Nisma të reja për dëshmi publike
1. Çfarë shembulli lanë të krishterët e shekullit të parë?
1 Të krishterët në shekullin e parë nuk predikonin vetëm shtëpi më shtëpi, por edhe publikisht. (Vep. 20:20) Për shembull, shkonin në tempull meqë atje gjenin shumë njerëz. (Vep. 5:42) Kur ishte në Athinë, apostulli Pavël u predikonte çdo ditë njerëzve që takonte në pazar. (Vep. 17:17) Shërbimi shtëpi më shtëpi vazhdon të jetë edhe sot mënyra jonë kryesore për të përhapur lajmin e mirë. Ama predikojmë edhe në sheshe parkimi, në dyqane, në parqe, në rrugë me shumë kalimtarë e në vende të tjera ku gjenden njerëz. Çdo lajmëtar mund të japë dëshmi publike. Por, disa prej tyre do të kenë mundësinë të marrin pjesë në dy nisma të reja fantastike për dëshmi publike.
2. Ç’metodë u provua në nëntor 2011?
2 Dëshmia publike speciale në metropol: Libri vjetor 2013, në faqet 16 dhe 17, raportonte se në nëntor 2011, në Nju-Jork, u provua një metodë për dëshmi publike. Në disa zona me shumë kalimtarë u vendosën tryeza dhe stenda të bukura me literaturë në shumë gjuhë. Para tyre kalonin çdo ditë mijëra njerëz, përfshirë ata që banojnë në ndërtesa ku Dëshmitarët nuk lejohen të hyjnë ose që zakonisht nuk gjenden në shtëpi. Rezultati ishte i shkëlqyer. Kohët e fundit, brenda një muaji u shpërndanë 3.797 revista dhe 7.986 libra. Shumë kalimtarë kanë kërkuar një studim biblik. Meqë synimi ishte fillimi i studimeve biblike, të gjitha adresat që u morën iu dërguan menjëherë kongregacioneve përkatëse që të ndiqnin interesin.
3. Si po zgjerohet kjo nismë?
3 Ngaqë kjo nismë pati sukses, tani po zgjerohet në mbarë botën në zonat metropolitane me popullsi të dendur. Çdo zyrë dege do të përcaktojë qytetet ku mund të përdoret kjo metodë e dëshmisë publike. Zakonisht, zgjidhen qytete me qendra të mëdha transporti ose me shumë zyra a ndërtesa banimi, sepse kanë edhe numër të madh kalimtarësh. Pasi zgjidhen qytetet, zyra e degës do të komunikojë me kongregacionet që do të ndihmojnë në këtë nismë dhe do t’u japë udhëzime specifike. Në përgjithësi, përdoren pionierët e rregullt ose specialë. Në disa vende mund të ndihmojnë edhe pionierët ndihmës.
4. Si predikohet në dëshminë publike speciale në metropol?
4 Si u dëshmohet kalimtarëve? Pionierët e caktuar në dëshminë publike speciale në metropol, zakonisht presin që dikush të afrohet te tryeza ose stenda e lëvizshme dhe e ftojnë të marrë botimin që i pëlqen. Duke përdorur Biblën pionierët u përgjigjen me kënaqësi pyetjeve që mund të bëjë personi. Nëse merr literaturë pionierët nuk i përmendin kontributet. Por, nëse pyet për financimin e veprës, i shpjegojnë se kontributet mund të dërgohen në adresën që tregohet në botim. Kur është e mundur pyesin: «Dëshironi që një Dëshmitar të vijë t’ju takojë në shtëpinë tuaj?» ose «A e dini se ofrojmë edhe studime biblike falas?»
5. Çfarë shpërblimesh i ka sjellë një çifti pjesëmarrja në këtë nismë?
5 Bashkëpunimi në këtë nismë ka qenë shumë shpërblyes. Një çift shkroi: «Çdo ditë, ndërsa qëndrojmë pranë tryezës e shohim mijëra veta që kalojnë para nesh, na preket zemra kur mendojmë sa shumë punë po bëhet për të kontaktuar njerëzit në mbarë botën. Gjithashtu, na forcohet vendosmëria që ta mbajmë veprën e predikimit në qendër të jetës sonë kur mendojmë se sa merak ka Jehovai për secilin prej tyre. Përfytyrojmë sikur Jehovai skanon zemrën e të gjithë atyre që kalojnë para tryezës për të gjetur personat e denjë. Asnjëherë nuk jemi ndier kaq pranë bashkëpunëtorëve tanë engjëllorë.»
6. (a)Ç’nismë e re po organizohet në shumë kongregacione dhe si ndryshon ajo nga dëshmia publike speciale në metropol? (b) Si mund të bashkëpunojnë kongregacionet ndërsa marrin pjesë në dëshminë publike?
6 Dëshmia në vende publike që organizohet nga kongregacioni: Veç dëshmisë publike speciale në metropol, pleqtë e kongregacioneve po organizojnë një nismë tjetër të re. Në territorin e degës së Shqipërisë me kalimin e kohës do t’i njoftojmë kongregacionet për këtë. Pas kësaj, lajmëtarët mund të vendosin një tryezë ose stendë në zonat me shumë kalimtarë brenda kufijve të territorit të kongregacionit. Kjo është ndryshe nga dëshmia publike speciale në metropol, ku pionierë nga shumë kongregacione predikojnë në të njëjtën zonë me shumë kalimtarë në qytete të zgjedhura nga zyra e degës.—Shikoni kutinë «Nevojitet një bashkëpunim i mirë».
7. Si do ta organizojnë pleqtë dëshminë në vende publike për kongregacionet e tyre, nëse kjo është praktike?
7 Në harmoni me drejtimin nga zyra e degës, pleqtë do të shohin nëse territori i tyre ka zona me shumë lëvizje dhe do të vendosin nëse ia vlen të organizojnë dëshmi në vende publike. Aty ku lejohet, mund të vendosen tryeza dhe stenda të lëvizshme nëpër qendra të mëdha transporti, sheshe, parqe, rrugë plot njerëz, qendra tregtare, godina universitetesh, aeroporte dhe në vende ku organizohen raste të përvitshme. Ka më shumë avantazhe kur tryezat vendosen në të njëjtin vend, në të njëjtat ditë dhe në të njëjtat orare. Është më e efektshme kur tryezat sistemohen në qendra tregtare se sa kur vendosen pranë një dyqani të madh ku njerëzit zakonisht shkojnë për një arsye të veçantë. Në disa vende, si në trotuare me shumë lëvizje, mund të jetë më e efektshme një stendë e vogël. Posaçërisht për këtë formë të dëshmisë publike janë përgatitur dokumente të veçanta që ekspozojnë revistat Kulla e Rojës e Zgjohuni! dhe librin Çfarë mëson vërtet Bibla? Pleqtë mund t’i shkarkojnë këto dokumente nga siti ynë. Lajmëtarët që do të përfshihen në këtë nismë do të veprojnë pak a shumë si ata që marrin pjesë në dëshminë publike speciale në metropol dhe duhet të ndjekin ngushtësisht drejtimin e mbikëqyrësit të shërbimit. Nëse marrin ndonjë adresë nga një i interesuar që nuk banon në territorin e tyre, duhet të plotësojnë menjëherë formularin Ju lutemi, ndiqni interesin (S-43) dhe t’ia japin sekretarit.
8. Nëse kongregacioni juaj nuk organizon diçka për dëshminë publike, ç’mund të bëni?
8 Përfshini dëshminë publike në shërbimin tuaj: Ndoshta disa kongregacione nuk kanë vende me aq shumë kalimtarë në territorin e tyre sa të ngrenë një kënd me tryeza dhe stenda të lëvizshme për të ekspozuar literaturë. Gjithsesi, edhe në këto kongregacione lajmëtarët nxiten të japin dëshmi publike. A ka në territorin tuaj ndonjë zonë tregtare apo ndonjë dyqan me shumë lëvizje? A ka ndonjë park ose ndonjë vend ku mblidhen njerëzit? A zhvillohen herë pas here grumbullime publike në territorin tuaj? Nëse po, atëherë mund kënaqeni duke dëshmuar publikisht.
9. Pse duhet të përpiqemi fort t’u predikojmë njerëzve kudo që janë?
9 Vullneti i Jehovait është që «njerëz të çdo lloji të shpëtojnë dhe të fitojnë njohurinë e saktë të së vërtetës». (1 Tim. 2:4) Prandaj po përpiqemi t’ua japim mesazhin për Mbretërinë sa më shumë njerëzve para se të vijë fundi. (Mat. 24:14) Në shumë vende është e vështirë t’i gjejmë njerëzit në shtëpi, por mund t’i takojmë në vende publike. Për disa, ndoshta dëshmia publike është e vetmja mundësi që të dëgjojnë lajmin e mirë. Pra, le ta kryejmë plotësisht shërbimin tonë duke u predikuar njerëzve kudo që janë.—2 Tim. 4:5.
[Kutia në faqen 5]
Nevojitet një bashkëpunim i mirë
Është vënë re se lajmëtarë nga kongregacione të ndryshme japin dëshmi publike në të njëjtat rrugë, në të njëjtat vende parkimi dhe para të njëjtave dyqane e qendra transporti. Lajmëtarë nga kongregacione të ndryshme kanë lënë literaturë në të njëjtat recepsione e dhoma pritjeje, dhe u kanë predikuar të njëjtave dyqane e zyra. Ndonjëherë kjo i ka bezdisur ata që punojnë dhe banojnë në ato zona, pavarësisht se lajmëtarët nuk kanë predikuar atje në të njëjtat orare. Ndaj, në përgjithësi është mirë të qëndrojmë brenda territorit të kongregacionit tonë kur dëshmojmë publikisht.
Nëse lajmëtarët duan të japin dëshmi publike në territorin e kongregacionit fqinj, duhet të flasin me mbikëqyrësin e shërbimit. Pastaj, ai do të komunikojë me mbikëqyrësin e shërbimit të atij kongregacioni për të kërkuar leje para se të predikohet në territorin fqinj. Kur disa kongregacione të gjuhëve të huaja janë caktuar të predikojnë në të njëjtën zonë, mbikëqyrësit e shërbimit duhet të komunikojnë me njëri-tjetrin që të mos bezdisin më kot banorët. Me një bashkëpunim të mirë çdo gjë ndodh «si ka hije dhe me rregull».—1 Kor. 14:40.
[Figura në faqen 6]
[Figura në faqen 6]