Të mbajmë një pikëpamje të ekuilibruar për muzikën

SOT industria e muzikës është një biznes shumëmiliardë dollarësh. Muzikantët e famshëm dhe menaxherët e tyre po fitojnë shuma të mëdha parash. Prapëseprapë, është fakt që jeta e disa muzikantëve mjaft të suksesshëm ka qenë e mbushur me hidhërime dhe ka marrë fund në mënyrë të parakohshme ose me vetëvrasje. Veç kësaj, ekzistojnë dëshmi të bollshme që tregojnë se disa lloje muzike janë korruptuese nga ana morale, emocionale e frymore dhe mund të çojnë në sjellje të dhunshme antishoqërore.

Megjithatë, bëjmë mirë të kemi një pikëpamje të ekuilibruar për muzikën. Ndonëse në këtë art përfshihen shumë gjëra të gabuara dhe të dëmshme, disa lloje muzike mund ta pasurojnë jetën dhe të sjellin një masë gëzimi dhe kënaqësie. Ato mund të na ngrenë moralisht dhe frymësisht. Vëreni vetëm disa shembuj.

Të 150 psalmet e Biblës janë kryevepra letrare: poema lirike, këngë të shenjta dhe lutje. Sot ato lexohen me kënaqësi në qindra gjuhë. Megjithatë, hebrenjtë e lashtë nuk bënin thjesht leximin e këtyre psalmeve. Ata i këndonin. Shpesh kjo bëhej me një shoqërim të bukur muzikor: një mjet i fuqishëm për të bërë lidhjen e mençurisë së Perëndisë së tyre, Jehovait, e shprehur nga fjalët, me ndjenjat, që këngëtarët e kualifikuar mund t’u transmetonin dëgjuesve. Aspak fillestare a primitive, cilësia dhe stili i muzikës hebreje ishin shumë më të larta sesa ato të kombeve fqinje të asaj kohe.

Kohë më vonë, të krishterët e shekullit të parë këndonin psalme dhe këngë të tjera të shenjta, për të lëvduar Perëndinë dhe për të lehtësuar një gjendje të tensionuar emocionale. Kështu muzika shërbente për të pasuruar jetën e tyre. Veç kësaj, duke kënduar këngë të bazuara në Bibël ata rrënjosnin më thellë në zemër njohurinë e Perëndisë, e cila u duhej për t’i drejtuar në jetë.—Mateu 26:30; Veprat 16:25.

Grekët e lashtë besonin se muzika e zhvillon personalitetin e njeriut dhe e formon më plotësisht një burrë a një grua. Në këtë botë të shekullit të 20-të, e cila e vë theksin mbi arsimimin në fushën e shkencës, ekonomisë dhe logjikës, zhvillimi i anës emocionale të personalitetit përmes arteve, shpesh lihet pas dore.

Të mbajmë ekuilibrin

Dëgjimi i një pjese të bukur muzikore mund të jetë një përvojë e dobishme dhe e këndshme. Megjithatë, njeriu mund të nxjerrë edhe më shumë kënaqësi duke i rënë një vegle muzikore ose duke kënduar me një grup miqsh. Arsimimi muzikor mund të hapë një fushë të gjerë kënaqësish të vërteta.

Sigurisht, ashtu si me gjërat e tjera të mira në jetë, edhe në këtë fushë të zbavitjes ekziston nevoja për të qenë të përmbajtur, për të pasur gjykim të shëndoshë dhe për të qenë seleksionues. Kjo është e vërtetë jo vetëm për sa i përket llojit të muzikës që zgjedhim, por edhe sasisë së kohës që kalojmë duke dëgjuar muzikë a duke i rënë një vegle.

Nëse një lloj i caktuar muzike po fillon të ushtrojë një efekt negativ mbi ndjenjat, veprimet dhe marrëdhëniet tuaja me të tjerët, atëherë zgjidhni një lloj tjetër muzike. Mbroni kështu veshët tuaj, që të mbroni ndjenjat tuaja, që të mbroni zemrën dhe mendjen tuaj!

Kjo është veçanërisht e vërtetë në lidhje me tekstet e këngëve. Ato mund të fillojnë t’ju modelojnë sipas dëshirave të atyre personave që s’kanë të njëjtat pikëpamje si ju për jetën dhe moralin e që përkundrazi mund t’ju shtyjnë në një stil jete të paperëndishëm dhe imoral. Në disa raste, edhe titulli i këngës mund të vërë në lëvizje ndjenja të gabuara.

Fjala e Perëndisë, Bibla, i këshillon ata të cilët dëshirojnë t’i pëlqejnë Perëndisë që t’i ‘paraqesin trupat [e tyre] si një flijim të gjallë, të shenjtë, të pranueshëm për Perëndinë: një shërbim i shenjtë me aftësinë [e tyre] të të arsyetuarit’. (Romakëve 12:1, BR) Dihet, ndjenjat tona janë pjesë e këtij ‘flijimi të gjallë’. Kështu që nëse ndonjëherë kuptojmë se përmes fuqisë së muzikës, ndjenjat tona po fillojnë ta mjegullojnë gjykimin dhe arsyetimin tonë të shëndoshë dhe të keqdrejtojnë veprimet tona, atëherë është koha të ndryshojmë zakonet e dëgjimit të muzikës. Të mos harrojmë: muzika ka fuqi të ndikojë në zemër e në mendje qoftë për mirë, qoftë për keq!

[Kutia dhe figura në faqen 10]

Zhvillon aftësinë për të mësuar

«Studimet tregojnë se dëgjimi i rregullt i muzikës së harmonishme mund të zhvillojë aftësinë e një foshnjeje për të mësuar. Por në shumë shtëpi, ato nuk e dëgjojnë kurrë një muzikë të tillë.»—Audio, mars 1999.