Ko sa’ u öndösuku soni möön bunu

Buta andi da dee möön fanöudu soni dee i kë lei

Wan pikisö ten nöö hii u tuu ta feni u lei soni u Bëibel. Ma nöö, unfa i sa wooko bumbuu ku di ten dë? Di fosu soni di i musu du, hën da i musu tei i ten buta pakisei bumbuu a di soni di i ta lesi. Joo möön feni wini, te i tei i ten lesi wan piki soni, möön leki te i biinga lesi gaan hia soni.

Baka di dë, nöö i buta andi da dee möön fanöudu soni dee i kë lei (Ef. 5:15, 16). Luku andi sa heepi i:

• I musu ta lesi di Bëibel hiniwan daka (Ps. 1:2). I sa dou di maaka dë ee i ta lesi dee pisi u Bëibel dee u musu ta lesi da di komakandi di u ta hoi a mindiwiki.

• Seeka iseei a fesi da di Hei Wakitimawosu lei, söseei seeka iseei a fesi da di mindiwiki komakandi, sö taa i sa ta da piki. ​—Ps. 22:22.

• Mbei möiti fii feni ten u ta lesi dee buku fuu, söseei fii ta luku dee fëlön ku dee woto soni u di ölganisaasi a jw.org.

• Öndösuku soni u wan soni di i kë ko sabi. Öndösuku soni u wan soni di ta da i bookohedi, ko feni piki a wan hakisi di i abi, nasö kandë i sa öndösuku soni u wan Bëibel woto di i kë ko sabi möön fini. Ee i kë feni soni di i sa öndösuku, nöö go a di pisi „Projecten voor Bijbelstudie” a jw.org.