Unfa Jehovah ta heepi u fuu hoi dou?

1. Faandi mbei u musu sa hoi dou, nöö ambë o heepi i u? (1 Petuisi 5:10)

U DI u ta libi a dee lasiti daka u di goonliba aki, mbei dee sëmbë u Jehovah musu sa hoi dou. So u de dë ku suwaki wan hii pisiten kaa. Wotowan ta tjali u di wan sëmbë di de lobi lasi libi. Boiti di dë, wotowan dë di dee famii u de ta du ku de, nasö di lanti ta du ku de (Mat. 10:18, 36, 37). I sa dë seiki taa Jehovah sa heepi i fii hoi dou, aluwasi andi ta miti i.​—Lesi 1 Petuisi 5:10.

2. Andi ta heepi u fuu sa hoi dou?

² Te wan sëmbë ta hoi dou, nöö di soni dë kë taki taa a ta hoi hënseei a Jehovah go dou ku piizii, söseei taa a ta biibi taa soni o go bunu a di ten di ta ko, aluwasi andi ta miti ën. U kuma Keesitu sëmbë sa hoi dou, u di Jehovah ta da u „di gaan kaakiti” fëën. Wa sa hoi dou söndö ën (2 Kol. 4:7). A di woto aki, woo luku fö soni di Jehovah seeka da u, u heepi u fuu sa hoi dou. Woo luku tu unfa u sa feni wini u dee soni aki.

BEGI JEHOVAH

3. Faandi mbei u sa taki taa begi da wan gaan foombo soni?

³ Jehovah da u wan soni di sa heepi u fuu hoi dou. Hii fa u da zöndu libisëmbë, tökuseei Jehovah seeka soni sö taa u sa ta fan ku ën (Heb. 4:16). Pakisei di soni aki: U sa begi Jehovah hiniwan juu, söseei u sa konda hii soni dëën. A ta fusutan hii töngö, söseei a sa jei u a hiniwan kamian ka u dë, aluwasi ee u dë u wanwan a wan kamian, nasö u dë a dunguwosu (Jona 2:1, 2; Tjab. 16:25, 26). Ee u ta booko u hedi sö tee taa wa saanfa u musu konda da Jehovah unfa u ta fii, tökuseei a ta fusutan andi u kë piki ën (Lom. 8:26, 27). A dë wan gaan foombo soni seei taa u sa begi Jehovah!

4. Faandi mbei u sa taki taa di begi di u ta begi Jehovah faa heepi u fuu hoi dou, ta kai ku ën?

⁴ Jehovah ta piki u a di Wöutu fëën taa „ee di begi kai ku di pakisei fëën, nöö a o jei” (1 Joh. 5:14). A dë sö taa u sa hakisi Jehovah faa heepi u fuu hoi dou ö? Aai! Jehovah kë taa u musu hoi dou. Faandi mbei u sa taki sö? Wë te u ta hoi dou te tesi ta miti u, nöö Jehovah sa piki Saatan Didibi, di sëmbë di ta mbei ën fa (Nöng. 27:11). Boiti di dë, di Bëibel ta taki taa Jehovah ta dë kabakaba u „du wan soni da dee sëmbë dee ta dini ën ku hii de hati” (2 Klon. 16:9). Fëën mbei u sa dë seiki taa Jehovah ta kë heepi u fuu sa hoi dou, söseei a abi di kaakiti u sa du ën tu.​—Jes. 30:18; 41:10; Luk. 11:13.

5. Unfa di begi di u ta begi Jehovah sa mbei u dë bööböö? (Jesaaja 26:3)

⁵ Di Bëibel ta taki taa te u ta begi Jehovah, ’nöö di kötöhati fëën di bigi pasa hii sëmbë fusutan o tjubi u hati ku u fusutan’ (Fil. 4:7). U ta tei di soni aki u bigi seei. Dee sëmbë dee an ta dini Jehovah seei ta abi bookohedi tu, nöö de ta du peipei soni u de sa ta dë bööböö, söseei u de sa fëëkëtë dee bookohedi u de. So u de ta mbei möiti u puu hii soni a de pakisei, sö taa de sa dë bööböö. Te wan sëmbë ta du dee soni aki, söseei te an sabi möön andi a ta pakisei, nöö dee taku jeje sa ko nëën. Di soni aki an bunu seepiseepi (Luku Mateosi 12:43-45). Di kötöhati di Jehovah ta da u te u ta begi ën, bunu gaanfa möön di kötöhati di wan sëmbë bi o sa feni te a ta du dee soni dë. Te u ta begi Jehovah, nöö u ta lei taa u ta futoou ën, nöö a ta mbei u „dë bööböö hii juu”. (Lesi Jesaaja 26:3.) Wan u dee fasi fa Jehovah ta du di soni aki, hën da a ta mbei u toona mëni dee soni dee u bi lei a di Bëibel, dee bi da u kötöhati. Dee soni dë ta mbei u dë bööböö, u di u sabi taa Jehovah ta booko hën hedi ku u, söseei u di u sabi taa a kë taa u musu fii bunu.​—Ps. 62:1, 2.

6. Andi i sa du fii sa ta möön feni wini u dee begi fii? (Luku di peentje tu.)

⁶ Andi i sa du? Te tesi ta miti i, nöö „tuwë di fuka fii da Jehovah”, söseei begi ën faa heepi i fii dë bööböö (Ps. 55:22). Hakisi ën faa da i köni tu fii sa sabi andi i musu du (Nöng. 2:10, 11). Ma te i ta hakisi ën faa heepi i, nöö a bunu fii ta dëën tangi tu (Fil. 4:6). I sa pakisei luku unfa Jehovah ta heepi i hiniwan daka fii hoi dou, nöö i dëën tangi u di a ta heepi i. Na mbei dee tesi dee ta miti i, tapa i fu ja sa si dee bunu soni dee Jehovah ta du da i.​—Ps. 16:5, 6.

DI WÖUTU U GADU

7. Unfa di lei di u ta lei soni a Bëibel sa heepi u fuu hoi dou?

⁷ Jehovah da u di Wöutu fëën u heepi u fuu sa hoi dou. Di Bëibel abi sömëni tëkisi di ta heepi u fuu sa dë seiki taa Jehovah o heepi u. Boo luku wan u dee tëkisi aki. Mateosi 6:8 ta taki taa: ’Ufö u go u go begi seei, nöö Gadu sabi gaanduwe kaa andi ku andi u abi fanöudu.’ Jesosi hën bi taki di soni aki, nöö a sabi Jehovah bunu möön hii woto sëmbë. Fëën mbei u sa dë seiki taa Jehovah sabi andi u abi fanöudu te soni ta taanga da u. Di Bëibel abi sömëni woto tëkisi kuma disi, di sa da u taanga fuu hoi dou.​—Ps. 94:19.

8. (a) Konda soni u wan mama wëti u Bëibel di sa heepi u fuu hoi dou. (b) Andi sa heepi u fuu toona mëni mama wëti u Bëibel te u abi de fanöudu?

⁸ Dee mama wëti u Bëibel sa heepi u fuu hoi dou. De ta heepi u fuu sa du soni ku köni (Nöng. 2:6, 7). Di Bëibel ta da u taanga fuu ta libi daka fu daka nango, söndö fuu booko u hedi tumisi ku andi o pasa a di ten di ta ko (Mat. 6:34). Ee u abi di guwenti u ta lesi di Bëibel hiniwan daka, söseei ee u ta kai pakisei a dee soni dee u ta lesi, nöö an o taanga da u sö fuu toona mëni dee mama wëti u Bëibel te u abi de fanöudu.

9. Unfa i ta fii te i ta lesi soni u di fasi fa Jehovah bi heepi dee dinima fëën a di ten di pasa?

⁹ Di Bëibel abi sömëni woto u sëmbë di bi dë leti kuma u, söseei di bi buta futoou a Jehovah, hën a heepi de (Heb. 11:32-34; Jak. 5:17). Te u ta buta pakisei a dee woto aki, nöö di soni dë ta heepi u fuu ko ta möön biibi taa Jehovah ’da di tjubi kamian fuu, söseei taa hën ta da u kaakiti. Hii juu u sa feni heepi nëën te u dë a fuka’ (Ps. 46:1). Te u ta buta pakisei a di fasi fa dee dinima u Jehovah bi hoi deseei nëën a di ten di pasa, nöö di soni dë ta da u taanga fuu djeesi de a di fasi fa de bi ta biibi a Jehovah, söseei a di fasi fa de bi ta hoi dou.​—Jak. 5:10, 11.

10. Andi i sa du fii sa feni möön wini u di Bëibel?

¹⁰ Andi i sa du? Lesi di Bëibel hiniwan daka, nöö sikifi dee tëkisi dee i si kuma o sa heepi i. Sömëni sëmbë lo’ u lesi di daka wöutu, u di a ta heepi de u de bigi di daka u de bunu, söseei u di de ta feni soni nëën u kai pakisei a di daka dendu. Wan sisa de kai Mariea bi feni taanga a di soni aki tu, di dee gaansëmbë fëën bi ko abi kankël. Andi bi heepi ën faa hoi dou, di a bi ta heepi de a dee lasiti liba di de bi dë a libi? A bi taki taa: „Hiniwan mamate mi bi ta lesi dee tëkisi u di buku Öndösuku Gadu Wöutu hiniwan daka, nöö mi bi ta kai pakisei a dee soni dee mi bi lei.” A bi taki go dou taa: „Di soni aki bi heepi mi u mi buta pakisei a Jehovah, söseei u mi buta pakisei a dee soni dee a ta lei u a di Wöutu fëën, ka u mi buta pakisei a dee bookohedi u mi wanwan nöö.”​—Ps. 61:2.

DEE BAAA KU DEE SISA FUU

11. Faandi mbei u ta feni taanga te u sabi taa na u wanwan ta hoi dou?

¹¹ Jehovah da u baaa ku sisa a hii së u goonliba u heepi u fuu sa hoi dou. U ta feni kötöhati te u sabi taa dee sitaafu dee u ta tja, de nöö ’dee wotowan fuu dee ta biibi Masa a kamiankamian a di goonliba aki ta tja tu’ (1 Pet. 5:9). Di soni aki kë taki taa baaa ku sisa dë di dee seei soni aki bi miti, nöö de bi hoi dou. Fëën mbei u sa dë seiki taa useei sa hoi dou tu!​—Tjab. 14:22.

12. Unfa dee baaa ku dee sisa fuu sa heepi u, nöö andi useei sa du da de? (2 Kolenti 1:3, 4)

¹² Dee baaa ku dee sisa fuu sa ta da u taanga fuu hoi dou. Apösutu Paulosu seei bi si taa sö di soni aki dë tuu. A dee biifi dee a bi sikifi, a bi kai dee në u dee baaa ku dee sisa dee bi heepi ën di de bi söötö ën a wosu, nöö a bi da de tangi. Dee baaa ku dee sisa aki bi da Paulosu taanga ku kötöhati, söseei de bi heepi ën a soni (Fil. 2:25, 29, 30; Kol. 4:10, 11). Sö nöö soni sa dë da u a di ten aki tu. Te u abi heepi fanöudu fuu hoi dou, nöö dee baaa ku dee sisa fuu ta sai dë u heepi u. Nöö te de abi heepi fanöudu, nöö useei ta sai dë u heepi de tu.​—Lesi 2 Kolenti 1:3, 4.

13. Andi bi heepi wan sisa de kai Maya faa bi sa hoi dou?

¹³ Dee baaa ku dee sisa bi da wan sisa de kai Maya, di ta dë a Losiaköndë, taanga seei. Dee siköutu bi ko suku soni a di wosu fëën a di jaa 2020, hën bakaten de bi tjëën go a kuutu, u di a bi konda soni u di biibi fëën da wotowan. Maya bi taki taa: „A di pisiten dë, mi bi wei, mi bi ta booko mi hedi, söseei mi bi ta tjali. Ma dee baaa ku dee sisa bi bëli mi, söseei de bi sikifi soni manda da mi u lei mi taa de lobi mi.” A bi taki go dou taa: „Mi bi sabi kaa taa dee baaa ku dee sisa u mi lobi mi, söseei taa de dë mi famii. Ma sensi di jaa 2020, mi bi ko dë möön seiki u di soni aki.”

14. Andi u sa du fuu feni heepi a dee baaa ku dee sisa fuu? (Luku di peentje tu.)

¹⁴ Andi i sa du? Te soni ta taanga da i, nöö a dë fanöudu fii ta dë makandi ku dee baaa ku dee sisa fii, söseei fii ta da woto ku de. Wa musu mbei soni tapa u fuu go suku heepi a dee gaanwomi. De „dë kuma wan kamian ka i sa kule go tjubi da gaan ventu, söseei kuma wan kamian ka i sa kule go tjubi da gaan tjuba” (Jes. 32:2). Hoi a pakisei tu taa soni ta miti dee baaa ku dee sisa fii tu. Fëën mbei ee i du wan bunu soni da wan sëmbë di abi heepi fanöudu, nöö di soni dë o mbei i fii bunu, söseei a o heepi i fii sa hoi dou.​—Tjab. 20:35.

DEE SONI DEE JEHOVAH PAAMUSI U

15. Unfa dee soni dee Jehovah bi paamusi Jesosi bi heepi ën, nöö unfa dee soni dee a paamusi u ta heepi u tu? (Hebelejën 12:2)

¹⁵ Jehovah paamusi u soni di ta heepi u fuu sa hoi dou (Lom. 15:13). Pakisei fa dee soni dee Jehovah bi paamusi Jesosi bi heepi ën faa hoi dou, a di daka di soni bi möön taanga dëën di a bi dë a goonliba aki. (Lesi Hebelejën 12:2.) Jesosi bi sabi taa di hoi di a bi o hoi dou, bi o mbei hii sëmbë ko sabi taa soni Saatan bi ta mindi da Jehovah. Jesosi bi ta buta pakisei tu a di miti di hën ku hën Tata bi o miti baka, söseei a di tii di hën ku dee baaa fëën bi o tii bakaten, a di Könuköndë a liba ala. Wë sö nöö di sabi di u sabi taa woo libi a di njunjun goonliba u Gadu, ta heepi fuu hoi dou, aluwasi andi ta miti u a di hogi goonliba u Saatan aki.

16. Unfa dee soni dee Jehovah paamusi u bi heepi wan sisa faa hoi dou, söseei andi i ta lei u di soni di a bi taki?

¹⁶ Buta pakisei a di fasi fa dee soni dee Jehovah paamusi u bi heepi wan sisa de kai Alla, di ta dë a Losiaköndë. De bi buta di manu u di sisa aki a dunguwosu, nöö a bi ta wakiti u de tjëën go a kuutu. Di di soni aki ko pasa, hën Alla bi taki taa: „Mi ta begi u dee soni dee Jehovah paamusi u pasa tuutuu, söseei mi ta kai pakisei a de, nöö di soni dë ta heepi mi u ma lasi hati poi. Mi sabi taa baka dee taanga ten aki, nöö bunu ten o ko. Jehovah o wini dee felantima fëën, nöö a o mbei u feni gaan bunu.”

17. Unfa u sa lei taa u ta tei dee soni dee Jehovah paamusi u u bigi? (Luku di peentje tu.)

¹⁷ Andi i sa du? Tei ten pakisei dee bunu soni dee Jehovah paamusi i da di ten di ta ko. Pakisei luku unfa soni o dë da i a di njunjun goonliba, söseei pakisei dee bunu dee joo feni. Te i tei dee soni dee ta miti u nöunöu maaka ku dee soni dee woo feni a di ten di ta ko, nöö de an dë „gaan soni. Biga fu wan pisiten nöö de dë” (2 Kol. 4:17). Boiti di dë, mbei möiti u peleiki da wotowan. Pakisei fa soni ta taanga da dee sëmbë u di goonliba u Saatan aki tjika, u di de an sabi dee soni dee Jehovah paamusi u da di ten di ta ko. I sa heepi de u de ko sabi möön soni u di Könuköndë u Gadu, aluwasi ee wan piki soni nöö i konda da de.

18. Faandi mbei u sa dë seiki taa dee soni dee Jehovah paamusi u o pasa tuutuu?

¹⁸ Baka di Jöpu bi hoi dou di sömëni soni bi miti ën, hën a bi piki Jehovah taa: „Mi ko si taa i sa du hii soni, nöö na wan soni sa tapa i fii du di soni di i abi a pakisei u du” (Jöpu 42:2). Jöpu bi ko fusutan taa na wan soni sa tapa Jehovah faa du di soni di a abi a pakisei u du. Di soni aki sa da u taanga te soni ta taanga da u. Pakisei di soni aki: Boo taa wan mujëë di dë ku suwaki lasi hati, u di a go a sömëni data, ma de an bi sa kulëën. Ma di a go a wan data di abi öndöfeni, söseei di dë u futoou, hën di data si andi ta du ën, hën a konda dëën unfa a o kulëën. Di soni dë ta mbei di mujëë böö seei fëëë sö, hii fa a o tei wan pikisö ten ufö a ko bëtë. A sa hoi dou nöunöu u di a sabi taa a o ko bëtë. Sö nöö u sa hoi dou, u di u dë seiki taa Gadu o mbei di goonliba aki ko toon wan Paladëisi, kumafa a paamusi u.

19. Andi u abi fanöudu fuu sa hoi dou?

¹⁹ U si taa Jehovah ta heepi u fuu sa hoi dou ku di Wöutu fëën, ku dee baaa ku dee sisa fuu, ku di begi di u sa begi ën, söseei ku dee soni dee a paamusi u. Ee u wooko ku dee soni dee Jehovah da u aki, nöö a o heepi u fuu sa pasa hiniwan soni di ta miti u, fu te di goonliba u Saatan aki an dë möön.​—Fil. 4:13.