Unfa di në u Jehovah dë fanöudu da Jesosi tjika?

1-2. (a) Andi Jesosi bi du a di ndeti ufö de kii ën? (b) Na un soni woo buta pakisei a di woto aki?

A DI ndeti u 14 Nisan u di jaa 33 Baka Keesitu, di juu bi ta zuntu ka de bi o sei Jesosi, nöö de bi o kuutu ën, de bi o lesi sitaafu dëën, de bi o du hogihati soni ku ën, söseei de bi o kii ën. Kaba seei Jesosi bi kaba njan wan apaiti njan ku dee apösutu fëën dee bi hoi deseei nëën. De bi njan a wan kamba di bi dë a liba u wan wosu. Di de bi kaba njan, hën Jesosi bi konda wantu lasiti soni da dee apösutu fëën u da de taanga. Ma ufö de kumutu a di kamba, hën Jesosi bi tei ten begi wan apaiti begi. Apösutu Johanisi sikifi andi Jesosi bi taki a di begi dë. Dee soni dë sikifi a Johanisi kapitë 17.

² A di woto aki, woo lei so soni a di begi u Jesosi. Ku andi a bi ta booko hën hedi ufö a dëdë? Unfa di begi dë ta heepi u fuu ko sabi andi bi dë fanöudu dëën, di a bi ta du di diniwooko fëën a goonliba aki? Boo buta pakisei a dee soni aki.

„MI MBEI DE KO SABI I NË”

3. Andi Jesosi bi taki u di në u Jehovah, nöö andi a bi kë taki ku di soni dë? (Johanisi 17:6, 26.)

³ Jesosi bi taki a di begi fëën taa: „Mi mbei de ko sabi i në.” Fuu taki ën, nöö hii tu pasi a bi taki taa a bi mbei dee bakama fëën ko sabi Jehovah në. (Lesi Johanisi 17:6, 26.) Andi a bi kë taki ku di soni dë? Taki a bi kë taki taa a bi mbei de ko sabi wan në di de an bi sabi ö? Wë dee bakama u Jesosi bi dë Dju, nöö de bi sabi kaa taa di në u Gadu da Jehovah. Di në dë bi sikifi dusudusu pasi a dee Hebelejën buku u Bëibel. Hën da na soni u di në u Gadu seei Jesosi bi ta taki. Ma a bi kë taki taa a bi mbei de ko sabi un pei Gadu Jehovah dë. Jesosi bi heepi dee bakama fëën u de ko sabi Jehovah möön bunu, te dou ku dee soni dee a abi a pakisei u du, dee soni dee a ta du, ku dee fasi dee a abi. Jesosi wanwan tö nöö sabi Jehovah sö bunu.

4-5. (a) Unfa wan sëmbë në sa ko dë möön apaiti da u? Konda wan woto. (b) Na un fasi dee bakama u Jesosi bi ko sabi Jehovah möön bunu?

⁴ Boo taa wan gaanwomi de kai David dë a di kemeente ka i dë. A dë wan data, nöö i sabi ën sömëni jaa kaa. Ma wan daka, hën wan gaan soni ko pasa ku i. Hën de tja i hesihesi go a di hatiwosu ka di baaa dë ta wooko, hën a heepi i fu ja lasi i libi. Di soni dë an o mbei i ko ta fii wan apaiti fasi te i jei di baaa dë në u? Wë a musu u dë sö! David an o dë di baaa di i bi sabi kaa nöö a kaba. Ma a o ko dë di data di heepi i fu ja dëdë tu.

⁵ U sa taki taa sö nöö dee bakama u Jesosi seei bi sabi Jehovah në tu. Ma di në dë bi ko dë möön apaiti da de, u di Jesosi bi heepi de u de ko sabi Jehovah möön bunu. Faandi mbei u sa taki sö? Wë u di Jesosi bi ta fan, ta du soni leti kuma hën Tata. Hën da dee apösutu u Jesosi bi ko „sabi” Jehovah möön bunu, u di de bi ta haika fa Jesosi bi ta lei sëmbë soni, söseei u di de bi ta buta pakisei a di fasi fa Jesosi bi ta libi ku sëmbë.​—Joh. 14:9; 17:3.

„U DI NË FII SEEI HEDI E, DI NË DI I DA MI”

6. Na un futu Jehovah da Jesosi di në fëën? (Johanisi 17:11, 12)

⁶ A di begi di Jesosi bi begi da dee bakama fëën, a bi taki taa: „Taata o, tjubi de u di në fii seei hedi e, di në di i da mi.” (Lesi Johanisi 17:11, 12.) Di soni aki kë taki taa de bi o bia ta kai Jesosi Jehovah u? Wë nönö. Hoi a pakisei taa di Jesosi bi taki soni u di në u Jehovah hën a bi piki Jehovah taa „u di në fii seei hedi”. Di soni aki ta lei taa Jehovah an bi da Jesosi di në fëën tuutuu. Wë nöö andi Jesosi bi kë taki di a bi taki taa Gadu dëën di në fëën? Di fosu soni, hën da Jesosi hën bi dë di bosikopuma u Jehovah, söseei di sëmbë di bi ta tei kamian dëën. Di Tata fëën hën bi mandëën ko, nöö a bi du gaan wooko u di në fëën Tata hedi (Joh. 5:43; 10:25). Di u tu soni, hën da di në u Jesosi kë taki taa „Jehovah da di heepima”. Awa, di në u Gadu nama ku di në u Jesosi.

7. Faandi mbei Jesosi bi sa fan da Jehovah? Konda wan woto.

⁷ U sa tei di soni aki maaka ku wan tiima di manda wan sëmbë u go fan ku wanlö sëmbë dëën. Te di bosikopuma taki wan soni, nöö a o dë kuma di tiima seei hën ta fan dë. Sö nöö, Jesosi bi abi di makiti u fan da Jehovah, biga Jehovah hën bi mandëën.​—Mat. 21:9; Luk. 13:35.

8. Faandi mbei Jehovah bi taki taa Jesosi bi ta tja di në fëën, hii fa an bi ko a goonliba aki jeti? (Ëkisodesi 23:20, 21)

⁸ Di Bëibel ta kai Jesosi di Wöutu, u di Jehovah bi tei ën u piki dee ëngëli ku libisëmbë andi Jehovah bi kë u de sabi, söseei andi a bi kë u de du (Joh. 1:1-3). A kan taa Jesosi hën bi dë di ëngëli di Jehovah bi manda u go heepi dee Isaëli sëmbë a di ten di de bi dë a di sabana. Di Jehovah bi ta piki de u de haika andi di ëngëli bi ta taki, hën a bi taa: „U di a ta tja di në u mi.”a (Lesi Ëkisodesi 23:20, 21.) Jesosi bi ta tja di në u Jehovah, u di a bi dë di sëmbë di ta tei kamian da Jehovah, söseei hën da di sëmbë di ta möön du soni u mbei di në u Jehovah ko limbo.

„TAATA O, BE SËMBË SI DI HEI KU DI KAAKITI DI I ABI E, BE DI NË FII BAI”

9. Unfa di në u Jehovah bi dë wan fanöudu soni da Jesosi tjika? Booko ën a piki möni.

⁹ Leti kumafa u bi taki, nöö ufö Jesosi ko a goonliba, nöö di në u Jehovah bi dë wan gaan soni dëën. Di a bi ko a goonliba aki, nöö a bi lei ku hii dee soni dee a bi ta du taa di në u Jehovah da wan gaan fanöudu soni dëën! A di kaba pisi u di diniwooko fëën, hën a bi begi hën Tata taa: „Taata o, be sëmbë si di hei ku di kaakiti di i abi e, be di në fii bai.” Wantewante dë, hën wan töngö piki kumutu a liba ala taa: „Mi mbei di në u mi kisi gafa kaa, nöö mi o du ën baka.”​—Joh. 12:28.

10-11. (a) Unfa Jesosi bi mbei di në u Jehovah ko limbo? (Luku di peentje tu.) (b) Faandi mbei di në u Jehovah bi musu ko limbo?

¹⁰ Jesosi seei bi gafa di në fëën Tata tu. Unfa a du ën? Wan u dee fasi fa a du ën, hën da a bi mbei sëmbë ko sabi dee waiti fasi dee Jehovah abi, söseei a bi mbei de ko sabi dee foombo soni dee a du. Ma Jesosi bi du wanlö woto soni tu, u di di në u Jehovah bi musu ko limbo, söseei sëmbë bi musu ko sabi taa a ta du soni a wan leti fasi.b Jesosi bi lei unfa di soni aki dë fanöudu tjika, di a bi lei dee bakama fëën fa de bi musu begi. A bi taki taa: „U Tata di dë a liba ala, be di në fii ko santa e.”​—Mat. 6:9.

¹¹ Faandi mbei di në u Jehovah bi musu ko limbo, söseei faandi mbei u musu lei taa Jehovah ta du soni a wan leti fasi? Wë u di Saatan Didibi bi mindi soni da Jehovah Gadu a di djai u Eden. Saatan bi taki taa Jehovah da wan mindisonima, söseei taa a ta tapa Adam ku Eva u feni wan bunu soni (Ken. 3:1-5). Dee soni aki ta lei taa Saatan bi kë taki taa Jehovah an ta du soni a wan leti fasi. Dee soni dee Saatan mindi da Jehovah aki bi sa mbei sëmbë mëni taa Jehovah na wan bumbuu Gadu. A bi poi hën në. Bakaten, a di pisiten u Jöpu hën Saatan bi taki taa sëmbë bi ta dini Jehovah sösö u di de bi sa feni wan soni nëën. Di mindisonima dë bi taki tu taa sëmbë o tapa u dini Jehovah te soni ta miti de, u di de an lobi ën tuutuu (Jöpu 1:9-11; 2:4). Ten bi musu pasa fuu si ee Jehovah nasö Saatan hën ta mindi soni.

„MI O LASI MI LIBI DA DEE SIKAPU”

12. Andi Jesosi bi dë kabakaba u du, u di a bi lobi di në u Jehovah?

¹² Jesosi lobi Jehovah sö tee taa a bi kë du hii soni di a bi sa du, u mbei di në u Jehovah ko limbo. Jesosi bi taki taa: „Mi o lasi mi libi da dee sikapu” (Joh. 10:17, 18). Awa, a bi dë kabakaba u dëdë da di në u Jehovah.c Adam ku Eva da dee tu fosu libisëmbë di an bi abi zöndu, nöö de bi bia baka da Jehovah, hën de tei di së u Saatan. Ma Jesosi bi du soni a wan woto fasi. A bi dë kabakaba u ko a goonliba u lei taa a lobi Jehovah. A bi lei taa a lobi Jehovah u di a bi ta piki hën buka a hii soni di a bi ta taki, söseei a hii soni di a bi ta du (Heb. 4:15; 5:7-10). A bi hoi hënseei a Jehovah u tefa de kii ën a wan hogihati fasi (Heb. 12:2). A sö wan fasi a bi lei gbelingbelin taa a lobi Jehovah ku di në fëën.

13. Faandi mbei Jesosi bi da di möön bunu sëmbë di bi sa lei taa Saatan da wan mindisonima? (Luku di peentje tu.)

¹³ A hii soni di Jesosi bi ta du, a bi ta lei taa Saatan hën da di mindisonima, na Jehovah! (Joh. 8:44) Sëmbë an dë di bi sabi Jehovah bunu möön Jesosi. Ee wan bunu soni bi dë a dee soni dee Saatan bi taki u Jehovah, nöö Jesosi bi o sa sabi. Ma Jesosi bi dë kabakaba u mbei di në u Jehovah ko limbo. Hii fa a bi djei kuma Jehovah an bi ta tjubi ën möön, tökuseei a bi dë kabakaba u dëdë ka faa bi bia baka da di lobi Tata fëën.​—Mat. 27:46.d

„DI WOOKO DI I DA MI U MI DU NÖÖ MI KABËËN”

14. Unfa Jehovah bi paka Jesosi di a hoi dou?

¹⁴ Jesosi bi begi a di ndeti ufö a dëdë. A bi taki taa: „Di wooko di i da mi u mi du nöö mi kabëën.” A bi ta futoou taa Jehovah bi o pakëën u di a bi hoi dou (Joh. 17:4, 5). Jesosi bi a’ leti u futoou hën Tata. Jehovah an bi disëën a geebi (Tjab. 2:23, 24). A bi weki Jesosi ko a libi baka, hën a butëën ko möön hei a liba ala möön fa a bi dë (Fil. 2:8, 9). Te u kaba fëën, hën Jesosi ko dë di Könu u di Könuköndë u Gadu. Andi di Könuköndë naandë o du? Wë a di u tu pisi u di begi u Jesosi, a bi taki taa: „Be di Könuköndë fii ko. Be di kë fii [Jehovah] pasa a goonliba aki leti kumafa a ta pasa a liba ala.”​—Mat. 6:10.

15. Un woto soni Jesosi o du?

¹⁵ A di ten di ta ko, nöö Jesosi o feti ku dee felantima u Gadu, söseei a o kii dee hogihati sëmbë na Amagedon (Ako. 16:14, 16; 19:11-16). Baka di dë, nöö a o tuwë Saatan go a di baaku, ka an o sa du na wan soni möön (Ako. 20:1-3). Jesosi o tii dusu jaa longi, nöö a o mbei sëmbë libi bööböö, söseei a o heepi libisëmbë u de an abi zöndu möön. A o weki sëmbë ko a libi baka. A o mbei di goonliba ko dë wan paladëisi. Di soni di Jehovah bi abi a pakisei da libisëmbë o pasa tuutuu awaa!​—Ako. 21:1-4.

16. Unfa di libi o dë a goonliba baka di Dusu Jaa Tii?

¹⁶ Unfa di libi o dë a goonliba a kaba u di Dusu Jaa Tii? Libisëmbë an o abi zöndu möön. An o dë u libisëmbë hakisi paadon u dee zöndu u de a di në u Jesosi möön, söseei de an o abi wan mindima fanöudu möön. Nöö „di dëdë di ta kii u aki, hën da di lasiti felantima di o kaba a mundu fiaa”. Dee geebi o dë leigileigi, u di sëmbë o weki ko a libi baka. Na wan sëmbë a goonliba o abi zöndu möön.​—1 Kol. 15:25, 26.

17-18. (a) Andi o pasa a kaba u di Dusu Jaa Tii? (b) Andi Jesosi o du a kaba u di tii fëën? (1 Kolenti 15:24, 28) (Luku di peentje tu.)

¹⁷ Un woto soni o pasa a kaba u di Dusu Jaa Tii? A di pisiten dë, wan apaiti soni o pasa. Na wan sëmbë o ta hakisi deseei möön ee Jehovah ta du soni a wan leti fasi. Unfa sö? A di djai u Eden, nöö Saatan bi taki taa Jehovah da wan mindisonima, söseei taa an ta tii libisëmbë ku lobi. Sensi di ten dë, dee sëmbë dee ta dini Jehovah bi ta lei hii juu taa Jehovah ta du soni a di möön bunu fasi di dë. Fëën mbei a kaba u di Dusu Jaa Tii, nöö hii sëmbë o ko sabi taa Jehovah ta du soni a wan leti fasi. Jehovah o mbei hii sëmbë ko sabi taa hën da di Tata fuu di dë a liba, di lobi u.

¹⁸ A kaba u di Dusu Jaa Tii, nöö hii sëmbë o sabi taa Saatan bi mindi soni da Jehovah. Andi Jesosi o du te di juu dou faa kaba tii? A dë sö taa a o djeesi Saatan, nöö a hopo fia ku Jehovah u? Wë nönö! (Lesi 1 Kolenti 15:24, 28.) Jesosi o da hën Tata di Könuköndë baka. A o saka hënseei a di tii u Jehovah basu. Awa, Jesosi an o du soni kuma Saatan. A dë kabakaba u da Jehovah hii di makiti baka, u di a lobi ën.

19. Unfa di në u Jehovah dë fanöudu da Jesosi tjika?

¹⁹ Awa, Jehovah bi dë kabakaba u da Jesosi di në fëën! Jesosi bi lei tuutuu fa hën Tata dë. Wë nöö unfa di në u Jehovah dë fanöudu da Jesosi tjika? A dë fanöudu dëën möön hii soni. A bi dë kabakaba u dëdë da di në u Jehovah, söseei a o dë kabakaba u da Jehovah hii di makiti baka, a kaba u di Dusu Jaa Tii. Unfa u sa waka a Jesosi baka? Woo piki di hakisi aki a di woto di ta ko.