Un dee baaa, un ta mbei möiti u ko toon dinai ö?

1. Unfa apösutu Paulosu bi ta si dee dinai?

DEE dinai ta du wanlö gaan fanöudu wooko a di kemeente, nöö apösutu Paulosu bi ta kai dee baaa aki gaan soni seei. Di a bi sikifi wan biifi manda da dee baaa ku dee sisa a Filipi, hën a bi manda wan apaiti odi da dee dinai ku dee gaanwomi.​—Fil. 1:1.

2. Unfa wan baaa de kai Luis ta fii di a ko toon wan dinai?

² Aluwasi ee dee baaa njönku, nasö aluwasi ee de ko gaandi kaa, tökuseei de ta dë waiwai te de ta heepi dee baaa ku dee sisa a di kemeente te de dë dinai. Wan baaa de kai Devan bi toon dinai di a bi abi 18 jaa, nöö wan woto baaa de kai Luis hën a bi abi möön leki 50 jaa. Unfa Luis bi ta fii di a ko toon wan dinai? Wë a bi taki taa: „Mi ta wai seei taa mi sa ta du soni u heepi dee baaa ku dee sisa u mi a di fasi aki. Sömëni pasi de bi du soni u lei taa de lobi mi, nöö nöunöu mi abi di gaandi u du soni u lei de taa mi lobi de tu.” Sömëni dinai ta piki ku di soni di Baaa Luis bi taki aki!

3. Andi woo luku a di woto aki?

³ Ee i dopu kaa, ma ja toon dinai jeti, nöö a bi o bunu seei fii mbei möiti u dou di maaka dë. Andi sa da i taanga fii kë ko toon wan dinai? Andi da dee fasi dee di Bëibel ta taki taa i musu ko abi? Wë di woto aki o tja dee soni dë ko a limbo da u. Ma ufö u taki u de, nöö boo luku andi da dee wooko dee wan dinai ta du.

ANDI DA DEE WOOKO DEE WAN DINAI TA DU?

4. Andi da dee wooko dee wan dinai ta du? (Luku di peentje tu.)

⁴ Wan dinai da wan baaa di dopu, di di santa jeje buta a wooko u heepi dee gaanwomi ku dee sömëni wooko dee dë u du a di kemeente. So u dee dinai ta seeka soni u heepi dee peleikima u de sa abi dee buku di de abi fanöudu u du di peleikiwooko, söseei u de sa sabi na un pisiwata de musu go peleiki. So dinai ta heepi seeka di Könuköndë zali be a ta dë limbolimbo, söseei be soni fëën an ta dë bookobooko. Boiti di dë, dee dinai ta dë taanputaanpu a dööbuka ta wai ku dee sëmbë dee ta ko a komakandi, söseei de ta heepi seeka poku soni ku fëlön soni a dee komakandi. Dee dinai da womi di lobi Jehovah, söseei di ta libi a wan fasi di ta kai ku ën. Boiti di dë, de lobi dee baaa ku dee sisa gaanfa seei (Mat. 22:37-39). Andi wan baaa sa du faa toon wan dinai?

5. Andi wan baaa musu ta du faa sa toon wan dinai?

⁵ Di Bëibel ta lei u andi da dee fasi dee wan baaa musu ko abi faa sa toon wan dinai (1 Tim. 3:8-10, 12, 13). I sa dou di maaka dë, te i ta lei soni u dee fasi dee di Bëibel ta taki dë, söseei te i ta mbei taanga möiti fii ko abi de. Ma di fosu soni di i musu du, hën da i musu pakisei luku faandi mbei i kë ko toon wan dinai.

FAANDI MBEI I KË KO TOON WAN DINAI?

6. Andi musu da i taanga fii kë du soni u heepi dee baaa ku dee sisa fii? (Mateosi 20:28; Luku kafiti tu.)

⁶ Buta pakisei a Jesosi, di möön bunu sëmbë di u musu djeesi. Di lobi di a bi lobi hën Tata, ku libisëmbë, mbei a bi ta du hii dee soni dee a bi ta du, u heepi sëmbë hii fa wotowan bi ta si so u dee wooko dee a bi ta du kuma lagi wooko. (Lesi Mateosi 20:28; Joh. 13:5, 14, 15) Ee di lobi di i lobi Jehovah ku libisëmbë de mbei i kë toon dinai, nöö Jehovah o mbei i feni gaan bunu, söseei a o heepi i fii ko abi dee fasi dee i musu ko abi fii sa dou di maaka dë.​—1 Kol. 16:14; 1 Pet. 5:5.

7. Faandi mbei an bunu fuu kë ko toon wan dinai u di u kë u sëmbë ko ta si u kuma heihei sëmbë?

⁷ Dee sëmbë u di goonliba aki lo’ u gafa dee sëmbë dee ta suku nëbai. Ma na sö a dë a di ölganisaasi u Jehovah. Wan baaa di ta du soni kuma Jesosi u lei taa a lobi Jehovah ku woto sëmbë, an ta suku u sëmbë ta si ën kuma a hei möön wotowan, nasö taa a dë basi u wotowan. Ee de bi o da sö wan sëmbë wan gaandi a di kemeente, nöö an o ta kë ta du dee wooko dee sëmbë ta si kuma lagi wooko, hii fa dee wooko dë dë fanöudu u de sa ta heepi dee sikapu u Jehovah. Di sëmbë dë sa ta si kuma a hei poi u du dee wooko dë (Joh. 10:12). Jehovah an o ta mbei soni waka bunu da dee sëmbë dee ta suku wan gaandi u di de ta pakisei deseei nöö, nasö u di de ta kë u sëmbë ta si de kuma wan heihei sëmbë.​—1 Kol. 10:24, 33; 13:4, 5.

8. Andi Jesosi bi piki dee apösutu fëën?

⁸ Dee gaan mati u Jesosi seei bi ta suku so gaandi. Ma di soni mbei de bi kë feni dee gaandi dë an bi bunu. Buta pakisei a di soni di bi pasa ku tu u dee apösutu u Jesosi. Jakobosi ku Johanisi bi go hakisi Jesosi be a da de wan apaiti wooko u du a di Könuköndë fëën. Ma Jesosi an bi piki de taa wan bunu soni de bi ko hakisi ën dë. Fëën mbei a bi piki hii dee 12 apösutu fëën taa: „Di fuunu di kë dë heima nöö a musu sakëën seei ta dini dee otowan fëën. Nöö di sëmbë di kë ko di möön hei wan fuunu tuu, nöö a musu dë kuma saafu da dee otowan.” (Maik. 10:35-37, 43, 44). Dee baaa dee kë dë dinai u di de ta kë du soni u heepi wotowan, o ko dë sëmbë di Jehovah o tei u heepi di kemeente.​—1 Tes. 2:8.

ANDI SA DA I TAANGA FII KË KO TOON WAN DINAI?

9. Andi sa heepi i fii kë ko toon wan dinai?

⁹ An dë u taki taa i lobi Jehovah, söseei taa i ta kë du soni u heepi wotowan. Ma hii fa a dë sö, tökuseei a sa kan taa ja abi di fii u du dee wooko dee wan dinai musu ta du. Ma andi sa heepi i fii kë du dee wooko dë? I sa buta pakisei a di dë di joo ta dë waiwai te i ta du soni da dee baaa ku dee sisa fii. Jesosi bi taki taa: „Dee sëmbë dee ta da sëmbë soni, ta dë waiwai möön leki dee sëmbë dee ta feni” (Tjab. 20:35). Jesosi seei bi ta du di soni di a bi taki dë. A bi ta dë waiwai seei te a bi ta heepi wotowan a soni. Di soni dë sa heepi i fii ko ta dë waiwai tu.

10. Unfa Jesosi bi lei taa a lo’ u heepi wotowan a soni? (Maikusi 6:31-34)

¹⁰ Boo buta pakisei a wan woto di ta lei fa Jesosi bi lo’ u heepi wotowan a soni tjika. (Lesi Maikusi 6:31-34.) Wan daka di Jesosi ku dee apösutu fëën bi wei, hën de bi nango a wan kamian ka de bi sa dë de wanwan, sö taa de bi sa böö. Ma wanlö gaan hia sëmbë bi kule go dë a di kamian ta wakiti de. De bi kë u Jesosi lei de soni. Ma Jesosi bi sa taki taa an bi o sa, u di hën ku dee bakama fëën an bi ’feni pasi njan’, söseei de an bi feni pasi böö seei. Nasö a bi sa lei de wantu soni, nöö baka di dë nöö a manda de be de go. Ma u di Jesosi bi lobi sëmbë, mbei a bi „go ta lei de sömëni soni möön”. A bi ta lei de soni seei nöömö fu te „sapate” (Maik. 6:35). An bi heepi dee sëmbë dë u di a bi musu u heepi de. Ma a bi heepi de u „di tjali u de kisi ën”. A bi kë lei de soni u di a bi lobi de. Di heepi di Jesosi bi ta heepi wotowan a soni bi ta mbei a ta dë waiwai.

11. Andi Jesosi bi du u heepi dee sëmbë dee bi ko nëën faa lei de soni? (Luku di peentje tu.)

¹¹ Jesosi bi ta heepi sëmbë u di a bi ta lei de soni u Gadu, ma a bi ta heepi de ku dee soni di de bi abi fanöudu tu. A bi da de soni u njan a wan foombo fasi, hën a bi hakisi dee bakama fëën u paati dee njanjan da de (Maik. 6:41). A sö wan fasi a bi ta lei dee bakama fëën unfa de bi musu ta heepi wotowan. A bi lei de tu taa dee wooko dee wan dinai ta du da wan gaan fanöudu wooko. Pakisei luku unfa dee bakama u Jesosi bi ta wai u wooko makandi ku Jesosi di a bi paati njanjan da dee hia sëmbë, sö taa de bi sa „njan te bëë u de fuu”! (Maik. 6:42) Di soni aki an bi dë di fosu pasi di Jesosi bi buta dee fëën soni a wan së, faa bi sa heepi wotowan. Hii juu seei a bi ta heepi wotowan a soni a hii di pisiten di a bi dë a goonliba aki (Mat. 4:23; 8:16). Jesosi bi ta wai seei te a bi ta lei sëmbë soni, söseei a bi ta wai te a bi ta heepi de ku dee soni di de bi abi fanöudu. An dë u taki taa iseei o ta dë waiwai tu, te i ta mbei möiti u ko dë wan dinai, u di i kë heepi wotowan a soni.

12. Faandi mbei wa musu ta si kuma wa sa’ u du soni tjika u heepi di kemeente?

¹² Ee i ta si kuma ja sa’ u du na wan hojo soni, nöö ja musu lasi hati, soni dë di i sa du u heepi di kemeente. I sa kai pakisei a di soni di Paulosu bi taki a 1 Kolenti 12:12-30, nöö hakisi Jehovah be a heepi i fii si unfa dee soni dee sikifi a di tëkisi dë nama ku i. Dee soni dee Paulosu bi taki dë ta lei gbelingbelin taa hii sëmbë dë fanöudu a di kemeente, te kisi iseei tu. Ee ja dou dee maaka fii sa toon wan dinai jeti, nöö ja musu lasi hati. Ma i musu ta mbei möiti go dou u du hii soni di i sa du u dini Jehovah, söseei u heepi dee baaa ku dee sisa fii. I sa dë seiki taa dee gaanwomi o buta pakisei a dee soni dee i sa du, ku dee soni dee ja sa du, te de o luku un wooko de o da i a di kemeente.​—Lom. 12:4-8.

13. Andi hiniwan fuu ta lei u gaansë u dee fasi dee wan dinai musu ko abi?

¹³ Buta pakisei a wan woto soni di musu mbei i kë ko toon wan dinai. Gaansë u dee fasi di wan dinai musu abi, da fasi di hiniwan Keesitu sëmbë musu ko abi. Hii Keesitu sëmbë musu mbei möiti u ko dë möön zuntu ku Jehovah, de musu lo’ u heepi sëmbë a soni, söseei de musu dë sëmbë di wotowan sa waka a de baka. Ma andi da dee soni dee wan baaa musu ta du faa sa toon wan dinai?

ANDI I MUSU TA DU FII SA TOON WAN DINAI?

14. Andi a kë taki fuu ko dë wan sëmbë „di sëmbë sa lesipeki”? (1 Timoteo 3:8-10, 12)

¹⁴ Boo taki u wantu u dee fasi dee wan baaa musu abi faa sa toon wan dinai. Dee fasi dë sikifi a 1 Timoteo 3:8-10, 12. (Lesi ën.) Wan dinai musu dë wan sëmbë „di sëmbë sa lesipeki”. A musu dë wan sëmbë di sa tja faantiwöutu. Ma di soni dë an kë taki taa ja musu ta lafu ta piizii ku wotowan (Peleik. 3:1, 4). Ma tökuseei i musu ta wooko taanga u tja dee faantiwöutu fii a wan bunu fasi. Te i ta du sö, nöö dee baaa ku dee sisa o ta si i kuma wan sëmbë di de sa futoou, nöö de o ta lesipeki i. 

15. Andi a kë taki fu wa musu „ta bia fan a buka”, söseei wa „musu ta suku u wini soni a wan fasi di na fiti”?

¹⁵ Ja „musu dë wan sëmbë ta bia fan a buka”. Di soni aki kë taki taa ja musu ta mindi soni. Sëmbë musu sa ta futoou i, u di i ta du andi i ta taki. Ja ta ganjan sëmbë (Nöng. 3:32). Ja „musu ta suku u wini soni a wan fasi di na fiti”. Hën da ja musu ta fufuu sëmbë te a nama ku wooko soni, nasö ku möni soni. A kë taki tu taa, ja musu ta tei dee baaa ku dee sisa u di kemeente mbei möni a de liba a wan fasi di an fiti, u di i ku de dë mati.

16. (a) Andi a kë taki u na „dë bebema”? (b) Andi a kë taki u „dë ku limbohati”?

¹⁶ Ja „musu dë bebema”. Di soni aki kë taki taa ja musu ta bebe daan pasa maaka, nasö taa sëmbë sabi i kuma wan sëmbë di ta bebe poi. I musu „dë ku limbohati”. Di soni aki kë taki taa i musu ta libi kumafa Jehovah kë. Hii fa i da wan zöndu libisëmbë di ta mbei föutu, tökuseei i ku Jehovah musu dë bunu, nöö di soni dë o mbei i ta dë bööböö.

17. Unfa wan baaa sa lei taa a dë u futoou te dee gaanwomi ta „wegi ën luku”? (1 Timoteo 3:10; luku di peentje tu.)

¹⁷ De musu „wegi ën luku bunu ufö”. Di soni aki kë taki taa dee gaanwomi ta si fa i ta tja dee faantiwöutu fii bunu tjika, söseei de ta si taa de sa futoou i. Fëën mbei te de da i wan wooko fii du a di kemeente, nöö a bi o bunu fii ta du soni kumafa de lei i, söseei kumafa di ölganisaasi ta lei u. Mbei möiti fii ko fusutan bumbuu andi da di wooko di i musu du, söseei na un pisiten i musu kabëën. A di pisiten di joo ta mbei möiti u du hiniwan u dee wooko dë, nöö dee wotowan u di kemeente o ta si taa i nango a fesi, nöö di soni dë o mbei de ta fii bunu. Un dee gaanwomi, u musu ta lei dee baaa soni u de sa go a fesi a di biibi. (Lesi 1 Timoteo 3:10.) Njönku baaa dë a di kemeente fuunu di abi söwan 10 jaa go miti 14 jaa u? Nasö de möön njönku ö? De abi di guwenti u lei soni u Bëibel, söseei u seeka bunu da dee komakandi ö? De abi di guwenti u da piki a dee komakandi ö? Söseei de nango a di peleikiwooko u? Ee sö a dë, nöö un da de wooko di de sa du, söseei di fiti de. A sö wan fasi woon sa ’wegi de luku bunu’ u si ee un sa futoou de. Nöö te de ko bigi tjika, nöö de sa abi dee fasi dee wan dinai musu abi.

18. Andi a kë taki u sëmbë an ’feni wan fa a i di na bunu’?

¹⁸ De an musu ’feni wan fa a i di na bunu’. Di soni aki kë taki taa sëmbë an musu sa kuutu i ku leti taa i ta du gaan hogi. A sa pasa taa sëmbë mindi soni da wan Keesitu sëmbë. Sëmbë bi mindi soni da Jesosi, nöö a bi taki taa de o libi a di seei fasi ku dee bakama fëën tu (Joh. 15:20). Ma ee i ta mbei möiti u du soni a wan leti fasi kuma Jesosi, nöö joo ko abi wan bunu në a di kemeente.​—Mat. 11:19.

19. Andi a kë taki te di Bëibel ta taki taa wan womi „musu abi wan kodo mujëë tö”?

¹⁹ „I musu abi wan kodo mujëë tö.” Ee i tööu, nöö i musu ta hoi iseei a dee wëti u Jehovah dee a buta sensi a di bigi, di nama ku di tööu libi. A bi mbei wan womi, ku wan mujëë, hën a tööu de (Mat. 19:3-9). Nöiti wan womi di dë Keesitu sëmbë musu libi fanafiti a di së u manu ku mujëë soni (Heb. 13:4). Ma na di dë nöö. I musu ta hoi iseei a di mujëë fii, nöiti ja musu buta pakisei a wan woto mujëë a wan fasi di an fiti.​—Jöpu 31:1.

20. Unfa wan baaa sa lei taa a ta luku dee sëmbë fëën wosudendu bunu?

²⁰ Dee baaa „musu sabi fa u tii wosu dendu libi u de bunu te dou ku dee mii u de tuu.” Ee i da wan hedima u wan wosudendu, nöö i musu ta tja di faantiwöutu fii bumbuu. I musu abi di guwenti u ta hoi di Wosudendu Dini. I musu abi di guwenti u ta peleiki makandi ku hiniwan u dee sëmbë u di wosudendu fii. I musu ta heepi dee mii fii u de ko dë mati ku Jehovah (Ef. 6:4). Wan womi di ta luku dee sëmbë fëën wosudendu bunu, ta lei taa a sa heepi dee sëmbë u di kemeente.​—Luku 1 Timoteo 3:5.

21. Andi i sa du ee ja dë wan dinai jeti?

²¹ Dee baaa, ee wan dë dinai jeti, nöö u ta da unu taanga fuun tei ten buta pakisei a dee soni dee u taki a di woto aki, nöö un begi Jehovah be a heepi unu fuun sa dou di maaka. Öndösuku soni di nama ku dee fasi dee wan dinai musu abi, nöö mbei möiti u ko abi dee fasi dë. Buta pakisei a di fasi fa i lobi Jehovah ku dee baaa ku dee sisa fii tjika. Mbei möiti u ko möön lobi dee baaa ku dee sisa, söseei u ko sabi faandi mbei i kë du soni u heepi de (1 Pet. 4:8, 10). Mbei möiti u ko toon wan dinai, nöö joo si fa joo ta dë waiwai, u di joo ta du soni u heepi dee baaa ku dee sisa fii a di kemeente. Be Jehovah mbei i feni gaan bunu, a di mbei di i ta mbei möiti u ko toon wan dinai!​—Fil. 2:13.