Të vizitojmë të gjithë ata që tregojnë njëfarë interesi
1 Shumë prej nesh sot janë në të vërtetën, sepse dikush vuri re reagimin tonë pozitiv ndaj mesazhit të Mbretërisë dhe tregoi durim duke u kthyer, ndoshta disa herë, për të kultivuar interesin tonë. Po kështu edhe ne, në mënyrë të ndërgjegjshme, duhet të kthehemi tek ata që tregojnë njëfarë interesi. Vërtet, rivizitat janë pjesë e detyrës sonë ‘për të bërë dishepuj’.—Mat. 28:19, 20.
2 Të dallojmë interesin e treguar: Edhe nëse dikush nuk e pranon literaturën tonë, shprehjet e fytyrës, toni i zërit dhe fjalët e tij mund të jenë shenjë e njëfarë vlerësimi për mesazhin e Mbretërisë. Duke marrë shkas nga këto, mund ta vizitojmë përsëri. Një vëlla e vizitoi dikë për pesë javë me radhë pa lënë asnjë botim. Herën e gjashtë ai pranoi botimin që iu ofrua dhe më vonë pranoi edhe një studim biblik.
3 Nëse vëreni njëfarë interesi, kthehuni pa humbur kohë, ndoshta pas pak ditësh. Mos i jepni mundësi ‘të ligut’ të rrëmbejë atë që është mbjellë në zemrën e atij njeriu. (Mat. 13:19) Bëni çmos që ta mbani fjalën e të ktheheni pikërisht atëherë kur i keni premtuar.—Mat. 5:37.
4 Në shërbimin rrugor: A përpiqeni të ndiqni interesin e atyre që takoni gjatë shërbimit rrugor ose kur jepni dëshmi joformale? Në fund të bisedës mund të thoni: «Më pëlqeu biseda me ju. Ku mund t’ju gjej që të flasim përsëri?» Kur është e përshtatshme, disa lajmëtarë mund të zgjedhin që t’i japin të interesuarit numrin e telefonit ose t’i kërkojnë të shkëmbejnë numrat e telefonit. Nëse njerëzit shohin që dilni rregullisht dhe në të njëjtën rrugë për të predikuar, mund të mos druhen t’ju japin numrin e telefonit ose adresën. Edhe në qoftë se nuk dëshirojnë t’ua japin këto informacione, mund të vazhdoni të nxisni interesin e tyre herën tjetër, kur t’i takoni në rrugë.
5 Mbushemi me gëzim kur shohim që çelin lulet për të cilat jemi kujdesur. Po kështu, mund të gëzohemi jashtë mase duke i rivizituar dhe duke i ndihmuar të tjerët të përparojnë nga ana frymore. (1 Kor. 3:6) Vini si synim që t’i rivizitoni të gjithë ata që tregojnë njëfarë interesi.