Dëshmi e efektshme në vendet publike
1. Si po dëshmojnë në vendet publike të krishterët e sotëm, duke imituar dishepujt e shekullit të parë, dhe me çfarë rezultatesh?
1 Ashtu si dishepujt e hershëm të Jezuit, edhe sot të krishterët përpiqen t’u japin lajmin e mirë njerëzve kudo që të jenë. (Vep. 16:13; 17:17; 20:20, 21) Falë përpjekjeve për të dëshmuar në vendet publike, ata po takojnë njerëz të interesuar që ndoshta s’do të ishin gjetur asnjëherë në shërbimin nga shtëpia në shtëpi.
2. Pse na duhet aftësi dalluese kur japim dëshmi në vendet publike, e si mund të ndihmojmë që të dëshmohet me rregullsi?
2 Kur dëshmojmë në vendet publike, duhet të përdorim aftësi dalluese. Në përgjithësi, më e mira është të predikojmë pa rënë në sy. Për shembull, nëse një numër shumë i madh lajmëtarësh predikojnë në të njëjtin vend ose shkojnë në të njëjtat zona tregtare, disa njerëzve mund t’u rëndojë prania jonë. Kjo i ul dinjitetin veprës dhe mund të na e kufizojë efektshmërinë në shërbim. Çfarë të bëjmë që të mos ndodhë një gjë e tillë? Disa kongregacione që kanë shumë zona ku mund të jepet dëshmi publike, e kanë parë të dobishme t’i organizojnë këto në territore më vete. (1 Kor. 14:40) Gjithashtu, do të ketë më shumë rregull po të predikojmë vetëm në territorin që i është caktuar kongregacionit tonë, përveç rastit kur janë marra masa specifike nga Komiteti i Shërbimit i Kongregacionit, për të ndihmuar një kongregacion tjetër.—Shih Shërbimi ynë i Mbretërisë, nëntor 1998, f. 6, par. 18, 19.
3. Cilën metodë kanë përdorur me sukses disa lajmëtarë, për të dhënë dëshmi në vendet publike?
3 Si t’u afrohemi njerëzve: Kur foli me një grua te një pus, Jezui filloi me një koment të shkurtër dhe gradualisht e zgjeroi bisedën, kur pa interesin e saj. (Gjoni 4:7-26) Në disa rrethana kjo metodë është e efektshme edhe sot. Për të pasur më shumë sukses në dëshminë publike, disa lajmëtarë e kanë parë të nevojshme që minutat e para t’i kalojnë duke përshëndetur njerëzit e duke u interesuar për ta, pastaj të fillojnë t’u flasin për mesazhin e Mbretërisë. Ata bëjnë një koment për një argument me interes për zonën, dhe shpesh kjo pasohet nga një bisedë. Dëgjojnë me vëmendje kur njerëzit shprehin shqetësimet e tyre dhe s’kalon shumë e fillojnë të japin ngushëllim nga Fjala e Perëndisë.—Rom. 15:4.
4. Si mund ta zhvillojmë interesin që gjejmë?
4 Të zhvillojmë interesin: Sa herë bëjmë një bisedë të këndshme, duhet të përpiqemi që të gjejmë mënyra për ta zhvilluar këtë interes. Si ta bëjmë këtë? Kur duket se bisedës po i afrohet fundi, mund të nxjerrim bllokun e shënimeve dhe të themi: «Më pëlqeu biseda që bëmë. A ka ndonjë mënyrë se si ta vazhdojmë një herë tjetër këtë bisedë?» Ose mund të themi: «Dua t’ju jap një revistë, ku ka një artikull që jam i sigurt se do t’ju interesojë. A mund t’jua sjell në shtëpi ose në zyrë?» Disa lajmëtarë, thjesht pyesin: «A mund t’ju marr në telefon në ndonjë numër?» Shpesh, kjo ka sjellë një përgjigje pozitive.
5. Cilin synim duhet të kemi kur japim dëshmi në vendet publike?
5 Shumë njerëz që janë takuar për herë të parë në vendet publike, kanë pranuar një studim biblik. Ky studim mund të drejtohet në shtëpinë e individit, në vendin e punës, në një mjedis të përshtatshëm publik ose me telefon. Le të vëmë si synim të fillojmë studime biblike, ndërkohë që japim dëshmi të efektshme në vendet publike.