«Çdo gjë le të bëhet për ndërtim!»
1 Në marrëdhëniet me vëllezërit tanë, ne duhet të bëjmë atë që është e mirë për ndërtimin e tyre. Kjo do të thotë që të interesohemi për të mbrojtur interesat e tyre frymore. Nëse angazhohemi në disa lloj punësh në botë që përfshijnë reklamimin e një produkti ose të një shërbimi, duhet të kemi kujdes që të mos bëjmë asgjë që do t’i pengonte vëllezërit.—2 Kor. 6:3; Filip. 1:9, 10.
2 Disa janë përfshirë në sipërmarrje të ndryshme tregtare, që kërkojnë guxim, duke i konsideruar të krishterët e tjerë si konsumatorë të mundshëm. Disa shoqëri shitjeje i inkurajojnë përfaqësuesit e tyre që ta konsiderojnë çdo person si një blerës të mundshëm—duke përfshirë edhe ata që kanë të njëjtën fe me ta. Disa vëllezër kanë organizuar grumbullime të mëdha të Dëshmitarëve, me qëllim që t’i inkurajojnë ata të përfshihen në një sipërmarrje të guximshme tregtare. Të tjerë e reklamojnë sipërmarrjen e tyre duke u sugjeruar bashkëbesimtarëve artikuj, broshura, informacione në Internet ose regjistrime në kaseta që nuk i kishin kërkuar. A do të ishte e përshtatshme për një të krishterë të përdorte kontaktet teokratike për të përfituar nga vëllezërit e tij frymorë? Jo!—1 Kor. 10:23, 24, 31-33.
3 Vëllezërit duhet të bëjnë kujdes: Kjo nuk do të thotë se një i krishterë nuk mund të hyjë në një marrëdhënie tregtare me një vëlla. Kjo është një çështje personale. Megjithatë, disa fillojnë projekte biznesi që inkurajojnë lakminë dhe i nxitin bashkëbesimtarët të bëhen ortakë me ta ose investuesit e tyre. Shumë nga këto sipërmarrje të guximshme falimentojnë, duke u kushtuar pjesëmarrësve në to shuma mjaft të mëdha parash. Megjithëse ata që morën pjesë në këto sipërmarrje mund të kenë qenë motivuar nga dëshira për të arritur një fitim të menjëhershëm, organizatori nuk duhet të mendojë se është i lirë nga faji nëse biznesi falimenton. Ai duhet të shqyrtojë me kujdes më përpara se si do të ndikohet mirëqenia fizike dhe frymore e vëllezërve të tij në rast se sipërmarrja nuk ka sukses. Ata që kanë përgjegjësi teokratike, duhet të jenë veçanërisht të kujdesshëm lidhur me gjërat e botës që marrin përsipër të bëjnë, sepse të tjerët mund t’i shohin me respekt dhe mund të kenë një besim të konsiderueshëm te ta. Do të ishte e gabuar të abuzoje me këtë besim. Nëse një vëlla nuk gëzon më respektin e të tjerëve, mund të humbasë privilegjet e shërbimit të shenjtë.
4 Synimi ynë duhet të jetë që ‘çdo gjë të bëhet për ndërtim’. (1 Kor. 14:26) Ne duhet të shmangim çdo gjë që fut aktivitetet tregtare brenda kongregacionit ose që i nxit ato. Këto gjëra nuk kanë të bëjnë aspak me arsyet tona biblike për t’u mbledhur së bashku.—Hebr. 10:24, 25.