I sa dini Jehovah go dou hii fa i ta fii bookosaka

1. Andi da so u dee gaan bunu dee u ta feni, u di u dë a di ölganisaasi u Jehovah?

DI DË di u dë a di ölganisaasi u Jehovah a dee lasiti daka aki, da wan gaan bunu di u abi. Di libi a di goonliba aki ta ko möön taanga, ma Jehovah da u dee baaa ku dee sisa fuu u heepi u (Ps. 133:1). Jehovah ta heepi u fuu abi wan piizii wosudendu libi (Ef. 5:33–6:1). Boiti di dë, a ta da u di köni di u abi fanöudu fuu sa ta dë bööböö.

2. Andi u musu du, nöö faandi mbei u musu du di soni dë?

² U musu mbei möiti seei fuu sa ta dini Jehovah go dou. Faandi mbei u taki sö? Wë u di so juu sëmbë sa du soni nasö taki soni di sa hati u. Nasö dee föutu dee useei ta mbei sa mbei u fii bookosaka, möönmöön ee u ta mbei dee seei föutu nöömö. U musu hoi dou a di dini di u ta dini Jehovah te wan baaa nasö wan sisa du wan soni di hati u, te di sëmbë di u ku ën tööu du wan soni di hati u, söseei te useei mbei wan föutu. Woo buta pakisei a hiniwan u dee soni aki, a di woto aki. Woo si tu andi u sa lei a wan sëmbë di di Bëibel ta taki soni fëën.

HOI ISEEI A JEHOVAH GO DOU TE WAN BAAA NASÖ WAN SISA DU WAN SONI DI HATI I

3. Andi ta miti dee sëmbë u Jehovah?

³ Di soni di sa mbei a taanga. So baaa ku sisa abi fasi di wa lobi. Wotowan sa du soni di sa mbei u lasi hati, nasö de sa libi ku u a wan fasi di an fiti. Dee gaanwomi sa mbei föutu tu. Dee lö soni aki sa mbei so sëmbë ta hakisi deseei ee a di ölganisaasi u Gadu u dë tuutuu. Nöö ka u de dini Gadu go dou „makandi” ku dee baaa ku dee sisa u de, nöö de an ta kë hulu dee sëmbë dee du wan soni ku de möön, söseei de an ta kë go a dee komakandi möön tu (Sef. 3:9). Di soni dë da wan köni soni ö? Wë boo luku andi u sa lei u di woto u wan sëmbë a Bëibel di bi abi sö wan fuka.

4. Un tesi bi miti apösutu Paulosu?

⁴ Di woto u Bëibel. Apösutu Paulosu bi sabi taa dee baaa ku dee sisa fëën bi dë zöndu libisëmbë. So u de an bi kë biibi taa a bi dë wan bakama u Keesitu tuutuu (Tjab. 9:26). Bakaten, so u de bi ta paaja mindimindi woto, u mbei sëmbë an futoou Paulosu möön (2 Kol. 10:10). Paulosu bi si fa wan gaanwomi bi du wan soni di bi sa mbei wotowan naki futu (Gal. 2:11, 12). Boiti di dë, wan u dee gaan mati fëën de kai Maikusi, bi du wan soni di bi hati ën gaanfa seei (Tjab. 15:37, 38). Paulosu bi sa luku hiniwan u dee soni aki, nöö a taki taa an o hulu dee sëmbë dë möön. Ma an du sö. A bi ta kai dee baaa ku dee sisa fëën gaan soni go dou, söseei a bi dini Jehovah fajafaja go dou. Andi bi heepi Paulosu faa hoi dou?

5. Andi bi heepi Paulosu fu an disa dee baaa ku dee sisa fëën? (Kolosën 3:13, 14) (Luku di peentje tu.)

⁵ Paulosu bi lobi dee baaa ku dee sisa fëën. U di a bi lobi de, mbei an bi ta buta pakisei a dee föutu di de bi ta mbei, ma a bi ta möön buta pakisei a dee bunu fasi di de bi abi. U di Paulosu bi lobi sëmbë, mbei a bi sa du di soni di hënseei bi sikifi a Kolosën 3:13, 14. (Lesi ën.) Luku unfa Paulosu bi libi ku Maikusi. Hii fa Maikusi bi go disa Paulosu di a bi go a di fosu sëndëlengi waka fëën, tökuseei Paulosu hati an bi ta boonu u nöömö u di soni dë hedi. Bakaten, Paulosu bi sikifi wan biifi manda da di kemeente a Kolosën, hën a bi gafa Maikusi nëën. A bi taki taa Maikusi bi heepi ën ku di wooko u Gadu, söseei taa a bi dëën „degihati seei” (Kol. 4:10, 11). Di a bi dë a dunguwosu a Loomë, hën a bi hakisi u Maikusi ko nëën u heepi ën (2 Tim. 4:11). Paulosu bi ta da dee baaa ku dee sisa fëën paadon, söseei a bi ta hulu de go dou. Andi u sa lei a Paulosu?

6-7. Andi sa heepi u fuu ta lei dee baaa ku dee sisa fuu taa u lobi de hii fa de ta mbei föutu? (1 Joh. 4:7)

⁶ Di soni di u sa lei. Jehovah kë fuu ta lei dee baaa ku dee sisa fuu taa u lobi de. (Lesi 1 Johanisi 4:7.) Te wan baaa nasö wan sisa an libi ku u kumafa wan Keesitu sëmbë musu ta libi ku wotowan, nöö u sa dë seiki taa na ku hën seei kë a du soni u hati u, söseei a ta mbei möiti u du soni di ta kai ku Jehovah (Nöng. 12:18). Jehovah lobi dee dinima fëën, hii fa de ta mbei föutu. An ta disa u, söseei an ta hoi u a bëë te u mbei wan föutu (Ps. 103:9). U ta tei ën u bigi seei taa Jehovah ta da u paadon, nöö u musu djeesi ën a di da di a ta da sëmbë paadon.​—Ef. 4:32–5:1.

⁷ Hoi a pakisei tu taa möön di kaba ta zuntu, möön u musu dë zuntu ku dee baaa ku dee sisa fuu. U musu dë ku di mëni taa sëmbë o du ku u möön gaanfa. Kandë de o buta u a dunguwosu u di biibi fuu hedi. Ee dee soni aki miti u, nöö woo abi dee baaa ku dee sisa fuu fanöudu seei (Nöng. 17:17). Buta pakisei a di soni di bi miti wan gaanwomi de kai Josep,a di ta libi a Sipanjöluköndë. De bi söötö hën ku wanlö woto baaa a dunguwosu u di de an bi kë tei së a politiki soni u köndë. Di baaa aki bi taki taa: „Di u bi dë a dunguwosu, hii u tuu bi ta libi makandi. Fëën mbei so juu a bi ta pasa taa u du wan soni di di wotowan an lobi. U bi musu dë kabakaba u da useei paadon ku hii u hati. Di soni dë bi heepi u fuu ta libi fiifii makandi, söseei a bi heepi u fuu sa ta tjubi u na u. Sömëni sëmbë di an bi ta dini Jehovah bi sai dë. Wan daka, mi bi kisi makei a maun, nöö ma bi sa du soni ku di maun dë. Wan u dee baaa bi ta wasi dee koosu lai u mi, söseei a bi ta heepi mi ku woto soni tu. Sëmbë bi lei mi taa de lobi mi, möönmöön a di pisiten di mi bi abi ën fanöudu seei.” Di woto aki ta lei u taa nöunöu u musu seeka hiniwan toobi di u abi ku wotowan!

HOI DOU TE DI SËMBË DI I KU ËN TÖÖU DU WAN SONI DI HATI I

8. Un fuka ta miti sëmbë di tööu?

⁸ Di soni di sa mbei a taanga. Fuka ta dë a di tööu libi. Di Bëibel ta taki gbelin taa sëmbë di tööu „abi sömëni fuka u de tjai” (1 Kol. 7:28). Faandi mbei u taki sö? Wë u di di womi ku di mujëë tuu da zöndu libisëmbë, de abi tookatooka fasi, söseei de abi soni di de lobi, ku soni di de an lobi. Boiti di dë, de sa dë sëmbë di kiija a tookatooka fasi. A sa pasa tu taa, baka di de tööu ufö de ko ta si so fasi a deseei di de an bi si a fesi. Hiniwan u dee soni dee u kai aki sa mbei bookohedi ko dë a di tööu libi. A sa pasa taa de ta suku di föutu a di wotowan u de, hii fa de tu tuu ta mbei föutu, söseei hii fa de tu tuu musu mbei möiti u seeka di toobi. A sa pasa seei taa de ko si kuma a möön bunu u de paati, nasö u de booko di tööu. Ma di soni dë o mbei de ko dë waiwai baka u?b Boo luku di woto u wan mujëë di bi hoi hënseei a Jehovah go dou, hii fa hën manu bi ta mbei di libi taanga dëën seei.

9. Un bookohedi Abigaëli bi abi?

⁹ Di woto u Bëibel. Abigaëli bi tööu ku wan womi de kai Nabali, nöö di Bëibel ta taki taa di womi aki bi abi hogihati, söseei an bi ta tja hënseei a wan bunu fasi (1 Sam. 25:3). A bi musu u ta taanga da Abigaëli faa libi ku sö wan womi. Abigaëli bi sa feni pasi u booko di tööu ö? Wë aai. Dafiti, di sëmbë di bi o toon könu u Isaëli, bi nango u go kii hën manu, u di hën manu bi kosi Dafiti ku dee sodati fëën (1 Sam. 25:9-13). Abigaëli bi sa kule go, nöö a disa Dafiti faa kii Nabali. Ma an bi du di soni dë. A bi fan ku Dafiti fu an kii Nabali (1 Sam. 25:23-27). Faandi mbei Abigaëli bi du di soni dë?

10. Andi bi sa dë di soni di bi heepi Abigaëli faa hoi dou, hii fa soni an bi nango bunu a di tööu libi fëën?

¹⁰ Abigaëli bi lobi Jehovah, söseei a bi ta si di tööu libi leti kumafa Jehovah ta si ën. A musu u dë sö taa a bi sabi andi Gadu bi piki Adam di a bi dëën di mujëë fëën (Ken. 2:24). Abigaëli bi sabi taa Jehovah ta si di tööu libi kuma wan santa soni. U di a bi kë du soni di ta kai ku Gadu, mbei a bi du hii soni di a bi sa du u soni an du dee sëmbë fëën wosudendu, te kisi hën manu tu. Wantewante a bi hopo du wan soni u tapa Dafiti fu an kii Nabali. Abigaëli bi dë kabakaba u hakisi u de dëën paadon u wan soni di an bi du. An dë u taki taa Jehovah bi lobi di mujëë aki, u di a bi abi degihati, söseei u di an bi ta pakisei hënseei wanwan. Andi womi ku mujëë di tööu sa lei a Abigaëli?

11. (a) Andi Jehovah kë taa sëmbë di tööu musu ta du? (Efeise 5:33) (b) Andi i lei u di fasi fa Sisa Carmen bi du soni, u soni an poi di tööu libi fëën? (Luku di peentje tu.)

¹¹ Di soni di u sa lei. Jehovah kë taa sëmbë di tööu musu lesipeki di tööu libi u de, aluwasi ee di sëmbë di de ku ën tööu ta mbei di libi ta taanga da de. Jehovah musu u ta wai te a ta si unfa sëmbë di tööu ta wooko makandi u seeka dee toobi di de abi. A ta wai tu te de ta lobi deseei, söseei te de ta lesipeki deseei. (Lesi Efeise 5:33.) Luku di woto u wan sisa de kai Carmen. Sikisi jaa baka di a tööu, hën a bigi lei soni u Bëibel ku dee Jehovah Kotoigi, hën a dopu bakaten. Di sisa aki bi taki taa: „Mi manu an bi lobi di soni di mi bi du. A bi bigi ta haun ku Jehovah. A bi ta kosi mi, söseei a bi ta taki taa a o go disa mi.” Hii fa soni bi dë sö, tökuseei Carmen bi hoi dou. 50 jaa longi a bi mbei taanga möiti u lobi hën manu, söseei u lesipeki ën. A bi taki tu taa: „Möön dee jaa bi ta pasa, möön mi bi ko ta fusutan unfa mi manu bi ta fii, söseei möön mi bi ta kë fan ku ën a wan suti fasi. Mi sabi taa Jehovah ta si di tööu libi kuma wan santa soni, nöö fëën mbei mi bi ta du hii soni di mi bi sa du u soni an poi di tööu libi fuu. Nöiti wan daka mi suku u go disa mi manu, u di mi lobi Jehovah.”c Ee soni ko ta taanga da i a di tööu libi fii, nöö i sa dë seiki taa Jehovah o heepi i fii hoi dou.

DINI JEHOVAH GO DOU ALUWASI EE I TA FII BOOKOSAKA U DI I MBEI WAN GAAN FÖUTU

12. Andi sa pasa te u du wan gaan zöndu?

¹² Di soni di sa mbei a taanga. U sa ta fii bookosaka seei te u du wan gaan zöndu. Di Bëibel ta taki taa dee zöndu fuu sa ta mbei u fii „bookosaka” nasö de sa mbei u „lasi hati” (Ps. 51:17). Wan baaa de kai Robert bi mbei möiti sömëni jaa longi, faa dou dee maaka di wan baaa musu dou, faa sa toon dinai. Ma a bi du wan gaan zöndu, nöö di soni dë bi mbei a ko fusutan taa a bi bia baka da Jehovah. Di baaa aki bi taki taa: „Di mi bi ko fusutan andi mi bi du, hën háti u mi bi bigi ta fon mi gaanfa seei. Bakaten ma bi ta fii bunu seei. Mi bi ta këë ta begi Jehovah. Mi bi ta pakisei taa Gadu an o haika dee begi u mi möön, u di mi bi du wan soni di hati ën.” Te u du wan gaan zöndu, nöö u sa ta si kuma Jehovah go disa u, söseei u sa ta si kuma an abi na wan wini ee u dini ën go dou (Ps. 38:4). Ee i bi fii sö wan daka kaa, nöö luku di woto u wan sëmbë u Bëibel di bi ta dini Jehovah go dou, hii fa a bi du wan gaan zöndu.

13. Un gaan zöndu apösutu Petuisi bi du, nöö andi bi mbei taa a du di gaan zöndu dë?

¹³ Di woto u Bëibel. Di ndeti ufö de kii Jesosi, hën apösutu Petuisi bi mbei wantu föutu, nöö dee soni dë mbei a du wan gaan zöndu. Di fosu föutu di Petuisi bi mbei, hën da a bi ta futoou hënseei poi. A bi njan buka taa aluwasi ee dee woto apösutu bi o go disa Jesosi, hën an bi o go disëën nöiti (Maik. 14:27-29). Baka di dë, di de bi dë a di djai u Gëtiseimani, Petuisi an bi sa dë ku wojo (Maik. 14:32, 37-41). Boiti di dë, di wanlö sëmbë di bi dë ku fetilai bi ko u ko kisi Jesosi, hën Petuisi kule go disëën (Maik. 14:50). Te u kaba fëën, a bi taki dii pasi taa an sabi Jesosi (Maik. 14:66-71). Andi Petuisi bi du di a bi ko fusutan taa a bi du wan gaan zöndu? Wë kandë u di háti fëën bi ta fon mën, mbei a bi go këë seei te a bigi (Maik. 14:72). U sa fusutan unfa a bi hati Petuisi tjika di de bi kii Jesosi. A musu u dë sö taa Petuisi bi ta fii bookosaka seei!

14. Andi bi heepi Petuisi faa dini Jehovah go dou? (Luku di peentje u di kafiti.)

¹⁴ Sömëni soni bi heepi Petuisi faa dini Jehovah go dou. A bi go a dee woto bakama u Jesosi, nöö de bi dëën kötöhati (Luk. 24:33). Boiti di dë, di Jesosi bi weki ko a libi baka, hën a bi go fan ku Petuisi, u di a bi kë dëën taanga (Luk. 24:34; 1 Kol. 15:5). Jesosi an bi gandji da Petuisi u di soni di a du, ma a bi piki ën taa a o dëën möön gaan faantiwöutu (Joh. 21:15-17). Petuisi bi sabi taa a bi du wan gaan zöndu, ma tökuseei a bi ta mbei möiti u du soni di bunu go dou. Faandi mbei? Wë u di a bi sabi taa di Masa fëën bi lobi ën jeti. Boiti di dë, dee woto bakama u Jesosi bi ta heepi ën go dou. Andi u sa lei a Petuisi?

15. Fuun soni Jehovah kë taa u musu dë seiki fëën? (Psalöm 86:5; Loomë 8:38, 39) (Luku di peentje tu.)

¹⁵ Di soni di u sa lei. Jehovah kë fuu dë seiki taa a lobi u, söseei taa a dë kabakaba u da u paadon. (Lesi Psalöm 86:5; Loomë 8:38, 39.) Te u du zöndu, nöö háti fuu ta fon u. Di soni dë an dë wan hogi soni. Ma wa musu pakisei taa Jehovah an lobi u möön, nasö taa an sa da u paadon möön. Ka fuu pakisei sö, nöö a möön bunu fuu go suku heepi wantewante. Robert, di u bi taki soni fëën kaa, bi taki taa: „Mi bi du zöndu, u di mi bi mëni taa mi bi o sa finga futu da tesi ku miseei kaakiti.” Di baaa aki bi ko fusutan taa a bi musu go fan ku dee gaanwomi. A bi taki tu taa: „Di mi bi go fan ku dee gaanwomi, hën wantewante de heepi mi u mi fii unfa Jehovah lobi mi tjika. Mi bi ta fii tu unfa dee gaanwomi lobi mi tjika. De bi heepi mi u mi si taa Jehovah an bi bia baka da mi.” Useei sa biibi taa Jehovah lobi u gaanfa seei, söseei taa a o da u paadon. Ma u musu lei taa di soni di u bi du ta hati u, u musu suku heepi, söseei u musu mbei möiti fu wa mbei di seei föutu dë möön (1 Joh. 1:8, 9). Te u ta biibi taa Jehovah lobi u, söseei te u ta biibi taa a da u paadon, nöö woo sa dini ën go dou, aluwasi ee u bi mbei wan föutu.

16. Faandi mbei i dë kabakaba u hoi dou a di dini di i ta dini Jehovah?

¹⁶ Jehovah ta tei ën u bigi seei te a ta si fa u ta mbei möiti fuu sa ta dini ën, möönmöön a dee lasiti daka aki. Jehovah sa heepi u fuu dini ën go dou, hii fa u ta fii bookosaka u di u mbei föutu, nasö hii fa wan sëmbë du wan soni di hati u. Aluwasi ee wan baaa nasö wan sisa du wan soni di hati u, tökuseei u sa lei taa u lobi de, söseei u sa da de paadon. U sa lei Gadu unfa u lobi ën tjika, söseei u sa lei unfa u ta lesipeki di tööu libi fuu, te u ta du hii soni di u sa du u seeka dee toobi ku dee bookohedi dee ta dë a di tööu libi. Ee u du wan zöndu, nöö u sa hakisi Jehovah faa heepi u. Te u du sö kaa, nöö u musu biibi taa a lobi u, söseei taa a da u paadon, nöö u dini ën go dou. U sa dë seiki taa woo feni gaan bunu ee u „ta du bunu nango nöömö”.​—Gal. 6:9.