DJAMBA DJƐ WEKELO 20
YEEMBO 7 Yehova ndeke wolo wɔso
Lenda Yehova djɛ mba lokembo
‘Womu woyale . . . le Papa kɛ nkɛtshi ole Ndjambe kɛ lokembo lonkfumɔ.’—2 KƆ. 1:3.
IKANYI YƐ DJAMBA
Elakanyelo w’owaso má wopo wɔ Yehova ndakembɛ ase Juda wayavunde tá Babilɔnɛ.
1. Kotepela nkambo djekomelisá ase Juda wa yavunde tá Babilɔnɛ.
TOKOKANELA wopo w’ase Juda wa yavunde tá Babilɔnɛ iyayale ladjɛ ndjoka. Iwɔ wɛnaka wopo w’owila wɔwɔ yatshitana. M’ɔtɛ wɔ mpekanto yɛwɔ la yɛ andoyi yɛwɔ, waavundaka má amvulu yɛwɔ djɛ ndatɔla tá ongidji w’angangɛnda. (2 Ɛk. 36:15, 16, 20, 21) Mpeyi nde, lá Babilɔnɛ, wayalaka la ndambo kɛ lotshungɔ lɔ nkamba elemo wɛwɔ wɛ lofu la lofu. (Jɛr. 29:4-7) Koko, lowiko lotayalaki wɔdju, la atayala lowiko lɔ yakombolaka. Iyokaka ngete mo djɛ nkambo djɛsɔ? Onto ɔmɔtshi m’anteyi kɛwɔ atepelaka ante: ‘Iso tintasɛka lá emamo wɛ ndjale yɛ Babilɔnɛ. Iso talelaki winá w’isawopɔka Siɔna.’ (Yee. 137:1) Waayalaki lá Babilɔnɛ wayalaka la djonyi djɛ lokembo, ko iyakoke mba mampe?
2-3. a) Kɛkɔnge kɛ Yehova ndananghela ase Juda wayalaki lá Babilɔnɛ? b) Ɛnaso lá djamba djɛnɛ lɔ nge?
2 Yehova alekɔ ‘Ndjambe kɛ lokembo lonkfumɔ.’ (2 Kɔ. 1:3) Ete ngo oyɛnde Ndjambe kɛ ngandji, nde nsasangaka nkembɛ anto ankfumɔ wasɛmɛla te nde. Yehova ewaki ante anto amɔtshi wayalaki lá Babilɔnɛ wangawola iluku yɛnde ko wangokalɔ le nde. (Iza. 59:20) Ndekana ɛnɔnyi 100 lá ntondo k’iwɔ mvundama, Yehova atshindaka ɔprɔfɛtɛ Izaya djɛ mfuna onkanda wetama lá djiina djɛnde. Lá okoma wɔkɔnge? Izaya atepela ante: ‘“Nyokembɛ, nyokembɛ enkambi wɛmi,” ndeke lotepela Ndjambe kɛnyo.’ (Iza. 40:1) Ɛwo, má mbamba k’afunelo w’ɔprɔfɛtɛ Izaya, Yehova apɛyɛka ase Juda wayalaki lá Babilɔnɛ lokembo lɔ yayalaka la djonyi.
3 Ete ngo ase Juda wasɔ, ole iso tolekɔ la djonyi djɛ lokembo winá la winá. Lá djamba djɛnɛ, tɔnghɛna topo tosato tɔ Yehova ndakembɛ waayalaki lá Babilɔnɛ 1) Nde alakaka djɛ nyimeyɛ anto walapɛlisá, 2) apɛyɛka enkambi wɛnde nkongi, la 3) ahɔdjɛka wɔma wɔwɔ. Winá wɔ sotatepela akambo wasɔ, lenda wopo w’okokɛ mba wapɔ má etepela wekembɛ wɛ Yehova.
YEHOVA NTIMEYƐKA LA NKƐTSHI KENKFUMƆ
4. Wopo wɔkɔnge Yehova ndɛnyɛ ante alekɔ Ndjambe kɛ nkɛtshi? (Izaya 55:7)
4 Yehova alekɔ ‘Papa kɛ nkɛtshi.’ (2 Kɔ. 1:3) Nde ɛnyɛka djekeka djɛsɔ winá wɔ ndalake djɛ nyimeyɛ ase Juda welá Babilɔnɛ walapɛlisá. (Wala Izaya 55:7.) Atepela ante: ‘La ngandji kɛ nkɔmano kɛ lotshinda lemi langokoka nkɛtshi.’ (Iza. 54:8) Wopo wɔkɔnge Yehova ndɛnyɛ nkɛtshi kɛnde? Kaanga ase Juda yayale ladjɛ nyɛna nkɛtshi la djɛmɔ m’ɔtɛ wɔ nanghedji djɛwɔ, Yehova alakaka ante wapangotshikala lotshinda lá Babilɔnɛ. Wapangɔkɔkɔmɛla l’eteyi lotshinda lotshinda. (Iza. 40:2) Ɔsɔ ngo etepela wɛsɔ yakembɛ la yashikikɛ waalapɛlaki!
5. Ladjikɛnge oyɛso la donga dj’efula djɛ ndjala la djedjɛ lá nkɛtshi kɛ Yehova ndeka ole ase Juda?
5 Owaso olakanyelo wɔkɔnge? Yehova alekɔ entshupa djɛ nyimeyɛ enkambi wɛnde lá lɛdji l’efula. Lɔɔko kɛnɛ tolekɔ la donga efula djɛ ndjala la djedjɛ lá nkambo djɛsɔ ete ngo ase Juda. Ngete mo? Iso tosipisoyɛ donga djetshinda Yehova djɛ ntimeyɛ. Ɛnɔnyi nkama m’ɔkɔngɔ wɔ ndjewoyɛ, Yehova atomaka wɔnande wɔ ngandji djɛ ndɔpɛyɛ lowiko lɔnde lá nkambo djɛ ananghi yɛ mpekanto walapɛla. Mande Yeso atovelaka, Yehova nkoka ‘ndjimola’ mpekanto yɛso inkfumɔ lotshinda lotshinda. (Ele. 3:19; Iza. 1:18; Ɛfɛ. 1:7) Ɔsɔ ngo okambelaso Ndjambe k’okana djandji!
6. Wopo wɔkɔnge w’okokaso mpika wiso lá nkɛtshi kɛ Yehova? (Lenda ntshango.)
6 Etepela wɛ Yehova welekɔ́ lá Izaya 55:7, wekoka ntɔpɛyɛ lokembo ntsha totshimba yimba má wopo wolawɛmbɛso lowo l’indeko. Anto amɔtshi wakoka nkindjɛ ndáwɛmbɛ lowo l’indeko m’ɔtɛ wɔ ovunga ɔmɔtshi womboheta kaanga m’ɔkɔngɔ w’iwɔ ndápɛla. Tokoka ndjoka nghɔsɔ pekapeka ntsha tɛna ndjolo l’eposelo wɛ nyɛtshi w’evunga wɛso. Koko, ntsha tombosuyɛ mpekanto la tombotshikitanyɛ nanghedji djɛso, toyale l’eshikikelo ente Yehova ambotimeyɛ. Edjinge winá wɔ Yehova otimeyɛnde, apongovungɔ lonkina mpekanto kɛso. (Ɛdjɛ la Jɛrɛmi 31:34.) Djɛko ndeke, ntsha Yehova apavungɔ mpekanto yɛso, iso koko totavungɔke. Kɛnɛ kelekɔ́ la djonyi le Yehova nde kɛnɛ k’onanghaso winá wɔsɔ, koko ape evunga wɛ sananghe l’etsho wemboheta. (Ezk. 33:14-16) Lako ilá, Papa kɛso kɛ nkɛtshi ototshungola etshinda etshinda má eposelo wɛ nyɛtshi w’evunga wɛso.
Kɛnɛ kelekɔ́ la djonyi le Yehova nde kɛnɛ k’onanghaso winá wɔsɔ, koko ape evunga wɛ sananghe l’etsho wemboheta (Lenda itenyi 6)
7. Kɛkɔnge kekoka ntokotshɛ́ djɛ mpona okotshɔ ntsha tisa mpekanto?
7 Onanghaso mo ntsha totshimba yimba má wopo wɔ nkfum’oloko otofutanyɛwɔ mande tisá mpekanto? Bible ntokembɛ djɛ mpona okotshɔ wɔ tokokolo. (Dja. 5:14, 15) Koko apayalaka wɔdju ndjawola ovunga wɔ sananghe. Koko tongotshindama djɛ nshimela ampame yɛ nkɔmano yɛsɔ ntsha tombolapɛla la ntsha tombovungɔ ente Yehova la ampame yɛ ndasɔnɛ djɛ ntokotshɛ́ wangotoka djandji. Tokolenda wopo wɔ nkɛtshi kɛ Yehova yakembɛ wɔnanyɔ Arthur,a kanga nkfum’oloko kɛnde yɔwɛmbɛka lowo. Arthur atepela ante: “Ndendaka asango wɛnyɛwɔ anto enghanghunya l’ilá k’ɔnɔnyi w’otondo. Koko m’ɔkɔngɔ wɔ ndjekameyɛ ntshawo mɔtshi djetepelaki djɛ nkfum’oloko, nsuyɛka mpekanto kɛmi le wadjɛmi la le tokokolo. Ko manyi bale nkitaka, koko lakindjɛki ndjoka nsɔnyi efula lá kɛnɛ kɛ mananghe. Tokokolo wamvungolaka ambɔ Yehova atankadjɛ. Nde ntokakolaka mande angɔtɔkɔpake. Etepela wɛwɔ wɛ wɔlɔ wɛsɔ wɛnkɔtaka l’oloko la wenkotshɛ́ka djɛ nkalɔ ndjala l’ekanedji kɛ wɔlɔ.” Lɔɔko kɛnɛ, Arthur akamba ete ngo yat’ekalo la onkambi w’okotshɛ́. Alekɔ nkambo djɛ lokembo efula ndjewa ente Yehova ndjokaka anto walapɛlá djandji!
YEHOVA ATƆPƐYƐ NKONGI
8. a) Nkongi djɛkɔnge Yehova ndapɛyɛ waayalaki lá Babilɔnɛ? b) Lá nkilika Izaya 40:29-31, eposelo wɛkɔnge wekokisá ndjala la nkongi le ase Juda walapɛlisá?
8 Lá ikanyi y’anto, ase Juda wayalaki lá Babilɔnɛ watayalaki la nkongi. Onkfumi wɔ Babilɔnɛ wapemelaki andja, wotatshungolaki anto wa yavundaka. (Iza. 14:17) Koko, Yehova apɛyɛka enkambi wɛnde nkongi. Nde alakaka djɛ ntshungola enkambi wɛnde, lako kaanga ekete kekokisá ndoshimba. (Iza. 44:26; 55:12) Lá wiso wa Yehova, Babilɔnɛ djalaki wɔdju ete ngo otoko. (Iza. 40:15) Ntshita Babilɔnɛ le nde, ayalaki wɔdju ete ngo ntshanganyɛ etoko la lohoye. Lɔɔla lɔkɔnge loyalisá le ase Juda? Nkongi djɛsɔ djakembɛka. Nkokaka ndananghela ole akambo ankina. Izaya afunaka ante: ‘Anto wakongá me Yehova wangokalɔ mba nkfulu.’ (Wala Izaya 40:29-31.) Ee, nkongi djapɛyɛka wolo, iwɔ ‘wangofumbɔ la apafu ete ngo mpongo.’
9. Kɛkɔnge kekokisá mpɛyɛ ase Juda elonga kɛ ndjilela Yehova oloko?
9 Yehova apɛyɛka lonkina waayalaki lá Babilɔnɛ elonga kɛ ndjilela alaka wande oloko. Lá ngete mo? Iwɔ watɔnɔlaki lá aprɔfɛsi imboshiyɛka nkotshama. Iwɔ wewaki ambɔ ase Asuriya watshitaka onkfumi wɔ Isariyɛlɛ wɔ nɔrɔ, la watɔlaka anto tá Babilɔnɛ. (Iza. 8:4) Iwɔ wɛnaka wopo wɔ ase Babilɔnɛ yatshite Jerusalɛmɛ la yavunde tá Babilɔnɛ. (Iza. 39:5-7) Iwɔ wɛnaka wopo wɔ yawole Nkfumi Zedekiya wiso la yɔtɔlɛ tá Babilɔnɛ. (Jɛr. 39:7; Ezk. 12:12, 13) Kenkfumɔ kɛ Yehova ndatepela kekotshamaka. (Iza. 42; 46:10) Ɔsɔ ngo akambo ankfumɔ wasɔ yayale ladjɛ nkembɛ djawo djɛwɔ ente daka djɛ Yehova djelendana la lotshungɔ lɔwɔ ngokotshama!
10. Kɛkɔnge kekoka ntokotshɛ́ djɛ ndjala la nkongi l’etsho w’ekomo wɛnɛ?
10 Owaso olakanyelo wɔkɔnge? Winá w’ɔlɛmbaso, nkongi nkoka ntokotshɛ́ djɛ nkalɔ mba wolo. Towika l’eleko kɛ wolo efula, ole tonana l’antonyi wa nkfulu. Koko topakoke ntshutshɛ nkongi. Yehova ambɔtɔpɛyɛ nkongi djɛ wɔlɔ efula—lowiko l’etshinda lá idjena yɛ vu la yɛ lotoyi pɔlɔ lɔ nsɔsɔlɔ. Iso ladjɛ nama nkongi djɛsɔ lá yimba la lá eloko wɛso. Ntsha lako, nkongi djɛso nkoka ndjala ngo ngete olendaso nde dongolongo djɛ mbandja djɛ wɔlɔ efula má vitrɛ djɛ lowonge lowonge. Wopo wɔkɔnge w’okokaso “nsola vitrɛ,” kana nama nkongi djɛso lá yimba? Tokoka ndɔsa winá mbala la mbala djɛ nkanela wopo wɔ lowiko lɔso iyongoyala wɔlɔ l’andja wa bango. Tokoka mbala wamba, ndenda avideo, la ndjekameyɛ teembo totepela djɛ nkongi djɛso. Ole tokoka nshimela Yehova lá lɔlɔmbɔ alaka wokongaso nyɛna ekotshamelo la oloko pakipaki.
11. Kɛkɔnge kekotshisá nkaana keyalaki l’olando wopashile djɛ nkalɔ mba wolo?
11 Tokolenda wopo wɔ nkongi yakembɛ Joy, nkaana kɛmɔtshi keyalaki l’olando w’opashile. Atepela ante: “Winá w’otshimbami yimba, langoshimelake Yehova tokanyi tɔmi timá ngonga k’oloko, mande ndjewa ente andjoka. Yehova angonkadjimolake má mpɛyɛ ‘wolo woleka wolo woyalaka l’anto.’” (2 Kɔ. 4:7) Joy angoyawɛnake lonkina lá andja wa bango wa ‘lako onto wongotepela ante “Lemi ndekɔ la olando.”’ (Iza. 33:24) Ole iso, ntsha tombodjipola Yehova eloko wɛso la tombopika wiso lá nkongi djɛso, tongowa wolo lonkina.
12. Donga djɛkɔnge dj’okotshɛso djɛ ndjilela Yehova oloko? (Lenda ntshango.)
12 Ete ngo ndananghe la waayalaki lá Babilɔnɛ, Yehova ambɔtɔpɛyɛ lonkina donga djɛ ndjawola alaka wande. Tɔtɔnɔlɛ lá aprɔfɛsi ikotshama lá wiso waso. Ndjɔmbɔmba, tɛna onkfumi wapamela andja w’otondo wolekɔ́ ‘ndambo wolo ndambo wɔdju.’ (Dan. 2:42, 43) Toka lonkina nsango yɛ ‘atshikito wa looko lá djena la djena’ la topoposanyɛ lá ‘ewila enkfumɔ.’ (Mat. 24:7, 14) Prɔfɛsi yɛsɔ la inkina ikembɛ djawo djɛso lá alaka wapɛyɛ lokembo wa Yehova watakotshama.
Aprɔfɛsi yɛnaso ikotshama winá wɔsɔ itɔpɛyɛ donga djɛ ndjilela Yehova oloko (Lenda itenyi 12)
YEHOVA MPƆDJƐKA WƆMA WƆSO
13. a) Ekakasano wɛkɔnge wepomanisá l’ase Juda winá wɔ yakoke mposa? b) Ete ngo otepelawɔ lá Izaya 41:10-13, wopo wɔkɔnge Yehova ndakembɛ ase Juda wayalaki lá Babilɔnɛ?
13 Kaanga Yehova ndakembɛ ase Juda la nkongi djɛ wɔlɔ efula, nde ewaki ante wakoka ndjala l’ekakasano efula winá wɔ yongowa lotshungɔ. Nde ewoyɛka ante winá wɔ eleko kɛsɔ yongosukana t’ekomo, nkfumi kɛmɔtshi kɛ nkfulu efula angokfulumola angando idjingaki Babilɔnɛ, ko masɔ, angɔkfɛyɛ Babilɔnɛ. (Iza. 41:2-5) Ase Juda wayalaka ladjɛ ndjoka wɔma? Yehova akembɛka enkambi wɛnde ntondo má ntepela ante: ‘Tokake wɔma, ladjikɛnde lemi ndekɔ esanga la wɛ. Tokiyanake ladjikɛnde lemi ndekɔ Ndjambe kɛko.’ (Wala Izaya 41:10-13.) Kɛkɔnge kɛ ndakɔpɛ ntepela má ‘lemi ndekɔ Ndjambe kɛko’? Nde atakɔpa mvungola ase Juda djɛ ndɔtɛmɔla, mande iwɔ wɔtɛmɔlaki. Koko, ndakɔpɛ nde ndavungola ante nde alekɔ winá enkfumɔ lawɔ.—Yee. 118:6.
14. Wopo wɔkɔnge Yehova ndahɔdjɛ lonkina wɔma wɔ waayalaki lá Babilɔnɛ?
14 Yehova akitshɛkitshɛka lonkina wɔma w’ase Juda má ndavungola nkfulu la balo djɛnde dj’ipa l’ekomo. Alɔmbaka lonkina ase Juda djɛ ndenda tɔɔtɔ tɔ l’olongo. Ashimelaka ante atatonga ngo tɔɔtɔ toko koko ewa ole djiina djɛ yɔɔtɔ la yɔɔtɔ. (Iza. 40:25-28) Ntsha Yehova ewa djiina djɛ yɔɔtɔ inkfumɔ, mbɔ koko ewa djiina djɛ onkambi wɔnde onkfumɔ! La koko ntsha Yehova alekɔ la nkfulu kɛ ntonga tɔɔtɔ, mbɔ koko alekɔ la nkfulu kɛ nkotshɛ́ enkambi wɛnde. Ɛwo, ase Juda watayalaki l’elonga kɛ nkiyana la kɛ ndjoka wɔma.
15. Wopo wɔkɔnge Ndjambe ndalɔngɔsɔla ase Juda lá kɛnɛ kakongaki?
15 Yehova alɔngɔsɔlaka enkambi wɛnde lá kɛnɛ kakongaki lá ntondo. Lá etenyi kɛ ntondo kɛ onkanda wɔ Izaya, Ndjambe ashimelaka owila wɔnde ante: ‘Nyingele lá mvulu y’eteyi la nyodjipe nkfuke yɛnyo. Nyisame l’ilá kɛ winá ɛmɔtshi tii nkɛlɛ yongoheta.’ (Iza. 26:20) Nkoka ndjala afunelo wasɔ wakotshamaka ntondo winá wɔ Kurɔ ndakfɛyɛ Babilɔnɛ. Ondjewi ɔmɔtshi wɔ wayi w’ɛkɔndɔ w’ose Grɛkɛ djɛ ntondo atepelaka ante nde “apɛyɛka [angala wande] ɔlɛmbɛ wɔ ndjaka onto onkfumɔ wɔ yɔngɛna lá bandja djɛ ngando.” Kokanela wopo w’anto wawikaki lá Babilɔnɛ iyoke wɔma! Koko ase Juda walamemaka mande walɛmɛyɛka alako wa Yehova.
16. Ladjikɛnge isopakoke nkiyana djɛ etsho weyaye? (Lenda ntshango.)
16 Owaso olakanyelo wɔkɔnge? Lako ilá, tɔkɔpa nkoma lá ndjolo k’ekekete ketayalaka ntondo l’ɔkɔndɔ wɔ wana w’anto. Ase andja wanɛ wapangewa kɛnɛ kɛ nangha la wangoka wɔma. Koko ape enkambi wɛ Yehova. Iso tewa ente Yehova alekɔ Ndjambe kɛso. Tongemala suu mande tewa ente ‘lotshungɔ [lɔso] lombokoma entshupa.’ (Luka 21:28) Kaanga winá wɔ osanga wɔ ewila yongotonanyɛ, tongopikama ndii. Yehova angɔtɔpɛyɛ elamelo kɛ andjelo la alako wapɛyɛ lowiko. Ndɔngɔtɔpɛyɛ alako wasɔ ngete mo? Tokonge tɔngɔlɛna. Koko ɛnama ete ngo isongowa alako wasɔ nde má mbamba kɛ ntshumano djɛso. Lá lɛdji lɔmɔtshi, ntshumano nkoka ndjala ‘amvulu [yɛso] y’eteyi,’ lá songowa lotoyi pɔlɔ. Wopo wɔkɔnge w’okokaso ndálɔngɔsɔla djɛ kɛnɛ ketokonga? Iso ladjɛ ndjala imama la wananyɔ l’ankaana, ndjala entshupa djɛ ndɔnda ɛlɔndjɛlɔ kɛ teokrasi, la ndjala l’eshikikelo ente Yehova alɔndjɛ olonghanyelo wɔso.—Heb. 10:24, 25; 13:17.
Má ntɔnɔla lá nkfulu l’akoka wa Yehova wa ntowikɛ, topangotshimba yimba la topangokiyana lá ndjolo k’ekekete (Lenda itenyi 16)b
17. Wopo wɔkɔnge w’okokɛ ndenda Yehova djɛ mba lokembo?
17 Kaanga ase Juda wayalaki lá Babilɔnɛ iyayalaka lá okakasano wɔ wolo, Yehova apɛyɛka lokembo lɔ yayalaka la djonyi. Angonangha wopo wɔkɔ ɔmɔ ole laso. Djɛko ndeke ayale ekete kenkfumɔ kekokomela lá lowiko, lenda Yehova djɛ mba lokembo. Ee, yala la djawo ente angimeyɛke enkambi wɛnde wɛ nkɔmano. Kindjɛ nkembɛ nkongi djɛko. Tovungɔ ente Yehova alekɔ Ndjambe kɛso, topalekɔ la nkambo djɛ ndjoka wɔma.
YEEMBO 3 Wolo wɔso, nkongi djɛso, wɛkamo wɔso
a Nkombo imɔtshi itshikitanyemaka.
b NSAKISO KƐ NTSHANGO: Iloyi y’andjawodji imbotshumana djɛ mbala Bible. Walekɔ l’eshikikelo lá nkfulu la lá akoka wa Yehova wá nama enkambi wɛnde, ayale idjena yɛkɔnge y’owikawɔ lá looko.