Të jemi të vëmendshëm ndaj thënieve të shenjta
1 Jo çdo gjë e thënë nga njeriu meriton vëmendje të veçantë. Por kur flet Perëndia, kemi arsye jetësore për të dëgjuar. (Ligj. 28:1, 2) Jemi mirënjohës që shkrimtarët e frymëzuar i regjistruan «thëniet e shenjta të Perëndisë» për dobinë tonë. (Rom. 3:2, BR) Kongresi krahinor që po vjen, do të sigurojë mundësi të çmuara për t’i dëgjuar këto thënie, ndërsa ato do të lexohen dhe do të shtjellohen. Si mund të tregojmë një vëmendje të veçantë në këtë rast?
2 Të mbërrijmë herët çdo mëngjes: Le të imagjinojmë emocionin e izraelitëve kur iu tha që të takonin Jehovain në Malin Sinai, për të dëgjuar Ligjin e tij! (Dal. 19:10, 11, 16-19) Nëse kemi një qëndrim të ngjashëm kur është fjala për të marrë udhëzimet e Jehovait në kongresin krahinor, do të marrim masa që të vijmë herët çdo ditë. Ne nuk mund ta dëgjojmë të gjithë programin nëse mbërrijmë me vonesë dhe shqetësojmë të tjerët, ndërsa përpiqemi të gjejmë vende. Dyert në lokalin e kongresit do të hapen çdo ditë në orën 8.00 të mëngjesit. Programi fillon çdo ditë në 9.30 paradite.
3 Madje edhe disa që vijnë herët nuk gjenden në vendet e tyre kur fillon sesioni. Përse ndodh kjo? Ata presin derisa drejtuesi të prezantojë këngën hapëse që të ndërpresin bisedat me miqtë dhe të nisen drejt vendeve të tyre. Ne duhet të vëmë re se disa minuta përpara këngës së hapjes së çdo sesioni, drejtuesi do të jetë i ulur në platformë, ndërkohë që transmetohet një melodi e Mbretërisë. Kjo është një shenjë për ne se ka ardhur koha që të jemi ulur. Kështu, kur të bëhet ftesa për të kënduar këngën hapëse, ne do të jemi gati të bashkohemi me të tjerët për t’i kënduar lavdi Jehovait.
4 Të dëgjojmë si një familje e bashkuar: Kur izraelitëve të mbledhur iu lexoheshin thëniet e shenjta, familjet, përfshirë edhe ‘fëmijët’, duhet të dëgjonin dhe të mësonin. (Ligj. 31:12) Në kongreset tona, fëmijët nuk duhen ‘lënë pa fre’. (Prov. 29:15, BR) Prindër, merrni masa që e gjithë familja juaj të ulet së bashku—duke përfshirë edhe adoleshentët! Disa prindër presin derisa të fillojë kënga hapëse për t’i çuar fëmijët në banjë. Megjithatë, kjo vështirë se do t’u mësonte fëmijëve rëndësinë e madhe të këngëve dhe lutjeve në adhurimin tonë. Është shumë më mirë që të kujdesemi për nevojat fizike përpara fillimit të çdo sesioni, nëse është e mundur!
5 Nëse pushojmë mirë çdo natë dhe nuk hamë rëndë gjatë ditës, do të mund të dëgjojmë mirë gjatë kongresit. Le të përqendrohemi në atë që thotë oratori. Të mos e lëmë mendjen të na shpërndahet sa andej-këtej. Të ndjekim me Bibël shkrimet që lexohen. Të mbajmë shënime të shkurtra. Gjatë çdo fjalimi, të sjellim sërish ndër mend atë që ka thënë oratori dhe të mendojmë se si do ta zbatojmë materialin e trajtuar. Në fund të çdo dite, ta diskutojmë programin si familje. Çfarë pikash ka pëlqyer secili anëtar? Si mund ta përdorim mirë si familje këtë informacion?
6 Të tregojmë respekt për Fjalën e Perëndisë: Kongreset na japin një mundësi të shkëlqyer për të folur me miqtë tanë dhe për të gëzuar shoqëri ndërtuese. Duke ardhur shpejt, do të kemi mundësi të bisedojmë përpara se të fillojë programi. Por, disa bëjnë biseda gjatë programit, duke menduar në mënyrë të gabuar, se kjo gjë nuk shkakton dhe aq shpërqendrim në një sallë të madhe. Edhe kur mbledhjet mbahen në ambiente të tilla, është koha për të dëgjuar, tamam siç bëjmë kur ndjekim një mbledhje në Sallën e Mbretërisë. Nuk duhet lejuar që përdorimi i celularit, i biper-it, i telekamerave dhe i aparateve fotografike të shkaktojë shpërqendrimin e të tjerëve gjatë programit.
7 Ndërsa merrte Ligjin nga Jehovai, Moisiu «nuk hëngri bukë as piu ujë». (Dal. 34:28) Në mënyrë të ngjashme, do të ishte e papërshtatshme të hanim ose të pinim gjatë sesioneve të kongresit. Nëse nuk përfshihen faktorë seriozë shëndetësorë, le të presim ‘kohën e caktuar’ për ta bërë këtë.—Ekl. 3:1, BR.
8 Në disa kongrese, vazhdon të jetë një problem me shumë motra e vëllezër, madje edhe fëmijë të vegjël, që shihen të vijnë vërdallë nëpër korridore gjatë sesioneve. Përcjellësit do të udhëzohen që t’u kërkojnë atyre të kthehen në sallë. Vullnetarët që punojnë në reparte të ndryshme, duhet që sapo ta kenë përfunduar punën e tyre të zënë vend në sallë. Nëse nuk u është caktuar të bëjnë ndonjë punë të rëndësishme gjatë sesioneve, duhet të qëndrojnë ulur në vendet e tyre e të dëgjojnë programin. Ata nuk duhet të sorollaten nëpër reparte, duke takuar njëri-tjetrin, ndërkohë që programi është në vazhdim.
9 Ne nuk duam të bëhemi kurrë të «rënduar nga veshët», kur është fjala për të dëgjuar Fjalën e Perëndisë. (Hebr. 5:11) Prandaj, le të jemi të vendosur të tregojmë respektin e duhur, duke dëgjuar me vëmendje shtjellimin e thënieve të shenjta të Jehovait në kongresin krahinor që po vjen.