Unfa di në u Jehovah musu dë fanöudu da u tjika?

1-2. Unfa u du sabi taa di në u Jehovah da wan gaan fanöudu soni da Jesosi?

DI NË u Jehovah da wan gaan fanöudu soni da Jesosi. Hën da di sëmbë di mbei sëmbë ko sabi di në fëën Tata möön gaanfa. Kumafa u bi luku a di woto di pasa, nöö Jesosi bi dë kabakaba u dëdë u lei taa Jehovah santa, söseei taa a ta du soni a wan leti fasi (Maik. 14:36; Heb. 10:7-9). Baka di Dusu Jaa Tii, nöö Jesosi o toona da hën Tata di Könuköndë baka, u di a kë taa Jehovah hën musu kisi hii gafa (1 Kol. 15:26-28). Di fasi fa Jesosi lobi di në u Gadu ta lei u unfa hën ku hën Tata dë mati tjika. A dë gbelingbelin u si taa Jesosi lobi di sëmbë di ta tja di në dë gaanfa seei.

² Jesosi bi ko a goonliba aki u ko piki sëmbë hii dee soni dee Jehovah bi kë u de ko sabi (Joh. 5:43; 12:13). A bi mbei dee bakama fëën ko sabi di në fëën Tata (Joh. 17:6, 26). A bi ta lei sëmbë soni u Jehovah, söseei a bi ta du foombo soni a di në u Jehovah (Joh. 10:25). Jesosi bi hakisi Jehovah be a tjubi dee bakama fëën u di në fëën hedi (Joh. 17:11). A dë limbolimbo u si taa di në u Gadu bi dë wan gaan fanöudu soni da Jesosi. Wë nöö unfa wan sëmbë sa taki taa a dë wan bakama u Jesosi nöö an sabi di në u Jehovah nasö an ta kai di në fëën?

3. Andi woo luku a di woto aki?

³ U di u da tuutuu Keesitu sëmbë, mbei u ta djeesi Jesosi a di fasi fa a lobi di në fëën Tata, söseei a di fasi fa a ta lesipeki ën (1 Petuisi 2:21). A di woto aki, woo luku faandi mbei Jehovah da pasi taa dee sëmbë dee ta paaja di „bunu buka u di Könuköndë”, ta tja di në fëën (Mat. 24:14). Woo luku tu faandi mbei di në u Jehovah musu dë wan gaan fanöudu soni da u.

DE KO DË SËMBË DI TA TJA DI NË FËËN

4. (a) Andi Jesosi bi piki dee bakama fëën kölö sö ufö a toona go a liba ala? (b) Andi u sa hakisi useei te u luku di soni di Jesosi bi piki dee bakama fëën?

⁴ Kölö sö ufö Jesosi toona go a liba ala, hën a bi piki dee bakama fëën taa: „Fa di [santa jeje] fëën o ko a unu liba dë, nöö a o da unu kaakiti fuun sa tei dee soni u mi dee un sabi konda da lanti be de jei. A Jelusalen aki woon seti konda di buka, nöö woon ta kondëën te dou hii Judea köndë te kisi Samalia köndë, nöö woon toona ta kondëën be a paaja a hii dee köndëköndë u goonliba tuu ka sëmbë dë” (Tjab. 1:8). Di bunu buka bi o paaja a hii kamian, na a Isaëli wanwan nöö. Awa, hii pei nasiön sëmbë bi o feni di okasi u ko dë bakama u Jesosi (Mat. 28:19, 20). Ma Jesosi bi taki taa: ’Un tei dee soni u mi dee un sabi konda da lanti be de jei.’ A dë sö taa soni u Jesosi nöö dee sëmbë dee bi o ko dë bakama fëën bi o ta konda u, naa a bi o dë u de ko sabi Jehovah, söseei u de ta konda soni u Jehovah da sëmbë tu? Di soni di sikifi a Tjabukama kapitë 15 o heepi u fuu sabi di soni aki.

5. Unfa dee apösutu ku dee gaanwomi u Jelusalen bi lei taa a dë fanöudu u hii sëmbë ko sabi di në u Jehovah? (Luku di peentje tu.)

⁵ A di jaa 49 Baka Keesitu, hën dee apösutu ku dee gaanwomi u Jelusalen bi hoi wan komakandi u taki ee dee sëmbë dee an bi dë Dju bi musu koti di maaka u dee Dju, sö taa de bi sa ko dë Keesitu sëmbë. A kaba u di komakandi, hën di baaa u Jesosi de kai Jakobosi bi taki taa: ’Wë u jei fa Petuisi fan dë kaa. A konda da u fa Masa Gadu seti pii sëmbë a dee sëmbë na u Isaëli sëmbë dendu u de ko dë sëmbë fëën.’ A bi toona taki andi di tjabukama Amösi bi taki, di a bi taa: ’Nöö fa mi o du ën dë, nöö dee oto sëmbë u goonliba o si, nöö de o suku u de ko dë sëmbë u mi tu. Dee oto köndë sëmbë na u Isaëli, dee mi tei u ko dë sëmbë u mi, de tuu o suku di pasi fu de sa ko a mi, sö Masa Gadu bi taki’ (Tjab. 15:14-18). Dee njunjun bakama u Jesosi aki an bi o lei soni u Jehovah nöö a kaba, ma de bi o ko dë sëmbë fëën tu. Di soni aki kë taki taa de bi o tja di në fëën, söseei sëmbë bi o sabi de kuma sëmbë u Gadu.

6-7. (a) Faandi mbei Jesosi bi ko a goonliba aki? (b) Andi da di möön fanöudu soni di Jesosi bi ko du a goonliba aki?

⁶ Di në Jesosi kë taki „Jehovah hën ta heepi sëmbë”, nöö Jehovah tei Jesosi u heepi dee sëmbë dee ta biibi nëën ku di Womi Mii fëën. Jesosi bi ko a goonliba aki ko paka paima da libisëmbë ku di libi fëën (Mat. 20:28). U di a paka di lusupaima, mbei libisëmbë sa feni paadon u dee zöndu u de, söseei de sa feni di libi u teego.​—Joh. 3:16.

⁷ Faandi mbei libisëmbë bi abi heepi fanöudu? Wë u di soni di bi pasa a di djai u Eden hedi. Kumafa di woto di pasa ta lei u, nöö Adam ku Eva, dee gaan avo u hii libisëmbë, bi hopo fia ku Jehovah. Fëën mbei de bi lasi di okasi di de bi abi u libi u teego (Ken. 3:6, 24). Ma Jesosi bi ko a goonliba u du wan möön fanöudu soni möön di heepi di a bi musu heepi libisëmbë. Saatan bi poi di në u Jehovah (Ken. 3:4, 5). Di heepi di Jesosi bi ko heepi libisëmbë bi nama ku wan möön fanöudu soni di bi o pasa tu, hën da di mbei di a bi o mbei di në u Jehovah ko limbo. Jesosi bi dë di möön bunu sëmbë di bi o sa du di soni aki, u di a bi ta tei kamian da Jehovah, söseei a bi du hii soni di Jehovah bi kë faa du a wan bunu fasi.

8. Andi hii dee sëmbë dee ta biibi a Jesosi musu ko fusutan?

⁸ Hii dee sëmbë dee bi o ko biibi a Jesosi, aluwasi ee de bi dë Dju nasö woto köndë sëmbë, bi musu biibi taa Jehovah Gadu, di Tata u Jesosi, hën da di Heepima u de (Joh. 17:3). Boiti di dë, de o sabi de kuma sëmbë di ta tja di në u Jehovah, leti kumafa Jesosi ta tjëën. De musu ko sabi tu unfa a dë fanöudu tjika u deseei du soni u mbei di në dë ko limbo. De musu du di soni dë sö taa Jehovah sa feni de u bunu, söseei u de sa feni di libi u teego (Tjab. 2:21, 22). Awa, hii dee bakama u Jesosi musu ko lei soni u Jehovah, ku Jesosi. Fëën mbei Jesosi bi kaba di begi fëën di sikifi a Johanisi 17 ku dee wöutu aki: „Mi mbei de ko sabi i në, nöö mi o ta mbei de ko sabi ën möönmöön jeti, sö taa de sa ta lobi deseei ku di wan seei lobi di i si i ta lobi mi aki. Nöö miseei o dë a de dendu tu ta tii de.”​—Joh. 17:26.

„UNU DA KOTOIGI U MI”

9. Unfa u sa lei taa di në u Jehovah dë fanöudu da u?

⁹ Te u luku dee soni dee u bi taki a fesi, nöö a dë limbolimbo u fusutan taa ee u kë waka a Jesosi baka, nöö u musu du soni u di në u Jehovah sa ko limbo (Mat. 6:9, 10). U musu hoi a pakisei taa di në u Jehovah musu dë di möön fanöudu soni a u libi. Di soni aki kë taki taa u musu ta lei ku dee soni dee u ta du taa di në u Jehovah da di möön fanöudu soni da u. Ma unfa u sa du soni sö taa di në u Jehovah sa ko limbo, nöö u lei taa Saatan ta mindi soni dëën?

10. Andi Jesaaja 42 te go miti 44 ta taki? (Jesaaja 43:9; 44:7-9) (Luku di peentje tu.)

¹⁰ Jesaaja kapitë 42 te go miti 44 ta taki unfa a dë fanöudu tjika fuu seei du soni u mbei di në u Jehovah ko limbo. Dee kapitë aki ta taki u wan apaiti kuutu ka de o luku ambë da di tuutuu Gadu, ma di kuutu aki an dë wan tuutuu kuutu. Jehovah ta kai hii dee soni dee ta kai deseei gadu, u de ko lei taa de dë gadu tuutuu. A ta kai dee bakama u de u de ko taanpu, u lei ee de dë gadu tuutuu. Ma na wan u de sa lei taa de dë gadu tuutuu!​—Lesi Jesaaja 43:9; 44:7-9.

11. Andi Jehovah piki dee sëmbë fëën, te u luku Jesaaja 43:10-12?

¹¹ Lesi Jesaaja 43:10-12. Jehovah bi taki u dee sëmbë fëën taa: „Unu da kotoigi u mi, nöö mi da Gadu.” Jehovah ta hakisi de taa: „Wan woto Gadu dë boiti mi ö?” (Jes. 44:8) U abi di gaandi u piki di hakisi aki. Nöö u sa lei ku dee soni dee u ta taki, ku dee soni dee u ta du, taa Jehovah da di wan kodo tuutuu Gadu. Di në fëën hei möön hii dee woto në. U ta lei ku di fasi fa u ta libi taa u lobi Jehovah, söseei taa u ta hoi useei nëën go dou, aluwasi ee Saatan ta mbei di libi ta taanga da u gaanfa seei. A di lö fasi aki, useei ta feni di okasi u du soni u mbei di në fëën ko limbo.

12. Unfa di tjabukama woto di sikifi a Jesaaja 40:3, 5 bi pasa tuutuu?

¹² Te u ta du soni u di në u Jehovah sa ko limbo, nöö hën da u ta djeesi Jesosi Keesitu. Boiti di dë, Jesaaja bi taki taa wan sëmbë bi o ko u „seeka di pasi u Jehovah” (Jes. 40:3). Wë unfa di soni dë ko pasa tuutuu? Johanisi di Dopuma bi seeka di pasi da Jesosi. Ma u sa taki taa di pasi u Jehovah hën a bi seeka, u di Jesosi bi tei kamian da Jehovah di a bi ko a goonliba aki (Mat. 3:3; Maik. 1:2-4; Luk. 3:3-6). Di seei tjabukama woto aki bi taki tu taa: „Di dë di Jehovah dë u gafa o ko a limbo” (Jes. 40:5). Wë unfa di soni dë pasa? Di Jesosi bi ko a goonliba aki, nöö a bi tei kamian da Jehovah a sö wan bunu fasi, taa a bi djei kuma Jehovah seei hën bi ko a goonliba aki.​—Joh. 12:45.

13. Unfa u sa djeesi Jesosi?

¹³ U da kotoigi u Jehovah leti kuma Jesosi. U ta tja di në u Jehovah, söseei u ta piki hii dee sëmbë dee u ta miti, dee foombo soni dee a du. Ma fuu sa du di soni dë a wan bunu fasi, nöö u musu piki wotowan hii dee soni dee Jesosi du tu, u mbei di në u Jehovah ko limbo (Tjab. 1:8). Jesosi da di sëmbë di konda soni u Jehovah da wotowan a di möön bunu fasi, nöö fëën mbei u ta djeesi ën (Ako. 1:5). Ma na un woto fasi u sa lei taa di në u Jehovah da wan fanöudu soni da u?

UNFA DI NË U JEHOVAH DË FANÖUDU DA U TJIKA?

14. Unfa di në u Jehovah ta mbei u ta fii, te u luku Psalöm 105:3?

¹⁴ U ta wai taa u ta tja di në u Jehovah. (Lesi Psalöm 105:3.) Jehovah ta wai seei te a ta si fa u ta djula dëën (Jel. 9:23, 24; 1 Kol. 1:31; 2 Kol. 10:17). Te u ta djula da Jehovah, hën da u ta du soni di ta lei taa u ta wai taa a dë di Gadu fuu. U ta si ën kuma wan gaandi u gafa di në fëën, söseei u konda da wotowan taa hii soni di a ta du bunu. Wa musu ta sen u piki dee sëmbë a wookope, dee mii fuu kalasi, dee sëmbë ka u ta dë, nasö woto sëmbë taa u da Jehovah Kotoigi! Didibi kë fuu disa u konda soni u di në u Jehovah da wotowan (Jel. 11:21; Ako. 12:17). Hën ku dee poipoi tjabukama fëën kë taa sëmbë musu fëëkëtë di në u Jehovah (Jel. 23:26, 27). Ma di lobi di u lobi di në u Jehovah ta mbei u ta kë gafëën ku wai „hii daka”.​—Ps. 5:11; 89:16.

15. Andi a kë taki u ta kai di në u Jehovah?

¹⁵ U ta kai di në u Jehovah go dou (Joë. 2:32; Lom. 10:13, 14). Te u ta kai di në u Jehovah, nöö di soni dë an kë taki nöö taa u sabi di në fëën, nasö taa a ta dë a u buka nöö a kaba. Ma u ta ko sabi unfa Gadu dë tuutuu, u ta futoou ën, söseei u ta suku heepi nëën (Ps. 20:7; 99:6; 116:4; 145:18). Boiti di dë, u ta konda soni u di në fëën, ku dee waiti fasi dee a abi da wotowan. Söseei u ta heepi sëmbë u tooka di fasi fa de ta libi, sö taa Jehovah sa wai ku de.​—Jes. 12:4; Tjab. 2:21, 38.

16. Unfa u sa lei taa Saatan da wan mindisonima?

¹⁶ U dë kabakaba u tja fuka, sö taa di në u Jehovah kisi gafa (Jak. 5:10, 11). Te u ta hoi useei a Jehovah go dou, hii fa u ta tja sitaafu, nöö u ta lei taa Saatan da wan mindisonima. A di ten u Jöpu, nöö Saatan bi taki u dee dinima u Jehovah taa: „Hii soni di wan sëmbë abi a o da faa sa tan a libi” (Jöpu 2:4). Saatan taki taa sëmbë bi o ta dini Jehovah te soni bi ta waka bunu da de, ma te de ko abi bookohedi, nöö de o go disa Jehovah. Jöpu bi lei taa di soni dë na tuu soni. Nöö sö nöö useei abi di gaandi u lei taa wa o go disa Jehovah nöiti, aluwasi andi Saatan o kë du ku u. U sa dë seiki taa Jehovah o ta tjubi u, u di në fëën hedi.​—Joh. 17:11.

17. Na un woto fasi u sa tja gafa ko da di në u Jehovah, te luku 1 Petuisi 2:12?

¹⁷ U ta lesipeki di në u Jehovah (Nöng. 30:9; Jel. 7:8-11). U ta tei kamian da Jehovah, söseei u ta tja di në fëën. Fëën mbei u sa tja gafa ko dëën, nasö a sa pasa taa u du soni di ta poi hën në. (Lesi 1 Petuisi 2:12.) U kë mbei hii möiti di u sa’ u gafa Jehovah ku dee soni dee u ta taki, söseei ku dee soni dee u ta du. A sö wan fasi, woo sa tja gafa ko da di në fëën a di möön bunu fasi fa u sa, hii fa u dë zöndu libisëmbë.

18. Andi da wan woto fasi fa u sa lei taa di në u Jehovah da wan gaan fanöudu soni da u? (Luku di pisi di ta taki u woto fanöudu soni tu.)

¹⁸ U ta möön booko u hedi ku di në u Jehovah, möön di fasi fa woto sëmbë ta si u (Ps. 138:2). Faandi mbei di soni dë da wan gaan fanöudu soni? Wë dee soni dee u ta du u di u lobi di në u Jehovah sa mbei sëmbë taki hogi fuu.a Jesosi bi dë kabakaba u dëdë a wan sen fasi kuma wan hogihati sëmbë, u tja gafa ko da di në u Jehovah. An bi a’ toobi ku di sen di de dëën, söseei an bi ta booko hën hedi gaanfa ku di fasi fa wotowan bi ta si ën (Heb. 12:2-4). Ma a bi ta buta pakisei a di soni di Gadu bi kë faa du.​—Mat. 26:39.

19. Unfa i ta si di në u Jehovah, nöö faandi mbei i ta si ën sö?

¹⁹ U ta wai seei taa u ta dini Jehovah, nöö u ta fii bunu te de ta kai u Kotoigi u Jehovah. Fëën mbei woo ta gafëën go dou, aluwasi ee sëmbë ta sösö u. Di në u Jehovah dë möön fanöudu da u, möön di fasi fa sëmbë ta si u. Fëën mbei boo dë kabakaba u ta gafa Jehovah go dou, aluwasi ee Saatan ta pooba u mbei u lasi hati. A sö wan fasi, woo lei taa di në u Jehovah da di möön fanöudu soni da u, leti kumafa a bi dë da Jesosi Keesitu.