Kur njerëzit nuk janë në shtëpi
1. Cilin problem hasim zakonisht gjatë shërbimit nga shtëpia në shtëpi?
1 Në shumë zona po bëhet gjithnjë e më e vështirë t’i gjejmë njerëzit në shtëpi. Në këto «kohë kritike» shumë janë të detyruar të punojnë me orë të zgjatura për të siguruar gjërat më të nevojshme. (2 Tim. 3:1) Disa mund të mos jenë në shtëpi, se kanë dalë për të shpenzuar para ose për t’u dëfryer. Si mund t’ua japim lajmin e mirë këtyre njerëzve?
2. Si mund të sigurohemi se ata që nuk ishin në shtëpi nuk do të lihen pas dore?
2 Të mbajmë regjistrime të sakta: Hapi i parë është t’i mbajmë shënim ata që nuk janë në shtëpi. Kjo është veçanërisht e rëndësishme nëse territori punohet shpesh. A e shënon emrin e rrugës, numrin e territorit, emrin tënd dhe datën? Mund të lësh vend për shënime të tjera kur ti ose një lajmëtar tjetër të ktheheni për të gjetur ata që s’ishin në shtëpi. Në fund, mos harro t’ia japësh shënimet lajmëtarit që ka atë territor, me përjashtim të rastit kur ai pranon të shkosh ti tek ata që nuk ke gjetur në shtëpi. Përdor një fletë tjetër për të shënuar ata që kanë treguar interes dhe dëshiron t’i rivizitosh.
3. Cilat janë disa sugjerime për të folur me ata që nuk janë në shtëpi?
3 Të provojmë në një orar tjetër: Ndoshta disa nga ata që nuk ishin në shtëpi gjatë ditëve të javës, mund të jenë në shtëpi në mbrëmje ose në fundjavë. A mund të programosh që të kthehesh në një kohë më të përshtatshme për ta? (1 Kor. 10:24) Nëse jo, mund t’ia japësh shënimet e atyre jo në shtëpi një lajmëtari që mund të shkojë në një orar tjetër. Ose mund t’u shkruash a të mundohesh t’u flasësh nëpërmjet telefonit. Lajmëtarët që problemet shëndetësore i kufizojnë të marrin pjesë në veprën nga shtëpia në shtëpi, mund të të ndihmojnë me kënaqësi.
4. Cila përvojë tregon sa e rëndësishme është të shkojmë përsëri tek ata që nuk gjejmë në shtëpi?
4 Ja një shembull që ilustron sa e rëndësishme është të përpiqemi të gjejmë ata që nuk ishin në shtëpi. Pasi lajmëtarët shkuan vazhdimisht te një shtëpi për tre vjet me radhë, më në fund takuan të zonjën e shtëpisë. Doli se ajo kishte pritur gjithë kohës që një Dëshmitar të shkonte e të rifillonte studimin biblik që e kishte nisur para se të shpërngulej në atë zonë.
5. Kur quhet i përfunduar një territor?
5 Të përfundojmë territorin: Kur quhet i përfunduar një territor? Zakonisht, kur janë bërë përpjekje të arsyeshme për të folur me një pjesëtar në çdo shtëpi. Mund të jetë e përshtatshme të lëmë një fletushkë ose një revistë të vjetër në një vend që nuk shihet nga kalimtarët tek ata që nuk i gjejmë në shtëpi, sidomos në ato territore që punohen rrallë. Territori duhet përfunduar brenda katër muajsh. Më pas, duhet dorëzuar, me qëllim që vëllai që merret me territoret të përditësojë regjistrimet e tij.
6. Pse duhet të përpiqemi t’ua japim lajmin e mirë të gjithëve në territorin tonë?
6 Ne duam që sa më shumë njerëz të kenë mundësi të mësojnë të thërrasin emrin e Jehovait dhe të shpëtojnë. (Rom. 10:13, 14) Kjo përfshin edhe ata që nuk i gjejmë kur shkojmë nga shtëpia në shtëpi. Njësoj si apostulli Pavël, zhvillo dëshirën ‘që të japësh dëshmi të plotë për lajmin e mirë të dashamirësisë së pamerituar të Perëndisë’.—Vep. 20:24.