I ta mëni dee soni aki ö?

I bi lesi dee Hei Wakitimawosu u di jaa aki ö? Wë luku ee i sa piki dee hakisi aki:

Unfa Jehovah ta lei u fuu libi ku mujëë sëmbë?

An lobi wan sëmbë möön wotowan, söseei an mbei womi sëmbë möön köni möön mujëë sëmbë. Gadu ta haika mujëë sëmbë. A ta kë sabi unfa de ta fii, söseei a ta kë sabi ku andi de ta booko de hedi. Boiti di dë, a ta futoou de u de du di wooko fëën.​—w24.01, bld. 15-16.

Unfa u sa wooko ku di soni di sikifi a Efeise 5:7, ka a ta taki taa: „Wan musu nama ku de”?

Apösutu Paulosu bi ta piki u fu wa ta nama ku sëmbë di o mbei a möön taanga da u fuu hoi dee wëti u Jehovah. Dee sëmbë dë sa dë sëmbë di u ta miti fesi ku fesi, ku sëmbë di u ta miti a Internet.​—w24.03, bld. 22-23.

Unfa u musu ta köni ku dee mindimindi woto dee sëmbë ta paaja?

U musu ta köni ku dee mindimindi woto di wan mati fuu di lobi u sa konda da u, söseei di sëmbë di wa sabi sa manda a e-mail da u. Boiti di dë, u musu ta köni ku dee sëmbë dee bia baka da di biibi, di ta du kuma de kë ko sabi soni u di tuutuu lei.​—w24.04, bld. 12.

Andi u sabi, ku andi wa sabi u di fasi fa Jehovah o kuutu Könu Salumon ku dee sëmbë u Sodom ku Gomola, ku dee sëmbë dee dëdë a di Gaan Wata?

Wa dë seiki ee Jehovah o mbei dee sëmbë aki dëdë u teego. Ma u sabi taa Jehovah sabi hii soni, söseei taa a abi tjalihati pasa maaka.​—w24.05, bld. 3-4.

Fuun soni u sa dë seiki u di Jehovah da „wan sitonu kuun”? (Deto. 32:4)

U sa go suku tjubi a Jehovah. A dë u futoou, u di hii juu a ta du andi a paamusi. Söseei, an ta tooka möönsö. Di fasi fa a dë, ku di soni di a abi a pakisei u du an ta tooka.​—w24.06, bld. 26-28.

Andi sa heepi i te i tooka kemeente?

Buta futoou a Jehovah, nöö a o heepi i kumafa a bi heepi dee dinima fëën a di ten di pasa. Na tei di kemeente ka i dë maaka ku di kemeente ka i bi dë. I musu ta dë kabakaba u du hii soni di i sa du a di kemeente, söseei mbei möiti fii ko abi njunjun mati.​—w24.07, bld. 26-28.

Andi u sa lei a dee dii woto dee dë a Mateosi kapitë 25?

Di woto u dee sikapu ku dee kaabita ta lei taa u musu abi biibi, söseei taa u musu ta hoi useei a Jehovah go dou. Di woto u dee köni wëndjë mujëë mii, ku dee don wëndjë mujëë mii ta lei u taa u musu ta dë seekaseeka, söseei taa u musu ta dë setiseti ta wakiti. Nöö di woto u dee talënti ta lei u unfa a dë fanöudu tjika fuu ta wooko taanga.​—w24.09, bld. 20-24.

Unfa di gadii u di Wosu u Gadu di Salumon bi mbei bi hei tjika?

A 2 Kloniki 3:4, so u dee pampia lolu ta taki taa di gadii u di Wosu u Gadu bi hei „120 el”, hën da feifiteni ku dii mëti ku föteni centimeter. Ma wanlö woto awooten pampia ta taki taa a bi hei „20 el”, hën da söwan 9 mëti. Di nöbu aki ta möön fiti, te u luku fa di wosu sinkii u di gadii bi degi.​—w24.10, bld. 31.

Andi a kë taki u wan dinai „musu abi wan kodo mujëë tö”? (1 Tim. 3:12)

Di soni aki kë taki taa ee a tööu, nöö a musu ta hoi hënseei a dee wëti u Jehovah dee nama ku di tööu libi. Ma na di dë nöö. A musu ta hoi hënseei a di mujëë fëën. Nöiti a musu buta pakisei a wan woto mujëë a wan fasi di an fiti.​—w24.11, bld. 19.

Faandi mbei wa sa taki taa Johanisi 6:53 ta taki u di fasi fa u musu hoi Di Ndeti Njanjan u Masa?

Johanisi 6:53 ta taki u di fasi fa a dë fanöudu tjika u njan di sinkii u Jesosi, söseei u bebe di buuu fëën. Jesosi bi taki dee soni aki a di jaa 32 Ba.K., a Galilea. A bi ta fan ku dee Dju dee na bi abi biibi nëën jeti. Nöö Di Ndeti Njanjan u Masa bi seti wan jaa baka di dë a Jelusalen. Di pasi dë, nöö Jesosi bi ta fan ku dee sëmbë dee bi o tii ku ën a liba ala.​—w24.12, bld. 10-11