U musu ta waka a Keesitu baka go dou te u dopu

1-2. Un bunu wan sëmbë ta feni baka te a dopu?

U TA wai seei te u dopu, söseei u ta wai taa u sa dë a di wosudendu u Jehovah. A dë wan gaandi taa u ku Jehovah sa ko dë gaan mati. U ta piki ku Dafiti di a sikifi dee wöutu aki taa: ’Dee sëmbë dee Jehovah ta tei tja ko a di djai fëën dendu ta feni bunu.’​—Ps. 65:4.

² Jehovah an ta tei hiniwan sëmbë buta a di wosudendu fëën. Kumafa u bi taki a di woto a fesi, nöö Jehovah ta ko zuntu u dee sëmbë dee ta lei taa de kë dë mati fëën (Jak. 4:8). Te i buta i libi a Jehovah maun nöö i dopu, nöö i ku Jehovah ta ko dë mati a wan apaiti fasi. I sa dë seiki taa baka di dë, a ’o mbei i feni bunu sö tee taa na wan soni o makei i’.​—Mal. 3:10; Jel. 17:7, 8.

3. Un faantiwöutu dee sëmbë dee buta de libi a Jehovah maun, söseei di dopu, abi? (Peleikima 5:4, 5)

³ Te i dopu ufö u sa taki taa i bigi dini Jehovah. Baka di dë, nöö joo ta mbei hii möiti u hoi iseei a di buka di i mbei ku Jehovah, aluwasi ee tesi, nasö fuka ta miti i. (Lesi Peleikima 5:4, 5.) U di i da wan bakama u Jesosi, mbei joo ta mbei hii möiti u ta waka nëën baka, ta piki hën buka a soni a hii futu (Mat. 28:19, 20; 1 Pet. 2:21). Di woto aki o heepi i fii sa ta djeesi Jesosi möön gaanfa.

I MUSU TA WAKA A JESOSI BAKA GO DOU ALUWASI EE FUKA TA MITI I

4. Na un fasi dee bakama u Jesosi ta tja „wan posu”? (Luk. 9:23)

⁴ Na pakisei taa baka te i dopu, nöö ja o abi na wan booko hedi möön. Jesosi bi taki taa dee bakama fëën bi o ta tja „wan posu”. Nöö „hiniwan daka” de bi o ta tjëën. (Lesi Lukasi 9:23.) Di soni di Jesosi bi taki dë bi kë taki taa dee bakama fëën bi o ta tja sitaafu u nöömö u? Wë nönö. Kë a bi kë lei de taa fuka bi o ta miti de, hii fa de bi o ta feni gaan bunu. So u dee soni dë sa dë soni di sa hati u gaanfa seei.​—2 Tim. 3:12.

5. Andi Jesosi paamusi dee sëmbë dee disa so soni u de sa dini Jehovah?

⁵ Kandë dee famii fii ta du ku i, nasö kandë i disa soni di bi sa du fii ko abi hia möni ku woto soni, u di i ta buta di dini di i ta dini Jehovah a di fosu kamian a i libi (Mat. 6:33). Ee so a dë, nöö i sa dë seiki taa Jehovah ta si hii dee soni dee i ta du dëën (Heb. 6:10). Boiti di dë, iseei ta öndöfeni dee soni dee Jesosi bi taki. A bi taki taa: „Di sëmbë di o disa hën baaa, ku ën sisa, ku ën mama, ku ën tata, ku ën mii, ku dee pandasi kamian fëën fu di a ko nama ku mi, ee nasö fu di a kë paaja di bunu buka u Gadu, nöö an o lasi e. Biga a o toona feni hii soni wan höndö toon baka: ee sisa, ee baaa, mama, pandasi kamian, ku köndë tuu seei a o feni a di ten u dë aki, ma nöö a o kisi sitaafu tu o. Ma nöö a di ten di ta ko, nöö a o feni di libi u teego a Gadu” (Maik. 10:29, 30). Dee bunu dee i feni bigi gaanfa möön dee soni dee i disa.​—Ps. 37:4.

6. Faandi mbei a dë fanöudu fii ta mbei möiti go dou baka te i dopu u na ta libi kumafa di zöndu sinkii fii kë?

⁶ Baka te i dopu, i musu ta mbei möiti go dou u na ta libi kumafa di zöndu sinkii fii kë (1 Joh. 2:16). Di soni aki dë fanöudu, u di i da wan zöndu libisëmbë jeti. I sa fii di seei fasi kumafa apösutu Paulosu bi ta fii di abi taki taa: „Fa mi dë aki, mi sa wai tumisi fu mi ta du kumafa dee wëti u Gadu taki. Ma nöö mi ta si taa wan oto soni dë ta wooko a hii dee pisipisi u mi sinkii tuu. A ta feti taanga ku dee wëti u Gadu dee dë a mi pakisei, ta hoi mi gingin a hogidu basu” (Lom. 7:22, 23). Di mbei di i musu ta mbei möiti u na ta du soni di an bunu, sa mbei i ta fii bookosaka so juu. Te i ta pakisei di soni di i paamusi Jehovah di i buta i libi nëën maun, nöö di soni dë o ta dai taanga fii finga futu te tesi ta miti i. Fuu taki ën kumafa a dë, nöö di buka di i mbei ku Jehovah dë, hën o heepi i te tesi ta miti i. Unfa so?

7. Unfa di buta di i buta i libi a Jehovah maun o heepi i fii hoi iseei nëën te tesi ta miti i?

⁷ Te i buta i libi a Jehovah maun, nöö i musu disa di soni di iseei kë. Di soni aki kë taki taa ja o ta du andi iseei kë möön, möönmöön e a dë wan soni di an ta kai ku Jehovah (Mat. 16:24). Nöö fëën mbei te wan tesi ta miti i, ja o sindo ta kai pakisei nöömö taa faandi mbei di soni dë ta miti i. Ma joo sabi kaa taa di wan kodo soni di i musu du, hën da i musu hoi iseei a Jehovah. Joo dë kabakaba u du andi Jehovah feni bunu. Joo du soni leti kuma Jöpu. Hii fa gaan hogi soni bi miti Jöpu, tökuseei a bi taki taa: „Mi o ta hoi miseei a Gadu u te böö u mi koti!”.​—Jöpu 27:5.

8. Unfa di begi di i bi begi buta i libi a Jehovah maun, sa heepi i fii finga futu te tesi ta miti i?

⁸ Di soni di o heepi i fii finga futu te tesi ta miti i, hën da te i ta pakisei di begi di i bi begi Jehovah buta i libi nëën maun. I bi o ta luku wan woto sëmbë mujëë nasö manu ku lobi wojo u? Wë nönö! I sabi kaa taa ja o du di soni dë. Fëën mbei an bi o dë wan köni soni fii da taku fii pasi u dee göö a i hati, fii musu go feni de puu bakaten. I musu ’kumutu disa di pasi u dee hogihati sëmbë’.​—Nöng. 4:14, 15.

9. Unfa di begi di i bi begi buta i libi a Jehovah maun, o heepi i fii buta di dini u Jehovah a di fosu kamian a i libi?

⁹ Andi joo du e wan sëmbë kë da i wan wooko di o mbei taa ja sa nango a komakandi hiniwan juu? Wë wantewante i bi o sabi andi i musu du, u di i bi buta dai iseei kaa ta ja bi o tei wan wooko di bi o mbei taa ja o sa nango a komakandi hiniwan juu möön. Fëën mbei ja o pakisei u tei sö wan wooko, nöö baka ten ufö joo ko ta suku fasi fa i sa buta Jehovah a di fosu kamian a i libi. Di soni di o heepi i da te i ta kai pakisei a di fasi Jesosi bi ta du soni. Hii juu a bi ta du di soni di bi ta kai ku hën Tata. Fëën mbei leti kuma Jesosi, i musu mbei möiti u finga futu da dee soni di i sabi taa sa mbei di Gadu di i buta i libi nëën maun, a feni i u bunu möön.​—Mat. 4:10; Joh. 8:29.

10. Unfa Jehovah o heepi fii ta waka Jesosi baka go dou, baka te i dopu?

¹⁰ Di fasi fa i ta du soni te tesi ta miti sa lei ee i de kabakaba u ta waka a Jesosi baka go dou. I sa dë seiki taa Jehovah o heepi fii ta waka a Jesosi baka go dou. Di Bëibel ta taki taa: „Gadu dë u futoou, nöö an o disa i u di soni musu wini i. A o mbei wan baaku da i nöömö fii pasa be ja kai”.​—1 Kol. 10:13.

DI SONI DI I SA DU FII TA WAKA A JESOSI BAKA GO DOU

11. Andi da wan u dee möön bunu fasi fa u sa waka a Jesosi baka? (Luku di peentje tu.)

¹¹ Jesosi bi ta dini Jehovah ku hii hën hati, söseei a bi ta dë zuntu u Jehovah u di a bi lo ‘u fan ku ën (Luk. 6:12). Wan u dee möön bunu fasi fa i sa ta waka a Jesosi baka go dou baka te i dopu, hën da te i ta mbei möiti u ta du soni di o mbei i ko möön zuntu ku Jehovah. Di Bëibel ta taki taa: „Di soni di u ko abi fusutan fëën kaa, nöö ku ën fuu libi e” (Fil. 3:16). So juu, joo ta jei woto u baaa ku sisa di bi seeka soni sö taa de bi sa du möön da Jehovah. Kandë de bi go a di Siköö da Könuköndë Peleikima, nasö kandë de bi go heepi a wan kamian ka möön peleikima bi dë fanöudu. Ee i abi di okasi u du möön da Jehovah, nöö a bunu seei. Dee dinima u Jehovah ta dë kabakaba u du möön a di dini di de ta dini ën (Tjab. 16:9). Ma e ja sa du möön da Jehovah nöunöu, nöö na pakisei taa dee sëmbë dee sa du möön soni dëën, bunu möön i. Di möön fanöudu soni, hën da hoi i musu hoi dou (Mat. 10:22). Hoi a pakisei taa Jehovah o wai ku i te i ta du andi i sa du dëën. U di a dë di möön bunu fasi fa i sa ta waka a Jesosi baka go dou, baka te i dopu.​—Ps. 26:1.

12-13. Andi i musu du ee i si taa ja dë waiwai sö möön kuma fosu? (1 Kolenti 9:16, 17) (Luku di pisi „Kule go dou”.)

¹² Andi i musu du e i ko si taa ja ta begi ku hii i hati möön, nasö taa di peleikiwooko an ta suti da i möön? Söseei andi i musu du ee di fasi fa i ta lesi Bëibel an ta da i piizii möön? Ee sö a dë, nöö na si kuma di jeje u Jehovah an dë ku i möön. U di u da zöndu libisëmbë mbei a sa pasa so juu taa dee fii fuu ta tooka. Ee ja ta dë waiwai sö möön kuma fosu, nöö buta pakisei a di woto u apösutu Paulosu. Hii fa a bi ta mbei möiti u djeesi Masa Jesosi, tökuseei a bi sabi taa so juu an bi o ta abi peesa u du dee soni dee a bi musu du. (Lesi 1 Kolenti 9:16, 17.) A bi taki taa: „Ee fuka mi ta puu da miseei te mi kondëën, nöö an dë taa wan apaiti soni mi du e. Biga di soni Gadu futoou mi u mi du dëën, hën nöö mi ta du kaa. Nöö aambi wan apaiti paima.” Fuu taki ën kumafa a dë, nöö Paulosu bi dë kabakaba u du di diniwooko fëën go dou, aluwasi ee an bi ta abi peesa u du ën.

¹³ Sö nöö iseei an musu ta luku a di fasi fa i ta fii wanwan, nöö i du soni. I musu dë kabakaba u du soni a wan bunu fasi aluwasi ee ja ta fii u du ën. Di fasi fa i ta fii sa tooka baka wan pisi ten ee i ta mbei möiti hii juu u ta du soni a wan bunu fasi. Ee i kë ta waka a Jesosi baka nöömö baka te i dopu, nöö i musu mbei möiti u ko abi di guwenti u ta öndösuku soni u Bëibel, u ta begi, u nango a dee komakandi, söseei u nango a di peleikiwooko. Nöö te dee baaa ku dee sisa ta si fa i ta hoi dou a di dini di i ta dini Jehovah, nöö a o da de taanga seei.​—1 Tes. 5:11.

„WEGI UNU SEEI LUKU BUNU”

14. Andi i musu ta wegi ta luku so juu, söseei faandi mbei i musu du ën? (2 Kolenti 13:5)

¹⁴ Baka te i dopu, nöö a dë fanöudu u ta wegi iseei luku hiniwan juu. (Lesi 2 Kolenti 13:5.) So juu a ta dë fanöudu fii ta wegi luku ee i ta begi hiniwan daka, ee i ta lesi ta öndösuku soni u Bëibel, ee i nango a dee komakandi, nasö ee i ta du di peleikiwooko. I musu mbei möiti u feni wini a dee soni aki, söseei mbei möiti u ta du de waiwai. A bi o bunu fii hakisi iseei taa: ’Mi sa booko dee soni u Bëibel dee an taanga u fusutan a piki möni da wotowan u? Woto fasi dë fa mi sa ta du di peleikiwooko sö taa a sa dë wan piizii soni da mi i ö? Mi ta konda finifini da Jehovah unfa mi ta fii ö? Dee begi u mi ta lei taa mi ta buta futoou nëën u? Mi nango hii juu a dee komakandi ö? Unfa mi sa ko ta buta möön pakisei te mi dë a dee komakandi, söseei unfa mi sa ta da piki möön bunu?’

15-16. Andi i ta lei u di woto u wan baaa di bi koti pasi da wan soni di bi sa miti ën?

¹⁵ A dë fanöudu tu fii ko sabi dee suwakifasi fii. Wan baaa de kai Robert, bi konda wan woto fëën seei di nama ku di sabi di u musu ko sabi dee suwakifasi fuu. A bi taki taa: „Di mi bi abi 20 jaa, nöö mi bi abi wan wooko ka mi bi sa wooko wantu daka a di wiki nöö. Wan daka baka wooko, hën wan mujëë a wookope bi kai mi u mi go nëën pisi. A bi taki taa mi ku ën wanwan bi o dë nëën pisi, nöö ’woo piizii makandi’. A di bigi, mi bi taki wanlö sösö soni sö taa ma bi sa go nëën pisi, ma te u kaba fëën mi piki ën taa nönö, söseei mi piki ën faandi mbei ma o go nëën pisi.” U sa gafa Robert u di a koti pasi da di soni di bi o miti ën. Di a toona pakisei di soni dë baka, hën a si taa a bi sa du soni a wan möön bunu fasi. A bi taki taa: ”Ma koti pasi da di soni di bi o miti mi hesi tjika, kumafa Josëfu bi koti pasi da di mujëë u Potifali (Ken. 39:7-9). Mi bi foondo u di fasi fa a bi taanga da mi u mi bi taki nönö. Ma di soni aki bi heepi mi, u mi si taa mi bi musu mbei möiti u mi ku Jehovah ko dë möön gaan mati.”

¹⁶ Joo feni wini te i ta wegi iseei ta luku leti kumafa Robert bi du ën. Aluwasi ee i bi koti pasi da wan soni di bi sa miti i kaa, tökuseei a bunu fii toona hakisi iseei u longi a bi tei fii taki nönö. Ee i si taa soni dë u tooka jeti, nöö na lasi hati. I musu wai taa i ko sabi di suwakifasi fii. I sa konda di suwakifasi fii da Jehovah, nöö i du soni di o heepi i fii sa ta piki Jehovah buka hiniwan juu.​—Ps. 139:23, 24.

17. Unfa di në u Jehovah bi nama ku di soni di bi miti Robert?

¹⁷ U sa lei möön soni u di woto u Robert. A bi taki tu taa: „Baka di mi piki di mujëë a wookope taa ma o go nëën pisi, hën a taki taa: ’I pasa di tesi!’ Hën mi hakisi ën taa, faandi mbei i taki sö? Hën a taki taa wan mati fëën di bi dë wan kotoigi fosu bi taki taa dee njönkuwan dee dë kotoigi ta du soni di an bunu tjubitjubi, möönmöön ee de feni di okasi u du ën. Hën a piki di mati fëën taa a o pooba luku e mi dë sö tu. Mi bi wai seei taa mi bi du soni a wan fasi di bi tja gafa ko da di në u Jehovah.”

18. Andi i dë kabakaba u du baka te i dopu? (Luku di pisi „Tu woto di o da i piizii”)

¹⁸ Te i buta i libi a Jehovah maun nöö i dopu, nöö i ta lei taa i kë santa di në u Jehovah aluwasi andi o pasa. I sa dë seiki taa Jehovah ta si hii dee tesi dee ta miti i, nasö dee soni dee i ta koti pasi da. A o mbei i feni gaan bunu te i ta mbei möiti u hoi iseei nëën. Söseei i sa dë seiki taa a o dai di santa jeje fëën fii sa hoi dou (Luk. 11:11-13). Jehovah o heepi i fii ta waka a Jesosi baka go dou, baka te i dopu.