‘Çdo gjë që bëjmë, ta bëjmë me dashuri’
1 «Anëtarët tuaj janë një kënaqësi e vërtetë; ata sillen me mirësjellje dhe respekt të jashtëzakonshëm.» Ky ishte një koment i bërë nga një agjensi që u siguron ndihmë dhe udhëzime vizitorëve të huaj dhe delegatëve të kongreseve të ndryshme, në një qytet në Shtetet e Bashkuara që mirëpriti një nga kongreset tona krahinore. Inkurajohemi kur marrim lavdërime të tilla për mënyrën se si sillemi në publik. Kjo tregon se në tërësi ‘çdo gjë që bëjmë, po e bëjmë me dashuri’. (1. Kor. 16:14) Ndërkohë, ka disa çështje me rëndësi që nëse nuk trajtohen do ta prishin reputacionin e mirë të popullit të Perëndisë.
2 Problemet me rezervimin e vendeve të strehimit: Në çdo qytet ku mbahet kongresi, formohet një Repart Strehimi, për të biseduar me pronarët e hoteleve dhe të vendeve të tjera të strehimit me pagesë, për një qira të arsyeshme, në mënyrë që gjithsecili të mund të përballojë shpenzimet për të ndjekur kongresin. Vëllezërit tanë harxhojnë mjaft kohë dhe përpjekje për dobinë tonë. Administruesit e disa hoteleve dhe vendstrehimeve, në fillim kanë ngurruar të bien dakord për një qira më të ulët nga ajo që kanë zakonisht, për shkak të përvojave të pakëndshme që kanë pasur me grupe të tjera fetare. Kur vëllezërit e Repartit të Strehimit i kanë siguruar se delegatët tanë do të bashkëpunojnë me hotelin ose vendin e strehimit, shumë hotele kanë pranuar me kënaqësi të rezervojnë dhoma për ne.
3 Vitin e kaluar, nga disa hotele pati ankesa për faktin se në minutën e fundit u bë një numër jashtëzakonisht i madh anulimesh. Përse kjo gjë? Disa delegatë kishin rezervuar dhoma në dy hotele, por nuk kishin paguar kapar në të parin ose nuk kishin njoftuar se do ta anulonin rezervimin në këtë hotel, për shkak se do të regjistroheshin në një tjetër. Në raste të tjera, disa vëllezër kishin rezervuar më shumë se një dhomë në një hotel, me mendimin se po u bënin një favor të tjerëve që po udhëtonin me ta. Por me të mbërritur pranonin vetëm një dhomë dhe i anulonin të tjerat. Hotelet që patën raste si këto, thanë se kjo nuk kishte ndodhur kurrë më parë me delegatët e Watchtower-it.
4 Kjo gjë u shkakton probleme serioze hoteleve, si edhe vetë organizimit tonë që ka të bëjë me kongresin. Hotelet rezervojnë një numër të caktuar dhomash për delegatët tanë dhe mendojnë se ato janë të gjitha të zëna, kur ja, në kohën e kongresit vërejnë se kanë dhoma bosh në hotel. Nëse ky problem vazhdon, ai do të bëhet një pikë kundërshtimi kur me këto hotele të zhvillohen biseda për kongreset e tjera në të ardhmen. Për të shmangur këtë gjë, duhen bërë rezervime vetëm për ato dhoma hoteli ose dhoma strehimi që është e sigurt se do të përdoren. Veç kësaj, nëse një gjë e tillë kërkohet, duhet dhënë kapari i një nate si një garanci për secilën dhomë të rezervuar. Duke vepruar në këtë mënyrë, dhoma do të ruhet edhe në raste të ardhjes me vonesë. Me këtë në mendje, a i kemi dërguar tashmë kaparin hotelit ku jemi regjistruar për të qëndruar?
5 Disa nga hotelet që ofrojnë një mëngjes falas, janë ankuar se vëllezërit tanë po abuzojnë me këtë rregullim, duke marrë sasi të mëdha ushqimi me vete, edhe pasi kanë ngrënë në hotel. Kur një hotel siguron ushqim në mëngjes për mysafirët e tij, kjo gjë duhet konsideruar ashtu siç është, pra, thjesht një mëngjes falas për ata që qëndrojnë atje. Qëllimi nuk është që ta marrim me vete këtë ushqim për ta ngrënë më vonë ose për ta ndarë me miqtë në kongres. Nëse abuzojmë me këtë masë, mund të shkaktojmë që hoteli ta heqë këtë lloj shërbimi, të kërkojë qira më të larta për dhomat ose të refuzojë të bisedojë me ne në të ardhmen.
6 Të bëjmë atë që është e mirë ndaj të gjithëve: Edukata e mirë dhe sjellja shembullore motivohen nga dashuria për Jehovain dhe për të afërmit tanë. (Mat. 22:37-39; Jak. 3:13) Bibla na nxit që të jemi të dashur dhe të tregojmë konsideratë ndaj të gjithë njerëzve. (Gal. 6:10) Ky parim gjen sigurisht zbatim kur qëndrojmë në hotel ose në një vend strehimi me pagesë. Mungesa e gatishmërisë për të bashkëpunuar prish reputacionin që kemi, rrezikon rregullimin tonë për të siguruar hotele dhe vende strehimi me qira më të ulët dhe shkakton lëndim ndjenjash mes vëllezërve. Nëse një hotel ose një strukturë tjetër strehimi vendos që të mos japë më dhoma me një qira më të ulët, mund të bëjë që të ndikohen seriozisht të tjerët që vijnë për të ndjekur kongresin në këtë qytet, veçanërisht, nëse ata nuk kanë mundësi ta përballojnë një qira më të lartë të dhomës.
7 Nëse një dhomë e mirë rezervohet që më përpara dhe anulohet minutën e fundit, do të thotë se një vëllai tjetër i është privuar mundësia për ta pasur atë kur është përpjekur për të bërë një rezervim. Kjo mund ta bëjë vëllanë që të udhëtojë për në një vend më larg ose të pranojë një vend strehimi më pak të dëshirueshëm. A po tregojmë kështu dashuri apo konsideratë? Sa shumë më mirë është që të tregojmë dashuri dhe të bëjmë atë që është e mirë ndaj të tjerëve duke mbajtur parasysh interesat e tyre më të mira dhe jo tonat!—Mat. 7:12; Gjoni 13:34, 35.
8 Ne presim me padurim që të ndjekim Kongresin Krahinor «Zbatues të Fjalës së Perëndisë». A i kemi bërë të gjitha përgatitjet, duke përfshirë rezervimin në hotel ose në vendin e strehimit dhe marrjen e masave për udhëtimin? Sjellja jonë në hotele, në vendet e strehimit dhe në qytetin ku mbahet kongresi, pasqyroftë gjithmonë të vërtetën që është në zemrat tona dhe dashurinë tonë për Krijuesin!