De dë a di Oleifi kuun liba

AKI i ta si Jesosi a di kuun de kai Oleifi Kuun. Dee fö womi dee dë ku ën da apösutu fëën. Tu u de, Andiasi ku Petuisi da baaa, nöö dee tu wotowan, Jakobosi ku Johanisi da baaa tu. Di Wosu u Gadu a Jelusalen i ta si a baka ala.

Tu daka pasa kaa sensi di Jesosi bi subi a di njönku buliki liba denda a Jelusalen. A dë feifidaka. Wan tu juu a fesi Jesosi bi dë a di Wosu u Gadu. Naandë dee begima bi pooba u kisi Jesosi tja go kii. Ma de bi fëëë u du ën, biga dee sëmbë lobi Jesosi.

Jesosi bi kai dee hedima u keiki ’Sindeki ku sindeki mii.’ Hën Jesosi taa Gadu o sitaafu de u hii dee hogi de bi du. Baka di dë Jesosi ko dou a Oleifi Kuun, hën dee fö apösutu fëën aki bigi ta hakisi ën soni. I saandi de ta hakisi Jesosi ö?

Dee apösutu ta hakisi soni u di ten di ta ko. De sabi taa Jesosi o puu hii hogilibi a goonliba. Ma de kë sabi na un ten di soni dë o pasa. Na un ten Jesosi o toona ko u tii kuma Könu?

Jesosi sabi taa dee bakama fëën a goonliba an o sa si ën te a o toona ko baka. Sö a dë u di a o dë a liba, nöö de an o sa si ën ala. Fëën mbei Jesosi konda da dee apösutu fëën un pei soni o ta pasa a goonliba te a ta tii kuma Könu a liba ala. Andi da wan tu u dee soni dë?

Jesosi taki taa gaan feti o dë, hia sëmbë o ta siki, hangi pena o dë, hogilibi o ko möön hia, nöö goon o ta seki ta latja kamian. Jesosi taki söseei taa di bunu buka u di könuköndë u Gadu o paaja a hii kamian u goonliba. I ta si dee soni aki ta pasa a di ten aki ö? Aai! Nöö fëën mbei u sa dë seiki taa Jesosi ta tii a liba nöunöu. Abiti möön a o puu hii hogilibi a goonliba.