U sa ta dë waiwai a di ten aki
WAN daka o dou ka sëmbë an o ta siki möön, de an o ta gaandi möön, söseei de an o ta dëdë möön tu. Iseei sa feni di lö libi dë tu! Ma a di ten aki, hii u tuu ta abi sömëni bookohedi ku fuka. Ma andi sa heepi i? Wë di Bëibel sa heepi i fii sa abi wan suti libi di ta da piizii a di ten aki kaa. Boo taki u so u dee bookohedi dee u ta abi, söseei unfa di Bëibel sa heepi u.
DË TIFEEDI KU DEE SONI DEE I ABI
Di soni di di Bëibel ta taki: „Wan musu lobi möni te a kisi unu buta nëën basu e, ma un musu ta [dë tifeedi] ku dee soni un abi kaa.”—Hebelejën 13:5.
Sömëni soni dë a di ten aki di sëmbë ta taki taa u musu u abi. Ma di Bëibel ta piki u taa u sa ta dë ’tifeedi ku dee soni dee u abi kaa’. Unfa u sa du di soni aki?
Ja musu ko „lobi möni.” Sëmbë ta du hii pei soni u di de abi „langawojo u möni”. U di de ta ko abi langawojo u möni, mbei de an ta booko de hedi ku dee famii u de möön, de an ta booko de hedi ku dee mati u de möön, söseei de ta du peipei soni di an fiti u möni hedi (1 Timoteo 6:10). An fiti u du dee soni dë u möni hedi! Te wan sëmbë lobi möni, „nöö di möni di a ta feni seei an o tjikëën.”—Peleikima 5:10.
Sëmbë dii möön dee soni u di goonliba. Dee soni di de ta mbei a di goonliba aki da soni di ta heepi u seei. Ma dee soni dë an sa lobi u, söseei de an sa tei dee soni di u ta du u bigi. Libisëmbë wanwan tö sa du dee soni dee u kai dë. Te u abi „wan tuutuu mati”, nöö woo sa ta dë tifeedi ku di libi di u abi.—Nöngö 17:17.
U SA TA DË WAIWAI A DI TEN AKI TE U TA DU DEE SONI DI DI BËIBEL TA PIKI U FUU DU
HOI DOU TE I DË KU SUWAKI
Di soni di di Bëibel ta taki: „Wan [sëmbë] hati di ta dë waiwai, bunu kuma deesi.”—Nöngö 17:22.
Te u ta dë waiwai, nöö di soni dë sa dë kuma wan „bunu deesi” di sa heepi u fuu hoi dou te u ta dë ku suwaki.” Ma andi sa heepi u fuu sa ta dë waiwai te u dë ku suwaki?
Tei soni u bigi. Ee dee bookohedi fuu nöö u ta pakisei, nöö a o ta djei kuma „hii daka” ta hogi da u seei (Nöngö 15:15). Ma di Bëibel ta piki u taa u musu „ta da Gadu tangi nöömö” (Kolosën 3:15). Tei dee bunu soni dee i ta feni u bigi, aluwasi fa de piki. Wai ku dee waiti soni di Gadu mbei. I sa ta luku unfa liba ala ta dë te sonu nango, nasö i sa buta pakisei a di fasi fa wan suti ventu ta böö, nasö te wan sëmbë di i lobi lafu da i. Dee soni aki sa mbei di libi ta ko möön suti da i.
Du soni da wotowan. Aluwasi i ta dë ku suwaki, tökuseei hoi a pakisei taa „dee sëmbë ta da sëmbë soni, de dë waiwai möön leki dee sëmbë ta feni” (Tjabukama 20:35). Te wotowan ta lei taa de tei dee soni dee u du da de u bigi, nöö woo ta möön dë waiwai, nöö wa o ta booko u hedi ku dee fuka fuu tumisi. Soni sa waka möön bunu a di libi fuu te u ta heepi wotowan u soni waka bunu a de libi.
SONI SA WAKA MÖÖN BUNU A DI TÖÖU LIBI FII
Di soni di di Bëibel ta taki: „Ko sabi andi da dee möön fanöudu soni.”—Filipi 1:10.
Te womi ku mujëë di tööu an ta du soni makandi wan apaiti, nöö a sa mbei de an dë mati sö möön. De musu ta si di tööu libi u de kuma wan u dee möön fanöudu soni a de libi.
Un du soni makandi. A dë wan bunu soni fuun du soni makandi. Di Bëibel ta taki taa: „Tu sëmbë bunu möön wan kodo” (Peleikima 4:9). Un sa ta boi soni makandi, un sa ta sport makandi, un sa nango ta köi makandi, nasö un sa ta du woto soni makandi.
Lei i manu nasö i mujëë fa i lobi ën tjika. Di Bëibel ta da wan womi ku hën mujëë taanga u de ta lobi deseei, söseei u de ta lesipeki de na de (Efeise 5:28, 33). Soni sa ta waka möön bunu a di tööu libi fii, te i abi di guwenti u ta lafu da di manu nasö di mujëë fii, te i ta baasëën, nasö te i ta dëën kado. Womi ku mujëë di tööu nöö sa ta duumi ku deseei.—Hebelejën 13:4.