Të dëshmojmë pa ndrojtje në territoret tregtare
1. Pse nuk duhet të shkurajohemi nëse kemi frikë të predikojmë në territor tregtar?
1 A ju zë frika kur mendoni për të dhënë dëshmi në territor tregtar? Nëse po, mos u shkurajoni, se edhe Pavlit që ishte një predikues i guximshëm e sypatrembur, iu desh ‘të merrte guxim’ që të predikonte. (1 Sel. 2:2) Më poshtë do të trajtojmë disa sfida të zakonshme dhe disa sugjerime praktike se si t’i përballojmë.
2. Pse nuk duhet të kemi merak se mos i bezdisim punonjësit?
2 A do të bezdisen punonjësit po t’i ndërpresim? Në shumë lloje biznesesh, punonjësit janë në shërbim të klientëve dhe e dinë se do t’i ndërpresin. Shpesh do të jenë të sjellshëm, pasi mund t’ju konsiderojnë një klient. Me një veshje dinjitoze dhe sjellje të ngrohtë e miqësore, do t’u impononi respekt.
3. Si të veprojmë që të mos i bezdisim klientët?
3 A do të më duhet ta bëj prezantimin në sy të shumë klientëve? Nëse është e mundur, zgjidh një orar kur dyqanet nuk janë plot, si për shembull orari i hapjes. Prit derisa menaxheri ose shitësi janë vetëm dhe pastaj afrojuni. Bëj një prezantim shumë të shkurtër.
4. Çfarë mund të themi kur predikojmë në territoret tregtare?
4 Çfarë të them? Fol me personin përgjegjës nëse aty ka disa punonjës. Mund të thoni: «Është e vështirë t’i gjejmë në shtëpi ata që punojnë, prandaj po ju vizitojmë në vendin e punës. E kuptoj që jeni të zënë, kështu që do t’i bie shkurt.» Që të mos na marrin për shitës, zakonisht është më mirë të mos i përmendim kontributet vullnetare nëse nuk na pyesin vetë se si financohet vepra jonë. Në varësi të natyrës së biznesit, mund t’i merrni leje menaxherit që të flisni shkurtimisht me punonjësit. Prezantohu po njësoj edhe me ta. Nëse një punonjës duket i zënë, fol më shkurt dhe lëri një fletushkë. Nëse nuk është e mundur të flasësh me punonjësit, ndoshta do të të lejojnë të lësh literaturë në dhomën ku bëjnë pushimin ose në ndonjë vend tjetër të përbashkët.
5. Ç’arsye kemi për të predikuar pa ndrojtje në territoret tregtare?
5 Jezui dhe Pavli u predikonin pa ndrojtje njerëzve në vendin e punës. Po kështu mund të bëni edhe ju. (Mat. 4:18-21; 9:9; Vep. 17:17) Kërkojini Jehovait t’ju ndihmojë të ruani një zemër të qetë dhe të jeni të guximshëm. (Vep. 4:29) Zakonisht në territoret tregtare i gjejmë pothuajse të gjithë, prandaj ia vlen ta provojmë këtë formë dëshmie frytdhënëse.