Dëshmia me telefon mund të jetë e efektshme
1. Pse dëshmia me telefon mund të shihet si pjesë e rëndësishme e shërbimit?
1 Pse ta shqyrtojmë si mundësi për shërbimin tonë dhënien e dëshmisë me telefon? Sepse është një nga mënyrat se si i ndihmojmë të tjerët të marrin njohuri të saktë që të shpëtojnë. (2 Pjet. 3:9) Ndonëse si metodë kryesore për të shpallur lajmin e mirë për Mbretërinë e Perëndisë kemi predikimin shtëpi më shtëpi, me gatishmëri përdorim edhe metoda të tjera që të flasim me ata që s’i gjejmë në shtëpi.—Mat. 24:14; Luka 10:1-7; Zbul. 14:6.
2. Si organizohet dëshmia me telefon?
2 Si organizohet: Siç bëhet për shërbimin shtëpi më shtëpi, edhe për dëshminë me telefon lajmëtarëve u jepet një territor. Dëshmia me telefon mund të bëhet vetëm ose me një grup të vogël me ndoshta dy a tre veta. Vendi që përdoret duhet të jetë i përshtatshëm për këtë punë. Shumë veta e kanë parë të dobishme të ulen në tryezë dhe të kenë përpara botimet që normalisht i përdorin kur predikojnë shtëpi më shtëpi.
3. Ç’duhet të mbajmë parasysh kur japim dëshmi me telefon?
3 Si të japësh dëshmi me telefon: Kur dëshmojmë me telefon, prezantimi duhet të jetë në stil bisedor. Disa që janë fillestarë në këtë vepër, mund t’i lexojnë një prezantim të zotit të shtëpisë, por me ton bisedor. Për këtë mund të shërbejnë prezantimet te libri Të arsyetojmë, te Shërbimi ynë i Mbretërisë dhe te fletushka A do të dish të vërtetën? Kur të përgatitësh prezantimin tënd, përcakto një temë, një pyetje dhe ji gati të lexosh disa shkrime që japin përgjigjen. Në përgjithësi mund të ofrosh të njëjtat botime që ofrohen shtëpi më shtëpi. Mbaj parasysh këta përkujtues: ji i çlirët e fol ngadalë. Ji i sjellshëm, i duruar e miqësor, sepse kjo dallohet në telefon. Dëgjoje të zotin e shtëpisë ndërsa shpreh mendimet, pastaj thuaji se e kupton dhe i vlerëson ato. Kujdes të mos përmendësh rregullin e kontributeve, pasi kjo mund të keqkuptohet si shitje nëpërmjet telefonit.
4. Çfarë mundësie na jep dëshmia me telefon lidhur me territorin që na është caktuar?
4 Ai me të cilin po flitni në telefon mund të jetë i ngujuar në shtëpi për shkak të sëmundjes ose dikush që s’e takojmë dot gjatë predikimit shtëpi më shtëpi, për shkak të orarit të punës. Të tjerë jetojnë në lagje të rrethuara e me roja ose në pallate me dyer të mbyllura në hyrje. Prandaj, për ta kryer në mënyrë më të plotë shërbimin, shqyrtoni mundësinë që të përdorni edhe metodën e efektshme të dëshmisë me telefon.