Mukanda awitukuasha bua kunyingiila na lulamato mpaa na ku nfudiilo

1-2. (a) Mpoolo pa baadi mufundile bena Ebelu mukanda, mianda ibaadi naminyi mu Yunda? (b) Buakinyi uno mukanda uyokielue ubafikile pa nsaa ilombane?

KUNYIMA kua lufu lua Yesu mu kipua kia 33, bena Nkidishitu ba mu Yelusalema na mu Yunda babapetele nkalakashi i bungi i bukopo. Mafuku apeela kunyima ku’abo kutuula kakongie ka bena Nkidishitu, kubatuelele kubinguabingua kui bukopo mu kano kakongie. (Bik. 8:1) Dingi, kunyima kua bipua 20, bena Nkidishitu babaadi bakiengie ngofu pa muanda wa nsala na bulanda. (Bik. 11:27-30) Biabia, peepi na kipua 61 bino bipungo bietu (B.B.), bena Nkidishitu babapetele butaale bu baabadi abapuandikisha na butaale abukafiki mu mafuku e kumpala. Mu kiakia kipungo, babapetele mukanda uyokielue aufiki kui Mpoolo mutumibua, mu wawa mukanda mubaadi elango dibaabadi nadio lukalo buabadia kuilumbuula bua mianda ibaadi peepi na kukitshika.

² Mukanda wa bena Ebelu ubafikile pa nsaa ilombane, muanda butaale bubapetele bena Nkidishitu bubaadi bua kapindi kapeela. Mpoolo baadi mupe bena Nkidishitu elango di buwa, buabadia kunyingiila mpombo ibaadi peepi na kuibafikila. Kubutudibua kua ndumbuluilo a mianda a bena Yunda, kubabakuile kui Yesu kubaadi peepi. (Luk. 21:20) Biabia, sunga Mpoolo sunga mbena Nkidishitu ba mu Yunda, ta babaadi abawuku nsaa ayikafiki kaaka kabutu nya. Biabia, bena Nkidishitu babaadi balombene kufubisha nsaa ipeela ibaadi ishaale buabadia kuilumbuula bua kudima ngikashi bu lukumiino na kunyingiila.​—Eb. 10:25; 12:1, 2.

3. Buakinyi mukanda wa bena Ebelu nguitutale n’atue lelo uno?

³ Tui peepi na kupeta mpombo ikata ikile ibapetele bena Nkidishitu ba mu Ebelu. (Mat. 24:21; Kbf. 16:14, 16) Biabia, tutaluuleyi angi malango abaabadi bape bena Nkidishitu kui Yehowa alombene kuitukuasha n’atue namu lelo uno.

“KUNYINGA MU KIKUDI”

4. Bena Nkidishitu ba mu Yunda babaadi bapete nkalakashi kinyi? (Tala dingi kifuatulo.)

⁴ Bena Nkidishitu babaadi bakudile mu Yunda, babaadi bapete nkalakashi i bukopo. Mu kingi kipungo, Yehowa baadi musangule bena Yunda bu muilo waye. Yelusalema ngi baadi epata dia Bufumu bu’Efile Mukulu pa nsenga, na tempelo ngi baadi mbalo ya lulanguilo lui selele. Bena Yunda booso ba sha lulamato babaadi abalondo Muiya wa Moyise ubaabadi abebapatuluila kui bakata ba bipuilo. Malongiesha aabo abaadi emeene nka ku bidibua, kusadibua, na kuibunga pamune na bantu ba ingi miilo. Biabia, kunyima kua lufu lua Yesu, Yehowa ta baadi dingi akumiina milambu ya bena Yunda nya. Ngi buakinyi, bibaadi lukalakashi kui bena Nkidishitu ba mu Yunda babaadi abalondo Muiya wa Moyise. (Eb. 10:1, 4, 10) Mpaa na bena Nkidishitu banyingie mu kikudi bu Mpiele mutumibua, babaadi abekitshisha ngofu bua kuiwubidishena na kuno kushintuluka kooso. (Bik. 10:9-14; Nga. 2:11-14) Pa muanda wa mianda ipia ibaabadi bakumiine, bena Nkidishitu booso babapetele kubinguabingua akufiki kui bakata ba bipuilo bia bena Yunda.

5. Bibaadi abitungu’shi bena Nkidishitu badimukile kinyi?

⁵ Bena Nkidishitu ba mu Ebelu, babaadi bapete nkalakashi ayitukila kui bisaka bibidi bia beshikuanyi. Kisaka kia kumpala, mbakata ba bipuilo bia bena Yunda babaadi abamono bena Nkidishitu bu basumbule lukumiino. Kisaka kia kabidi, mbena Nkidishitu ba madimi, babaadi abatakula balongi ba Nkidishitu bua’shi batungunukie na kulonda Muiya wa Moyise, bua’shi tala bapeta kubinguabingua. (Nga. 6:12) Nkinyi kibaadi kilombene kukuasha bena Nkidishitu bua kushaala na lulamato kui Yehowa?

6. Mpoolo baadi munyingishe bena kukumiina naye buabadia kukita kinyi? (Bena Ebelu 5:14–6:1)

⁶ Mu mukanda wa bena Ebelu, Mpoolo baadi munyingishe bena kukumiina naye buabadia kunyiisha kubadika Eyi di’Efile Mukulu na kunangushena. (Badika Bena Ebelu 5:14–6:1.) Mpoolo baadi afubisha bifundue bia kiina Ebelu bua kuibapatuluila’shi, mushindo wabalanguila Yehowa kui bena Nkidishitu ngukile bibaabadi abamulanguila kui bena Yunda.a Mpoolo baadi muwukie’shi kutamisha kiwukilo na mpushisho a bia binyibinyi, kubaadi kulombene kukuasha bena Nkidishitu buabadia kuikala b’elumbuule bua kutundula malongiesha a madimi na kuiapela.

7. Nkalakashi kinyi ya tukuete kufumankana nayo lelo uno?

⁷ Nka bu bena Nkidishitu ba mu Ebelu, lelo uno tukuete kufumankana na bantu abapalakasha mianda, na binangu bia madimi bilekeene na akiakula Yehowa’shi nkia binyibinyi na nkilulame. Beshikuanyi netu abetuamba’shi Tumonyi tua Yehowa tui bubi, muanda atukookielaa Miiya ya Yehowa pabitale kutambuka lusandi, na abamba’shi t’atufuilaa bantu lusa, tui bantomboshi. Mushindo aunangushena bantu, ukuete kunyiisha kuikutuena ngofu na abinangushenaa Yehowa. (Nki. 17:15) Biabia, abitungu tunyingishe ngobesha yetu ya kutundula na kupela binangu bia beshikuanyi netu bilombene kuitupambusha, na kuitutshobolosha sunga kuitukutshishua kufubila Yehowa.​—Eb. 13:9.

8. Nkinyi kilombene kuitukuasha bua kutungunuka na kunyinga mu kikudi?

⁸ Atukitshi kalolo p’atutumikila elango dia Mpoolo dibapeele bena Nkidishitu ba mu Ebelu, dia kuikala banyingie mu kikudi. Bino abipushisha’shi, abitungu tuilongiele Bible kalolo, bua kumona bia kuuka Yehowa na mushindo waye w’anangushenaa. Atutungunuka na kukita bino mpaa na kunyima kua kuilambula na kubatshishibua. Sunga tuekala bapue kukita bipua bungi kinyi mu ndumbuluilo a Yehowa, abitungu tutungunukie na kuibadikila na kuilongiela Eyi di’Efile Mukulu pa kiubishi. (Mis. 1:2) Kuikala na kiubishi ki buwa kia kuibadikila Bible, akuitukuasha bua kunyingisha eyikashi dibaadi Mpoolo mushimikie kasele mu mukanda waye kui bena Ebelu: Lukumiino.​—Eb. 11:1, 6.

‘TUIKALEYI NA LUKUMIINO BUA KUPAASHA MIUWA YETU’

9. Buakinyi bibaadi abitungu’shi bena Nkidishitu ba mu Ebelu bekale na lukumiino lunyingie?

⁹ Bena Nkidishitu ba mu Ebelu babaadi na lukalo na lukumiino lui bukopo, bua kupanda ku mpombo ibaadi peepi na kufika mu Yunda. (Eb. 10:37-39) Yesu badimuishe balongi baye’shi, su nubamono nka Yelusalema abamuifunyisha kui beshikuanyi, nusuukile ku miengie. Dino elango dibaadi ditale bena Nkidishitu booso, babaadi bashaale mu Yelusalema na babaadi mu bibundi bibefunyishe. (Luk. 21:20-24) Nsaa ibafikile basalayi bua kutuuka Yelusalema ngoshi, bantu babaadi peepi na Yelusalema babaadi batuele mu kibundi, muanda babaadi bakulupile’shi midimba ya kibundi ayibakaluila. Kusuukila ku miengie kubaadi akumueka bu binangu bishi buwa, ngi buakinyi bibaadi abitungu lukumiino lui bukopo bua kukookiela elango dia Yesu.

10. Lukumiino lui bukopo lubadia kutakula bena Nkidishitu bua kukita kinyi? (Bena Ebelu 13:17)

¹⁰ Bibaadi abitungu dingi’shi, bena Nkidishitu ba mu Ebelu bakulupile baaba booso babaabadi batuule kui Yesu bua kukunkusha kakongie. Booso babaadi abakunkusha, babaadi abatuusha buludiki na bishinkamiisho, bua kukuasha bena kakongie booso bua’shi balonde elango dia Yesu pa nsaa ilombane na mu mushindo wi buwa. (Badika Bena Ebelu 13:17.) Kishima kia mu kiina Greke kiabadi bafubishe mu Bena Ebelu 13:17 akiamba’shi: “Kookielayi,” akileesha muntu kampanda mushinkamishe’shi, akookiela muanda mmukulupile yawa muntu atuusha buludiki. Bino t’abipushisha’shi abitungu tukookiele bakulu bu kitungo nya, kadi abitungu tuibakookiele muanda tui bebakulupile. Nyi buakinyi bibaadi abitungu’shi bena Nkidishitu ba mu Ebelu banyiishe kukulupila baaba babaadi abebakunkusha kumpala kua’shi mpombo ifikie. Su bena Nkidishitu babalondele buludiki bua bakulu mu kipungo kia butaale, bibaadia kuibabofuila bua kuibakookiela mpaa na mu kipungo ki bukopo.

11. Buakinyi kuikala na lukumiino lunyingie nyi muanda wi na muulo kui bena Nkidishitu lelo uno?

¹¹ Nka bu bibaadi bena Nkidishitu ba mu Ebelu, n’atue namu tui na lukalo na lukumiino. Tui bashaale mu kipungo ki bantu be bungi abetubepuula na t’abakumiina kudimusha kua mu Bible kua’shi nfudiilo a uno ndumbuluilo e bubi a mianda kuete kufika. (2 Mp. 3:3, 4) Kukatusha biabia, Bible etuleesha ingi mianda pabitale akikakitshika apakabanga mpombo ikata, kadi kui ingi mianda i bungi yatush’atuwuku. Abitungu tuikale na lukumiino lunyingie’shi nfudiilo a uno ndumbuluilo a mianda akafiki pa nsaa ilombane na Yehowa aketupasukila.​—Aba. 2:3.

12. Nkinyi akiketukuasha bua kupanda ku mpombo ikata?

¹² Abitungu dingi tuikale na lukumiino lunyingie mui bantu babakuete kufubisha kui Yehowa lelo uno bua kuituludika, kuamba’shi: “Mpika a lulamato na mudimukie.” (Mat. 24:45) Apakabanga mpombo ikata, atukapete buludiki abukapaasha miuwa yetu, nka bu bibaadi bipete bena Nkidishitu ba mu Ebelu buludiki, nsaa ibaadi basalayi ba bena Loma befunyishe Yelusalema. Binobino nyi kipungo akitungu tunyingishe lukulupilo luetu, na kukulupila buludiki bu’abetupa kui bantu abakunkusha ndumbuluilo a Yehowa. Biabia, su ta tui bakulupile na kukookiela buludiki buabo kubanga binobino, abiketuikeela bukopo bua kukookiela buludiki mu kipungo kia mpombo ikata.

13. Buakinyi elango di’atupete mu Bena Ebelu 13:5, di na muulo?

¹³ Pa baadi bena Nkidishitu ba mu Ebelu abatengiela buludiki pabitale kusuuka, bibaadi abitungu’shi bekale na nshalelo mupeelepeele na kuleka kuikala na “kifulo kia makuta.” (Badika Bena Ebelu 13:5.) Be bungi ba kuabadi babaadi bakiengie na nsala na bulanda. (Eb. 10:32-34) Sunga bibaadi ingi misuusa abakumiina kukienga pa muanda wa’shi mbafule mukandu wi buwa, bangi bababangile pangi kumona’shi bupeta mbulombene kuibakaluila. Anka makuta ta abaadi apaashe miuwa yabo pabaabadi babutule Yelusalema nya. (Yak. 5:3) Biabia, baaba booso babaadi bafule bintu bia ku mbidi, bibaadi bibeelele bukopo bua kusuuka na kuleka bupeta buabo na mashibo aabo.

14. Lukumiino lunyingie lui kuikala na bukitshishi kinyi ku bitshibilo bietu kubanga binobino pabitale bintu bia ku mbidi?

¹⁴ Su tubekala na lukumiino’shi Yehowa abutula uno ndumbuluilo a mianda e bubi binobino, t’atumono makuta e bungi na bintu bia ku mbidi bu biina muulo ukata nya. Mu kipungo kia mpombo ikata, makuta t’aakekala na muulo su ngupeela. Bible amba’shi bantu, “abakasumbula oolo aabo mu bilayi” muanda abakatundula’shi “biamo biabo bi’ebakanyi [arja] na oolo aabo t’abikebapaasha efuku dia nsungu ya Yehowa.” (Es. 7:19, NWT) Pa mutue pa kuipaana mu kukimba makuta e bungi, abitungu tuate kitshibilo kilombene kuitukuasha, bua kuikala na nshalelo mupeelepeele kadi e na nkatshinkatshi. Nyi nkukutua kua binangu su tuabanga kuata mabaasa ashi na muulo, na kukisha nsaa i bungi mu kukimba bia kupua nkalo yetu ya ku mbidi. Abitungu dingi tuikale badimukie bua kupela kuikala na kifulo kia bintu bia ku mbidi biatudi bapue kuikala nabio. (Mat. 6:19, 24) Lukumiino luetu lui kuikala lutompibue pabitale bintu bia ku mbidi, na ingi mianda bu bia tukuete kutengiela’shi nfudiilo a uno ndumbuluilo a mianda e bubi afikie.

“NUI NA LUKALO LUA KUNYINGIILA”

15. Buakinyi bena Nkidishitu ba mu Ebelu babaadi na lukalo lui bukopo lua kunyingiila?

¹⁵ Bena Nkidishitu babaadi bashaale mu Yunda, babaadi na lukalo na kunyingiila bua kufubila Yehowa, ku muanda mpombo ibaadi peepi na kufika. (Eb. 10:36) Sunga bibaadi bangi bena Nkidishitu bapete kubinguabingua kui bukopo, be bungi babaadi bakumiine kufika bu bena Nkidishitu mu kipungo kia butaale bua kapindi kapeela. Mpoolo baadi mutentekieshe bena Nkishitu buabadia kuikala b’elumbuule bua bitompuanga abifiki, na kuikala na lulamato mpaa na ku lufu nka bibakitshine Yesu. (Eb. 12:4) Bu bibaadi abifuimi bena Nkidishitu, beshikuanyi bena Yunda babaadi abafiitshi munda na kuibatombokiela muanda wa bantu be bungi babaadi abafiki bu bena Nkidishitu. Kunyima kua bipua bipeela, kisaka kia beshikuanyi kibatukile mpoolo ngoshi pabaadi alungula mukandu wi buwa mu Yelusalema. Bena Yunda bakile pa 40, “abadiile lukuku betshipa bambanga’shi t’abadi sunga nkutoma mpa na p’abayipayila Mpoolo.” (Bik. 22:22; 23:12-14) Sunga bibaabadi bebashikue na kuibabingabinga, bena Nkidishitu babaadi batungunukie nka na kuibunga pamune bua kulanguila, kulungula mukandu wi buwa, na kulama lukumiino luabo lunyingie.

16. Mukanda wa bena Ebelu wi kuitukuasha buatudia kuikala na mmueneno e buwa pabitale kubinguabingua naminyi? (Bena Ebelu 12:7)

¹⁶ Nkinyi kibaadi kilombene kukuasha bena Nkidishitu bena Ebelu buabadia kunyingiila kubinguabingua kubaabadi apete? Mpoolo baadi akumiina kukuasha bena Nkidishitu buabadia kumona bi muulo wa kunyingiila nkalakashi yabo. Baadi muibapatuluile’shi Efile Mukulu e kutadiila’shi lukumiino lua muina Nkidishitu lutompibue bua kumulongiesha. (Badika Bena Ebelu 12:7.) Kuakua kulongiesha kui kukuasha muina Nkidishitu buadia kudima na kulumbuula ngikashi i na muulo ya buina Nkidishitu. P’abo kutuula binangu biabo ku bipeta abituuku ku nfudiilo kua kutompibua, bena Nkidishitu ba mu Ebelu babaadi bamone’shi mbibofule bua kunyingiila.​—Eb. 12:11.

17. Kunyingiila kubinguabingua, kubaadi kulongieshe Mpoolo kinyi?

¹⁷ Mpoolo baadi mulangie bena Nkidishitu ba mu Ebelu bua kunyingiila nkalakashi n’eshimba diabo dioso. Mpoolo mutumibua baadi mutuushe elango di buwa pabitale mushindo wa kunyingiila kubinguabinua. Kumpala kua kufika bu muina Nkidishitu, Mpoolo baadi akiengiesha bena Nkidishitu na baadi mumone biabidi bubi kukiengiesha bangi. Na baadi muwukie dingi mushindo wa kunyingiila kubinguabingua. Ku nfudiilo a bioso, kunyima kuaye kufika bu muina Nkidishitu, baadi mupete bitompuanga bilekeenelekeene. (2 Ko. 11:23-25) Mpoolo baadi muwukie kalolo kibaadi nakio lukalo bua kunyingiila. Baadi mutentekieshe bano bena Nkidishitu booso’shi p’abanyingiila nkalakashi, abitungu bakulupile mui Yehowa kushi kuikulupila abo banabene. Mpoolo baadi mulombene kuakula n’eshimba dinyingie’shi: “Yehowa mmukuashi ande; ntankatshinyi kintu.”​—Eb. 13:6.

18. Kuwuka akikakitshika mu mafuku aafiki kui kuitukuasha buatudia kunyingiila bitompuanga naminyi?

¹⁸ Bangi bakuetu bena Nkidishitu bakuete kunyingiila kubinguabingua mpaa na binobino. Tui kuibakuatshishena na lulamato looso ku bukuashi bua nteko, sunga na bintu bia ku mbidi. (Eb. 10:33) Bible akula pa butooka’shi: “Bantu boso abakumiina kulamata Efile Mukulu mu buumune na Nkidishitu Yesu, abakakiengieshibua namu.” (2 Ti. 3:12) Ngi buakinyi, abitungu atue booso tuilumbuule bua nkalakashi i bukopo ayifiki mu mafuku e kumpala. Biabia tutungunukieyi na kukulupila mui Yehowa n’eshimba dietu dioso, tukulupile’shi aketukuasha buatudia kunyingiila lukalakashi looso lulombene kuitufikila. Apakalombana nsaa, akapaasha booso abamulanguila na lulamato.​—2 Te. 1:7, 8.

19. Tui kukita kinyi bua kuilumbuula bua mpombo ikata? (Tala dingi kifuatulo.)

¹⁹ Kushi mpaka, mukanda wa Mpoolo kui bena Ebelu, ubaadi ukuashe bena Nkidishitu booso ba mu Siekele a kumpala buabadia kuilumbuula bua mpombo ibaadi ilombene kuibafikila. Mpoolo baadi mulangie bakuabo buabadia kuikala na kiwukilo ki bungi na mpushisho e buwa a Bifundue. Kukita biabia, kubaadi kulombene kuibakuasha buadia kutundula malongiesha a madimi na kuiapela, muanda abaadi alombene kubofusha lukumiino luabo. Baadi muibanyingishe buabadia kuikala na lukumiino lui bukopo, na kuikala na bukidi bua kukookiela buludiki bua Yesu, na bua baaba booso abakunkusha kakongie. Na dingi, baadi mukuashe bena Nkidishitu buabadia kunyiisha kunyingiila pa kuikala na mmueneno e buwa a nkalakashi, na kuiyimona bu mushindo wabafubisha kui Nshabo sha kifulo e muiyilu bua kuibalongiesha. N’atue namu abitungu tutumikile dino elango diyokielue. Su tubakitshi biabia, atuikala na ngobesha ya kunyingiila na lulamato mpaa na ku nfudiilo.​—Eb. 3:14.