Kumutu a di ten di sëmbë kumutu a katibo a Egepiti te dou di ten u di fosu könu u Isaëli

Mosesi tja dee Isaëli sëmbë kumutu a katibo a Egepiti köndë go a di kuun de kai Sinai ka Gadu da de dee wëti fëën. Bakaten Mosesi manda 12 womi u go luku fa di köndë Kaana dë. Ma 10 u dee womi an bi tja bunu njunsu ko. Dee soni de taki bi mbei taa dee sëmbë bi kë go baka a Egepiti köndë. U di dee Isaëli sëmbë bi makei biibi, mbei Gadu bi sitaafu de. A mbei de waka 40 jaa longi a sabana dendu.

Te u kaba fëën Gadu tei Josua u tja dee Isaëli sëmbë go a di köndë Kaana. Jehovah mbei foombo soni pasa u heepi de u tei di köndë. A bi mbei di Joodan lio tapa u kule, dee peni u Jelikou booko kai, nöö a bi mbei di sonu hoi wan hii daka longi. Baka sikisi jaa hën de tei di köndë puu a dee Kaana sëmbë maun dendu.

Bigi u di ten u Josua, nöö kuutuma tii Isaëli 356 jaa longi. U ta lei soni u sömëni u de kuma Baaki, Gidion, Jefita, Simison ku Samuëli. Söseei u ta lesi soni u mujëë kuma Lakabu, Debola, Jaëli, Luti, Naomi ku Delaila. Te u konda hii dee jaa, nöö Pisi DII ta taki u soni di pasa a 396 jaa dendu.