Mishindo ayitukuashaa Yehowa bua kunyingiila

1. Buakinyi abitungu kunyingiila, na nanyi e kuitukuasha? (1 Mpiele 5:10)

MU ANO mafuku e bukopo a ku nfudiilo, muilo wa Yehowa wi na lukalo lua kunyingiila. Bangi be na maladi takudi mafuku e bungi. Bangi namu mbafuishe muntu abadi bafule. Na bangi bakuete abebabingabinga kui bena kifuko nabo sunga bakata ba mbulamatadi. (Mat. 10:18, 36, 37) Anka ikala mushinkamisheʼshi, sunga wekala na lukalakashi lui naminyi, Yehowa akukuasha bua kunyingiila.​—Badika 1 Mpiele 5:10.

2. Bena Nkidishitu abapetaa bukome bua kunyingiila kui nnanyi?

² Kunyingiila nyi kushala na lulamato kui Yehowa na kumufubila na muloo nsaa yatudi mu nkalakashi, yabetubingabinga, sunga yabetutakula bua kukita muluisho. Bua kunyingiila, abitungu dingi tukumiineʼshi mianda ayishintuluka. Bukome bua kunyingiila tʼabufiki kuatudi nya, kadi abufiki kui Yehowa, aye mulombene kuitupa “bukome bukile bua mafuku oso.” (2 Ko. 4:7) Mu uno muisambo, atuisambila mishindo inanka ayitukuashaa Yehowa bua kunyingiila. Atumono dingi kia kukita buaʼshi ino mishindo itukuashe.

LUTEKO

3. Buakinyi atuambaʼshi luteko nyi nkilengieleshi?

³ Yehowa mukite kintu kia kukaanya akitukuashaa bua kunyingiila. Mmukite biaʼshi tuisambe naye sunga biatudi bankitshishi ba miluisho. (Eb. 4:16) Bu kileshesho: Tui kuteka Yehowa nsaa yoso na pabitale muanda oso wawa. Etuteemesha mu ludimi loso lualua, na mbalo yoso yaya yatudi mpa na mu lukano. (Yon. 2:1, 2; Bik. 16:25, 26) Sunga tuekala bakalakashue ngofu, bashiʼabauku kia kulungula Yehowa, aye e na ngobesha ya kupusha kiakia kiatukiebanga kuakula. (Lom. 8:26, 27) Eyendo, luteko nyi nkilengieleshi!

4. Buakinyi tui kuambaʼshi kuteka Yehowa bukuashi bua kunyingiila nkuipushene na kikiebe kiʼeshimba diaye?

⁴ Muiyi diaye, Yehowa etushinkamiishaʼshi “kintu kioso kiatumutekie muyile kikiebe ki’eshimba diaye, etuteemesha.” (1 Yo. 5:14) Tui kuteka Yehowa bukuashi bua kunyingiila su? Oolo! Kukita bino nkuipushene na kikiebe kiʼeshimba diaye. Buakinyi atuamba biabia? Nsaa yatunyingiila nkalakashi, atukuasha Yehowa bua kualuula Satana Diabulu kuete kumusabuula. (Nki. 27:11) Kukatusha biabia, Bible ambaʼshi Yehowa akumiina “kulesha bukome buaye kui baba bamukulupile nʼeshimba diabo dioso.” (2 Mi. 16:9) Biabia, tushinkamisheʼshi Yehowa e na bukome na lukalo lua kuitukuasha bua kunyingiila.​—Yesh. 30:18; 41:10; Luk. 11:13.

5. Luteko lui kuitukuasha bua kupeta butaale naminyi? (Yeeshaya 26:3)

⁵ Bible ambaʼshi nsaa yatutekie Yehowa, “butaale bu’Efile Mukulu bukile binangu bioso abulama mashimba [etu] na binangu [bietu].” (Fid. 4:7) Tui na lutumbu bua uno muanda. Nsaa i bantu bashʼabafubila Yehowa abapete nkalakashi, abakimbaa mishindo ilekene ya kupeta butaale bua mu binangu. Anka butaale abuitupaa Yehowa nsaa yʼatumutekie, mbukile buwa. Nsaa yʼatusambila Yehowa, atuleshaʼshi tuibamukulupile, na aye namu muleeʼshi etupa “butaale bua loso.” (Badika Yeeshaya 26:3.) Mushindo umune awibikita Yehowa, pa kuitukuasha bua kutentekiesha bifundue abitunyingisha biatudi balongie Muiyi diaye. Bino bifundue abitukuasha bua kuikala na butaale muanda abitutentekieshaʼshi Yehowa etupasukilaa na akumiinaaʼshi tuikale na butaale.​—Mis. 62:1, 2.

6. Nkinyi kiosho kuluba mu nteko yobe? (Tala dingi kifuatulo.)

⁶ Kiodia kukita. Nsaa yodi na lukalakashi, lungula Yehowa biabia biopusha. “Tuula bushito bobe” kuadi na omutekie buadia nkupa butaale. (Mis. 55:22) Dingi, mutekie kinangu bua kuuka kiodia kukita. (Nki. 2:10, 11) Nsaa yomuiyayila bua kunyingiila, tolubanga kumutumbula. (Fid. 4:6) Kimba bitunduilo abileshaʼshi Yehowa kuete nkukuasha mu lukalakashi lobe, na omutumbule bua bukuashi buaye. Totadilangaʼshi lukalakashi lodi nalo lukukutshishe kumona bioso bikuete kukita Yehowa bua nkukuasha.​—Mis. 16:5, 6.

BIBLE

7. Kuilongiela Bible kui kuitukuasha bua kunyingiila naminyi?

⁷ Yehowa muitupe Eyi diaye Bible buaʼshi tunyingiile. Mu Bible mui ma verse e bungi aetushinkamiishaʼshi Yehowa akumiina kuitukuasha. Bu kileshesho, Mateo 6:8 ambaʼshi: “Nshenu auku kianudi nakio lukalo kumpala kua’shi numutekie kianka.” Yesu baadi muakule ano mayi, auku Yehowa kukila bantu boso, biabia tushinkamisheʼshi nsaa yatukiengie, Yehowa auku kiatudi nakio lukalo na etukuasha. Mu Bible mui bileshesho bi bungi bi bino abitukuasha bua kulama kitshibilo kietu kia kunyingiila.​—Mis. 94:19.

8. (a) Tuusha kileshesho kia eyi dia kulonda dia mu Bible di kuitukuasha bua kunyingiila. (b) Nkinyi kilombene kuitukuasha bua kutentekiesha ano mayi a kulonda nsaa yatudi nao lukalo?

⁸ Mayi a kulonda a mu Bible ekuitukuasha bua kunyingiila. Ano mayi a kulonda ekuitukuasha bua kuata bitshibilo bi buwa. (Nki. 2:6, 7) Bu kileshesho, Bible etunyingisha bua kupela kuikalakasha pabitale akikakitshika malooba, kadi tukulupile Yehowa efuku dioso. (Mat. 6:34) Su tuekala na kiubishi kia kubadika Bible efuku dioso na kunangushena ku biatubadika, atutentekiesha mayi a kulonda aetukuasha bua kuata bitshibilo bi buwa.

9. Mbikunyi bilombene bileshesho bia mu Bible kunyingisha lukumiino luetuʼshi Yehowa etukuasha?

⁹ Mu Bible mui bileshesho bia bantu be nka buʼtue abaadi bakulupile Yehowa na aye nkuibakuasha. (Eb. 11:32-34; Yak. 5:17) Nsaa yatunangushena ku bileshesho bi bino, atushinkamishaʼshi Yehowa nyi ‘kifwamino na bukome bwetu, ekala pepi bwa kwitukwasha mu mpombo.’ (Mis. 46:1) Nsaa yatunangushena mushindo ubaadi bafubi ba Yehowa ba kala baleshe lukumiino na kutungunuka na kumufubila mu nkalakashi, abitunyingisha bua kuibambula.​—Yak. 5:10, 11.

10. We kufubisha Bible mu mushindo wi buwa naminyi?

¹⁰ Kiodia kukita. Badika Bible efuku dioso, na ofunde pʼesaki ma verse aakukuashaa. Be bungi mbamoneʼshi kubadika kifundue kia kuifuku nʼefuku akuibakuashaa bua kubanga efuku na binangu bia mu Bible. Mukuetu mukashi abetaminaa bu Mariea mmumoneʼshi bino mbia binyibinyi nsaa ibabaadi bakuate baledi baaye mukumbo wa cancer. Nkinyi kibaadi kimukuashe bua kunyingiila bikishekishe mieshi ipeela kumpala kuaʼshi bafue? Ambaʼshi: “Ku nakashika koso, nabadikaa kifundue mu broshire eetu a Tutaluleyi Bifundue efuku dioso na kunangushena. Kino kiubishi nkinkuashe bua kunangushena pabitale Yehowa na mianda i buwa yetulongieshaa i Muiyi diaye, pamutue pa kunangushena ku mianda yandi nayo.”​—Mis. 61:2.

BAKUETU BENA NKIDISHITU

11. Buakinyi kuukaʼshi ta tui bupenka nsaa yatunyingiila lukalakashi kampanda akuitunyingisha?

¹¹ Yehowa muitupe bakuetu balume na bakashi mu nsenga ishima bua kuitukuasha buaʼshi tunyingiile. Penda kuukaʼshi “[bakuetu] boso be mu nsenga ishima, bakuete kufumankana na ano makienga e mumune,” akuitushinkamiishaʼshi ta tui bupenka. (1 Mp. 5:9) Na dingi, tushinkamisheʼshi sunga tuapeta lukalakashi lui naminyi, bangi bakuetu mbapue kufumankana nalo na abo nkunyingiila. Bino abileshaʼshi natue namu tui kunyingiila!​—Bik. 14:22.

12. Mushindo kinyi wi kuitukuasha bena Nkidishitu netu, natue namu tui kuibakuasha naminyi? (2 Bena Kodinda 1:3, 4)

¹² Bakuetu balume na bakashi be kuitukuasha bua kunyingiila. Mpoolo mutumibua baadi mumoneʼshi bino mbia binyibinyi. Ke bungi baadi atumbula boso abaadi abamukuasha pabaadi mu lukano, pa kuibatemuna mpa na mashina aabo mu mikanda yaye. Abaadi banyingishe Mpoolo na kumukuasha na bintu bibaadi nabio lukalo. (Fid. 2:25, 29, 30; Kol. 4:10, 11) Lelo uno, bakuetu balume na bakashi be kuitunyingisha na kuitukuasha patudi mu nkalakashi. Natue namu tui kuibakuasha pabadi mu nkalakashi.​—Badika 2 Bena Kodinda 1:3, 4.

13. Nkinyi kikuashe mukuetu mukashi abetamina bu Maya bua kunyingiila?

¹³ Bakuetu balume na bakashi mbakuashe ngofu mukuetu mukashi a mu Russie abetaminaa bu Maya. Mu 2020, ba mpulushi ba mu Russie abafikile batuela muaye mu nshibo pa bukopo na babanga kusalakasha bintu, na kunyima abo nkuenda naye ku tumiladi bua kumusambisha pa muanda waʼshi baadi mulungule mukandu wi buwa. Maya ambaʼshi: “Mu kino kipungo ki bukopo, bakuetu balume na bakashi abaadi abangitamina sunga kunfudila mikanda bua kunshinkamishaʼshi banfule. Nadi naukuʼshi bakuetu balume na bakashi mbanfule na beʼnka bu kifuko kiande. Anka, kubanga mu 2020, nemunyishe kuibishinkamisha.”

14. Kukuasha bena Nkidishitu netu be mu nkalakashi kui kuitukuasha naminyi bua kunyingiila nkalakashi yetu? (Tala dingi kifuatulo.)

¹⁴ Kiodia kukita. Nsaa yonyingiila nkalakashi, tuetolanga kula na bakuenu balume na bakashi. Tuekokanga bua kuteka bakulu bukuashi. Mbalombene kuikala bu “kisuukilo ku kipapi kya mpeshi.” (Yesh. 32:2) Tentekieshaʼshi, bakuenu bena Nkidishitu bakuete nabo namu kunyingiila nkalakashi. Biabia, nsaa yokitshina ungi muntu e mu nkalakashi kintu akimukuasha, abikukuasha namu bua kuikala na muloo na kunyingiila nkalakashi yodi nayo.​—Bik. 20:35.

LUKULUPILO LUETU

15. Lukulupilo bua mafuku aafiki lubaadi lukuashe Yesu naminyi, na luno lukulupilo lui kuitukuasha naminyi? (Bena Ebelu 12:2)

¹⁵ Yehowa muitupe lukulupilo aluitukuasha bua kunyingiila. (Lom. 15:13) Tentekieshaʼshi lukulupilo lubaadi lukuashe Yesu bua kunyingiila lukalakashi lui bukopo bukile pabaadi pa nsenga. (Badika Bena Ebelu 12:2.) Yesu baadi aukuʼshi su bashala na lulamato, alesha patookaʼshi bioso bibaadi Satana muakule pabitale Yehowa mbia madimi naʼshi abitungu kunemeka Yehowa. Yesu baadi dingi atengiela efuku diakalukiila kui Nshaye muiyilu, nʼefuku diakekala Nfumu na kumunana pamune na bakuabo, bantu 144 000. Mu mushindo umune, lukulupilo luetu lua kuikala na muwa wa ikalayika mu Nsenga ipia yʼEfile Mukulu, aluitukuasha bua kunyingiila nkalakashi yoso yatupete mu uno ndumbuluilo e bubi a Satana.

16. Lukulupilo lubaadi lukuashe mukuetu mukashi Alla naminyi, na muanda waye ubakulongiesha kinyi?

¹⁶ Tala bibaadi lukulupilo lua Bufumu lukuashe mukuetu mukashi a mu Russie abetamina bu Alla, sha mulume ababaadi beele mu lukano. Pabakitshikile uno muanda, Alla ambaʼshi: “Kuteka bua lukulupilo luetu bua mafuku aafiki na kutungunuka na kunangushena, nkukuashe bua kupela kubofula. Naukuʼshi kunyima kua ino nkalakashi, akukafiki mianda i buwa. Yehowa atshimuna beshikuanyi baye, na etufutu.”

17. Tui kulesha lutumbu bua lukulupilo luitupe Yehowa naminyi? (Tala dingi kifuatulo.)

¹⁷ Kiodia kukita. Ata nsaa ya kunangushena ku mianda i buwa itulee Yehowa mu mafuku aafiki. Emone mu Nsenga ipia na onangushene ku miabi yatukapete. Na makienga oso atudia kupeta lelo “nga kapindi kapeela na ngapelepele.” (2 Ko. 4:17) Na dingi, ekitshishe bua kulungula bangi pabitale milayilo ya Yehowa bua mafuku aafiki. Banda kunangushena bi nshalelo a bantu bashʼabauku Yehowa bukopo. Nabo namu be na nkalakashi, kadi tʼabauku mianda yoso i buwa ilee Yehowa bua mafuku aafiki. Sunga tuakula mianda penda ipeela, tui kuibapa malaka a kuuka bi bungi pabitale Bufumu bua Yehowa na milayilo yaye.

18. Buakinyi abitungu tukulupile mu milayilo ya Yehowa?

¹⁸ Kunyima kua Yobo kunyingiila nkalakashi, balunguile Yehowaʼshi: “[Binobino] naawukuʼshi we mulombeene kukita byooso, naʼshi takwi mwanda woshyookwobesha.” (Yob. 42:2) Nka bu abibilesha Yobo, ta kui kintu kilombene kukutshishua Yehowa kulombasha mpango yaye. Kutentekiesha uno muanda, kui kuitukuasha bua kunyingiila. Tuate kileshesho, puandikisha’shi muana mukashi e na mukumbo utaudi mafuku e bungi. Muinyongole kuishimba muanda mupue kuenda kui ba doktere be bungi, kadi su ngumune ta mumupaashe. Anka nsaa i doktere e na kiuukilo ki bungi akuata mukumbo waye na kumupatuluila bia kuiubuka, eshimba adimunyingi sunga biata mafuku e bungi kumpala kuaʼshi apande. Binobino abimubofuila bua kunyingiila mukumbo waye muanda aukuʼshi apanda. Mu mushindo umune, lukulupilo lua Mpaladiso aluitukuasha bua kunyingiila.

19. Nkinyi akitunguʼshi tukite bua kunyingiila?

¹⁹ Nka bu bibatuibimono, Yehowa etukuasha bua kunyingiila ku bukuashi bua luteko, Bible, bakuetu bena Nkidishitu na lukulupilo luetu. Su tuafubisha bino bintu bioso kalolo, Yehowa etukuasha sunga tuekala na lukalakashi lui naminyi. Atuikala na mushindo wa kunyingiila mpa na nsaa yababutula uno ndumbuluilo a Satana mpa na makienga oso.​—Fid. 4:13.