Augustus

Luku tu prenspari sani na ini a psalm na ini a tekst fu tide: (1) Ret’ati sma e kisi problema. (2) Yehovah e lusu den problema gi wi. Fa Yehovah e du dati? Wan sani di a e du, na taki a e yepi wi fu si a libi na ini a grontapu disi na wan yoisti fasi. Aladi Yehovah e pramisi wi taki wi o de nanga prisiri te wi e dini en, tòg a no e gi wi a dyaranti taki a libi fu wi o de sondro problema now (Yes. 66:14). A e gi wi dek’ati fu tan poti prakseri na a ten di e kon te wi o abi a libi di a wani taki wi abi fu têgo (2 Kor. 4:16-18). Fosi a ten dati doro, a e yepi wi fu tan dini en ibri dei (Sari 3:22-24). San wi kan leri fu getrow anbegiman fu Yehovah na ini Bijbel ten èn na ini a ten fu wi? Wi kan kisi problema di wi no ben ferwakti. Ma te wi e fertrow tapu Yehovah, dan a o horbaka gi wi ala ten.​—Ps. 55:22. w23.04 14-15 ¶3-4

Wi kan leri furu fu na eksempre fu Yosef nanga Maria di ben de klarklari fu gi yesi na lanti srefi di a ben muilek gi den (Luk. 2:1-6). Di Maria ben de nanga bere neigi mun kba, dan lanti ben ferwakti taki den du wan sani di ben muilek gi den. Grankownu Augustus ben meki wan wet taki ala sma na ini a Gran Kownukondre Rome ben musu go na a foto pe den gebore fu skrifi den nen na lantibuku. Yosef nanga Maria ben musu go te na Betlehem di ben de sowan 150 kilometer moro fara èn den ben musu waka na ini wan kontren di ben lai bergi. A sani dati no ben o makelek gi den, spesrutu fa Maria ben de nanga bere. Kande den ben e broko den ede nanga Maria nanga a beibi fu en di no ben gebore ete. Ala sani ben o waka bun nanga den? Fa den ben o du efu Maria ben musu meki a pkin te den ben de na pasi? A beibi di ben de na ini Maria bere ben o tron a Mesias. A situwâsi disi ben o meki taki den no gi yesi na lanti? Yosef nanga Maria no meki den brok’ede disi tapu den fu gi yesi na a wet. Yehovah ben breiti taki den gi yesi èn a sorgu gi den. Maria doro bun na Betlehem, a meki wan gosontu beibi, èn a yepi srefi fu meki Bijbel profeititori kon tru.​—Mika 5:2. w23.10 8 ¶9; 9 ¶11-12

Ma san yu kan du efu yu e senwe fu gi piki na den konmakandra? Wan fu den sani di yu kan du na fu sreka bun (Odo 21:5). O moro yu sabi na artikel, o moro yu no o senwe so fu gi piki. Boiti dati, hori den piki fu yu syatu (Odo 15:23; 17:27). Wan syatu piki e meki taki yu no abi fu broko yu ede so furu nanga san yu o taki. Te yu e gi wan syatu piki nanga yu eigi wortu, dan yu e sori taki yu sreka bun èn taki yu e ferstan na artikel bun. San yu kan du efu yu pruberi den sani disi kba ma tòg yu e senwe fu gi moro leki wán noso tu piki? Yu kan de seiker taki Yehovah o warderi a muiti di yu meki fu du san yu man (Luk. 21:1-4). Yehovah no e aksi wi fu du moro leki san wi man du (Fil. 4:5). Luku san yu kan du, poti wan marki fu du a sani dati èn begi Yehovah fu no senwe tumsi. Kande yu kan poti en leki marki na a bigin fu gi wán syatu piki. w23.04 21 ¶6-8

Paulus e agersi wi nanga srudati di de srekasreka fu go feti. Wan srudati di de na ini a legre musu de srekasreka ala ten fu go feti. Na so a de tu nanga wi. Wi de srekasreka ala ten gi a dei fu Yehovah te a bribi nanga a lobi fu wi de leki wan sani di e kibri wi borsu èn te a howpu fu wi de leki wan helm. Wan srudati ben e weri wan sani fu kibri a borsu fu en so taki peiri no doro en ati. Bribi nanga lobi e kibri wi agersi ati. Den fasi disi o yepi wi fu tan dini Gado èn fu tan waka baka Yesus. Bribi e gi wi a dyaranti taki Yehovah o blesi wi te wi e suku en nanga wi heri ati (Hebr. 11:6). Te wi abi bribi, wi o tan gi yesi na wi Fesiman, Yesus, awinsi problema e miti wi. Wi bribi kan kon moro tranga te wi e luku den ondrofenitori fu sma na ini a ten disi di tai hori na Gado di sma ferfolgu den noso di den ben abi moni problema. Èn wi no o feti baka gudu te wi e teki na eksempre fu den sma di kenki den libi èn di poti a Kownukondre na a fosi presi na ini den libi. w23.06 10 ¶8-9

Wan sma di sabi dwengi ensrefi, man hori ensrefi èn a abi krakti tapu san a e du. Efu wi wani doro den marki fu wi, dan a de prenspari fu dwengi wisrefi, spesrutu efu wan sani muilek fu du noso efu wi no e firi fu du en. Hori na prakseri taki a dwengi di wi man dwengi wisrefi na wan fu den fasi di a yeye fu Gado e meki sma kisi. Dati meki yu musu aksi Yehovah fu gi yu en santa yeye so taki a kan yepi yu fu dwengi yusrefi moro (Luk. 11:13; Gal. 5:22, 23). No wakti teleki sani e waka bun. Na ini a grontapu disi, ala sani no o waka bun noiti. Efu wi e wakti teleki dati psa, dan kande noiti wi o doro a marki fu wi. Kande wi no e firi fu doro a marki fu wi fu di a muilek fu doro en. Efu na so a de nanga yu, dan yu denki taki yu kan du pkinpkin sani fu doro a marki dati? Efu yu wani kweki wan fu den fasi di Kresten musu abi, dan fu san ede yu no e pruberi fu sori a fasi dati na ini pkinpkin sani? Efu yu wani leisi a heri Bijbel, dan kande yu no abi fu leisi tumsi langa, ma yu kan bigin nanga wan syatu pisi. w23.05 29 ¶11-13

Na ini den lasti dei disi, Yehovah gebroiki en organisâsi fu gi wi leri fu Gado Wortu so taki wi kan tan waka tapu „a Pasi fu Santafasi” (Yes. 35:8; 48:17; 60:17). Wi kan taki dati den wan di e studeri Bijbel, e kisi na okasi fu waka tapu „a Pasi fu Santafasi”. Son sma e waka wan syatu pisi nomo tapu a pasi èn te fu kba den e kmoto fu a pasi. Ma trawan e hordoro èn den e tan waka tapu a pasi teleki den doro pe den musu doro. Pe den o doro? „A Pasi fu Santafasi” e tyari den wan di abi a howpu fu libi na hemel, go na „a paradijs fu Gado” na ini hemel (Openb. 2:7). A pasi e tyari den wan di abi a howpu fu libi na grontapu, go na a Dusun Yari Tiri fu Krestes te nowan sma abi sondu moro. Efu yu e waka tapu a pasi disi, dan no luku go na baka. Tan na tapu a pasi èn no kmoto na en tapu teleki yu doro a nyun grontapu. w23.05 17 ¶15; 19 ¶16-18

Te yu e prakseri ala den sani di Yehovah du gi yu, dan yu o de nanga tangi èn yu o wani gi yusrefi abra na en (Ps. 116:12-14). A fiti taki Bijbel e kari Yehovah a Sma di e gi „ibri bun presenti nanga ibri kado di bun dorodoro” (Yak. 1:17). A moro prenspari sani di Yehovah gi wi, na a srakti-ofrandi fu en Manpkin, Yesus. Denki a tori! A lusu-paiman meki taki yu kan tron wan mati fu Yehovah. Èn a gi yu a howpu fu libi fu têgo (1 Yoh. 4:9, 10). Te yu gi yusrefi abra na Yehovah, dan dati na wan fu den moro bun fasi fa yu e sori en taki yu de nanga tangi gi a lobi di a sori gi yu. Boiti dati, yu e sori tu taki yu de nanga tangi gi ala den tra blesi di a gi yu.​—Deut. 16:17; 2 Kor. 5:15. w24.03 5 ¶8

Te wi e luku a takru fasi fa a grontapu disi e tyari ensrefi, dan wi e firi neleki fa Lot ben e firi. A „ben abi furu brok’ede, fu di den sma di ben e trangayesi a wet, ben e du ogri sondro fu syen” aladi den ben sabi taki wi hemel Papa no lobi en te sma e du den sani dati (2 Petr. 2:7, 8). Fu di Lot ben abi bigi lespeki nanga lobi gi Gado, meki a weigri fu du den takru sani di den sma na en lontu ben e du. Wi e libi tu na mindri sma di no e lespeki den wet fu Yehovah. Aladi di dati de so, tòg wi kan tan tyari wisrefi na wan krin fasi efu wi lobi Gado èn efu wi e leri fu abi bigi lespeki gi en (Odo 14:2). Fu di Yehovah wani yepi wi, meki a e gi wi dek’ati nanga yepi fu a buku Odo. Ala Kresten, man nanga uma, yonguwan nanga owruwan, kan kisi wini trutru te den e poti prakseri na den rai di de fu feni na ini a buku disi. Te wi abi bigi lespeki gi Yehovah, dan wi no o de mati fu sma di e tyari densrefi na wan fasi di Yehovah no feni bun. w23.06 20 ¶1-2; 21 ¶5

Kande yu famiri gens yu, noso kande yu ben kan abi moro moni nanga gudu, ma yu besroiti fu poti Gado Kownukondre na a fosi presi na ini yu libi (Mat. 6:33). Efu dati de so, dan yu kan de seiker taki Yehovah sabi ala san yu du gi en (Hebr. 6:10). Kande yu ondrofeni a sani disi di Yesus ben taki: „Ibri sma di gwe libi en oso, noso en brada, noso en sisa, noso en mama, noso en papa, noso en pkin, noso en gron fu mi ede èn fu a bun nyunsu ede, o kisi wán hondro tron moro leki san a abi na ini a ten disi. A o kisi oso, brada, sisa, mama, pkin, nanga gron èn a o kisi ferfolgu tu. Ma na ini a ten di e kon a o kisi têgo libi” (Mark. 10:29, 30). A de krin taki den blesi di yu kisi warti moro den sani di yu libi na baka.​—Ps. 37:4. w24.03 9 ¶5

Di den Kresten na ini Yudea ben kisi fu du nanga wan bigi angriten, dan den brada nanga sisa fu a gemeente na ini Antiokia „besroiti taki ibriwan fu den ben o seni san den man gi, fu yepi den brada di ben tan na Yudea” (Tori 11:27-30). Aladi den brada nanga sisa di ben kisi fu du nanga angriten ben e libi fara, tòg den Kresten na ini Antiokia ben de klarklari fu yepi den (1 Yoh. 3:17, 18). Na ini a ten disi wi kan sori sar’ati tu te wi yere taki rampu miti wi brada nanga sisa. Kande wi kan aksi den owruman efu wi kan yepi nanga wan project. Wi kan gi moni fu horbaka gi a wroko, noso wi kan begi gi den brada nanga sisa disi. A kan taki wi brada nanga sisa o abi yepi fanowdu fu man tan na libi. Te Krestes Yesus, wi Kownu kon fu krutu sma, dan wi wani meki a si wi leki sma di e sori sar’ati. Dan a o gi wi a kari fu „teki a Kownukondre”.​—Mat. 25:34-40. w23.07 4 ¶9-10; 6 ¶12

Neleki Yehovah, Yesus ben de klarklari fu fiti ensrefi. Gado ben seni en kon na grontapu fu preiki gi „den lasi skapu fu a pipel fu Israel”. Ma a sori taki a ben de klarklari fu fiti ensrefi te a ben e preiki gi sma. Wan leisi, wan uma di no ben de fu Israel, begi Yesus fu dresi na umapkin fu en di ’wan ogri yeye ben e pina kfalek’. Yesus sori sar’ati gi na uma èn a dresi na umapkin fu en (Mat. 15:21-28). Luku wan tra eksempre. Wan pisi ten na fesi, Yesus taki dati efu wan sma e taki dati a no sabi en, dan a o taki tu dati en no sabi a sma dati (Mat. 10:33). Ma a ben taki dati a no sabi Petrus di Petrus taki dri leisi taki a no sabi en? Nôno. Yesus ben sabi taki Petrus ben abi berow fu a sani di a du èn taki a ben abi bribi. Baka di Yesus kisi wan opobaka, dan a go na Petrus. A musu de so taki Yesus taigi Petrus taki a gi en pardon èn taki a lobi en (Luk. 24:33, 34). Yehovah Gado nanga Yesus Krestes de klarklari fu fiti densrefi. Fa a de nanga wi? Yehovah wani taki wi de klarklari fu fiti wisrefi. w23.07 21 ¶6-7

San wi kan ferteri trawan di e tweifri taki grontapu o tron wan Paradijs trutru? A fosi sani, na taki Yehovah srefi pramisi en. A buku Openbaring e taki: „A sma di ben e sdon na tapu a kownusturu taki: ’Luku, mi e meki ala sani kon nyun.’” Na en abi a koni nanga a makti fu meki en pramisi kon tru, èn a e angri fu du dati tu. A di fu tu sani, na taki Yehovah sabi taki den sani di a taki o psa trutru. Dati meki a taki: „Den wortu disi tru èn sma kan bribi den. . . . Den sani disi psa kba!” A di fu dri sani, na taki te Yehovah e bigin nanga wan sani, dan a e klari en tu. Dati meki a taki: „Mi na a Alfa nanga na Omega” (Openb. 21:6). Yehovah o sori taki Satan na wan leiman èn taki a no man tapu Yehovah fu du san a abi na prakseri. Sobun te wan sma taigi yu: ’Den sani disi moi, ma mi no e bribi taki den o kon tru’, dan san yu kan du? Yu kan leisi èn ferklari vers 5 nanga 6 gi en. Sori en fa Yehovah poti en handtekening fu gi wi a dyaranti taki den sani di a pramisi o kon tru.​—Yes. 65:16. w23.11 7 ¶18-19

Yehovah ben pramisi Abraham a sani disi di a ben de wan owru man fu 75 yari èn a no ben abi nowan pkin ete. Abraham ben si a fa a pramisi dati kon tru? A no si a heri pramisi kon tru. Baka di Abraham abra Eufraat-liba, a wakti 25 yari fosi a ben man si fa en manpkin Isak gebore na wan wondru fasi. Èn 60 yari baka dati, Esau nanga Yakob, den granpkin fu en, gebore (Hebr. 6:15). Ma noiti Abraham si taki den bakapkin fu en tron wan bigi pipel èn taki den kisi a Pramisi Kondre. Ma Abraham ben abi wan bun matifasi nanga en Mekiman (Yak. 2:23). Te Abraham o kisi wan opobaka, a o breiti srefsrefi fu kon sabi taki a bribi nanga a pasensi fu en meki taki ala pipel fu grontapu kisi blesi (Gen. 22:18). San disi e leri wi? Kande wi no si fa ala den pramisi fu Yehovah kon tru nownow. Ma efu wi abi pasensi neleki Abraham, wi kan de seiker taki Yehovah o blesi wi now èn a o blesi wi moro na ini a nyun grontapu di a pramisi wi.​—Mark. 10:29, 30. w23.08 24 ¶14

Di Kownu Usia ben yongu, a ben abi sakafasi. A leri „fu abi lespeki gi a tru Gado”. Èn Yehovah blesi en na ini bijna ala den 68 yari di a ben de na libi (2 Kron. 26:1-4). Usia wini furu feanti èn a meki Yerusalem kon tranga (2 Kron. 26:6-15). A no de fu taki dati Usia ben breiti srefsrefi nanga ala den sani di Gado ben yepi en fu du (Preik. 3:12, 13). Kownu Usia ben gwenti taki trawan du san a taki. A kan taki na a sani disi meki taki a ben denki taki a man du ala san a wani? Wan dei Usia besroiti fu go na ini Yehovah en tempel èn a go bron switismeri na tapu na altari, aladi den kownu no ben mag du dati (2 Kron. 26:16-18). Granpriester Asaria pruberi fu tapu Usia, ma Usia atibron srefsrefi. A sari taki Usia no tan getrow na Yehovah èn Yehovah strafu en nanga gwasi siki (2 Kron. 26:19-21). Usia en libi no ben o waka so efu a ben tan abi sakafasi. w23.09 10 ¶9-10

Srefi baka di na apostel Petrus tron wan salfu Kresten a ben musu feti teige den swakifasi fu en. Na ini a yari 36, Gado ben seni Petrus go na Kornelius di no ben de wan Dyu, èn Gado ben salfu a man dati nanga santa yeye. Dati ben de wan krin bewijs taki „Gado no lobi a wan sma moro a trawan” èn taki sma di no ben de Dyu ben kan tron memre fu a Kresten gemeente (Tori 10:34, 44, 45). Sobun, baka dati Petrus bigin nyan makandra nanga sma di no ben de Dyu. Fosi, dati ben de wan sani di a no ben o du noiti. Ma son Dyu Kresten ben feni taki Dyu nanga sma di no ben de Dyu no ben musu nyan nanga makandra. Wan tu sma di ben abi a denki dati kon na Antiokia, dan Petrus tapu fu nyan nanga den brada fu en di no ben de Dyu, kande fu di a ben frede taki a ben o hati den firi fu den Dyu Kresten. Na apostel Paulus ben si a hoigrifasi disi èn a taigi Petrus na fesi ala sma taki a sani san a ben du no bun (Gal. 2:13, 14). Petrus meki wan fowtu, ma a hordoro. w23.09 22 ¶8

Owruman, yu de klarklari fu sorgu gi den skapu fu Yehovah nanga prisiri? De eerlijk nanga yusrefi efu yu si taki yu abi wan tu swakifasi, ma no las’ati. No fergiti taki „Masra bun” èn taki a o yepi yu fu wroko na den sani dati (1 Petr. 2:3). Na apostel Petrus e gi wi a dyaranti disi: „Gado . . . gi unu leri dorodoro. A o meki unu tnapu kánkan, a o meki unu kon tranga” (1 Petr. 5:10). Fosi, Petrus ben e firi taki a no ben warti nofo fu de nanga Gado Manpkin (Luk. 5:8). Ma fu di Yehovah nanga Yesus yepi Petrus, meki a tan du tranga muiti fu waka baka Krestes. Fu dati ede Yehovah meki Petrus „go na ini a têgo Kownukondre fu wi Masra nanga wi Ferlusuman Yesus Krestes” (2 Petr. 1:11). Dati na wan kfalek bigi grani! Efu yu e tan du muiti fu waka baka Krestes neleki Petrus èn efu yu e meki Yehovah tan gi yu leri dorodoro, dan yu tu o kisi a grani fu libi fu têgo. ’A bribi fu yu o meki taki yu kisi ferlusu.’​—1 Petr. 1:9. w23.09 30 ¶14; 31 ¶16-17

A tabernakel fu owruten ben abi wán dyari. A dyari disi ben abi wan skotu na en lontu. Drape den priester ben e du den wroko fu den. A bigi kopro altari pe sma ben e tyari bron-ofrandi ben de na ini a dyari disi. Drape yu ben abi sosrefi wan kopro beki di ben abi watra na ini di den priester ben e gebroiki fu krin densrefi fosi den du santa diniwroko (Eks. 30:17-20; 40:6-8). Na ini a ten disi den salfu brada fu Krestes di de ete na grontapu, e dini getrow na ini a pkin tempel-dyari fu na agersi tempel. A bigi beki nanga watra di ben de na ini a tabernakel nanga den tempel ben prenspari srefsrefi fu di a e memre den salfuwan èn sosrefi ala Kresten taki den musu tan hori densrefi krin èn taki den musu tan anbegi Yehovah na a yoisti fasi. Ma pe a „bigi ipi” e anbegi Yehovah? Na apostel Yohanes ben si taki den „ben e tnapu na fesi a kownusturu” èn dati e prenki a bigi tempel-dyari na grontapu. Na drape „den e du santa wroko gi [Gado] dei nanga neti na ini a tempel fu en” (Openb. 7:9, 13-15). Wi breiti srefsrefi taki Yehovah gi wi a moi okasi fu anbegi en na ini a bigi agersi tempel fu en. w23.10 28 ¶15-16

Wan fasi fa Yehovah e tranga wi, na taki a e gebroiki den owruman fu du dati (Yes. 32:1, 2). Sobun, te yu e broko yu ede nanga wan sani, dan ferteri den owruman. Te den wani yepi yu, no draidrai fu teki a yepi dati. Yehovah kan gebroiki den owruman disi fu tranga yu. A Bijbel howpu fu wi fu libi fu têgo na ini wan paradijs na grontapu noso na ini a hemel Kownukondre, kan gi wi dek’ati tu. A howpu fu wi e tranga wi fu hordoro te tesi e miti wi, fu preiki a bun nyunsu, èn fu dini den brada nanga sisa fu wi (1 Tes. 1:3). A srefi howpu dati tranga na apostel Paulus. A ben kisi „ala sortu hebi tesi”, a ben e „bruya”, sma ben e „ferfolgu en”, èn den ben „naki en trowe” (2 Kor. 4:8-10). Paulus tan poti prakseri na a howpu fu en èn na so a kisi krakti fu hordoro (2 Kor. 4:16-18). Paulus tan poti prakseri na a tamara fu en fu libi fu têgo na hemel. Paulus denki dipi fu a howpu dati èn a sani dati meki taki a ben e firi leki a ben e „kisi nyun krakti dei fu dei”. w23.10 15-16 ¶14-17

Te yu e begi, dan prakseri efu disi na a yoisti ten gi Yehovah fu du san yu aksi en. Kande wi feni taki wi musu kisi piki wantewante tapu a begi fu wi. Ma fu taki en leti, Yehovah sabi san na a moro bun ten fu yepi wi (Hebr. 4:16). Te wi no e kisi wantewante san wi aksi Yehovah, dan kande wi o denki taki Yehovah no wani yepi wi. Ma a kan tu taki a feni taki a ten no doro ete fu yepi wi. Fu eksempre, wan yongu brada ben begi fu kon betre fu a siki fu en. Ma no kon betre. Efu Yehovah ben du wan wondru fu dresi en, dan Satan ben kan taki dati a brada tan dini Yehovah soso fu di Yehovah dresi en (Yob 1:9-11; 2:4). Boiti dati, Yehovah poti wan ten kba te a o dresi ala siki (Yes. 33:24; Openb. 21:3, 4). Fosi a ten dati doro, wi no kan ferwakti taki Yehovah o du wondru fu dresi siki sma. Sobun, a brada ben kan aksi Yehovah fu gi en a krakti nanga wan korostu firi fu man hordoro èn fu tan dini en nanga en heri ati. w23.11 24 ¶13

Simson ben meki wan seryusu fowtu, ma a tan dini Yehovah. Fu di a ben wani du san Yehovah ben wani a du, meki a suku wan okasi fu feti nanga den Filisteasma (Krut. 16:28-30). Simson begi Yehovah: „Meki mi pai den Filisteasma gi san den du nanga mi.” A tru Gado piki a begi fu Simson èn a gi en na aparti krakti baka. Simson kiri moro Filisteasma a leisi disi leki oiti bifo. Aladi Simson ben musu libi nanga den takru bakapisi fu a fowtu di a meki, tòg a no tapu fu du a wani fu Yehovah. Awinsi wi meki wan fowtu èn kisi pir’ai noso awinsi wi lasi wan grani, tòg wi no musu tapu fu du a wani fu Yehovah. No fergiti taki Yehovah de klarklari fu gi wi pardon (Ps. 103:8, 9). Aladi wi e meki fowtu, Yehovah kan gi wi krakti fu du en wani, neleki fa a ben gi Simson krakti. w23.09 6 ¶15-16

Te yu hordoro, dan Yehovah o feni yu bun. Disi no wani taki dati Yehovah breiti taki yu e kisi tesi noso problema. Na presi fu dati, a breiti taki yu e hordoro. A e gi wi trutru dek’ati fu sabi taki Yehovah breiti nanga wi te wi e hordoro (Ps. 5:12). Prakseri taki di Abraham hordoro di a kisi tesi, dan Yehovah ben feni en bun. Yehovah ben e si en leki en mati èn leki wan ret’ati sma (Gen. 15:6; Rom. 4:13, 22). Na so a kan de tu nanga wi. Gado no e luku o furu wi e du na ini en diniwroko noso sortu grani wi abi, fu man feni wi bun. A e feni wi bun te wi e hordoro aladi wi e kisi tesi. Awinsi o owru wi de, awinsi na ini sortu situwâsi wi de, noso awinsi san wi man du, wi alamala man hordoro. Yu e hordoro aladi yu e kisi wan tesi nownow? Efu dati de so, dan no fergiti taki Gado feni yu bun. Te wi e ferstan taki Gado feni wi bun, dan dati o tranga a howpu di wi abi. w23.12 11 ¶13-14

Wan Kresten man musu leri fu taki bun nanga trawan. Disi wani taki dati a musu arki bun te wan sma e ferteri en fa a e denki èn fa a e firi èn a musu du muiti fu ferstan a sma dati (Odo 20:5). Wan fasi fa o man ferstan fa wan sma e firi, na te a e arki fa a sma e taki, te a e luku fa a poti en fesi, èn fa a e du. Yu no o man du disi te yu no e teki ten fu de makandra nanga sma. Efu doronomo yu e gebroiki soso yu cel fu taki nanga sma, dan te fu kba yu no o man taki bun moro nanga sma te yu de nanga den. Dati meki yu musu suku okasi fu miti nanga sma fu taki nanga den (2 Yoh. 12). Wan lepi brada musu man sorgu gi ensrefi èn gi en osofamiri (1 Tim. 5:8). A bun fu leri fa fu du wan sani di o yepi yu feni wan wroko (Tori 18:2, 3; 20:34; Ef. 4:28). Wroko tranga èn sorgu taki yu tan du wan wroko teleki a kba. Efu yu e du dati, dan a o moro makelek gi yu fu feni wan wroko èn fu no lasi a wroko dati. w23.12 27 ¶12-13

Te bijbel e taki fu „a dei fu Yehovah”, dan a e taki fu a ten te Yehovah o krutu den feanti fu en èn ferlusu en pipel. Na ini owruten, Yehovah ben strafu wan tu pipel (Yes. 13:1, 6; Esek. 13:5; Sef. 1:8). Na ini a ten disi „a dei fu Yehovah” e bigin te den politiek tiriman o pori Babilon a Bigiwan èn a e kba nanga a feti fu Armagedon. Wi musu sreka nownow fu man psa a „dei” dati libilibi. Fu taki en leti, Yesus ben leri taki wi „musu de srekasreka” ala ten gi a „bigi banawtu”(Mat. 24:21; Luk. 12:40). Na ini a fosi brifi di na apostel Paulus ben skrifi gi den Tesalonikasma, a gebroiki difrenti agersitori fu yepi Kresten fu de srekasreka gi a bigi krutudei fu Yehovah. Paulus ben sabi taki a dei fu Yehovah no ben o kon na a ten dati (2 Tes. 2:1-3). Tòg a gi den brada nanga sisa fu en dek’ati fu sreka gi a dei dati neleki a ben o kon tamara. Wi kan fiti a rai fu en tu. w23.06 8 ¶1-2

Na ini 1978, sma ben meki wan bun hei gebow na Tokio, Yapan. A ben abi 60 verdieping. Sma ben aksi densrefi fa a gebow ben o man tan tnapu fu di gronseki ben psa furu na ini a foto dati. San den sabiman du fu lusu a problema? Den meki a gebow na so wan fasi taki a tranga, ma a man beni pkinso tu efu a gron e seki. Kresten de neleki a gebow dati. Fa so? Wan Kresten musu tnapu kánkan, ma a musu man beni tu. Wan Kresten musu tranga èn a musu tan gi yesi na den wet fu Yehovah èn libi soleki fa Gado wani. So wan sma de „klarklari fu gi yesi” èn a no o trangayesi Gado wet. Ma na a tra sei a no musu de wan sma di e hori nomo na san a e prakseri. A musu fiti ensrefi tu te a bun fu du dati na ini wan spesrutu situwâsi noso te a de fanowdu srefi (Yak. 3:17). Wan Kresten di leri fu si sani na a yoisti fasi disi, no o strak tumsi. Ma a no abi a denki tu taki a mag du ala sani. w23.07 14 ¶1-2

Yesus ben musu kakafutu gi Satan Didibri di ben wani meki a du sondu. Satan ben taigi en srefi fu trangayesi Gado (Mat. 4:1-11). Satan ben de nomonomo fu meki Yesus sondu so taki a no ben o man pai a lusu-paiman. Di Yesus ben e du a diniwroko fu en na grontapu, dan moro tesi miti en. Den feanti fu en ferfolgu en èn den pruberi fu kiri en (Luk. 4:28, 29; 13:31). A ben musu ferdrage den fowtu fu den bakaman fu en (Mark. 9:33, 34). Di a ben de na fesi krutu, dan sma pina en èn den spotu en. Dan den kiri en na wan tumsi ogr’ati fasi fu meki a kisi syen (Hebr. 12:1-3). Di a ben e anga na a pina-postu, a ben e pina hebi fu di Yehovah no ben e kibri en moro (Mat. 27:46). A de krin taki Yesus pina hebi fu man pai a lusu-paiman. Te wi e prakseri ala den sani di Yesus ben de klarklari fu du gi wi, dan wi lobi en trutru. w24.01 10-11 ¶7-9

Pasensi e yepi wi tu fu libi bun nanga trawan. A e yepi wi fu arki bun te trawan e taki (Yak. 1:19). Boiti dati, pasensi e yepi wi fu libi na ini freide nanga trawan. Te wi de na ini wan situwâsi di e meki wi stress, dan pasensi o meki taki wi no de gaw fu taki noso du wan sani di kan hati trawan. Te wi abi pasensi, dan wi no o atibron esi te wan sma hati den firi fu wi. Na presi fu pai ogri fu ogri, wi o „tan ferdrage makandra èn gi makandra pardon nanga un heri ati” (Kol. 3:12, 13). Pasensi kan yepi wi fu teki moro bun besroiti tu. Na presi fu hasti wi srefi fu teki wan besroiti sondro fu denki, wi o teki ten fu ondrosuku sani èn baka dati wi o besroiti fu du sani moro bun. Fu eksempre, efu wi e suku wan wroko, dan kande wi o de gaw fu teki a fosi wroko di wi feni. Ma efu wi abi pasensi, wi o teki ten fu ondrosuku sani bun. Wi o luku fa a wroko disi o abi krakti tapu wi osofamiri èn tapu a matifasi di wi abi nanga Yehovah. Te wi abi pasensi, dan wi no o teki besroiti di kan abi takru bakapisi gi wi. w23.08 22 ¶8-9

Efu yu e firi brokosaka fu di yu musu kakafutu gi takru lostu, dan prakseri san yu pramisi Yehovah di yu gi yusrefi abra na en, dan dati o gi yu a krakti fu kakafutu gi tesi. Fa so? Te yu gi yusrefi abra na Yehovah, dan yu no e teri yusrefi moro. Disi wani taki dati yu no o feti moro baka sani di yu sabi taki Yehovah no feni bun (Mat. 16:24). Sobun, te wan tesi e miti yu, dan yu no abi fu denki tumsi langa san yu musu du bika yu besroiti na fesi kba san yu o du. Yu o tan gi yesi na Yehovah. Yu o du ala san yu man fu du san Yehovah wani. Yu o de leki Yob. Aladi hebi tesi ben e miti en, tòg a taki sondro fu degedege: „Mi o tai hori na Gado”!​—Yob 27:5. w24.03 9 ¶6-7

Yehovah, „a Gado fu lobi”, de nanga wi! (2 Kor. 13:11) A e broko en ede nanga ibriwan fu wi. Wi de seiker taki Yehovah e ’sori wi bun-ati’ fu di a lobi wi (Ps. 32:10). O moro wi e prakseri fa a sori lobi gi wi, o moro wi e si fa a e broko en ede nanga wi. Disi e hari wi kon moro krosbei na en. Wi kan begi en sondro fu frede èn wi kan ferteri en taki wi abi a lobi fu en tranga fanowdu. Wi kan taki nanga en fu ala sani di e gi wi brok’ede, fu di wi de seiker taki a e ferstan wi èn taki a de klarklari fu yepi wi (Ps. 145:19). Neleki fa wan faya e waran wi skin tapu wan kowru dei, na so a waran lobi fu Yehovah kan trowstu wi te wi kisi problema nanga tesi. Sobun de nanga prisiri fu di Yehovah lobi yu. Èn meki wi alamala bari: „Mi lobi Yehovah”!​—Ps. 116:1. w24.01 31 ¶19-20

Yesus no ben e ferteri sma nomo taki a nen fu Gado na Yehovah. Den Dyu di Yesus ben e gi leri ben sabi Gado nen kba. Ma Yesus ben de a moro bun sma di ben kan „meki wi kon sabi en” (Yoh. 1:17, 18). Fu eksempre, den Hebrew Buku fu Bijbel e sori taki Yehovah abi sar’ati nanga switifasi (Eks. 34:5-7). Yesus ben yepi sma fu kon ferstan dati moro bun di a ferteri na agersitori fu a lasi manpkin nanga en papa. Wi e leisi taki a boi di ben sori berow „ben de fara fu oso ete” di en papa si en. tòg a papa lon go miti en, a brasa en, èn a gi en pardon nanga en heri ati. A tori disi e yepi wi fu si krin taki Yehovah abi sar’ati nanga switifasi (Luk. 15:11-32). Yesus yepi sma fu ferstan fa Yehovah de trutru. w24.02 10 ¶8-9

Yehovah e trowstu sma di e sari èn a e meki den firi bun baka. Fa wi kan sori taki wi abi sar’ati nanga trawan èn fa wi kan trowstu den neleki fa Yehovah e du dati? Wan fasi fa wi kan du dati, na te wi e du muiti fu kon abi fasi di o meki en makelek gi wi fu trowstu trawan èn fu abi sar’ati nanga den. San na wan tu fu den fasi dati? San o yepi wi fu tan lobi makandra èn fu „tan trowstu makandra” ibri dei? (1 Tes. 4:18) Wi musu leri fu firi gi wi brada nanga s’sa, wi musu leri fu lobi den, èn fu sori switifasi gi den (Kol. 3:12; 1 Petr. 3:8). Fa den fasi disi o yepi wi? Te wi abi sar’ati nanga trawan èn te wi e broko wi ede trutru nanga den, dan seiker wi o wani yepi den te den de na nowtu. Dati meki Yesus taki: „San furu na ati, na dati mofo e taki. Wan bun sma e taki bun sani, fu di en ati bun” (Mat. 12:34, 35). Iya, wan prenspari fasi fa wi e sori taki wi lobi wi brada nanga s’sa na te wi e trowstu den na ini muilek ten. w23.11 10 ¶10-11

Efu wi wani ferstan Bijbel profeititori, dan wi musu suku yepi. Luku na eksempre disi. Kow taki dati yu e go na wan presi di yu no sabi, ma wan mati di sabi a presi bun de nanga yu. A sabi precies pe unu de èn pe ibri pasi e go. A no de fu taki dati yu o breiti dati yu mati kon nanga yu. Yehovah de leki a mati dati. A sabi precies na ini sortu ten wi e libi èn san o sa na ini a ten di e kon. Sobun, efu wi wani ferstan Bijbel profeititori, dan wi musu abi sakafasi èn wi musu aksi Yehovah fu yepi wi (Dan. 2:28; 2 Petr. 1:19, 20). Ala bun papa nanga mama wani taki den pkin abi wan koloku libi. Yehovah wani dati tu gi den pkin fu en (Yer. 29:11). Ma tra fasi leki libisma, Yehovah man ferteri wi soifri san o psa na ini a ten di e kon. Yehovah meki sma skrifi profeititori na ini en Wortu so taki wi kan sabi na fesi sortu prenspari sani o psa.​—Yes. 46:10. w23.08 8 ¶3-4