Si të japim dëshmi me stenda

Dëshmia me stenda po tregon se është mjaft e efektshme për t’u dhënë të vërtetën njerëzve me zemër të sinqertë. (Gjoni 6:44) Prandaj, pleqtë janë inkurajuar të organizojnë dhënien e dëshmisë me stenda në vende publike brenda territorit të kongregacionit ku ka shumë kalimtarë. Meqë stendat janë të lëvizshme, në përgjithësi nuk ka nevojë që të marrim leje nga autoritetet. Kush kualifikohet për të marrë pjesë? Ata lajmëtarë që tregojnë se kanë gjykim të mirë, sillen me dinjitet dhe kanë aftësi të mira komunikuese. Më poshtë tregohet çfarë duhet ose nuk duhet të bëjnë lajmëtarët që të kenë sukses.

Çfarë duhet bërë:

Ji miqësor, i ngrohtë dhe i gjindshëm me kalimtarët. Disa lajmëtarë buzëqeshin me ngrohtësi e me gjithë zemër dhe përshëndetin në mënyrë miqësore. Nëse dikush sheh nga stenda ndërsa kalon, mund t’i thuash: «Mund të marrësh diçka, nëse do.»
Qëndro në distancën e duhur nga stenda. Në disa vende lajmëtarët kanë sukses nëse qëndrojnë rreth një metër larg saj. Kurse të tjerë thonë se kjo i bën disa kalimtarë të ngurrojnë të ndalojnë, prandaj qëndrojnë edhe pak më larg dhe presin derisa dikush ndalon te stenda. Sapo i afrohet stendës, përpiqen ta përfshijnë në bisedë, ndoshta duke e pyetur: «A keni menduar ndonjëherë për këtë pyetje?»
Përdore Biblën sa më shumë.
Tregoji për mundësinë e studimit biblik çdokujt që merr një nga botimet për studim, si libri Çfarë mëson vërtet Bibla. Pyete nëse dëshiron të shohë videon Pse ta studiosh Biblën? në një pajisje elektronike.
Përpiqu t’u marrësh të interesuarve ndonjë informacion për t’i kontaktuar, po të jetë e mundur. Nëse nuk banojnë në territorin tënd, plotëso formularin Ju lutemi, ndiqni interesin (S-43) dhe jepja sa më shpejt sekretarit.