Köni be soni an mbei i du zöndu

1-2. (a) Andi Jesosi bi heepi dee bakama fëën u de fusutan? (b) Faandi mbei dee bakama u Jesosi bi kule go disëën? (Luku dee peentje tu.)

JESOSI bi piki dee bakama fëën taa: „Mi sabi taa hati fuunu kë du kumafa a fiti, ma wan taanga sö” (Mat. 26:41b). Jesosi ta lei u ku di soni di a bi taki dë, taa a bi ta fusutan unfa u dë zöndu libisëmbë tjika. Ma di soni dë ta lei u wan woto soni tu: Wa musu ta futoou useei poi. U sa taki taa a di seei ndeti dë, dee bakama u Jesosi bi naki maun a hati, u lei unfa de an bi o go disa di Masa u de tjika (Mat. 26:35). De bi kë du soni kumafa a fiti. Ma de an bi fusutan taa hesihesi seei de bi o sa misi du soni di an bunu, te tesi miti de. Fëën mbei Jesosi bi piki de taa: „Un dë ku wojo e, nöö un begi taanga be wan du zöndu te soni pooba unu.”​—Mat. 26:41a.

² Ma a tjali seei taa dee bakama u Jesosi an bi du di soni di Jesosi bi piki de u de du. De bi fika ku Jesosi ö? Naa de bi kule go disëën di sëmbë bi ko kisi ën? U di de an bi ta köni, mbei de bi du di soni di de bi taki taa de an bi o du nöiti. De bi go disa Jesosi.​—Mat. 26:56.

3. (a) Faandi mbei wa musu ta futoou useei poi, ee u kë hoi useei a Jehovah? (b) Andi woo luku a di woto aki?

³ Wa musu ta futoou useei poi. Tuu taa u dë kabakaba u mbei hii möiti u soni an puu u a di pasi u Jehovah. Ma u da zöndu libisëmbë, nöö soni sa mbei u go du zöndu (Lom. 5:12; 7:21-23). Hesihesi seei soni sa mbei u go du zöndu. Ee u kë hoi useei a Jehovah ku di Womi Mii fëën, nöö u musu ta köni ku soni di sa mbei u go du zöndu. Di woto aki sa heepi u fuu du di soni dë. Woo luku fosu ku un soni u musu ta möön köni. Baka di dë, nöö woo luku unfa u sa köni be soni an mbei u go du zöndu. Te u kaba fëën, nöö woo luku unfa u sa ta dë ku wojo go dou.

KU UN SONI U MUSU TA MÖÖN KÖNI?

4-5. Faandi mbei u musu ta köni fu wa du pikipiki zöndu tu?

⁴ Pikipiki zöndu di u ta du seei sa mbei u ku Jehovah an ko dë mati sö möön. Boiti di dë, de sa mbei u go du möön gaan soni seei.

⁵ Soni ta pooba hii u tuu. Ma hiniwan fuu abi fëën suwakifasi. Fëën mbei so soni o sa ta mbei a ta möön taanga da u fuu hoi useei a Jehovah. Kandë a sa ta taanga da wan sëmbë fu an libi fanafiti libi a di sëmbë u manu ku mujëë soni. A sa ta taanga da wan wotowan faa hoi hënseei fu an du soni di an fiti, kuma di pëë di sëmbë ta pëë ku de sen kamian, nasö di luku di sëmbë ta luku fanafiti soni a di së u manu ku mujëë. A sa ta taanga da so sëmbë u de an fëëë libisëmbë, u de an ko abi gaanfasi, u hati u de a ta boonu hesi, nasö woto soni. U ta fusutan faandi mbei Jakobosi bi taki taa ’dee taku hangi dee dë leti a u hati dë, de wë ta hai u fuu du hogi’.​—Jak. 1:14.

6. Na un soni wa musu ganjan useei?

⁶ I sabi andi ta mbei a möön taanga da i fii hoi iseei fu ja du zöndu ö? Soni an o waka bunu da u ee u ta ganjan useei taa wa abi suwakifasi, nasö ee u ta si kuma u taanga tjika fuu sa hoi useei fu wa du zöndu (1 Joh. 1:8). Paulosu bi taki taa sëmbë di ko gaangaan sëmbë a di biibi seei sa du zöndu ee de an köni (Gal. 6:1). Wa musu ganjan useei, ma u musu sabi naasë wa taanga tjika.​—2 Kol. 13:5.

7. Ku andi u musu ta möön köni? Konda wan woto.

⁷ Andi u musu du, te u ko sabi kaa andi sa möön mbei an taanga da u fuu hoi useei, fu wa du zöndu? U musu mbei möiti fuu ko ta möön duwengi useei a dee pisi dë! Buta pakisei a di woto aki: Na awooten, di pisi u wan peni di an bi ta kaba taanga sö, bi ta dë dee gaandöö fëën. Fëën mbei möön hia sëmbë bi ta hoi wakiti a dee gaandöö u di foto. Wë sö nöö soni musu dë da u tu. U musu ta möön köni ku soni di u sabi taa sa mbei u go du zöndu.​—1 Kol. 9:27.

UNFA U SA KÖNI BE SONI AN MBEI U GO DU ZÖNDU

8-9. Unfa di njönku kijoo di Nöngö kapitë 7 ta taki soni fëën, bi sa köni fu an go du wan gaan zöndu? (Nöngö 7:8, 9, 13, 14, 21)

⁸ Unfa u sa ta köni be wa du zöndu? Luku andi u sa lei a di njönku kijoo di Nöngö kapitë 7 ta taki soni fëën. A bi du fanafiti soni ku wan mujëë di ta libi fanafiti libi. Vers 22 ta taki taa ’te u di njönku kijoo mëni’, hën a bigi waka a di mujëë baka. Ma kumafa u ta si a dee vers ufö di dë, nöö sömëni pikipiki soni bi pasa ufö a ko pasa taa di njönku kijoo go du zöndu.

⁹ Andi bi mbei taa a bi go du zöndu? Di fosu soni, hën da a „bi waka pasa zuntu ku tjontjon u di pasi ka di mujëë ta dë”, nöö sonu bi nango kaa. Baka di dë, hën a waka go a di së u di wosu u di mujëë. (Lesi Nöngö 7:8, 9.) Bakaten, di a si di mujëë, hën an bi bia toona. Ma a bi disëën be a bosi ën, söseei a bi haika di a bi ta konda dëën unfa a bi tja soni go tjuma da Gadu. Kandë di mujëë bi ta piki ën di soni dë, u di a bi kë faa si taa hën na wan hogihati sëmbë. (Lesi Nöngö 7:13, 14, 21.) Ee di njönku kijoo aki bi köni fu an mbei dee föutu dee u taki dë, nöö soni an bi o hai ën faa go du zöndu, nöö an bi o du zöndu tu.

10. Unfa wan sëmbë sa mbei di seei föutu di di njönku kijoo bi mbei?

¹⁰ Di woto di Salumon bi konda, ta heepi u fuu fusutan andi sa pasa ku hiniwan u dee dinima u Jehovah. Wan dinima u Jehovah sa du wan gaan zöndu, nöö a ko ta fii bakaten kuma di soni pasa ku ën „wan pasi vou” sö. Nasö a sa taki taa: „Miseei an fusutan möön e.” Ma ee a kai pakisei a di soni di pasa, nöö a sa ko si taa a mbei wanlö pikipiki föutu, di mbei taa a go du wan gaan zöndu. Dee föutu dë sa dë taa a bi ta hulu sëmbë di an lobi Jehovah, a bi ta piizii a wan fasi di an fiti, nasö kandë a bi nango a website ku kamian di an bunu da Keesitu sëmbë. A kan tu taa an bi ta begi möön, an bi ta lesi Bëibel möön, an bi nango a dee komakandi möön, nasö an bi nango a di peleikiwooko möön. Hën da te i luku ën te i kaba, nöö i ta ko si taa di soni di bi miti di njönku kijoo hën wë miti ën. An bi du zöndu wan pasi vou sö, ma a bi mbei wanlö pikipiki föutu a fesi ufö.

11. Ku andi u musu ta köni sö taa wa du zöndu?

¹¹ Andi u ta lei a di soni dë? U musu ta köni fu wa du zöndu. Ma u musu ta köni tu fu wa du dee soni dee sa mbei taa u go du zöndu. Di soni dë Salumon seei bi taki, baka di a bi konda di woto u di njönku kijoo ku di fanafiti mujëë. A bi taki taa: „Na go ka [di mujëë aki] nango” (Nöng. 7:25). A bi taki tu taa: „Na go zuntu ku di mujëë aki. Na go zuntu ku di dööbuka fëën” (Nöng. 5:3, 8). Awa, u ta köni fu wa du zöndu, te u ta mbei hii möiti fu wa go zuntu ku soni di sa mbei taa u go du zöndu.a Di soni aki kë taki taa aluwasi ee wan soni an föutu da Keesitu sëmbë, tökuseei woo ta köni fu wa du ën ee u sabi taa a sa mbei u go du soni di an bunu.​—Mat. 5:29, 30.

12. Andi Jöpu bi buta da hënseei taa an bi o du, nöö unfa di soni dë bi o heepi ën fu an go du zöndu? (Jöpu 31:1)

¹² Fuu sa koti pasi da soni di sa mbei u go du zöndu, nöö u musu buta da useei taa woo ta köni. Di soni dë Jöpu bi du. A „bi mbei wan buka ku hën wojo”, taa nöiti a o luku wan mujëë di an dë mujëë fëën kuma a kë ën. (Lesi Jöpu 31:1.) Di soni di a bi buta taa a o du dë, bi o heepi ën fu an waka da hën mujëë. Useei sa buta da useei taa woo ta koti pasi da hiniwan soni di sa mbei u go du zöndu.

13. Faandi mbei u musu ta köni ku dee soni dee u ta pakisei? (Luku dee peentje tu.)

¹³ U musu ta köni ku dee soni dee u ta pakisei tu (Ëki. 20:17). So sëmbë ta si kuma an hogi ee wan sëmbë ta pakisei soni di an fiti, solanga na du a ta du de. Ma di lö fasi u si soni dë an bunu. Te wan sëmbë ta dë ta pakisei wan soni di an bunu, nöö a ta kë möön du di soni dë. Fuu taki ën, nöö di sëmbë ta mbei di fii u du di soni dë ko möön taanga, nöö a ta ko dë faa ta mbei taanga möiti fu an du ën. A dë sö tuu taa so juu soni di an bunu o ta ko a u pakisei. Ma di soni di u musu du, hën da u musu ta puu dee soni dë a u pakisei wantewante, nöö u bia pakisei bumbuu soni. Te u ta du sö, nöö wa o da taku pakisei pasi u de mbei lutu a u hati. Ee nasö de sa mbei a taanga da u fuu duwengi useei, nöö de sa mbei u go du wan gaan zöndu.​—Fil. 4:8; Kol. 3:2; Jak. 1:13-15.

14. Un woto soni sa heepi u, u soni an mbei u go du zöndu?

¹⁴ Un woto soni u sa du, u soni an mbei u go du zöndu? U musu dë seiki, taa hii juu soni o ta waka bunu da u te u ta hoi dee wëti u Jehovah. So juu a o ta taanga da u fuu mbei dee soni dee u ta pakisei, ku dee soni dee u ta kë, kai ku Gadu. Ma te u mbei di möiti dë, nöö woo dë bööböö.

15. Unfa di mbei di woo mbei möiti fuu ta kë soni di bunu, o heepi u fu wa du zöndu?

¹⁵ U musu mbei möiti fuu ta kë soni di bunu. Ee u mbei möiti fuu ko ta ’buuse soni di an bunu, nöö u ko lobi soni di bunu’, nöö woo ko ta möön fii u du soni di bunu, söseei woo ko ta möön fii u koti pasi da soni di sa mbei u go du zöndu (Amös. 5:15). Te u ta kë soni di bunu, nöö an o ta taanga da u sö fuu duwengi useei te wan soni ko a u wan pasi vou sö, di sa mbei u go du zöndu.

16. Unfa di du di woo ta du soni di nama ku Gadu, sa heepi u fu wa du zöndu? (Luku dee peentje tu.)

¹⁶ Andi u sa du fuu ko ta kë soni di bunu? U musu ta mbei möiti ka u sa mbei dou, fuu ta du soni di nama ku Gadu. Te u dë a dee komakandi nasö a di peleikiwooko, nöö an ta pasa hesihesi taa soni ta hai u fuu go du zöndu. Ma u ta möön fii u du soni di ta kai ku Jehovah (Mat. 28:19, 20; Heb. 10:24, 25). Te u ta lesi di Wöutu u Gadu, ta öndösuku soni nëën, ta kai pakisei a dee soni dee u ta lesi, nöö u ta ko möön lobi soni di bunu, nöö u ta ko ta möön buuse soni di an bunu (Jos. 1:8; Ps. 1:2, 3; 119:97, 101). Hoi a pakisei taa Jesosi bi piki dee bakama fëën taa: „Un begi taanga be wan du zöndu te soni pooba unu” (Mat. 26:41). Te u ta tei ten ta begi di Tata fuu di dë a liba ala, nöö u ta dëën pasi faa heepi u. A sö wan fasi u ta möön kë ko ta du soni di ta kai ku ën.​—Jak. 4:8.

DË KU WOJO GO DOU

17. Un fasi bi taanga da Petuisi faa disa?

¹⁷ A kan taa u sa disa so fasi di u abi di an bunu. Ma u sa ko si taa wantu u dee woto fasi fuu ta da u bookohedi jeti. Boo luku unfa soni bi dë da apösutu Petuisi. U di a bi taa fëëë libisëmbë, mbei a bi taki dii pasi taa an sabi Jesosi (Mat. 26:69-75). Di Petuisi bi hopo fan ku dee kuutuma a di kuutuwosu u dee Dju, nöö a bi djei kuma an bi ko taa fëëë möön (Tjab. 5:27-29). Ma sömëni jaa baka di dë, a bi disa u njan ku dee Keesitu sëmbë dee an bi dë Dju, „u di a bi ta fëëë dee sëmbë dee bi dë Dju” (Gal. 2:11, 12). Di fëëë u Petuisi bi toona ko. A kan taa nöiti di fëëë fëën bi go ku telu.

18. Andi sa pasa te a nama ku so u dee fasi dee u abi dee an bunu?

¹⁸ Soni sa dë da u leti kuma Petuisi. Unfa sö? Wë wan fasi di u bi ta mëni taa u bi disa, sa toona ko baka. Wan baaa bi taki taa: „Teni jaa longi kaa di mi bi disa u luku fanafiti soni a di së u manu ku mujëë, nöö mi bi ko mëni taa ma bi abi di bookohedi dë möön. Ma di taku fii di mi bi abi fosu, bi sai piii dë ta wakiti u wan bunu okasi dou faa toona ko.” Hii fa soni bi dë sö da di baaa fuu, tökuseei u wai taa an bi disa u mbei möiti. A bi ko si taa solanga a dë a di hogi goonliba aki jeti, a bi o dë faa ta mbei möiti ta duwengi hënseei hii daka, fu an luku dee lö soni dë möön. Hën mujëë ku dee gaanwomi u di kemeente ka a bi dë, bi heepi ën gaanfa seei faa ta möön köni fu an luku dee soni dë möön.

19. Andi sa heepi u ee u abi wan fasi di ta taanga da u fuu disa?

¹⁹ Ee u abi wan fasi di ta taanga da u fuu disa, nöö andi sa heepi u u di fasi dë an mbei u du soni di an bunu? Woo feni heepi te u ta du di soni di Jesosi bi piki u. A bi taki taa: „Un dë ku wojo e.” Aluwasi i dë a wan pisiten ka i ta fii taa i taanga, tökuseei i musu ta koti pasi go dou da dee soni dee sa mbei i go du zöndu (1 Kol. 10:12). Na disa u du dee soni dee bi heepi i u soni waka bunu da i. Nöngö 28:14 ta taki taa: „Di sëmbë di ta köni hii juu o dë waiwai.”​—2 Pet. 3:14.

DEE WINI DEE U TA FENI TE U TA DË KU WOJO

20-21. (a) Un wini woo feni te u ta köni u soni an mbei u go du zöndu? (b) Andi Jehovah o du da u ee u ta mbei di möiti di uu musu mbei? (2 Kolenti 4:7.)

²⁰ U sa dë seiki taa woo feni wini te u ta köni u soni an mbei u go du zöndu. Zöndu libi sa tja ’piizii ko da u u wan pisiten’, ma te u ta libi kumafa Jehovah kë, nöö woo ta möön dë waiwai (Heb. 11:25; Ps. 19:8). Di soni dë dë sö, u di Jehovah mbei u fuu ta libi a wan fasi di ta kai ku ën (Ken. 1:27). Hën da te u ta libi kumafa Jehovah kë, nöö háti fuu an o ta fon u. Boiti di dë, woo sa feni di libi u teego.​—1 Tim. 6:12; 2 Tim. 1:3; Jud. 20, 21.

²¹ Tuu taa ’wa taanga sö’, ma nëën da saanfa-u-du fuu kaba. Biga Jehovah ta dë kabakaba u da u di kaakiti di u abi fanöudu. (Lesi 2 Kolenti 4:7.) Hoi a pakisei taa di kaakiti di bigi pasa maaka Jehovah ta da u. Ma useei musu ta mbei möiti hiniwan daka ku di fuu seei kaakiti di u abi, sö taa soni an mbei u go du zöndu. Ee u ta mbei di möiti di uu musu mbei, nöö u sa dë seiki taa te u ta begi Jehovah faa da u kaakiti, u di u abi möön kaakiti fanöudu, nöö a o haika dee begi fuu (1 Kol. 10:13). Awa, Jehovah sa heepi u fuu ta köni be soni an mbei u go du zöndu.