Wa o dë u wanwan nöiti

1-2.(a) Faandi mbei u sa taki taa nöiti u ta dë u wanwan te soni ta taanga da u? (b) Andi woo luku a di woto aki?

TE SONI ta taanga da u, nöö a kan taa u ta fii kuma u de u wanwan a ze a wan piki boto, nöö di wata ta seki gaanfa seei. Hii fa u sa fii sö, tökuseei wa dë u wanwan. Di lobihati Tata fuu di dë a liba ala ta si taa soni ta taanga da u, nöö a paamusi u taa a o heepi u. Jehovah ta piki dee dinima fëën taa: „Mi o dë ku i.​—Jes. 41:10.

² A di woto aki, woo luku unfa Jehovah ta heepi u a dee fö fasi aki: te a ta tii u, te a ta da u dee soni dee u abi fanöudu, te a ta tjubi u, söseei te a ta da u kötöhati. Jehovah ta piki u taa u sa dë seiki taa aluwasi andi ta miti u, nöiti a o fëëkëtë u. Nöiti a o go disa u. Fëën mbei nöiti woo dë u wanwan.

JEHOVAH TA TII U

3-4. Unfa Jehovah ta tii u? (Psalöm 48:14)

³ Lesi Psalöm 48:14. Jehovah sabi taa wa sa tii useei. Unfa a ta tii dee dinima fëën a di ten aki? A ta wooko ku di Bëibel u tii u. Di fasi aki da wan u dee fasi fa a ta tii u (Ps. 119:105). Jehovah ta wooko ku di Wöutu fëën u heepi u fuu ta du soni a wan köni fasi, fuu ko abi dee fasi dee o mbei u ta dë waiwai nöunöu aki kaa, söseei de o mbei u feni di libi u teego a di ten di ta ko.a Jehovah ta lei u fuu ta da wotowan paadon, fuu ta du soni a wan leti fasi, söseei fuu ta lobi wotowan ku hii u hati (Ps. 37:8, Heb. 13:18, 1 Pet. 1:22). Te u ta du soni kumafa Jehovah ta lei u, nöö woo ko dë wan möön bunu mama nasö wan möön bunu tata da dee mii fuu. Woo ko dë wan möön bunu manu, nasö mujëë da di sëmbë di u ku ën tööu, söseei woo ko dë wan möön bunu mati da wotowan.

⁴ Boiti di dë, Jehovah konda woto u sëmbë da u a di Bëibel di bi ta fii kumafa useei ta fii, söseei di soni bi ta taanga da de kuma u (1 Kol. 10:13, Jak. 5:17). Te u ta lesi dee woto aki, nöö u ta fiti dee soni dee u lei a u libi, nöö woo feni wini u de a tu fasi. Di fosuwan, hën da woo ko fusutan taa na u wanwan nöö soni ta taanga da. Ma sëmbë bi abi di seei booko hedi kuma u tu, nöö Jehovah bi heepi de u de hoi dou (1 Pet. 5:9). Di u tu wini di woo feni, hën da woo si unfa u sa hoi dou te soni ta taanga da u.​—Lom. 15:4

5. Ambë Jehovah ta tei u tii u fuu sa waka a di pasi di o mbei u feni teego libi?

⁵ Jehovah ta wooko ku baaa ku sisa u tii tu.b Dee keling gaanwomi ta ko sömëni pasi a dee kemeente u ko da u taanga. Dee taki dee de ta hoi ta mbei di biibi fuu ko möön taanga, söseei de ta heepi u fuu sa ta libi fiifii makandi ku useei (Tjab. 15:40–16:5). Dee gaanwomi u kemeente seei ta wooko taanga u heepi dee baaa ku dee sisa u de, u de ku Jehovah sa dë mati go dou (1 Pet. 5:2, 3). Mama ku tata ta heepi dee mii u de u de lobi Jehovah, u de abi di guwenti u ta du bunu soni, söseei u de ta du soni ku köni (Nöng. 22:6). Dee sisa dee dë gaangaan sëmbë a di biibi ta heepi dee njönku sisa te de ta tja deseei a wan bunu fasi, te de ta lei de unfa de sa du soni a wan köni fasi, söseei te de ta da de kötöhati.​—Tit. 2:3-5.

6. Andi u musu du fuu sa feni wini u di tii di Jehovah ta tii u?

⁶ Jehovah da u hii dee soni dee u abi fanöudu fuu sa du soni a wan köni fasi, söseei fuu sa ta dë waiwai. Unfa u sa lei taa u ta tei dee soni dee a da u u bigi? Nöngö 3:5, 6 ta taki taa: „Buta futoou a Jehovah ku hii i hati. Na buta futoou a iseei.” Te u ta futoou ën, nöö ’hënseei o leti u buta a pasi’. Di soni aki kë taki taa a o heepi u fuu wai pasi da gaansë u dee fuka dee sa miti u, sö taa u sa möön piizii u di libi!​—Ps. 32:8.

JEHOVAH TA DA U DEE SONI DEE U ABI FANÖUDU

7. Na un fasi Jehovah ta da u dee soni dee u abi fanöudu? (Filipi 4:19)

⁷ Lesi Filipi 4:19. Jehovah ta da u dee lei dee u abi fanöudu fuu abi wan taanga biibi. Ma boiti di dë, a ta heepi u fuu feni njanjan, soni u bisi, ku wan wosu fuu libi (Mat. 6:33; 2 Tes. 3:12). Awa, an föutu fuu ta booko u hedi ku dee soni dee u abi fanöudu, ma Jehovah ta da u taanga fu wa booko u hedi pasa maaka (Mat. 6:25). Faandi mbei? Wë u di di Tata fuu di dë a liba ala an ta disa dee dinima fëën de wanwan möönsö (Mat. 6:8; Heb. 13:5). A taki taa a o da u dee soni dee u abi fanöudu, nöö u sa biibi ën.

8. Andi Jehovah bi du da Dafiti?

⁸ Boo luku fa Jehovah bi heepi Dafiti. A dee jaa di Dafiti bi ta lowe da Könu Saulosu, nöö soni bi ta taanga dëën seei. Jehovah bi dëën ku dee womi fëën dee soni di de bi abi fanöudu u de dë a libi. Di Dafiti bi ta pakisei di fasi fa Jehovah bi heepi ën a di ten dë, hën a taki taa: „Mi bi dë wan njönku kijoo, ma nöunöu mi ko gaandi kaa. Ma nöiti mi si taa Gadu disa wan sëmbë di ta libi bunu nëën wojo, hën wanwan. Nöiti mi si taa dee mii fëën ta waka ta suku soni u njan” (Ps. 37:25). Kandë iseei si fa Jehovah da i dee soni dee i bi abi fanöudu, nasö fa a da dee baaa ku dee sisa fii dee soni di de bi abi fanöudu.

9. Unfa Jehovah ta heepi dee sëmbë fëën a di ten aki te wan gaan hogi pasa? (Luku dee peentje.)

⁹ Boiti di dë, Jehovah ta heepi dee sëmbë fëën tu te wan gaan hogi pasa ka de ta libi. Di wan gaan hangi bi ko a di ten u dee fesiten Keesitu sëmbë, hën dee Keesitu sëmbë u woto köndë bi manda soni da dee baaa ku sisa u de (Tjab. 11:27-30; Lom. 15:25, 26). Dee sëmbë u Jehovah ta du di seei soni dë, a di ten aki. Te wan gaan hogi pasa, nöö Jehovah ta wooko ku dee sëmbë fëën u manda wata, soni u njan, soni u bisi, ku deesi da dee baaa ku dee sisa dee ta libi ka di gaan hogi pasa. Dee baaa ku dee sisa dee ta mbei dee kamian ka u ta dini Gadu, ta seeka dee Könuköndë zali dee booko. Boiti di dë, dee sëmbë u Jehovah ta dë kabakaba u wooko ku Bëibel u da sëmbë taanga ku kötöhati, möönmöön dee sëmbë di sëmbë u de lasi libi, nasö di wosu u de booko.c

10-11. Andi i lei a di woto u Borys?

¹⁰ Jehovah ta da dee sëmbë dee na ta piki hën buka soni tu. U sa djeesi Jehovah te useei ta suku okasi u du soni da dee sëmbë dee na ta dini ën (Gal. 6:10). Te u du di soni dë, nöö de sa feni pasi u ko sabi u, ku Jehovah. Boo luku wan woto u wan womi di ta libi a Ukalaini de kai Borys, di dë hedima u siköö. Borys an dë wan Jehovah Kotoigi, ma hii juu a bi ta libi bunu ku dee siköö mii dee dë Kotoigi, nöö a bi ta lesipeki di biibi u de tu. Di feti bi ta feti a di pisiwata ka a bi ta dë, hën a bi kë kumutu naandë go a wan woto pisiwata u di köndë faa bi sa dë möön fiifii, hën dee baaa ku dee sisa bi heepi ën. Bakaten, hën a bi ko mëni di dëdë u Jesosi ku u. Te a ta pakisei dee soni di dee baaa ku dee sisa bi du dëën, nöö a bi taki taa: „Dee Jehovah Kotoigi bi libi bunu ku mi seei. Mi ta da de tangi.”

¹¹ Hii u tuu sa djeesi di Tata fuu di dë a liba ala di abi tjalihati, te u ta lei taa u lobi dee sëmbë dee abi heepi fanöudu, aluwasi de ta dini Jehovah nasö ee de an ta dini ën (Luk. 6:31, 36). U ta dë ku di mëni taa di möiti di u ta mbei u lei taa u lobi sëmbë, o mbei taa de ko dë bakama u Jesosi (1 Pet. 2:12). Ma aluwasi de ko dini Jehovah, nasö de an ko dini ën, tökuseei woo dë waiwai u di „dee sëmbë dee ta da sëmbë soni, ta dë waiwai möön leki dee sëmbë dee ta feni”.​—Tjab. 20:35.

JEHOVAH TA TJUBI U

12. Andi Jehovah paamusi taa a o du u tjubi dee sëmbë fëën? (Psalöm 91:1, 2, 14)

¹² Lesi Psalöm 91:1, 2, 14. A di ten aki, Jehovah paamusi u taa a o tjubi u da hii soni di sa poi di dë di u ku ën dë mati. Nöiti a o disa Saatan u poi di tuutuu lei (Joh. 17:15). Te di „gaan fuka” dou, nöö u sa dë seiki taa Jehovah o du dee soni dee a paamusi u. A o heepi u fuu abi wan taanga biibi, söseei a o tjubi u u hogi an miti u.​—Ako. 7:9, 14.

13. Na un fasi Jehovah ta tjubi hiniwan fuu apaiti?

¹³ Unfa Jehovah ta tjubi hiniwan fuu apaiti? A da u di Bëibel sö taa u sa sabi andi bunu ku andi an bunu (Heb. 5:14). Te u ta libi ku dee mama wëti u Bëibel, nöö u ku Jehovah an o poi, söseei de ta tjubi u u hogi an miti u (Ps. 91:4). Boiti di dë, Jehovah da u di kemeente u heepi u ku dee soni dee u abi fanöudu sö taa u sa hoi dou (Jes. 32:1, 2). Te u ta nama ku dee sëmbë dee lobi Jehovah, söseei dee ta libi ku dee mama wëti fëën, nöö woo feni taanga a de, söseei de o heepi u fuu finga futu da soni di sa mbei u ku Jehovah poi.​—Nöng. 13:20.

14. (a) Faandi mbei Jehovah an ta puu hii dee tesi fuu da u? (b) Un taanga Psalöm 9:10 ta da u? (Luku di pisi di ta taki u woto fanöudu soni tu.)

¹⁴ A di ten di pasa, Jehovah bi tjubi dee sëmbë fëën u hogi an miti de. Ma na hii juu a bi ta du ën. Sö juu soni ta miti u „a wan juu di wa bi mëni” (Peleik. 9:11). Boiti di dë, Jehovah bi da pasi taa sö dinima fëën bi tja sitaafu, u lei taa Saatan da wan gaan mindisonima (Jöpu 2:4-6; Mat. 23:34). Leti kumafa a bi pasa ku so u dee dinima u Jehovah a di ten di pasa, sö nöö a sa pasa ku u tu. U sabi taa Jehovah an ta puu hii tesi a pasi da u, ma u sa dë seiki taa nöiti a o disa dee sëmbë dee lobi ën de wanwan.d​—Ps. 9:10.

JEHOVAH TA DA U KÖTÖHATI

15. Unfa u ta feni taanga a di Wöutu u Gadu, a dee baaa ku dee sisa fuu, söseei te u ta begi? (2 Kolenti 1:3, 4)

¹⁵ Lesi 2 Kolenti 1:3, 4. So juu u ta djëmë, so juu u ta fëëë, nasö u ta booko u hedi gaanfa seei ku soni. Kandë i abi wan gaan bookohedi nöunöu di ta mbei i ta fii kuma i dë i wanwan. Sëmbë ta fusutan unfa i ta fii ö? Wë, Jehovah hën a ta fusutan fa i ta fii. Na fii nöö a ta fii te u ta tja pen nöö a kaba, ma a „ta heepi u fuu feni kötöhati” tu te u ta tja fuka. Ma unfa a ta du di soni dë? Te u ta konda hii soni di dë a u hati da Jehovah, nöö a ta da u ’di kötöhati fëën di bigi pasa hii sëmbë fusutan u tjubi u hati ku u fusutan tuu’ (Fil. 4:6, 7). Boiti di dë, u ta feni kötöhati te u ta lesi fa Jehovah ta fan ku u a di Bëibel. A di Wöutu fëën, a ta konda da u unfa a lobi tjika, a ta lei unfa u musu ta köni ku soni, söseei a ta piki u taa soni o go bunu a di ten di ta ko. Boiti di dë, u ta feni kötöhati a dee kemeente komakandi. U ta lei sömëni soni di ta da u taanga, söseei u ta dë makandi ku dee baaa ku dee sisa fuu di lobi u.

16. Andi i ta lei a di woto u Nathan ku Priscilla?

¹⁶ Fuu sa fusutan möön bunu unfa Jehovah ta wooko ku di Wöutu fëën u da u taanga ku kötöhati, nöö woo luku di woto u Nathan ku Priscilla di ta liba na Amëëkanköndë. Wantu jaa pasa de bi foloisi go a wan köndë ka möön peleikima bi dë fanöudu. Nathan bi taki taa: „U bi ta biibi taa Jehovah bi o mbei soni waka bunu da u.” Ma di de bigi du di njunjun wooko u de, hën de bi ko abi bookohedi a gözöntu së, ku möni së. De bi abi u toona go a de köndë baka, nöö de bi abi möni fuka jeti. Nathan bi taki taa: „Mi bi ta hakisi miseei faandi mbei Gadu an bi heepi u kumafa u bi mëni. Mi bi ta hakisi miseei ee mi bi du wan soni di an bunu.” Baka wan pisiten Nathan ku Priscilla bi ko fusutan taa Gadu an bi disa de möönsö. Nathan bi taki go dou taa: „A dee pisiten di soni bi ta taanga da u, nöö di Bëibel bi dë kuma wan köni mati da u, di bi ta da u taanga ku kötöhati. U bi ta buta pakisei a di fasi Jehovah bi ta heepi u fuu hoi dou di soni bi ta taanga da u, ka fuu bi buta pakisei a dee bookohedi fuu. Di soni dë bi heepi fuu dë seekaseeka da hiniwan soni di bi sa miti u a di ten di ta ko.”

17. Unfa wan sisa de kai Helga feni kötöhati? (Luku di peentje tu.)

¹⁷ Dee baaa ku dee sisa fuu sa da u kötöhati. Unfa sö? Wë, boo luku di woto u Helga di ta libi a di köndë Hongalia. Sömëni jaa longi soni bi ta taanga dëën, nöö a bi ko ta dë pantapanta, söseei a bi ta fii kuma an bi dë na wan hojo soni. Ma te a toona mëni di ten dë baka, nöö a ta si fa Jehovah bi wooko ku di kemeente u dëën kötöhati. A bi taki taa: „Jehovah bi ta heepi mi hii juu te a bi si taa ma abi kaakiti möön. Soni bi ta taanga da mi u di mi bi ta wooko taanga u luku di mii u mi di bi dë ku suwaki, söseei u di mi bi abi woto bookohedi jeti. Dee 30 jaa dee pasa, mi si fa Jehovah bi da mi kötöhati kumafa a abi paamusi. Sömëni pasi a wooko ku wotowan u da mi taanga ku dee soni dee de bi ta taki. Sömëni pasi sëmbë bi ta gafa mi, de bi ta manda bosikopu da mi a tëlëfön, söseei de bi ta sikifi soni a pampia manda da mi a di pisiten di mi bi abi ën taanga fanöudu seei.”

18. Unfa u sa da wotowan kötöhati?

¹⁸ U abi di gaandi u djeesi Gadu a di fasi fa a ta da sëmbë kötöhati. Unfa u sa du ën? U sa ta haika de ku pasensi, u sa ta da de lai, söseei u sa ta heepi de ku dee soni dee de abi fanöudu (Nöng. 3:27). U ta mbei möiti u da dee sëmbë dee ta tja sitaafu kötöhati te kisi dee sëmbë dee na ta dini Gadu jeti. Te dee sëmbë dee dë ka u ta libi dë ku suwaki, te de ta djëmë, nasö te de abi bookohedi, nöö u nango luku de, u ta haika de, söseei u ta kanda soni u Bëibel da de di sa da de taanga. Te u ta djeesi Jehovah, di Gadu ka „hii kötöhati ta kumutu”, nöö wa o ta heepi dee baaa ku dee sisa fuu wanwan nöö u hoi dou te tesi ta miti de, ma woo ta heepi dee sëmbë dee na ta dini ën tu u ko a di tuutuu lei.​—Mat. 5:16.

JEHOVAH TA HEEPI U HII JUU

19. Andi Jehovah du da u, nöö unfa u sa djeesi ën?

¹⁹ Jehovah ta booko hën hedi gaanfa seei ku hii dee sëmbë dee lobi ën. An ta disa u möönsö te soni ta taanga da u. Leti kumafa dee gaansëmbë u wan mii ta heepi ën, sö nöö Jehovah ta heepi dee sëmbë dee ta hoi deseei nëën. A ta tii u, a ta da u dee soni dee u abi fanöudu, a ta tjubi u, söseei a ta da u kötöhati. U ta djeesi di Tata fuu di dë a liba ala, te u ta da sëmbë taanga te de abi bookohedi. Te tesi ta miti u, söseei te soni ta taanga da u, nöö u sa dë seiki taa Jehovah o dë ku u. A ta piki u taa: „Na fëëë, biga mi dë ku i” (Jes. 41:10). Di soni aki ta da u taanga taa Jehovah tuutuu! U ta si tuutuu taa wa o dë u wanwan nöiti.