A duam të bëjmë më shumë?
1 Jezui e krahasoi Mbretërinë me thesaret e çmuara. (Mat. 13:44-46) Edhe vepra e përhapjes së lajmit të Mbretërisë është një thesar me vlerë. Ky shërbim meriton vendin e parë në jetën tonë, edhe nëse pjesëmarrja e plotë në të përfshin një masë vetëmohimi. (Mat. 6:19-21) A duam të bëjmë më shumë në shërbimin e Mbretërisë?
2 Të shqyrtojmë këto aspekte thelbësore: Nevojiten disa gjëra për të zgjeruar pjesëmarrjen tonë personale në shërbim: (1) të jemi të vendosur që t’i vëmë interesat e Mbretërisë të parat në jetë (Mat. 6:33); (2) të ushtrojmë besim e të mbështetemi te Jehovai (2 Kor. 4:1, 7); (3) të kërkojmë ndihmën e Perëndisë nëpërmjet lutjeve të sinqerta e këmbëngulëse (Luka 11:8-10); (4) të vazhdojmë deri në fund e të veprojmë në përputhje me lutjet tona.—Jak. 2:14, 17.
3 Mënyra për të zgjeruar shërbimin tonë: Secili prej nesh mund të vërë si synim bazë që të harxhojë rregullisht një sasi kohe në shërbim çdo muaj. Por a kemi menduar që të kërkojmë, gjithashtu, çdo mundësi për të dhënë dëshmi të rastit, duke u përpjekur që të bëjmë prezantime më domethënëse, duke rritur efektshmërinë e rivizitave dhe duke u përpjekur të drejtojmë studime biblike që përparojnë? A mund të jemi në gjendje të shërbejmë si pionierë ndihmës, të rregullt ose atje ku ka më shumë nevojë? Nëse jemi vëllezër të pagëzuar, a mund të vëmë synime për t’u kualifikuar si shërbëtor ndihmës ose plak? (1 Tim. 3:1, 10) A mund ta zgjerojmë shërbimin tonë duke plotësuar kërkesën për të shërbyer në Bethel, për Shkollën e Stërvitjes për Shërbim ose për stërvitjen misionare në Shkollën e Galaadit?—Luka 10:2.
4 Një vëlla që kishte një punë në kohë të plotë dhe që harxhonte shumë kohë në veprimtaritë sportive u nxit që të bëhej pionier i rregullt. Filloi të shërbente si pionier ndihmës e më pas i rregulloi rrethanat që të fillonte shërbimin e plotkohor. Më vonë ndoqi Shkollën e Stërvitjes për Shërbim, e cila e ndihmoi të përgatitej për caktimin që ka sot si mbikëqyrës qarkor. Është shumë i lumtur që iu përgjigj asaj nxitjeje dhe është i sigurt se ndihet shumë më i lumtur nga vendimi që mori për të bërë më shumë në shërbim të Mbretërisë.
5 Jehovai i bekon ata që tregohen të gatshëm për të shërbyer. (Isa. 6:8) Të mos lejojmë asgjë që të na pengojë ta zgjerojmë shërbimin tonë e, si pasojë, të gjejmë edhe më shumë kënaqësi e freski!