Yuli

Ala sani di Yesus ben e taki èn ben e du, a ben sori krin fa en Papa ben e denki èn ben e firi. Dati ben de fu si tu na ini den wondru di a ben du (Yoh. 14:9). San wi kan leri fu den wondru fu Yesus? Yesus nanga en Papa lobi wi srefsrefi. Di Yesus ben de na grontapu, dan a sori taki a lobi libisma srefsrefi èn dati meki a du wondru fu yepi den wan di ben e pina. Wan leisi, tu breniman bari kari Yesus fu yepi den (Mat 20:30-34). Luku taki Yesus „ben sari den” èn dati meki a dresi den. Na lobi meki taki Yesus ben abi so furu sar’ati nanga den man disi. Na a sar’ati disi meki taki a gi den wan di ben de nanga angri n’nyan èn taki a dresi wan gwasiman (Mat. 15:32; Mark. 1:41). Wi kan de seiker taki Yehovah, a Gado di „abi trutru sar’ati” nanga en Manpkin lobi wi trutru èn taki a e hati den taki wi e pina (Luk. 1:78; 1 Petr. 5:7). Den e angri srefsrefi fu tyari wan kba kon na ala den problema di e kwinsi libisma. w23.04 3 ¶4-5

Wi kan tyari wan tu kenki kon so taki wi no go luku noso arki fowtu sani di pôpi na ini a grontapu fu Satan. Wi kan furu wi prakseri nanga bun sani te wi e leisi èn e studeri Bijbel. Te wi e go na den konmakandra èn te wi e du a preikiwroko, dan dati o yepi wi tu fu kibri a denki fu wi. Yehovah fu en sei e pramisi taki a no o meki wi kisi tesi di hebi moro leki san wi man tyari” (1 Kor. 10:12, 13). Ibriwan fu wi musu begi moro leki san wi ben gwenti, fu man tan getrow na Yehovah na ini den muilek lasti dei disi. Yehovah wani taki te wi e begi en taki wi musu ’ferteri en ala san de na tapu wi ati’ (Ps. 62:8). Prèise Yehovah èn taki en tangi fu ala san a e du. Aksi en fu gi yu dek’ati na ini a preikiwroko. Begi en fu yepi yu te yu abi problema èn te yu e kisi tesi. No meki noti nanga nowan sma tapu yu fu begi Yehovah doronomo. w23.05 7 ¶17-18

Fu san ede wi e go na den gemeente konmakandra? A moro prenspari reide fu san ede wi e du dati na fu prèise Yehovah (Ps. 26:12; 111:1). Wan tra reide na fu gi makandra dek’ati na ini den muilek ten disi (1 Tes. 5:11). Te wi e gi piki na den konmakandra, dan wi e du den tu sani disi. Ma son leisi a kan muilek gi wi fu gi piki. Kande wi e senwe fu gi piki, noso kande wi lobi fu gi piki ma wi no e kisi wan piki te wi e opo wi anu. San kan yepi wi? Paulus ben taki o prenspari a de fu „gi makandra dek’ati”. Wi no o senwe so moro fu gi piki efu wi e hori na prakseri taki wi kan gi trawan dek’ati kba te wi e gi wan syatu piki di e sori a bribi fu wi. Èn efu wi opo wi anu furu leisi ma wi no kisi piki, wi kan breiti taki trawan na ini a gemeente o kisi na okasi fu gi piki.​—1 Petr. 3:8. w23.04 20 ¶1-3

A kownu ben seni wan boskopu gi a pipel. Den Dyu di ben de na ini katibo sowan 70 yari ben mag go na den kondre Israel, baka (Esra 1:2-4). Na Yehovah w’wan ben kan meki a sani disi psa. Den Babilonsma no ben gwenti fu meki den katiboman kon fri (Yes. 14:4, 17). Ma wan tra tirimakti ben teki Babilon abra èn a nyun tiriman ben taigi den Dyu taki den ben mag drai go baka. Ala Dyu, spesrutu ibri osofamiri-edeman ben musu teki wan besroiti. Den ben musu besroiti efu den ben o gwe libi Babilon noso efu den ben o tan drape. A besroiti dati no ben o de wan makrikiwan. A kan taki furu fu den Dyu ben owru tumsi fu waka so fara. Èn fu di furu fu den Dyu ben gebore ini Babilon, meki na drape w’wan den ben sabi. Gi den, Israel ben de a kondre pe den afo fu den ben e libi. A kan taki sonwan fu den Dyu ben kon gudu srefsrefi na ini Babilon. Sobun a no ben makelek gi den fu gwe libi den oso noso bisnis èn go na wan presi di den no ben sabi. w23.05 14 ¶1-2

Gado Wortu e gi wi dek’ati fu tan hordoro, fu abi sar’ati èn fu sori lobi. Lukas 21:19 e taki: „Te unu hordoro, dan unu o kisi libi.” Na Kolosesma 3:12 skrifi: „Un musu abi trutru sar’ati.” Èn 1 Tesalonikasma 4:9, 10 e taki: ’Gado srefi leri unu taki un musu lobi makandra. Ma wi e gi unu rai, mi brada, fu tan lobi makandra moro.’ Den tekst disi ben skrifi gi Kresten di ben e hordoro kba èn di ben e sori sar’ati nanga lobi. Ma den ben musu tan sori den fasi disi. Wi musu du a srefi. Fu man du dati, luku fa den fosi Kresten ben sori den fasi disi. Dan yu o si fa yu kan teki na eksempre fu den so taki yusrefi kan de srekasreka gi a bigi banawtu. Dan te a bigi banawtu doro, yu o man tan hordoro fu di yu ben leri fu du dati kba. w23.07 3 ¶4, 8

Awinsi wi na wan salfuwan noso wi de fu den „tra skapu”, wi alamala musu tan tapu „a Pasi fu Santafasi”. Te wi e du dati, dan dati o yepi wi fu tan anbegi Yehovah now èn na ini a ten di e kon te a Kownukondre o tyari bun furu blesi gi wi (Yoh. 10:16). Sensi a yari 1919, milyunmilyun man, uma nanga pkin-nengre gwe libi Babilon a Bigiwan, noso den falsi kerki na heri grontapu èn den bigin waka tapu na agersi pasi disi. Yehovah ben sorgu taki nowan sani ben de tapu a pasi di ben o meki en muilek gi den Dyu fu gwe libi Babilon (Yes. 57:14). Ma fa a de nanga „a Pasi fu Santafasi” na ini a ten disi? Hondrohondro yari fosi 1919, Yehovah gebroiki man di ben abi dipi lespeki gi en fu yepi trawan fu kmoto na ini Babilon a Bigiwan. (Luku Yesaya 40:3.) Den man disi sreka a pasi so taki bakaten ret’ati sma ben kan kmoto na ini falsi kerki èn anbegi Yehovah makandra nanga en pipel. w23.05 15-16 ¶8-9

Yehovah wani taki wi e dini en nanga prisiri èn nanga wi heri ati (2 Kor. 9:7). Ma fa a de te wi no e firi fu doro wan marki? Wi musu tan du muiti ete fu doro en? Luku na eksempre fu Paulus. A ben taki: „Mi e naki mi skin nanga kofu èn mi e basi en neleki a de wan srafu” (1 Kor. 9:25-27). Paulus ben dwengi ensrefi fu du san bun, srefi te a no ben e firi fu du dati. Yehovah ben breiti nanga a wroko di Paulus ben du gi en? Iya, seiker! Èn Yehovah blesi en gi a muiti di a ben meki (2 Tim. 4:7, 8). Na so a de tu taki Yehovah breiti te a e si taki wi e du muiti fu doro a marki fu wi, srefi te wi no e firi fu du dati. A breiti nanga wi fu di a sabi taki srefi efu wi no lobi fu du wan sani, tòg wi e du dati fu di wi lobi en. Neleki fa Yehovah ben blesi Paulus, na so a o blesi wi gi a muiti di wi meki (Ps. 126:5). Èn te wi e si fa Yehovah e blesi wi, dan dati kan gi wi na angri fu doro a marki fu wi. w23.05 29 ¶9-10

Na apostel Paulus ben agersi den sma di no o psa a dei fu Yehovah libilibi nanga sma di e sribi. Den no sabi san e psa na den lontu èn den no e si taki a ten e lon. Dati meki den no man si taki prenspari sani e psa èn den no man du noti. Furu sma na ini a ten disi e sribi na yeye fasi (Rom. 11:8). Den no e bribi den bewijs di e sori taki wi e libi na ini „den lasti dei” èn taki a bigi banawtu o kon heri esi (2 Petr. 3:3, 4). Ma dei fu dei wi e si taki a prenspari fu tan na ai (1 Tes. 5:6). Wi no musu bruya èn de rustig. Fu san ede? Fu di dati o yepi wi fu teki a yoisti besroiti so taki wi no bemui na ini den politiek afersi nanga den problema fu a ten disi. O moro a dei fu Yehovah e kon krosbei, o moro sma o dwengi wi fu teki sei na ini den sortu afersi disi. Tòg wi no musu broko wi ede nanga san wi o du. A yeye fu Gado kan yepi wi fu no bruya èn fu teki bun besroiti.​—Luk. 12:11, 12. w23.06 10 ¶6-7

San yu e prakseri wantewante te yu e yere a nen Simson? Kande yu e denki fa a man disi ben tranga srefsrefi. Dati tru. Ma Simson ben teki wan don besroiti di tyari takru bakapisi kon gi en. Aladi dati de so, tòg Yehovah ben poti prakseri na ala den sani di Simson ben du fu dini en. Èn Gado meki sma skrifi a tori fu Simson na ini Bijbel fu di a ben de wan getrow man. Yehovah gebroiki Simson fu du kfalek sani fu yepi den Israelsma, a pipel di Gado ben teki leki en pipel. Hondrohondro yari baka di Simson dede, Yehovah meki na apostel Paulus skrifi a nen fu Simson makandra nanga a di fu den man di sori trutru bribi (Hebr. 11:32-34). Na eksempre fu Simson kan gi wi dek’ati. Simson ben fertrow tapu Yehovah, srefi di a ben de na ini kfalek muilek situwâsi. Na eksempre fu Simson kan gi wi dek’ati èn wi kan leri tra sani fu en tu. w23.09 2 ¶1-2

Te wi abi a gwenti fu begi Yehovah èn ferteri en ala den brok’ede fu wi, dan dati e tranga wi fu hordoro (1 Tes. 5:17). Awinsi yu no e kisi hebi tesi now, tòg a bun fu begi Yehovah fu yepi yu efu yu e broko yu ede nanga wan sani noso efu yu no sabi san yu musu. Te yu abi a gwenti fu begi Gado fu yepi yu nanga den pkinpkin problema di yu abi now, dan yu no o draidrai fu begi en te yu o kisi bigi problema na ini a ten di e kon. Te dati o psa, dan yu no o tweifri taki Yehovah sabi o ten èn fa a musu yepi yu (Ps. 27:1, 3). A o moro makelek gi wi fu psa a bigi banawtu efu wi e hordoro now te wi e kisi tesi (Rom. 5:3). Fu san ede wi kan taki dati? Furu brada nanga sisa taki dati ibri leisi te den psa wan tesi, dan dati e yepi den fu hordoro te den kisi wan tra tesi. Te den si fa Yehovah e yepi den fu hordoro, dan dati e tranga a bribi fu den taki Yehovah de klarklari fu yepi den. A bribi dati e yepi den fu hordoro te wan tra tesi kon.​—Yak. 1:2-4. w23.07 3 ¶7-8

Fu di Yehovah abi sakafasi èn sar’ati, meki a no strak tumsi. A ben de krin fu si taki Yehovah abi sakafasi, di a ben de fu pori na ogr’ati pipel fu Sodom. Yehovah meki den engel fu en taigi a ret’ati man Lot fu lowe go na den bergi. Lot ben frede fu go drape. Dati meki a begi taki en nanga en osofamiri kisi na okasi fu lowe go na Sowar, wan pkin foto di Yehovah ben o pori. Yehovah ben kan hori nomo taki Lot musu du soifri san a ben taigi en fu du. Na presi fu dati a gi Lot primisi fu go na Sowar, èn a no pori a foto dati (Gen. 19:18-22). Hondrohondro yari baka dati, Yehovah sori sar’ati gi den sma fu Ninefei. A seni a profeiti Yona go drape fu taigi den sma taki heri esi a foto nanga den ogr’ati sma na ini ben o kisi pori. Ma di den sma fu Ninefei sori berow, Yehovah sori sar’ati gi den èn a no pori a foto.​—Yona 3:1, 10; 4:10, 11. w23.07 21 ¶5

San wi kan leri fu Yoas? A ben de leki wan bon di no ben rutu dipi èn di ben abi wan krakatiki fanowdu fu tan tnapu. Di Yoyada, a krakatiki fu en, no ben de moro, dan sma di ben drai baka gi Yehovah bigin abi krakti na en tapu. Fu di den sma disi ben de leki a winti di e wai, meki Yoas fadon. A sani disi e sori krin taki a no ala ten den sma na wi lontu o leri wi fu abi bigi lespeki gi Yehovah. Efu wi wani tan abi wan tranga bribi, dan wi srefi musu leri fu lobi èn fu lespeki Yehovah. Dati meki wi musu abi a gwenti fu studeri, fu denki dipi fu den sani di wi e leri, èn fu begi doronomo (Yer. 17:7, 8; Kol 2:6, 7). Yehovah no e aksi tumsi furu fu wi. Preikiman 12:13 e sori krin san Gado e ferwakti fu wi. Drape skrifi: „Lespeki a tru Gado èn hori den komando fu en, fu di dati na san libisma musu du.” Te wi e lespeki Gado, dan wi o man tai hori na Yehovah, awinsi san e psa. Noti no o man pori a matifasi di wi abi nanga Yehovah. w23.06 19 ¶17-19

Yehovah e gebroiki wortu fu sori taki wi kan bribi en. Vers 5 e bigin so: „A sma di ben e sdon na tapu a kownusturu taki” (Openb. 21:5a). Den wortu disi prenspari srefsrefi fu di disi na wán fu den dri leisi nomo na ini a buku Openbaring pe Yehovah srefi e taki. Sobun, a no wan tranga engel gi a dyaranti disi. Srefi Yesus no du dati. Ma na Yehovah srefi taki en! A sani disi e gi wi bun reide fu bribi den sani di Yehovah e taki baka dati. Fu san ede? Fu di Yehovah „no man lei” (Tit. 1:2). Sobun, wi kan de seiker taki den wortu di wi e leisi na Openbaring 21:5, 6 o kon tru. Poti prakseri na a wortu: „Luku” (Openb. 21:5). A Griki wortu di vertaal nanga „luku” skrifi furu tron na ini a buku Openbaring. San Gado e taki baka dati? A e taki: „Mi e meki ala sani kon nyun.” A tru taki Yehovah o tyari den kenki disi kon na ini a ten di e kon. Ma fu di a de so seiker taki a o du san a pramisi, meki a e taki fu den sani dati neleki a e du den nownow kba.​—Yes. 46:10. w23.11 3-4 ¶7-8

Na apostel Petrus ben feti nanga den swakifasi fu en. Luku wan tu eksempre. Di Yesus ferteri taki a ben o pina èn dede soleki fa Bijbel profeititori taki, dan Petrus taigi en taki den sani dati no ben o psa kwetkweti (Mark. 8:31-33). Ibri tron baka, Petrus nanga den tra apostel ben e hartaki nanga makandra suma moro bigi (Mark. 9:33, 34). Tapu a lasti neti fosi Yesus dede, dan sondro fu denki Petrus koti wan man yesi puru (Yoh. 18:10). A srefi neti dati, Petrus ben frede so te gi den sma taki a taigi den dri leisi taki a no sabi en mati Yesus (Mark. 14:66-72). A sani dati meki Petrus krei nanga bigi sari. Yesus no drai baka gi na apostel fu en di ben las’ati. Baka di Yesus opo baka, a ben gi Petrus na okasi fu sori taki a lobi en ete. Yesus ben aksi Petrus fu dini leki skapuman gi den skapu fu en (Yoh. 21:15-17). Petrus ben de klarklari fu du san Yesus taigi en fu du. A ben de na ini Yerusalem tapu a dei fu a Pinksterfesa èn a ben de wan fu den sma di Gado salfu nanga santa yeye. w23.09 22 ¶6-7

Petrus ben taigi den tra owruman: „Luku den skapu fu Gado” (1 Petr. 5:1-4). Efu yu na wan owruman, wi sabi taki yu lobi yu brada nanga sisa èn yu wani yepi den. Ma kande yu e denki son leisi taki yu abi so furu fu du noso taki yu weri so te taki yu no man tyari a frantwortu dati. San yu kan du? Ferteri Yehovah ala den brok’ede fu yu èn fa yu wani yepi den brada nanga sisa. Petrus ben skrifi: „Efu wan sma e dini trawan, dan meki a fertrow tapu a krakti di Gado e gi” (1 Petr. 4:11). Kande den brada nanga sisa fu yu abi problema di no kan lusu dorodoro na ini a sistema disi. Ma hori na prakseri taki „a gran skapuman”, Yesus Krestes, kan yepi den moro bun leki iniwan tra sma. A kan du dati now èn na ini a nyun grontapu. Gado wani taki owruman lobi den brada nanga sisa, taki den e go luku den fu gi den dek’ati, èn taki den „tron eksempre gi den”. w23.09 29-30 ¶13-14

Wi musu luku bun taki wi no e teki libisma denki abra. Efu wi e luku sani libisma fasi, dan a sani dati kan meki wi drai baka gi Yehovah èn den wet fu en (1 Kor. 3:19). Nofo tron „a koni fu a grontapu disi” e gi sma dek’ati fu du san densrefi wani, na presi fu arki Gado. Wan tu Kresten na Pergamum nanga Tiatira ben teki a denki abra fu den sma na ini den kondre dati di ben anbegi falsi gado èn di ben du hurudu. Yesus ben gi ala tu gemeente seryusu rai fu di den ben si taki seks hurudu ben feni presi na den mindri ma den no ben du noti fu tapu en (Openb. 2:14, 20). Na ini a ten disi sma kan kori wi fu teki fowtu denki abra. Famiriman nanga sma di wi sabi kan meki wi denki taki wi no musu de so strak èn taki wi mag psa den wet fu Yehovah. Fu eksempre, den kan taki dati yu no abi fu libi wan krin libi èn taki den wet fu Bijbel a no gi a ten disi moro. Kande son leisi wi e denki taki Yehovah no e taigi wi krin fa sani musu waka. A kan psa srefi taki wi wani go „du sani di no skrifi na ini den Santa Buku”.​—1 Kor. 4:6. w23.07 16 ¶10-11

Maria, a mama fu Yesus, ben abi krakti fanowdu. A no ben trow, ma tòg a ben o kon de nanga bere. Noiti a ben kweki pkin, ma a ben o abi fu sorgu gi a boi di ben o tron a Mesias. Wan tra sani na taki noiti ete a ben abi seks. Fa ben o taigi Yosef taki a ben de nanga bere? Dati ben musu fu de wan muilek sani fu du (Luk. 1:26-33). Fa Maria kisi a krakti? A suku yepi na trawan. A aksi Gabrièl fu ferteri en moro fini san a ben o abi fu du (Luk. 1:34). Syatu baka dati, a go te na „a bergikontren” fu Yuda fu go luku en famiri Elisabet. Elisabet prèise Maria èn Yehovah meki a ferteri Maria wan profeititori di ben abi fu du nanga a pkin di ben de na ini en bere. A sani disi gi Maria furu dek’ati (Luk. 1:39-45) Maria taki dati Yehovah „du kfalek bigi sani” (Luk. 1:46-51). Yehovah gebroiki Gabrièl nanga Elisabet fu tranga Maria. w23.10 14-15 ¶10-12

Wan pkin grupu fu den disipel fu Krestes salfu nanga santa yeye èn disi meki taki den tron manpkin fu Gado. Den 144.000 salfuwan disi o dini leki priester na hemel makandra nanga Yesus (Openb. 14:1). A Santa Presi fu a tabernakel e prenki taki Gado teki den leki en salfu manpkin aladi den de na grontapu ete (Rom. 8:15-17). A Moro Santa Presi fu a tabernakel e prenki hemel pe Yehovah e tan. „A garden” di e prati a Santa Presi fu a Moro Santa Presi e prenki Yesus en libisma skin. Solanga a ben abi wan libisma skin, a no ben o man go na ini hemel leki a bigi Granpriester fu na agersi tempel. Fu di Yesus gi en libisma skin leki wan ofrandi gi libisma, meki a opo a pasi gi ala salfu Kresten fu go na hemel. Den srefi musu libi a libisma skin fu den na baka fu man libi na hemel.​—Hebr. 10:19, 20; 1 Kor. 15:50. w23.10 28 ¶13

Gideon hori ensrefi di den Efrayimsma ben e krutu en (Krut. 8:1-3). A no piki den nanga ati bron. Fu di a ben abi sakafasi, meki a arki san den ben abi fu taki èn a taki switi nanga den. A sani disi meki taki den no atibron moro. Neleki Gideon, owruman e arki bun èn den no e atibron te sma e krutu den (Yak. 3:13). Na so den e yepi fu meki freide tan na ini a gemeente. Di sma ben e prèise Gideon fu di a ben wini Midian, dan a gi Yehovah ala grani (Krut. 8:22, 23). Fa owruman kan teki na eksempre fu Gideon? Den kan gi Yehovah grani fu den sani di den ben man du (1 Kor. 4:6, 7). Efu sma e prèise wan owruman fu di a e gi bun leri, dan a kan taigi den taki den leri dati e kmoto fu Gado Wortu èn taki wi alamala e kisi leri fu Yehovah en organisâsi. Son leisi a bun te owruman e luku efu den e gi leri na wan fasi di e gi grani na Yehovah, noso efu na prèise den wani taki sma prèise den. w23.06 4 ¶7-8

Efu Yehovah no e piki a begi fu wi, dan wi kan aksi wisrefi dri sani. A foswan na: ’Mi e begi gi a yoisti sani?’ Nofo tron wi e denki taki wi sabi san bun gi wi. Ma kande den sani di wi e aksi Yehovah no o tyari wini kon gi wi te fu kba. Efu wi e begi Yehovah fu yepi wi nanga wan problema, dan a kan taki Yehovah sabi wan moro bun fasi fa fu lusu a problema. Èn son sani di wi e aksi Yehovah kande no e kruderi nanga a wani fu en (1 Yoh. 5:14). Luku na eksempre fu den papa nanga mama di aksi Yehovah fu yepi a pkin fu den fu tan na ini waarheid. A no fowtu fu begi gi so wan sani. Tòg a de so taki Yehovah no e dwengi nowan sma fu anbegi en. A wani taki wi alamala, sosrefi den pkin fu wi, musu besroiti srefi fu anbegi en (Deut. 10:12, 13; 30:19, 20). Dati meki a moro bun efu den papa nanga mama e aksi Yehovah fu yepi den fu doro na ati fu a pkin fu den, so taki a pkin o du muiti fu lobi Yehovah èn fu tron wan mati fu en.​—Odo 22:6; Ef. 6:4. w23.11 21 ¶5; 23 ¶12

Fu san ede a prenspari fu trowstu trawan efu wi wani sori den taki wi lobi den? Soleki fa wan buku di e ferklari Bijbel e sori, dan a wortu di Paulus gebroiki gi „trowstu” wani taki dati yu e „tnapu na sei wan sma fu gi en dek’ati te wan bigi nowtu miti en”. Sobun, te wi e trowstu wan brada noso wan s’sa di abi problema, dan wi e yepi en fu opo tnapu èn fu tan waka na tapu a pasi fu libi. Ibri leisi te wi e trowstu wan brada noso wan s’sa, wi e sori lobi gi en (2 Kor. 7:6, 7, 13). Fu man trowstu trawan, wi musu abi sar’ati nanga den. Fu san ede dati de so? Te wi abi sar’ati nanga trawan, dan wi o wani trowstu den èn wi o wan du wan sani fu yepi den. Sobun, na te wi abi sar’ati nanga trawan, dan wi o man trowstu den. Paulus ben sori taki na fu di Yehovah abi sar’ati meki a e trowstu sma. Fu dati ede a e kari Yehovah „a Tata di abi furu sar’ati” èn „a Gado fu ala trowstu”.​—2 Kor. 1:3. w23.11 9-10 ¶8-10

Ala den bakaman fu Krestes kan ferwakti taki banawtu o miti den. Luku na eksempre fu na apostel Paulus. A ben taigi den Tesalonikasma: „Di wi ben de nanga unu, wi ben ferteri unu na fesi kba taki wi ben o nyan pina. We, na dati psa tu” (1 Tes. 3:4). Èn a ben skrifi den Korentesma: „Brada, wi wani taki un musu sabi sortu banawtu miti wi . . . Wi no ben sabi srefi efu wi ben o tan na libi (2 Kor. 1:8; 11:23-27). Kresten na ini a ten disi kan ferwakti tu taki banawtu o miti den (2 Tim. 3:12). Kande mati nanga famiri no e libi bun nanga yu fu di yu poti bribi na ini Yesus èn fu di yu bigin waka na en baka. Noso kande a muilek fu tan eerlijk fu di yu baas noso tra sma na wrokope e aksi yu fu du sani di no bun (Hebr. 13:18). Lanti e gens yu fu di yu prati a howpu fu yu nanga trawan? Awinsi na ini sortu banawtu wi de, tòg Paulus e taki dati wi musu prisiri. w23.12 10-11 ¶9-10

Yakob ben kisi furu problema. Tu fu den boi fu Yakob, Simeon nanga Leifi, meki a famiri kisi syen èn den meki Yehovah kisi pornen. Boiti dati, Rakel, a wefi di Yakob ben lobi srefsrefi, kon lasi libi di a ben e meki a di fu tu pkin fu den. Èn fu di wan bigi angriten ben kon, meki Yakob no ben abi tra fasi leki fu froisi go na a kondre Egepte tapu en owrudei (Gen. 35:16-19; 37:28; 45:9-11, 28). Aladi den problema disi ben e miti Yakob, tòg a no lasi fertrow na ini Yehovah èn na ini den pramisi fu en. Èn Yehovah srefi sori Yakob taki a feni en bun. Fu eksempre, Yehovah gi Yakob furu gudu. Èn a no de fu taki dati Yakob ben de nanga bigi tangi taki Yehovah meki a si en manpkin Yosef baka, fu di a ben denki taki a boi fu en ben dede langa ten kba. Fu di Yakob ben abi wan bun matifasi nanga Yehovah, meki a ben man hordoro di a kisi ala den problema disi (Gen. 30:43; 32:9, 10; 46:28-30). Te wi abi wan bun matifasi nanga Yehovah, dan wi o man hordoro tu te wi e kisi problema di wi no ben ferwakti. w23.04 15 ¶6-7

Na ini Psalm 23 David e sori taki a e bribi taki Yehovah lobi en èn taki a e sorgu gi en. A e taki fu a lobi di en nanga en Skapuman, Yehovah abi gi makandra. David ben sabi taki ogri no ben o miti en efu a ben meki Yehovah tiri en, èn a ben fertrow dorodoro na En tapu. David ben sabi taki Yehovah ben o sori lobi gi en ibri dei fu en libi. San meki taki a ben bribi dati? David ben feni taki Yehovah ben e sorgu en bun fu di a no ben e mankeri noti. David ben sabi taki Yehovah ben de en mati èn taki Yehovah ben feni en bun. Dati meki a ben de seiker taki awinsi san ben o psa nanga en, Yehovah ben o tan gi en ala san a ben abi fanowdu. Fu di David ben de seiker taki Yehovah lobi en èn taki a ben o sorgu gi en, meki David no ben e broko en ede, ma na presi fu dati a ben de koloku èn tevrede.​—Ps. 16:11. w24.01 29 ¶12-13

Sensi a Di Fu Tu Grontapufeti, a pipel fu Yehovah ben man preiki fri na ini furu kondre. Fu taki en leti, furu sma kon sabi Yehovah èn den futuboi fu en e preiki na heri grontapu. Na ini a ten disi, den brada fu a Tiri Skin e tan suku a tiri fu Krestes. Den wani taki den rai di den e gi den brada nanga sisa musu kruderi nanga a fasi fa Yehovah nanga Yesus e si sani. Èn den e gebroiki kring-owruman nanga gemeente owruman fu teki fesi na ini den gemeente. Den salfu owruman èn sosrefi ala den owruman na ini den gemeente de na ini Krestes en ret’anu (Openb. 2:1). A no de fu taki dati den owruman disi na sondu libisma èn den e meki fowtu. Moses nanga Yosua ben e meki fowtu son leisi èn den apostel ben e du dati tu (Num. 20:12; Yos. 9:14, 15; Rom. 3:23). Ma wi kan si krin taki Yesus e tiri a koni srafu di de fu fertrow èn sosrefi den owruman di a poti fu teki fesi. A o tan du dati. Dati meki wi abi ala reide fu fertrow den rai di wi e kisi nanga yepi fu den brada di a poti fu teki fesi. w24.02 23-24 ¶13-14

Wi kan meki Yehovah prisiri tu na ini a ten disi. Wi e du dati te wi e taki fu en na wan fasi di e sori taki wi lobi en èn taki wi e warderi den sani di a e du gi wi. Te wi de na ini a preikiwroko, dan wi e hori na prakseri taki wi wani hari sma kon na Yehovah èn wi wani meki den kon lobi wi Papa, neleki fa wi e du dati (Yak. 4:8). Wi e prisiri srefsrefi fu sori sma san Bijbel e taki fu Yehovah, so taki den e kon si taki a abi lobi, retidu, koni, makti, nanga tra moi fasi. Wan tra fasi fa wi e prèise Yehovah, na te wi e du muiti fu de leki en. Te wi e du dati, dan kande tra sma o si taki wi no de leki den sma na ini na ogri grontapu disi èn den kan aksi densrefi fu san ede dati de so (Mat. 5:14-16). Te wi e miti den sma disi na ini wi aladei libi, dan wi o man ferteri den fu san ede wi e tyari wisrefi tra fasi leki den. Disi kan meki taki ret’ati sma o wani kon sabi a Gado fu wi. Te wi e prèise Yehovah na den fasi disi, dan wi o meki a prisiri.​—1 Tim. 2:3, 4. w24.02 10 ¶7

Fu man tron wan lepi Kresten man, dan yu musu leri fu du sani di kan yepi yu na ini a libi. Disi o yepi yu fu tyari frantwortu na ini a gemeente, yu o man feni wan wroko fu sorgu yu nanga yu osofamiri, èn yu o man libi bun nanga trawan. Fu eksempre, leri fu leisi èn skrifi bun. Bijbel e taki dati wan man di wani de koloku èn di wani taki sani waka bun nanga en e teki ten ibri dei fu leisi Gado Wortu èn fu denki dipi fu en (Ps. 1:1-3). Fu di a e leisi Bijbel ibri dei, meki a o kon sabi fa Yehovah e denki èn dati o yepi en fu denki krin èn fu leri fa fu fiti Gado Wortu na ini en libi (Odo 1:3, 4). Wi brada nanga sisa abi yepi fanowdu fu brada di man gi leri èn di man gi rai fu Bijbel. Efu yu man leisi èn skrifi bun, dan yu o man hori lezing èn gi piki di e tranga a bribi fu trawan. Boiti dati yu o man skrifi moi penti di yu feni di yu kan gebroiki fu tranga yu eigi bribi èn fu gi trawan dek’ati. w23.12 26-27 ¶9-11

Te yu e frede, dan denki dipi fu den sani di Yehovah o du na ini a ten di e kon te Satan no de moro. Wan fu den demo na a kongres fu 2014 ben sori fa wan papa ben e taki nanga en osofamiri fa a ben o de efu den vers disi fu 2 Timoteyus 3:1-5 ben o taki fa a libi na ini a Paradijs o de. A ben taki: „Na ini a nyun grontapu a moro prisiri ten o de. Bika sma o lobi trawan, den o lobi leri sani fu Gado, den no o denki tumsi furu fu densrefi, den o abi sakafasi, den o prèise Gado, den o gi yesi na papa nanga mama, den o de nanga tangi, den o tai hori na trawan, den o lobi den famiri so te, den o de klarklari fu meki kruderi, den o ferteri bun sani fu trawan, den o dwengi densrefi, den o abi switifasi, den o lobi san bun, den o de fu fertrow, den no o du san densrefi wani, den no o abi heimemre, den o lobi Gado na presi taki den lobi prisiri, èn den o dini Gado fayafaya. Tai hori na den sma dati.” Yu e taki nanga yu osofamiri noso nanga brada nanga sisa fa a libi o de na ini a nyun grontapu? w24.01 6 ¶13-14

A moi fu sabi taki Yehovah feni a pipel fu en bun. Bijbel e taki: „Yehovah e prisiri nanga a pipel fu en” (Ps. 149:4). Ma son leisi, sonwan fu wi kan firi brokosaka so te taki wi kan aksi wisrefi: ’Yehovah feni mi bun?’ Furu getrow futuboi fu Yehovah na ini Bijbel ten ben e aksi densrefi a sani disi (1 Sam. 1:6-10; Yob 29:2, 4; Ps. 51:11). Bijbel e sori krin taki Yehovah kan feni wi bun awinsi wi na sondu sma. San wi musu du so taki Yehovah kan feni wi bun? Wi musu poti bribi na ini Yesus Krestes èn teki dopu (Yoh. 3:16). Na so wi e sori ala sma taki wi abi berow fu den sondu fu wi èn taki wi pramisi Gado taki wi o du a wani fu en (Tori 2:38; 3:19). Yehovah breiti srefsrefi te wi e du den sani disi fu tron wan moro bun mati fu en. Te wi e tan du ala san wi man fu tan dini Yehovah soleki fa wi pramisi en, dan a o feni wi bun èn a o si wi leki en bun mati.​—Ps. 25:14. w24.03 26 ¶1-2

Wi kan waka baka na eksempre fu den disipel èn tan preiki, srefi te tiriman e taigi wi fu no preiki moro. Wi kan de seiker tu taki Yehovah o yepi wi fu du wi preikiwroko bun. Begi tu fu abi dek’ati nanga koni. Aksi Yehovah fu yepi yu fu hordoro te yu abi problema. Furu fu wi abi brok’ede, kande wi abi problema nanga wi gosontu, kande wi e stress, kande wan lobiwan fu wi dede, wi abi problema na ini wi osofamiri, sma e ferfolgu wi, noso wi abi tra problema. Èn siki di e panya na heri grontapu nanga orloku e meki en moro muilek gi wi fu hordoro. Ferteri Yehovah ala san de tapu yu ati. Ferteri en fu a situwâsi fu yu neleki fa yu ben o ferteri wan bun mati. Yu kan fertrow taki Yehovah „o yepi yu” (Ps. 37:3, 5). Te wi e hordoro na ini begi, dan dati o yepi wi fu ’hordoro te wi de na ini banawtu’ (Rom. 12:12). Yehovah sabi san den anbegiman fu en e ondrofeni. A e yere den „te den e bari suku yepi na en”.​—Ps. 145:18, 19. w23.05 5-6 ¶12-15

Te wi musu teki prenspari besroiti, dan wi musu kon sabi „san na a wani fu Yehovah” èn baka dati wi musu du dati tu (Ef. 5:17). Te wi feni Bijbel gronprakseri di abi fu du nanga a situwâsi fu wi, dan dati e sori taki wi wani kon sabi fa Gado e denki fu a tori. Èn te wi e fiti den gronprakseri fu Gado, dan wi o man teki bun besroiti. „Na ogriwan”, noso wi feanti Satan, wani taki wi gebroiki ala wi ten fu feti baka grontapu sani, so taki wi no abi ten moro fu dini Gado (1 Yoh. 5:19). A kan psa makelek taki wan Kresten e bigin poti moro prakseri na gudu, heiskoro-leri, noso na a wroko fu en, na presi fu gebroiki den someni okasi di de fu du moro gi Yehovah. Efu a ben o du dati, dan a ben o sori taki a e bigin denki leki den sma di no e dini Yehovah. A no de fu taki dati den sani disi no fowtu fu du, ma noiti wi musu poti den na a fosi presi na ini wi libi. w24.03 24 ¶16-17