Programi i asamblesë speciale njëditore

Syri është një mrekulli për nga mënyra e projektimit. (Psal. 139:14) Megjithatë ai mund të përqendrohet vetëm në një objekt. Kjo është e vërtetë për syrin si në kuptimin fizik, ashtu edhe në kuptimin figurativ. Që të kemi një shikim të qartë dhe pa u shpërqendruar nga ana frymore, duhet që vëmendjen ta përqendrojmë në bërjen e vullnetit të Perëndisë. Duke pasur parasysh shpërqendrimet gjithnjë e në rritje të botës së Satanait, sa i përshtatshëm është programi që do të trajtohet gjatë asamblesë speciale njëditore me temë «Mbajeni syrin të thjeshtë!», e cila do të mbahet gjatë vitit të shërbimit 2006.​—Mat. 6:22.

Çfarë mund të bëjmë që të kemi bekime nga Jehovai? (Prov. 10:22) Kjo pyetje do të marrë përgjigje gjatë pjesës me temë: «Bekimet që korrim kur mbajmë një sy të thjeshtë». Intervistat do të nxjerrin në pah dobitë që mund të kemi po të zbatojmë parimet biblike. Fjalimi i parë me temë «Të mbajmë një sy të thjeshtë në një botë të ligë», që do të mbahet nga oratori vizitues, do të na japë disa paralajmërime për gjërat që na e ndërlikojnë jetën dhe që pak nga pak bëhen pengesë për përparimin tonë frymor. Gjithashtu do të mësojmë se çfarë përfshihet në «pjesën e mirë» që duhet të zgjedhim.​—Luka 10:42.

Si mund t’i inkurajojnë prindërit dhe të tjerët të rinjtë që këta të përqendrohen në synimet frymore? Disa prindër dhe të rinj do të komentojnë në lidhje me këtë pyetje të rëndësishme gjatë pjesëve me temë «Prindër që i drejtojnë mirë shigjetat e tyre» dhe «Të rinj që kanë synime frymore». (Psal. 127:4) Në fjalimin përmbyllës, oratori vizitues do të tregojë se si mund të ecim në një hap me organizatën e Jehovait si individë, si familje dhe si kongregacion.

Edhe nëse jemi prej pak kohësh apo prej dekadash në të vërtetën, është shumë e rëndësishme që ‘ta mbajmë syrin tonë të thjeshtë’. Programi i asamblesë speciale njëditore do të jetë një ndihmë e madhe në këtë drejtim.