Programi i asamblesë së re speciale njëditore

«Bëhuni tërësisht të rritur në aftësitë për të kuptuar.» Kjo është tema e programit të asamblesë speciale njëditore që do të fillojë të mbahet nga shtatori i vitit 2000. (1 Kor. 14:20) Pse do të jetë e vlefshme që të marrim pjesë në të? Jetojmë në një botë të mbushur me ligësi. Për t’i rezistuar asaj, duhet të zhvillojmë aftësitë tona të kuptueshmërisë frymore, në mënyrë që të mund ta mposhtim të ligën me të mirën. Për ta bërë këtë gjë do të na ndihmojë programi i asamblesë speciale njëditore.

Në sesionin e hapjes, mbikëqyrësi qarkor do të trajtojë temën «Ndihmë për t’u bërë tërësisht të rritur në kuptueshmërinë e Biblës». Ai do të na tregojë se si të bëhemi të qëndrueshëm në besimin e krishterë. Oratori vizitues do të nënvizojë faktin se si përdorimi aktual ose zbatimi i parimeve biblike është jetësor për të zhvilluar një perceptim të thellë, ndërsa do të flasë për temën «Ruani gjendjen frymore duke stërvitur aftësitë tuaja perceptuese».

Të rinjtë, gjithashtu, duhet t’i zhvillojnë aftësitë për të kuptuar. Kjo do të trajtohet në pjesën «Përse të jemi foshnja për sa i takon së keqes?» dhe «Të rinj që fitojnë kuptueshmëri tani». Dëgjojini të rinjtë që tregojnë se çfarë po bëjnë për ta forcuar veten e tyre frymësisht, në mënyrë që të mund të frenojnë çdo lloj kurioziteti rreth aktiviteteve të liga të botës dhe të shmangin telashet.

Si mund të gjejmë lumturi më të madhe në jetë? Oratori vizitues do ta shpjegojë këtë në fjalimin përmbyllës «Nxirrni dobi duke i zbatuar parimet biblike me kuptueshmëri». Ai do të japë shembuj për të treguar se zbatimi i Fjalës së Perëndisë na ndihmon që të përballojmë problemet, të marrim vendime dhe të nxjerrim me të vërtetë dobi nga ajo që po na mëson Jehovai.

Ata që në këtë asamble dëshirojnë ta simbolizojnë dedikimin e tyre ndaj Perëndisë, me anë të pagëzimit në ujë, duhet të njoftojnë sa më shpejt që të jetë e mundur mbikëqyrësin drejtues. Shënoni në kalendar, me t’u njoftuar, datën e asamblesë speciale njëditore, dhe bëni plane të qarta për të nxjerrë dobi nga ky program i pasur. Mos mungoni në asnjë pjesë të asamblesë speciale njëditore! Ajo do t’ju forcojë që t’i bëni ballë këtij sistemi të lig dhe që të qëndroni besnikë ndaj Jehovait.