Jemi Dëshmitarë gjithë kohën
1. Ç’mund të mësojmë nga rasti kur Jezui i predikoi gruas te pusi?
1 Jezui kishte ecur me orë të tëra. Ishte i lodhur dhe i etur. Kur dishepujt shkuan të blinin diçka për të ngrënë, ai u ul për të pushuar pranë një pusi jashtë një qyteti të Samarisë. Jezui nuk ishte në Samari për të predikuar; thjesht i ra rruga andej duke shkuar për në Galile, që të vazhdonte shërbimin atje. Pavarësisht nga kjo, ai shfrytëzoi rastin për t’i dhënë dëshmi një gruaje që po mbushte ujë. (Gjoni 4:5-14) Pse? Jezui ishte vazhdimisht «dëshmitari i besueshëm dhe i vërtetë» i Jehovait. (Zbul. 3:14) E imitojmë Jezuin duke qenë Dëshmitarë të Jehovait gjithë kohën.—1 Pjet. 2:21.
2. Si mund të jemi të përgatitur për të dhënë dëshmi joformale?
2 Të jemi të përgatitur: Mund të jemi të përgatitur për të dhënë dëshmi joformale nëse mbajmë literaturë me vete. Shumë lajmëtarë mbajnë fletushka me vete dhe ua lënë shitësve në dyqane, punonjësve në pikat e karburantit dhe të tjerëve që takojnë gjatë ditës. (Ekl. 11:6) Një motër që udhëton shpesh, sigurohet që të ketë gjithmonë në çantë një Bibël të vogël e librin Çfarë mëson vërtet Bibla? dhe përpiqet të hyjë në bisedë me ata që janë ulur afër.
3. Si mund të nisim një bisedë?
3 Të fillojmë një bisedë: Kur japim dëshmi në mënyrë joformale, nuk është e thënë të prezantojmë një temë biblike që në fillim. Jezui nuk e filloi bisedën me gruan te pusi duke u prezantuar si Mesia. Ai thjesht i kërkoi ujë duke i zgjuar kureshtjen. (Gjoni 4:7-9) Një motër zbuloi se një mënyrë e ngjashme i jep mundësi të fillojë një bisedë kur e pyesin nëse u kënaq gjatë një feste. Në vend që të përgjigjet se nuk u përfshi në atë festë ngaqë është Dëshmitare e Jehovait, ajo thotë: «Unë vetë kam vendosur të mos e festoj.» Nga kureshtja, bashkëbiseduesi zakonisht e pyet përse dhe pastaj motra ka mundësi t’i japë dëshmi.
4. Për çfarë të nxit Mateu 28:18-20?
4 Edhe pse Jezui nuk është më në tokë duke shërbyer me zell, ai vazhdon të interesohet që vepra e predikimit të bëhet siç e bëri ai. (Mat. 28:18-20) Prandaj, ashtu si Modeli ynë, Jezui, ne jemi Dëshmitarë të gatshëm për të shpallur publikisht besimin tonë në çdo kohë.—Hebr. 10:23.