Kongresi krahinor «Lajmëtarë të paqes hyjnore» 1996
1 Programi i kongresit krahinor të këtij viti me siguri që do të na ndihmojë të ruajmë paqen tonë hyjnore dhe do të sqarojë rolin tonë në ndihmë të të tjerëve, për ta gjetur këtë paqe. Tema e tij është: «Lajmëtarë të paqes hyjnore.» A i keni bërë planet tuaja me qëllim që të mos mungoni gjatë programit?
2 Një program tre ditor: Jemi të sigurt se ju do të kënaqeni plotësisht në kongresin e këtij viti dhe do të ktheheni në shtëpi me fuqi të ripërtërirë. (2. Kron. 7:10) Këtë vit do të kemi përsëri një program tre ditor. A i keni bërë tashmë rregullimet për të rezervuar kohë nga puna, në mënyrë që të jeni të pranishëm gjatë gjithë kohës? Disa nga kongreset e para do të mbahen përpara se shkolla të ndërpritet gjatë verës. Nëse keni fëmijë në moshën e shkollës, a i keni informuar me respekt mësuesit e tyre se ata do të mungojnë të premten për këtë pjesë të rëndësishme të stërvitjes së tyre fetare?
3 Siç është njoftuar në Kullën e Rojës së 15 shkurtit 1996, për Shqipërinë, kongresi krahinor do të mbahet në Tiranë në pallatin e sportit «Asllan Rusi», më 12-14 korrik 1996.
4 Programi do të fillojë të tri ditët në orën 930 dhe do të përfundojë të dielën rreth orës 1600. Dyert do të hapen në orën 800. Të vetmit që lejohen të hyjnë më përpara do të jenë ata që punojnë në reparte të ndryshme, por edhe këta nuk do të lejohen të ruajnë vende, derisa ndërtesa të hapet për çdo njeri. A do të shfaqim mirësi ndaj vëllezërve tanë më të vjetër dhe të pamundur, duke u lënë vendet bosh në zonat që janë më të favorshme dhe të rehatshme? Mos harroni se «dashuria . . . nuk shikon interesat personale».—1. Kor. 13:4, 5, BR; Filip. 2:4.
5 A do të jeni të mprehur? Mbasi citonte Proverbat 27:17, «Hekuri mpreh hekurin», Kulla e Rojës e 15 gushtit 1993 anglisht, vërente: «Ne jemi tamam si instrumentet që kërkojnë një mprehje të rregullt. Duke qenë se shprehja e dashurisë për Jehovain dhe marrja e vendimeve të bazuara në besimin tonë do të thotë të jemi të ndryshëm nga bota, ne vazhdimisht duhet të marrim një shteg të ndryshëm, nga ai që merr shumica.» Si mund ta aplikojmë këtë këshillë?
6 Ne jemi dhe duhet të mbetemi të ndryshëm nga bota. Për ta përmbushur këtë duhet të bëjmë një përpjekje të vazhdueshme, nëse do të jemi të zellshëm për vepra të shkëlqyera. (Titit 2:14) Kjo është arsyeja përse artikulli i Kullës së Rojës, i cituar më sipër, vazhdonte duke thënë: «Kur jemi bashkë me të tjerët, të cilët e duan Jehovain, ne mprehim njëri-tjetrin—e nxitim njëri-tjetrin për dashuri dhe vepra të shkëlqyera.» Kongresi krahinor është një nga masat e Jehovait për të na ndihmuar që të qëndrojmë të mprehtë frymësisht. Ne nuk mund të mungojmë në asnjë pjesë të programit.
7 Një person i mençur do të dëgjojë: Dëgjimi është një art që duhet zhvilluar. Thuhet se njeriu i zakonshëm mban mend vetëm gjysmën e asaj që ka dëgjuar—pavarësisht se me sa kujdes mendon ai se ka dëgjuar. Meqë jetojmë në një kohë hutimesh, herë pas here mund të provojmë vështirësi për t’u përqendruar për një kohë të gjatë. A mund të përpiqemi të rritim masën e vëmendjes sonë, veçanërisht kur ulemi në një auditor të madh për të dëgjuar dikë që po flet? Në qoftë se ju kërkohet që të jepni një përmbledhje të secilës ditë të programit, pasi ktheheni në shtëpi nga kongresi, a do të ishit në gjendje ta bënit? Si mund të përmirësojmë të gjithë ne aftësinë tonë për të dëgjuar dhe për t’i kushtuar një vëmendje të plotë çdo pjese që paraqitet në programin e kongresit?
8 Interesi i etshëm është thelbësor, pasi dhurata hyjnore e kujtesës nuk mund të funksionojë me efektivitet pa të. Për shembull, sa më shumë interes tregon një person në një temë, aq më e lehtë është për t’i kujtuar pikat kryesore të një fjalimi ose pjese të programit. Megjithatë, kjo varet shumë nga fakti nëse po i kushtojmë më shumë vëmendje se zakonisht gjërave, të cilat kemi privilegjin t’i dëgjojmë në kongreset krahinore. Interesi ynë i etur dhe vëmendja ndaj secilës pjesë të programit të kongresit, ka të bëjë me gjendjen tonë të tanishme frymore, si edhe me perspektivën e ardhme. Nëpër kongrese, ne na mësohen rrugët e Jehovait dhe na jepen udhëzime për të kryer një vepër jetëshpëtuese. (1. Tim. 4:16) Mendoni sikur të ishit në një anije në një det të stuhishëm. Premtimet e Jehovait janë një spirancë e fortë shprese. Nëse një person është i pavëmendshëm ndaj programeve të krishtere dhe lejon që mendjen e tij ta rrëmbejë rryma, ai mund të humbasë pika të rëndësishme nga këshillat dhe udhëzimet, të cilat mund ta mbronin atë nga vuajtjet e fundosjes frymore të anijes.—Hebr. 2:1; 6:19.
9 Në shumë pjesë të botës, vëllezërit tanë bëjnë përpjekje të mëdha fizike për të marrë pjesë në mbledhje. Është e mrekullueshme të shohësh se si përqendrohen të mahnitur në kongrese. Megjithatë, në disa vende, individë të ndryshëm kanë shpërqendruar të tjerët, duke u sorrollatur nëpër vendet e kongreseve, gjatë seancave. Të tjerë vijnë me vonesë. Në disa kongrese të kaluara, ishte e vështirë të dëgjoje minutat e para të programit, për shkak se shumë veta endeshin kot nëpër korridore dhe prapa vendeve të ndenjjes. Këta zakonisht nuk janë vëllezër që punojnë në reparte, as nëna që kujdesen për nevojat e fëmijëve të tyre të vegjël. Pjesa më e madhe e shqetësimit vjen nga njerëz të cilët janë vetëm duke biseduar. Këtë vit, Reparti i Shoqërimit do t’i kushtojë më shumë vëmendje këtij problemi dhe shpresojmë, që të gjithë të ulen kur drejtuesi të na ftojë për ta bërë këtë. Bashkëpunimi juaj në lidhje me këtë do të vlerësohet shumë.
10 Cilat sugjerime praktike do të na ndihmojnë që të jemi më të vëmendshëm ndaj programit dhe të mbajmë mend sa më shumë nga ajo që do të paraqitet? Çfarë është thënë në vitet e shkuara duhet të ripërsëritet: (a) Përqendrohu në arsyen kryesore për të cilën shkon në qytetin ku mbahet kongresi. Ajo është jo për t’u marrë me zbavitje, por për të dëgjuar dhe mësuar. (Ligj. 31:12) Përpiqu që të pushosh në mënyrë të mjaftueshme çdo natë. Nëse vjen në kongres shumë i lodhur, përqendrimi do të jetë i vështirë. (b) Lejoji vetes kohë të mjaftueshme për të parkuar makinën dhe zër vend përpara se të fillojë programi. Vajtja me nxitim për të zënë vende në minutën e fundit, zakonisht bën që të humbasësh një pjesë të fillimit. (c) Merr shënime të shkurtra mbi pikat kyçe. Marrja e shënimeve të tepërta mund të jetë një pengesë për një dëgjim të mirë. Kur shkruan, sigurohu se nuk po humbet pikat e tjera për shkak të përqendrimit në shënimet e tua. (d) Kur fillon një pjesë e kongresit mbaj një qëndrim të etur që më përpara. Pyet veten: ‘Çfarë mund të mësoj nga kjo pjesë që të rris vlerësimin tim dhe dashurinë për Jehovain? Si mund të më ndihmojë informacioni për të shfaqur personalitetin e ri në mënyrë më të plotë? Si do të më ndihmojë kjo që të përmirësohem në shërbimin tim?’
11 Sjellje që stolis shërbimin tonë: Pavli e inkurajoi Titin ta shfaqte veten e tij si «një shembull për vepra të shkëlqyera». Duke u treguar i pakorruptueshëm në mësimin e tij, Titi do t’i ndihmonte të tjerët që të «stolisin mësimin e Shpëtimtarit tonë, Perëndisë, në të gjitha gjërat». (Titit 2:7, 10, BR) Çdo vit, ne marrim përkujtues me dashamirësi mbi faktin se përse sjellja e perëndishme është kaq e rëndësishme, ndërkohë që udhëtojmë për në kongres dhe kthehemi nga ai, kur jemi në hotele dhe restorante si dhe gjatë kongresit. Vitin e kaluar dëgjuam përsëri disa komente të ngrohta nga zemra, të cilat ne do të na pëlqente t’i ndanim bashkë me ju.
12 Drejtuesi i një hoteli tha: «Është gjithmonë një kënaqësi të presësh Dëshmitarët sepse ata janë të durueshëm, bashkëpunues dhe mbajnë me kujdes fëmijët e tyre.» Një nëpunës i sportelit tha se puna e tij bëhet «shumë e lehtë kur Dëshmitarët janë duke u regjistruar dhe kur dalin nga hoteli, sepse megjithëse ata duhet të presin shumë në radhë, janë gjithmonë të edukuar, të durueshëm dhe të arsyeshëm». Një grua në New England (Sh.B.A.) ishte kaq e impresionuar nga sjellja e të rinjve Dëshmitarë që qëndronin në të njëjtin motel, saqë kërkoi disa literaturë mbi organizatën tonë.
13 Nga ana tjetër, ka vend për përmirësim në disa fusha. Ne do të dëshironim të ndanim së bashku disa vërejtje që i janë dërguar Shoqatës. Një mbikëqyrës udhëtues raportoi se fëmijët e Dëshmitarëve të Jehovait kanë nevojë për më shumë mbikëqyrje nëpër hotele. Disa janë parë të vrapojnë nëpër korridore, duke hipur e zbritur me ashensor, duke bërë shumë zhurmë rreth pishinës dhe duke qëndruar shumë në ujë, përtej kohës së njoftuar për mbyllje, duke prishur gjumin e të ftuarve të tjerë. Ne kemi nevojë t’i stërvisim fëmijët tanë për të kuptuar se sjellja e krishterë nuk është vetëm për një kohë të caktuar. Ajo nuk merr fund kur udhëtojmë jashtë ndërtesës së kongresit. Ajo duhet të zgjasë gjatë 24 orëve të ditës. Sjellja jonë në hotel, restorante dhe rrugë duhet të jetë po aq e nderueshme sa edhe kur jemi ulur gjatë sesioneve, bashkë me vëllezërit që janë të mësuar nga Jehovai.—Isa. 54:13; 1. Pjet. 2:12.
14 Ne do të dëshironim, gjithashtu, të jepnim një përkujtues dashamirës mbi bakshishin. Kamarierët, kamarieret, shërbëtoret e hotelit dhe tellallët, si edhe të tjerët në punëra të ngjashme, varen shumë pas bakshisheve për të siguruar jetesën.
15 Megjithëse shërbimi i ushqimit nuk vazhdon të jetë më nëpër kongreset tona, ka një shpenzim të madh që lidhet me qiranë e godinës, sigurimin e parkimit dhe kujdesjen për çështje të ndryshme. Kontributet tona vullnetare mbulojnë këto shpenzime. Një motër me fëmijë adoleshentë erdhi në kongres me të holla të pakta. Megjithatë, ajo dhe fëmijët ndihmuan me një kontribut të vogël. Ajo që çdonjëri vendos të bëjë në lidhje me këtë është një çështje personale, por ne e dimë që ju i vlerësoni përkujtues të tillë.—Vep. 20:35; 2. Kor. 9:7.
16 Të dalluar nga mënyra se si vishemi: Mënyra se si vishemi, zbulon shumë për ne dhe ndjenjën tonë ndaj të tjerëve. Shumica e adoleshentëve dhe shumë të rritur, janë të rrethuar nga stile veshjesh të shthurura dhe tekanjoze, në shkollë ose në vendin e tyre të punës. Çdo vit stilet e veshjeve bëhen edhe më të tepruara, madje tronditëse. Nëse nuk jemi të kujdesshëm, mund të ndikohemi lehtë nga bashkëmoshatarët nga bota për t’u veshur ashtu si ata. Shumë stile janë të papërshtatshme për t’u veshur në mbledhjet e adhurimit. Në një shënim të marrë mbas njërit prej kongreseve të vitit të fundit shprehej vlerësimi për programin, por shtohej: «Unë u habita pse kishte kaq shumë vajza të reja me fustane kaq të shkurtra, me bluza të hapura deri poshtë qafës dhe të çara të mëdha.» Sigurisht, të gjithë ne dëshirojmë të jemi të veshur në një mënyrë që u ka hije shërbëtorëve të krishterë, si gjatë kongresit, ashtu edhe ndërsa shoqërohen pas programit. Në çdo kohë, ne bëjmë mirë të reflektojmë mbi këshillën e apostullit Pavël që të krishterët të stolisen «me veshje të rregullta, me modesti dhe shëndet mendor».—1. Tim. 2:9, BR.
17 Kush duhet të përcaktojë se çfarë është veshje modeste dhe e rregullt? Të qenit modestë do të thotë të mos jemi «as të pacipë, as vetëpohues». Fjalori, gjithashtu, e përcakton një modest si një «pa pretendime». As Shoqata, as edhe pleqtë nuk vendosin rregulla mbi veshjen ose mbi krehjen. Megjithatë, a nuk i duhet bërë e qartë një të krishteri, stili i veshjes i të cilit është dukshëm jo modest ose i pahijshëm? (Krahaso Filipianëve 1:10.) Paraqitja dhe veshja jonë nuk duhet të tërheqë vëmendjen e papërshtatshme. Ne duhet të jemi të pëlqyeshëm në paraqitje, jobotëror ose ofendues. Si shërbëtorë të lajmit të mirë, veshja dhe paraqitja jonë e përshtatshme gjatë kohës që ne jemi në qytetin ku mbahet kongresi krahinor, i sjell nder Jehovait dhe e prezanton denjësisht organizatën. Prandaj, prindërit duhet të japin shembullin personal dhe më pas të sigurohen se edhe fëmijët e tyre janë veshur në mënyrë të përshtatshme për këtë rast. Pleqtë duhet të japin një shembull të mirë dhe të jenë gati për të ofruar një këshillë dashamirëse, nëse është e nevojshme.
18 Hotelet: Më përpara ne cituam fjalët e një punonjësi të një hoteli, i cili tha se kishin marrë një përshtypje të mirë, sepse vëllezërit kishin qenë të durueshëm, të sjellshëm dhe bashkëpunues. Ne dëshirojmë të vazhdojmë t’i shfaqim këto cilësi të krishtere edhe nëse do të duhet të presim radhën për t’u regjistruar në hotel. Ne i vlerësojmë hotelet që kanë bashkëpunuar me Shoqatën në sigurimin e dhomave me një çmim të arsyeshëm. Megjithëse mund të jemi të lodhur nga udhëtimi, ne duhet të mos harrojmë që t’i trajtojmë punonjësit e hotelit me dashamirësi. Bërja jonë kështu mund të shkaktojë që disa ta shohin të vërtetën më seriozisht.
19 Kamerat, videokamerat dhe kasetofonët: Është e lejueshme të përdoren kamera dhe mjete të tjera regjistrimi, duke u siguruar se po tregojmë konsideratë për të pranishmit e tjerë. Nëse ne shëtisim rreth e rrotull, duke bërë fotografi gjatë sesioneve, jo vetëm që do të shpërqendrojmë të tjerët që përpiqen të dëgjojnë, por edhe ne do të humbasim disa pjesë të programit. Ne zakonisht përfitojmë më shumë nga kongresi, duke i kushtuar vëmendje serioze folësve dhe duke marrë shënime të sakta. Ne mund të regjistrojmë për një vëlla ose motër që është invalid në shtëpi; sidoqoftë, për dobinë tonë, ne mund të shohim, kur të kthehemi në shtëpi se pas shumë orësh regjistrimi të programit, nuk mbetet shumë kohë për të riparë shumë nga ajo që kemi regjistruar. Aparatet regjistruese të çdo lloji nuk duhen lidhur në sistemet elektrike ose zanore dhe pajisjet as nuk duhet të bllokojnë kalimet midis rreshtave, korridoret ose shikimin e të tjerëve.
20 Ndenjja: Vazhdojmë të vërejmë një përmirësim në çështjen e ruajtjes së vendeve. Vitin e kaluar, shumica juaj ndoqën udhëzimin: VENDET MUND TË RUHEN VETËM PËR PJESËTARËT E AFËRT TË FAMILJES SUAJ DHE NDONJË QË UDHËTON ME JU NË MAKINËN TUAJ. Ju me siguri e keni parë atë si më pak stresante, sepse shumë i kanë ndjekur këto udhëzime të qarta. Madje ç’është më e rëndësishme, pëlqimi juaj kënaqi Jehovain dhe ‘skllavin e besueshëm’, i cili dha ushqimin frymor.—Mat. 24:45.
21 Ka një numër në rritje të vëllezërve tanë, të cilët kanë nevoja të veçanta shëndetësore. Disa vijnë në kongres me karroca invalidi dhe kanë nevojë për kujdes nga pjesëtarët e familjes. Të tjerë janë nën mjekime të ndryshme për sëmundje kronike, të tilla si probleme me zemrën ose atake epileptike. Me të vërtetë, zemra jonë ngrohet kur shohim vëllezër e motra të tillë në kongres, të vendosur për të mos munguar në asnjë nga ushqimet frymore. Sidoqoftë, herë pas here, ka ekzistuar problemi i disa personave që sëmuren gjatë kongresit, kur nuk kanë pasur afër familjarë ose anëtarë të kongregacionit që t’u japin ndihmë. Në disa raste, administrata e kongresit është detyruar të thërrasë shërbimin e urgjencës mjekësore për të transportuar një vëlla ose një motër për në spital. Përgjegjësia për kujdesjen e sëmundjes kronike duhet të bjerë së pari mbi pjesëtarët e familjes dhe të afërmit e ngushtë. Reparti i Ndihmës së Shpejtë të kongresit nuk është një vend përkujdesjeje për sëmundjet kronike. Në qoftë se një pjesëtar i familjes suaj ka nevojë për kujdes të veçantë, ju lutemi të jeni të sigurt se ai nuk është lënë vetëm, në rast të një urgjence. Përveç kësaj, në kongrese nuk do të ketë parapërgatitje për dhoma speciale për të shtruar ata që kanë alergji të cilat parashikojnë shtrimin e tyre në vende të përgjithshme shtrimi. Pleqtë duhet të jenë vigjilentë ndaj çdo personi në kongregacionin e tyre, i cili ka nevoja të veçanta shëndetësore dhe të sigurohen se rregullimet janë bërë para kohës së kongresit, në kujdes të tyre.
22 Nevojat për ushqim në kongres: Shumë komente pozitive janë bërë në lidhje me dobitë e sjelljes me vete të ushqimit tonë. Një vëlla shkroi: «Unë mund të shoh qartë një dobi të madhe frymore nga kjo. E gjithë kjo kohë dhe energji tani mund të drejtohet ndaj çështjeve frymore. Unë nuk kam dëgjuar një koment negativ.» Një motër shkroi: «Me anë të shembullit tuaj, ju vëllezër të dashur na inkurajuat ne, si individë të krishterë, për të shqyrtuar veten, për të kërkuar mënyra për ta thjeshtuar jetën tonë dhe për të rritur aktivitetin tonë teokratik.» Një mbikëqyrës udhëtues shkroi mbi parapërgatitjet e mëparshme të shërbimit të ushqimit: «Rregullimi i vjetër bënte që një numër i madh vëllezërish të mungonin në tërë programin e asamblesë.» Në lidhje me ushqimin që vëllezërit sollën, një plak shkroi: «Ata kanë tamam atë që dëshirojnë dhe nuk duhet të presin më në radhë për të.» Së fundi, një motër tjetër shkroi: «Mbas sesioneve kishte paqe, qetësi dhe një atmosferë të kënaqëshme.» Po, secili mund të sjellë mjaft për të mbajtur veten gjatë periudhës së pasdites. Shumë komentuan mbi faktin se ata kishin më shumë kohë për të vizituar miqtë.
23 Përsëri këtë vit nuk do të ketë shërbim ushqimi. Ju mund të merrni për pak minuta Shërbimi ynë i Mbretërisë i majit 1995, për të rishikuar shtojcën në paragrafin 26, për sugjerime praktike mbi çështjen e ushqimit që mund të merret në kongres. Ju lutemi mos harroni, që nuk duhet merren enë qelqi ose pije alkoolike brenda ndërtesës së kongresit. Nëse janë të nevojshëm frigoriferë të vegjël dore, ata duhet të vendosen nën karrigen tuaj. Mbaj në mendje që ka kohë të mjaftueshme gjatë pushimit të drekës, për të ngrënë dhe pirë atë që ju sillni. Si në Sallën tonë të Mbretërisë gjatë mbledhjeve, ashtu edhe gjatë seancave të kongresit ne nuk hamë. Kështu demonstrojmë respekt për rregullimin e adhurimit dhe për ushqimin frymor që jepet.
24 Së shpejti do të fillojnë kongreset e para «Lajmëtarë të paqes hyjnore». A i keni plotësuar përgatitjet tuaja për të qenë të pranishëm dhe a jeni gati për të shijuar tri ditë me një shoqëri të gëzuar dhe në gjëra të mira frymore? Është lutja jonë e sinqertë që Jehovai të bekojë përpjekjet tuaja për të marrë pjesë në kongresin e kësaj vere.
[Kutia në faqen 6]
Përkujtues për kongresin krahinor
Pagëzimi: Kandidatët për pagëzim duhet të ulen para fillimit të programit, në vendin e caktuar, ditën e shtunë në mëngjes. Është vërejtur se disa veshin tipe veshjesh që nuk janë të denja dhe zvogëlojnë vlerën e këtij rasti. Një kostum banje modest dhe një peshqir duhet të merret nga çdo person që planifikon të pagëzohet. Pleqtë e kongregacionit, duke e parë çështjen në broshurën Mësimet elementare të Biblës, bashkë me kandidatët për pagëzim, duhet të sigurohen se çdonjeri i ka kuptuar këto pika. Pas fjalimit të pagëzimit dhe lutjes nga oratori, drejtuesi i seancës do t’u japë udhëzime të shkurtra kandidatëve dhe më pas do të ftojë për një këngë. Mbas strofës së fundit, shoqëruesit do t’i drejtojnë kandidatët në vendin për pagëzim. Meqë pagëzimi, si simbol i dedikimit të dikujt është një çështje intime dhe personale midis individit dhe Jehovait, nuk ekziston kushti për të ashtuquajturit partnerët pagëzues, sipas të cilit dy ose më shumë kandidatë pagëzues e marrin për krahu ose e mbajnë për dore atë, ndërkohë që pagëzohet.
Distinktivi: Ju lutemi të vini distinktivin e vitit 1996 në kongresin krahinor dhe ndërsa udhëtoni për në kongresin krahinor dhe kur ktheheni prej tij. Kjo shpesh bën të mundur që të japim një dëshmi të shkëlqyer ndërsa udhëtojmë. Distinktivat dhe mbajtëset duhet të sigurohen nëpërmjet kongregacionit, pasi ato nuk do të disponohen në kongres. Mos prit deri pak ditë para kongresit për të kërkuar distinktivat për vete dhe familjen tënde. Mos harro të marrësh Kartelën Mjekësore Pa Gjak.
Karrocat e fëmijëve dhe karriget portabël: Në shumë vende, karrocat e fëmijëve nuk mund të përdoren në ambientet publike të asambleve. Rregullat e parandalimit të zjarrit nuk e lejojnë vendosjen e tyre në korridore dhe në kalimet midis rreshtave të karrigeve. Meqë turma të mëdha mund të shkaktojnë ngushtica, karrocat e fëmijëve mund të jenë mundësi të rrezikshme, jo vetëm për fëmijën, por edhe për çdo njeri që mund të pengohet mbi to. Kështu, ju lutemi të mos i sillni ato në vendin e kongresit. Sidoqoftë, ndenjëse fëmijësh ose makinash janë të lejueshme, duke qenë se këto mund të sigurohen në vendet pranë prindërve. Gjithashtu, ju lutemi të mos sillni karrige portabël. Ato janë të rrezikshme dhe nuk lejohen në ndërtesat për publik të gjerë. Bashkëpunimi juaj në këto çështje është i çmuar.
Shërbimi vullnetar: Duke mos pasur më shërbimin e ushqimit, shumë veta mund të shohin se ata mund të punojnë si vullnetarë gjetkë. A mund të veçoni një sasi kohe nga kongresi për të ndihmuar në ndonjë nga repartet? Duke u shërbyer vëllezërve tanë, mbase edhe për disa orë, mund të jetë shumë ndihmuese dhe mund të sjellë një kënaqësi të madhe. Nëse mund të ndihmoni, ju lutemi njoftoni në Repartin e Shërbimit Vullnetar në kongres. Fëmijët nën 16 vjeç, gjithashtu, mund të kontribuojnë shkëlqyeshëm, duke punuar nën drejtimin e një prindi ose të një të rrituri përgjegjës.
Zëra për kujdes: Qëndroni të vëmendshëm ndaj problemeve të mundshme, në mënyrë që të shmangni vështirësitë e panevojshme. Shpesh hajdutët dhe individë të tjerë të paturpshëm grabisin njerëzit që janë larg vendbanimit të tyre. Sigurohuni që automjeti juaj është i kyçur në çdo kohë dhe mos lër asnjëherë asgjë të dukshme për të tunduar dikë që të thyejë xhamin. Hajdutët dhe xhepistët e përqendrojnë vëmendjen në grumbullime të mëdha. Nuk do të ishte e mençur të linit ndonjë gjë me vlerë në vendin tuaj. Ju nuk mund të jeni të sigurt nëse çdo njeri përreth jush është një i krishterë. Përse të ofroni ndonjë tundim? Janë marrë raporte për përpjekje të bëra nga disa të jashtëm për të joshur fëmijët dhe për t’i larguar ata. RUAJINI FËMIJËT TUAJ GJATË GJITHË KOHËS.
Ju lutemi mos i shkruani ose mos i telefononi drejtuesve të kongresit, duke kërkuar informacion mbi ndonjë çështje që ka të bëjë me kongresin. Nëse informacioni nuk është i disponueshëm nga pleqtë, mund të shkruani në adresën e një kongresi të veçantë, që gjendet në anën e pasme të formularëve Kërkesë për Nevoja të Veçanta, njëri prej të cilëve i është dërguar ekipit të informacionit të kongregacionit.