Kumutu a di ten u katibo a Babilon te dou di ten di de mbei dee peni u Jelusalen baka

Di dee Isaëli sëmbë bi dë a katibo a Babilon, de tja sömëni sitaafu di pooba di biibi u de. De bi tuwë Sadaki, Mësaki ku Abetineko go a wan gaan kendikendi onfu dendu, ma Gadu bi mbei de kumutu libilibi. Bakaten di dee Media sëmbë ku dee Pëlsia sëmbë wini Babilon, hën de tuwë Daniëli go a wan baaku dendu ka lëun bi dë, ma Gadu tjubi ën tu u di a tapa dee lëun buka.

Te u kaba fëën, Silosi, di könu u Pëlsia, mbei dee Isaëli sëmbë ko fii. De toona go baka a de köndë, baka 70 jaa di de bi tja de go a katibo a Babilon. Wan u dee fosu soni de du di de toona go baka a Jelusalen, hën da de bigi mbei di Wosu u Jehovah. Ma hesihesi felantima bi ko tapa di wooko u de. Fëën mbei söwan 22 jaa bi pasa, baka di de toona go a Jelusalen ufö de bi kaba mbei di Wosu.

Bakaten u ta lei fa Ësala bi toona go a Jelusalen u seeka di Wosu ko hanse. Di dë pasa baka söwan 47 jaa di de kaba mbei di Wosu. Nöö 13 jaa baka di waka u Ësala, hën Nehemia go heepi u mbei dee bookobooko peni u Jelusalen baka. Pisi FEIFI ta taki u soni di pasa a 152 jaa dendu.