Dee sëmbë dee ta piki Gadu buka o feni gaan bunu

Di tjabukama u Gadu de kai Mosesi bi taki taa ee u ta hoi dee wëti u Gadu, nöö woo feni gaan bunu (Detolonomi 10:13; 11:27). Wa ta piki Gadu buka u di u ta fëëë taa a o sitaafu u. Te u luku dee fasi dee Gadu abi, nöö u ta kë piki hën buka u di u lobi ën, söseei u di wa kë du soni di o hati ën. Di Wöutu fëën ta piki u taa: „Ee u lobi Masa Gadu tuu, nöö woo hoi dee wëti fëën dee a da u fuu hoi.”​—1 Johanisi 5:3.

Unfa di piki di u ta piki Gadu buka ta tja wini ko da u? Boo luku tu fasi.

1. WOO KO KÖNI TE U TA PIKI GADU BUKA

„Mi Jehovah, da i Gadu. Mi da di sëmbë di ta lei i sö taa i sa feni bunu, . . . di ta tii i ka i musu waka.”​—JESAAJA 48:17.

Jehovah di Gadu di mbei u, sabi u, söseei a ta da u andi u abi fanöudu. Ee u kë taa dee soni dee Jehovah ta lei u ku di Buku fëën, heepi u fuu du bunu soni, nöö u musu sabi andi Jehovah kë fuu du, nöö u du de tu.

2. WOO TA DË WAIWAI TE U TA PIKI GADU BUKA

„Dee sëmbë dee ta jei di Wöutu u Masa Gadu ta piki ën buka, de ta dë waiwai!”​—LUKASI 11:28.

A di ten aki, milionmilion sëmbë di ta piki Gadu buka ta dë waiwai. Luku di woto u wan womi di ta libi a Sipanjöluköndë. Hati fëën bi ta boonu hesi, nöö a bi lo’ u hogi da sëmbë, te kisi hën mujëë seei tu. Wan daka a bi lesi soni u Josëfu a wan u dee buku di di tjabukama Mosesi bi sikifi. Josëfu bi dë wan u dee mii u Jakopu, nöö a bi abi sakafasi. De bi sei Josëfu kuma saafu hën de bi butëën a dunguwosu, ma tökuseei a bi lei taa a abi sakafasi, an bi mbei toobi, söseei a bi ta da wotowan paadon (Kenesesi, kapitë 37-45). Di womi aki bi taki taa: „Te mi ta pakisei di woto u Josëfu, nöo a ta heepi mi u ko abi sakafasi, ku bunufasi, söseei a ta heepi mi u mi sa ta duwengi miseei. Di soni aki ta mbei taa mi ta dë waiwai nöunöu.

Di Buku u Gadu ta lei u unfa u musu libi ku woto sëmbë. A di woto di ta ko woo taki möön hia soni fëën.