I musu ta begi nöömö u Gadu feni i bunu

Gadu da libisëmbë di gaandi u de sa ta fan ku ën, sö taa de sa ta konda dëën unfa de ta fii te de ta begi ën. Di tjabukama u Gadu de kai Dafiti bi begi taa: „I da di sëmbë di ta haika begi. A i hii pei sëmbë o ta ko suku heepi” (Psalöm 65:2). Ma unfa u musu begi u Gadu sa haika u?

BEGI KU SAKAFASI, SÖSEEI KU HII I HATI

Te i ta begi Gadu, nöö i sa ta ’konda hii dee soni dee dë a i hati dëën’ (Psalöm 62:8). Di makiti Gadu u mundu lobi te sëmbë ta begi ën ku hii de hati.

KAI DI NË U GADU TE I TA BEGI ËN

Hii fa de ta kai Gadu a peipei fasi, tökuseei a abi wan kodo në nöö. A ta piki u taa: „Mi da Jehovah. Mi në di dë” (Jesaaja 42:8). Di në Jehovah dë u feni söwan 7000 toon a di Wöutu fëën. Sömëni u dee tjabukama bi ta kai di në u Gadu te de bi ta begi ën. Abahamu bi taki taa: „Gaantangi Jehovah, . . . Be mi taki wan soni möön” (Kenesesi 18:30). Useei musu ta kai di në u Gadu, te u ta begi.

I SA BEGI A DI TÖNGÖ DI I TA FAN

Gadu ta fusutan unfa u ta pakisei, söseei a ta fusutan unfa u ta fii, aluwasi un töngö u ta fan. Di Wöutu fëën ta lei taa: „Gadu an ta luku fesi. A ta si hii sëmbë di wan fasi. Biga ee wan sëmbë i ta lesipeki ën ta libi bunu nëën wojo, nöö a o tei i ko sëmbë fëën kaa.”​—Tjabukama 10:34, 35.

Ma ee u kë feni gaan bunu u Gadu, nöö u musu du wan woto soni tu, boiti begi. A di woto di ta ko, woo luku andi da di woto soni di u musu du.