto ɔmɔtshi wɔ nkɔmano wótepelawɔ lá Bible ndakindjɛ nkambela Yehova kaanga ndananghe mpekanto k’ekekete.

13. Mpekanto k’ekekete kɛkɔnge ɔpɔstɔlɔ Pɛtɛlɔ ndananghe, ko nkambo djɛsɔ yokomɛ djɛ nangha nge?

¹³ Ndjɔmbɔmba kɛ Bible. Otsho wɔ lá ntondo kɛ nyɔyi kɛ Yeso, ɔpɔstɔlɔ Pɛtɛlɔ ananghaka evunga wɛ nkekete efula wookomisá djɛ nde nkiyana efula. Ntondontondo, Pɛtɛlɔ alawilelaka oloko lá lɛdji l’indeko, má mfuna ante angotshikala la nkɔmano kaanga ntsha apɔstɔlɔ ankina wambokadjɛ Yeso. (Mar. 14:27-29) Masɔ, winá wɔ yayalaka lá bedji djɛ Ngetesɛmanɛ, Pɛtɛlɔ avɔka ilɔ efula l’edjena kɛ nde nkindjɛ mbadjɛ etengo Yeso ndaashimela. (Mar. 14:32, 37-41) Masɔ, Pɛtɛlɔ akadjɛka Yeso winá w’oloyi w’ekekete yaye ndovunda. (Mar. 14:50) Ekomo ekomo, Pɛtɛlɔ anghanaka Yeso mbala isato inkfumɔ ante apowewe, atshibaka edjinge ntshiba lá ongolo wɔsɔ. (Mar. 14:66-71) Wopo wɔkɔnge Pɛtɛlɔ ndelola winá wɔ ndosipisoyɛ ekekete kɛ mpekanto kɛ ndananghe? Nde alelaka la alɛmbaka lá lɛdji lɔ nyɛtshi efula ole asolomotɔka lá wopo wɔ nkfum’oloko kɛnde yɔwɛmbɛ lowo. (Mar. 14:72) Kookanela yɛnyi y’efula yɛ Pɛtɛlɔ ndoke winá wɔ ilongo yɛnde Yeso ndayakema winá emangha m’ɔkɔngɔ wɔ lasɔ. Lá nsɔsɔlɔ, Pɛtɛlɔ ayalaka ladjɛ ndáwoka ante apalekɔ la ntshina!

14. Kɛkɔnge kekotshisá Pɛtɛlɔ djɛ nkindjɛ nkambela Yehova? (Lenda edjinge ntshango djelá loposo.)

¹⁴ Pɛtɛlɔ ayalaka ladjɛ nkindjɛ nkambela 66Yehova m’ɔtɛ wɔ donga efula. Nde atalawangoyɛ l’anto ankina, atshɔka te wananyɔ wande wa nyuma ole ape l’ehamo, iwɔ wokembɛka. (Luka 24:33) Ladjiko djɛ lasɔ, Yeso kanga lokfundisá, ɛnamaka le Pɛtɛlɔ mbala imɔtshi djɛ ndokembɛ. (Luka 24:34; 1 Kɔ. 15:5) M’ɔkɔngɔ wɔ lasɔ, l’edjena kɛ mpɛla Pɛtɛlɔ m’ɔtɛ wɔ evunga wɛnde, Yeso ashimelaka ilongo yɛnde ante angowa edjito wɛ nkekete. (Dj. 21:15-17) Pɛtɛlɔ ewaki ante ambonangha mpekanto k’ekekete koko atapekɔ. Lamo? Ladjikɛnde nde ayalaki la eshikikelo ante Owandji wɔnde Yeso, atopekɔ. Ole wananyɔ wande wa nyuma wakindjɛka ndoosuka. Olakanyelo wɔkɔnge w’owaso má ndjɔmbɔmba kɛ Pɛtɛlɔ?

15. Nkambo djɛkɔnge Yehova ɔkɔpande iso ndáshikikɛ? (Yeembo 86:5; Ɔrɔma 8:38, 39) (Lenda edjinge ntshango.)

¹⁵ Olakanyelo. Yehova nkɔpaka iso ndjala l’eshikikelo ente nde ntɔkɔpaka la alekɔ entshupa djɛ ntimeyɛ. (Wala Yeembo 86:5; Ɔrɔma 8:38, 39.) Winá w’onanghaso mpekanto, nkfum’oloko kɛso ntɔpɛlaka efula. Lako nyɛtshi ndawoka nghɔsɔ. Koko, totakanelake kaanga ndambo daambi ente Yehova apɔtɔkɔpaki lonkina kana apatimeyɛki. L’edjena kɛ nkanela nghɔsɔ, iso ladjɛ mpona okotshɔ mbala kɛkɔ kɛmɔ. Robert, kanga sotepelaki má djiko, atepela ante: “Nkfɔka lá mpekanto ladjikɛnde ndawɛkɛka lá wolo la lá akoka wami wa mpikama lá ntondo k’ohemba.” Ayɛka ndɛna ante ngo nde nshimela tokokolo. Nde atepela ante: “Winá wɔ mananghe nkambo djɛsɔ, mbala kɛkɔ kɛmɔ nyɛnaka lɔwɔ lɔ Yehova lɔ ngandji má mbamba kɛwɔ. Tokokolo watampekɔ. Iwɔ wankotshɛ́ka djɛ lemi ndjawola ente Yehova antakadjɛ.” Ole iso tokoka ndjala la eshikikelo ente Yehova ntɔkɔpaka lombombe la ntimeyɛka ntsha tomboyapɛla má evunga wɛso, tombohona okotshɔ w’oyɛso la djonyi la tombonangha la wolo dj’ipa nkalɔ l’evunga wɛkɔ lonkina. (1 Dj. 1:8, 9) Eshikikelo kɛ nghɔsɔ ntokotshɛ́ka dj’ipa ndɛmba kana mpekɔ winá w’otakanaso kana w’ɔkfɔso l’ohemba.

16. Ladjikɛnge nghomboyashikikɛ djɛ nkindjɛ nkambela Yehova?

¹⁶ Yehova ndɔsaka la ntshina efula welo w’ilaso djɛ ndokambela l’etsho w’ekomo wɛ wolo wɛnɛ. M’okotshɔ wɔ Yehova, iso nkoka nkindjɛ kaanga opomanaso l’akambo wakoka ntɔlɛmbɛ. Iso nkoka nkindjɛ nkɔpa wananyɔ l’ankaana yɛso ole ndawimeyɛ kaanga ntsha wambotokiyanyɛ. Iso nkoka nyɛnyɛ ngandji k’efula k’okaso Ndjambe ole nɛmɛyɛ nonghanyi kɛnde kɛ bala, má nangha kenkfumɔ k’okokaso nangha djɛ nkandola ekakasano weposá lá bala djɛso. Edjinge ntsha tombonangha mpekanto, tokoka mpona okotshɔ wɔ Yehova, ndjawola ente nde ntɔkɔpaka la ntimeyɛka la nkindjɛ ndokambela. Tolekɔ l’eshikikelo ente tongowa esako wɛnde ntsha ‘topatshikisa nangha kɛnɛ kelekɔ́ wɔlɔ.’​—Nga. 6:9.