April

Kutsiwani ngatsi? Sicabanga ngendlela Nkulunkulu lacabanga ngayo yini nobe ngendlela bantfu balelive labacabanga ngayo? Njengobe singemaKhristu, senta konkhe lesingakwenta kute sijabulise Nkulunkulu. Kutsiwani ngetintfo lesiticabangako? Sisebenta kamatima yini kute sicabange njengaJehova, lokusho kubona tintfo ngendlela latibona ngayo? Kwenta njalo kudzinga imetamo. Kute imetamo lokufanele siyente kute sicabange ngendlela bantfu balelive labacabanga ngayo. Loko kwentiwa kutsi situngeletwe ngumoya welive. (Ef. 2:2) Bantfu balelive bavame kusikhutsata kutsi siticabangele tsine sodvwa, ngako ngaletinye tikhatsi singalingeka kutsi sibalalele. Kumatima kucabanga ngendlela Jehova lacabanga ngayo, kodvwa kumelula kakhulu kucabanga njengabantfu balelive. Nangabe sivumela bantfu balelive basente sicabange njengabo, sitaticabangela tsine sodvwa siphindze sifune kutikhetsela kutsi ngukuphi lokulungile nalokungakalungi. (Mak. 7:21, 22) Kubalulekile kutsi silwele ‘kucabangisa kwaNkulunkulu’ hhayi “kwebantfu.” w18.11 18 ¶1; 19 ¶3-4

Jesu wajabula kakhulu ngesikhatsi Jehova amkhombisa kutsi uyamemukela ngekutsi akhulume naye tikhatsi letehlukene. Ngemuva nje kwekutsi Jesu abhajatiswe eMfuleni iJordane, Jehova washo lamavi alombhalo walamuhla. Kubonakala ngatsi nguJesu naJohane kuphela labeva lamavi. Kusesele umnyaka kutsi Jesu afe, baphostoli bakhe labatsatfu beva Jehova akhuluma ngaJesu atsi: “Lena yiNdvodzana yami letsandzekako nalengiyemukele; yilaleleni.” (Mat. 17:5) Kwekugcina, nasekusele emalanga lambalwa kutsi Jesu afe, Jehova waphindze wakhuluma neNdvodzana yakhe asezulwini. (Joh. 12:28) Ngisho noma Jesu bekati kutsi utawubulawa kabuhlungu futsi abitwe ngekutsi ungumhlambalati, wathantazela kutsi kwenteke intsandvo yaJehova hhayi yakhe. (Mat. 26:39, 42) “Wabeketelela kufa elugodvweni, wangalinaki lihlazo” futsi akazange afune kwemukelwa bantfu balelive, kodvwa wafuna kwemukelwa nguBabe wakhe.—Heb. 12:2. w18.07 10-11 ¶15-16

Ngemuva kwekutsi Jesu acalise Sidlo SeNkhosi Sakusihlwa, wakhombisa kuba nesibindzi mbamba. Kanjani? Jesu wemukela kutsi kwenteke intsandvo yaBabe wakhe ngisho noma bekati kutsi batambeka licala lekuhlambalata futsi bambulale. (Mat. 26:65, 66) Jesu wachubeka etsembekile kute angcwelise ligama laJehova, amelele bukhosi baNkulunkulu, aphindze avulele bantfu labaphendvukako indlela yekutfola kuphila lokuphakadze. Ngesikhatsi lesifanako, Jesu wenta balandzeli bakhe bakulungela loko lebebatawuhlangabetana nako masinyane. Jesu wakhombisa kuba nesibindzi ngekutsi anganaki tintfo lebetingamkhatsata, kunaloko wanaka kakhulu tidzingo tebaphostoli bakhe labetsembekile. Lesidlo lesimelula lasicalisa ngemuva kwekucosha Judasi besitawukhumbuta bantfu lebebatawuba balandzeli bakhe labagcotjiwe ngetintfo labatizuza ngenca yengati yaJesu leyacitseka kanye nekuba nencenye esivumelwaneni lesisha.—1 Khor. 10:16, 17. w19.01 22 ¶7-8

Jehova waphendvula asezulwini watsi: “Ngilikhatimulisile, futsi ngitawuphindze ngilikhatimulise.” Jesu bekakhatsatekile ngenca yekutsi bekufanele ahlale atsembekile kuJehova. Jesu bekati kutsi utawufa kabuhlungu. (Mat. 26:38) Intfo lebeyibaluleke kakhulu kuJesu bekukutsi akhatimulise libito laBabe wakhe. Jesu bekabekwe licala lekuhlambalata, ngako bekakhatsateke kakhulu ngekutsi kufa kwakhe kutalingcolisa libito laNkulunkulu. NjengaJesu, natsi singahle sikhatsateke nangabe ligama laJehova lingcoliswa. Kungenteka natsi siphatfwa kabi njengobe kwenteka nakuJesu. Noma kungenteka siviswe buhlungu tindzaba letingemanga letikhulunywa bantfu labasiphikisako. Singahle sicabange ngekutsi letindzaba tiyalingcolisa ligama laJehova. Emavi aJehova atasidvudvuta kakhulu nakwenteka loko. Jehova akayuze ehluleke kukhatimulisa libito lakhe.—Hla. 94:22, 23; Isa. 65:17. w19.03 11-12 ¶14-16

Bafundzi baJesu bebacabanga kutsi Jesu utawubuyisela umbuso ka-Israyeli, kodvwa bamangala kakhulu ngesikhatsi Jesu atsi utawuphatfwa kabi futsi abulawe. Umphostoli Phetro watsi: “Bani nemusa kuwe Nkhosi; loku ngeke kwenteke kuwe.” Jesu watsi: “Suka Sathane! Usikhubekiso kimi, ngobe awucabangisi kwaNkulunkulu kodvwa ucabangisa kwebantfu.” (Mat. 16:22, 23; Imis. 1:6) Ngekusho lamavi, Jesu waveta umehluko emkhatsini wendlela Nkulunkulu lacabanga ngayo kanye nendlela bantfu balelive labalawulwa nguSathane labacabanga ngayo. (1 Joh. 5:19) Phetro bekakhutsata Jesu kutsi aticabangele yena, lokuyintfo leyentiwa bantfu balelive. Indlela Jesu laphendvula ngayo Phetro ikhombisa kutsi bekatimisele kucabanga ngendlela yaNkulunkulu hhayi yalelive. w18.11 18 ¶1-2

Cabanga kutsi yini Jehova layibonako nangabe tigidzigidzi tebantfu emhlabeni wonkhe tiba khona emkhosini weSidlo SeNkhosi Sakusihlwa. Akabuki nje linani lebantfu labakhona kuphela, kodvwa unaka umuntfu ngamunye lokhona. Nasi sibonelo, uyababona labo lababa khona njalo ngemnyaka. Labanye beta ngisho nobe bahlushwa kabuhlungu. Labanye ababi khona njalo kuyo yonkhe imihlangano, kodvwa beta njalo eSikhumbutweni ngoba bayabona kutsi kubaluleke kakhulu kutsi babe khona. Jehova uyababona labo labacalako kuta eSikhumbutweni, mhlawumbe ngenca yekutsi bafuna kubona kutsi kwentekani. Siyaciniseka kutsi Jehova uyajabula nakabona bantfu labanyenti baba khona eSikhumbutweni. (Luk. 22:19) Nanobe kunjalo, unaka kakhulu sizatfu lesibenta babe khona noma tisusa tabo. Siyakulangatelela yini kufundziswa nguJehova kanye nenhlangano yakhe layisebentisako?—Isa. 30:20; Joh. 6:45.w19.01 26 ¶1-3

Jesu bekatimisele kufela bafundzi bakhe, futsi onkhe malanga bekabeka tidzingo tabo kucala kunetakhe. Sibonelo saloko kutsi bekaya kubo ngisho noma adziniwe nobe acindzetelekile. (Luk. 22:39-46) Bekanaka kakhulu loko bekangakwentela labanye, hhayi loko labangamentela kona. (Mat. 20:28) Siyincenye yebazalwane labasenkholweni yeliciniso futsi siyakujabulela kucitsa sikhatsi lesinyenti sisita labanye kutsi nabo babe kuyo. Nobe kunjalo, sifisa ngalokukhetsekile kusita bantfu “labahlobene natsi ekukholweni” kodvwa labangasayi ensimini kanye nasemihlanganweni. (Gal. 6:10) Sikhombisa kutsi siyabatsandza nasibakhutsata kutsi babe khona emihlanganweni ikakhulukati eSikhumbutweni. Silingisa Jehova naJesu ngekutsi sijabule nangabe ummemeteli lopholile abuyela kuJehova.—Mat. 18:14. w19.01 29 ¶12, 14; 30 ¶15

Nakacalisa Sikhumbuto sekufa kwakhe, Jesu wasebentisa sinkhwa seliPhasika neliwayini lebelivele likhona kuphela. Jesu watjela baphostoli bakhe kutsi letintfo letimbili letisisekelo tisho umtimba wakhe lote sono kanye nengati yakhe futsi bekatawunikela ngako ngenca yabo. Kungenteka baphostoli bakhe abazange bamangale kutsi lomkhosi lobalulekile bewungasiyo inkimbinkimbi. Kungani? Ekucaleni kwemnyaka, asekhaya lebangani bakhe labakhulu boLazaro, Mata, kanye naMariya, Jesu wacala kushumayela. Mata bekakhona kodvwa bekamatasa alungiselela sivakashi sabo lesibalulekile siphihli sekudla. Nakabona loko, ngemusa Jesu walungisa indlela Mata bekacabanga ngayo, futsi wamsita wabona kutsi kudla lokunyenti akukabaluleki ngaso sonkhe sikhatsi. (Luk. 10:40-42) Ngekuhamba kwesikhatsi, futsi sekusele ema-awa lambalwa kutsi abetselwe, Jesu wasisebentisa seluleko labesinikete Mata. Waciniseka kutsi sidlo seSikhumbuto besimelula. w19.01 20-21 ¶3-4

Jehova wakhombisa Jesu kutsi uyamemukela ngekutsi ente intfo Jesu labengakayilindzeli. Wamvusa futsi “wamphakamisela esikhundleni lesisetulu” waphindze wamniketa kuphila lokuphakadze ezulwini lobekungazange kutfolwe ngulomunye umuntfu. (Fil. 2:9; 1 Thim. 6:16) Loyo ngumvuzo lomuhle kakhulu Jesu lawutfola ngenca yekwetsembeka kwakhe. Yini lengasisita sibalekele kufuna kwemukelwa bantfu balelive? Ngaso sonkhe sikhatsi khumbula kutsi Jehova uhlale atemukela tinceku takhe letetsembekile futsi utibusisa ngetindlela lebetingakatilindzeli. Kute lowatiko kutsi yini Jehova latasentela yona esikhatsini lesitako. Kodvwa nyalo njengobe sibeketelela bumatima kanye netilingo kulelive lelibi, kufanele sihlale sikhumbula kutsi lelive liyendlula. (1 Joh. 2:17) Babe wetfu lositsandzako Jehova, “akasuye umuntfu longakalungi kutsi angakhohlwa umsebenti wenu nelutsandvo lenibe nalo ngelibito lakhe.”—Heb. 6:10. w18.07 11 ¶17-18

Ngebusuku bekugcina ngesikhatsi adla nebaphostoli bakhe, Jesu bekakhatsateke ngekutsi bete bunye. Ngesikhatsi athantaza nabo, wathantazela kutsi babe munye njengobe yena naBabe wakhe bamunye. Nangabe bebanebunye, bantfu bebatawubona kutsi vele Jehova watfuma Jesu emhlabeni kutsi ente intsandvo yaNkulunkulu. Bafundzi baJesu sibili bebatawubonakala ngekutsi batsandzane futsi babe nebunye. (Joh. 13:34, 35) Ngalobo busuku, Jesu wagcizelela kutsi bafundzi bakhe kufanele babe nebunye ngoba bekabonile kutsi bebete bunye. Bafundzi bakhe baphindze baphikisana ngekutsi “ngubani lotaba mkhulu kunabo bonkhe.” (Luk. 22:24-27; Mak. 9:33, 34) Ngalelinye lilanga, Jakobe naJohane bacela kutsi Jesu abanikete tikhundla letiphakeme eMbusweni wakhe futsi bahlale eceleni kwakhe.—Mak. 10:35-40. w18.06 8 ¶1-2

Jehova ufuna labashadile batsandzane kakhulu kute lutsandvo lwabo luhlale njalo. (Mat. 19:3-6) Kuphinga kusono lesikhulu kakhulu umuntfu langasenta, futsi kukhombisa kuba bete lutsandvo. Ngako uMtsetfo wesikhombisa kuleMitsetfo lelishumi bewukulahla kuphinga. (Dut. 5:18) Kusono kuNkulunkulu futsi kusento lesikhombisa lunya, umuntfu langasenta kulashade naye. (Gen. 39:7-9) Nangabe loshade naye aphingile, kungahle kuphele emashumi eminyaka solo uva buhlungu. Jehova uyikhatsalela kakhulu inhlalakahle yebantfwana. Jehova wayala batali kutsi banakekele bantfwana babo ngekubanika tintfo labatidzingako, baphindze babasite babe nebuhlobo lobuhle naye. Batali bekufanele basebentise onkhe ematfuba labawatfolako kute bafundzise bantfwana babo kutsandza Jehova kanye neMtsetfo wakhe. (Dut. 6:6-9; 7:13) Batali bekungakafaneli batsatse bantfwana babo njengetintfo tekunganakwa nome tekuphatfwa kabi, kodvwa bekufanele babaphatse kahle njengobe balifa lelivela kuJehova.—Hla. 127:3. w19.02 21 ¶5, 7

Jobe wakhona kuba cotfo ngenca yekutsi beketsemba kutsi Jehova utamnika umvuzo. Bekaciniseka kutsi Jehova unendzaba nebucotfo bakhe. Ngisho nome bekavivinywa, Jobe bekangangabati kutsi Jehova utamniketa umvuzo. Siyaciniseka kutsi loko kwamsita kakhulu kutsi ahlale acotfo. Kwetsembeka kwaJobe kwamjabulisa kakhulu Jehova futsi wamniketa umvuzo ngisho noma abengumuntfu lonesono. (Jobe 42:12-17; Jak. 5:11) Jobe utawutfola umvuzo lomkhulu kakhulu esikhatsini lesitako. Nkulunkulu wetfu akakashintji. (Mal. 3:6) Nangabe sikhumbula kutsi Jehova uyajabula ngekwetsembeka kwetfu, singaba nelitsemba lelihle ngelikusasa. (1 Thes. 5:8, 9) Ngaletinye tikhatsi ungahle ucabange kutsi nguwe wedvwa lowetama kugcina bucotfo, kodvwa awusiwedvwa. Emhlabeni wonkhe, kunetigidzi tebantfu baNkulunkulu labahlala bacotfo. Uyincenye yenhlangano lenebazalwane nabodzadze labahlala bacotfo ngisho nome basongelwa ngekufa.—Heb. 11:36-38; 12:1. w19.02 7 ¶15-16

Njengobe sikhatsi seSikhumbuto sendlula, senta kahle ngekutibuta lemibuto lelandzelako: ‘Yini lengingayenta kute ngimlingise kakhulu Jesu ekukhombiseni labanye kutsi ngiyabatsandza? Ngitinaka kakhulu yini tidzingo tebazalwane bami kwendlula tidzingo tami? Ngilindzele kutsi bazalwane nabodzadze bente lokungetulu kwemandla abo yini noma ngiyakhumbula kutsi nabo banesono?’ Shengatsi singahlale silingisa Jesu futsi sibavele labanye. Ngemuva kwesikhashana angeke kusadzingeka kutsi sikhumbule kufa kwaKhristu. Ngesikhatsi sekuhlupheka lokukhulu, Jesu utawufika futsi agcogcele ndzawonye labo “labakhetsiwe” kutsi baye ezulwini, ngemuva kwaloko Sikhumbuto angeke sisaba khona. (1 Khor. 11:26; Mat. 24:31) Ngisho noma bantfu baNkulunkulu bangasasigubhi Sikhumbuto, siyaciniseka kutsi batawuhlale bawukhumbula lomkhosi loluphawu lwekutfobeka, sibindzi, kanye nelutsandvo lolukhulu lolwakhonjiswa nguJesu. w19.01 25 ¶17-19

Cabanga ngekutsi kunakekela imitimba yetfu kusisita njani kutsi sibone kubaluleka kwekunakekela tinhlitiyo tetfu letingekwemfanekiso. Kwekucala, kuze imitimba yetfu ihlale iphilile kufanele sidle kudla lokunemphilo siphindze sitivocavoce. Ngendlela lefanako, kuze inhlitiyo yetfu lengekwemfanekiso ihlale iphilile, kufanele sihlale sifundza liBhayibheli kanye netincwadzi letisekelwe kulo bese siyakhombisa kutsi sinekukholwa. Kute sikhombise kutsi sinekukholwa kuJehova kufanele sikusebentise loko lesikufundzako, siphindze sikhulume ngetintfo lesitikholelwako. (Rom. 10:8-10; Jak. 2:26) Kwesibili, imitimba yetfu ingabonakala iphilile kodvwa sibe sinekugula lokutsite. Ngendlela lefanako, singahle sicabange kutsi sinekukholwa lokucinile ngenca yeluhlelo lesinalo lwekukhonta Nkulunkulu ngisho sinetifiso letimbi. (1 Khor. 10:12; Jak. 1:14, 15) Kufanele sikhumbule kutsi Sathane ufuna kusenta sicabange njengaye. w19.01 15 ¶4-5

Natsi kufanele sitibute: ‘Ngiyabasita yini labahluphekile? Ngiyakwenta yini loko lokwentiwa ngulomSamariya loneluvelo?’ (Luk. 10:30-35) ‘Ngingasikhombisa yini sihawu ngekutsi ngibasite ngemusa labo labahluphekako? Nasi sibonelo, ngiyawasita yini emaKhristu lesekakhulile, bafelokati, kanye nebantfwana labanebatali labangasibo BoFakazi? Ngingasitsatsa yini sinyatselo ‘sekukhuluma ngendlela ledvudvutako nalabacindzetelekile’?’ (1 Thes. 5:14; Jak. 1:27) Nangabe sikhombisa labanye sihawu sitfola injabulo lesiyitfola nasipha labanye. Ngetulu kwaloko siyati kutsi sisuke sijabulisa Jehova. (Imis. 20:35; Heb. 13:16) Mayelana nemuntfu lonakekela labanye, iNkhosi Davide yatsi: “Simakadze uyawumlondvolotela imphilo yakhe; uyawumenta abe [ngulojabulako] emhlabeni.” (Hla. 41:1, 2) Nangabe sibakhombisa sihawu neluvelo labanye bantfu sitawutfola umusa waJehova futsi sitawujabula.—Jak. 2:13. w18.09 19 ¶11-12

Yoshiko, umKhristu lowetsembekile watfola tindzaba letibuhlungu. Dokotela wakhe wamtjela kutsi bekatawushona ngemuva kwetinyanga letimbalwa. Wativa njani? Yoshiko wakhumbula livesi leliseBhayibhelini lebekalitsandza futsi lelingumbhalo welusuku walamuhla. Wabese utjela dokotela wakhe kutsi bekangesabi ngobe Jehova bekambambe ngesandla. Lamavi ladvudvutako latfolakala kulelivesi amsita kutsi achubeke etsembele kakhulu kuJehova. Natsi lelivesi lingasisita kutsi singesabi nasibhekana nekuvivinywa lokumatima. Ekucaleni, Jehova watjela Isaya kutsi abhale lamavi kute advudvute emaJuda labetawutfunjelwa eBhabhulona. Nanobe kunjalo, Jehova lamavi bekangakawabhaleli kutsi advudvute emaJuda kuphela, kodvwa ayabadvudvuta ngisho nebantfu labaphila esikhatsini setfu. (Isa. 40:8; Rom. 15:4) Lamuhla siphila ‘etikhatsini letibucayi lokumatima kubhekana nato,’ ngako sisidzinga kakhulu sikhutsato lesikulombhalo wa-Isaya.—2 Thim. 3:1. w19.01 2 ¶1-2

Esimeni lesinjalo, bobabili basuke baseshadile, ngisho nobe bahlala ngekwehlukana batawuba netinkinga. Umphostoli Pawula washo nasi sizatfu sekutsi bantfu labashadile bahlale ndzawonye: “Indvodza lengakholwa ingcwelisiwe ngenca yemfati wayo, nemfati longakholwa ungcwelisiwe ngenca yendvodza yakhe lekholwako; kube akusinjalo, ngabe bantfwana benu bangcolile, kodvwa nyalo bangcwele.” (1 Khor. 7:14) EmaKhristu lamanyenti latsembekile achubeka ahlala nebantfu lashade nabo labangasibo boFakazi ngisho nasetimeni letimatima. Kuwajabulise kakhulu kutsi kutidzela kwawo kwente bantfu labashade nabo baba BoFakazi BaJehova. (1 Khor. 7:16; 1 Phet. 3:1, 2) Emhlabeni wonkhe, BoFakazi BaJehova bayajabula emishadweni yabo lephumelelako. Ngisho nasebandleni lokulo bakhona bazalwane nabodzadze labajabulako emishadweni yabo. Labazalwane labetsembekile bayabatsandza bafati babo futsi labafati bayabatsandza futsi bayabahlonipha bayeni babo. Bonkhe bayakhombisa kutsi umshado ungahlonishwa.—Heb. 13:4. w18.12 14 ¶18-19

Ligama lelitsi Edeni lisho “injabulo” futsi bekumnandzi kuhlala kulendzawo. Lendzawo beyiyinhle, inekudla lokunyenti futsi bekunekuthula emkhatsini webantfu netilwane. (Gen. 1:29-31) NgesiGriki ligama lesiHebheru lelisho “ingadze” lihunyushwe ngekutsi pa·raʹdei·sos. I-Cyclopaedia leyabhalwa nguM’Clintock naStrong itsi ligama lelitsi pa·raʹdei·sos lenta umuntfu lokhuluma siGriki acabange ngendzawo lenhle, lete tintfo letingaba yingoti, lenetihlahla letitsela titselo letehlukahlukene, lenemifula lenemanti lahlobile nalenetjani lobuluhlata lapho kungadla khona imihlambi yetinyamatane kanye netimvu. (Catsanisa naGenesisi 2:15, 16.) Nkulunkulu wabeka bo-Adamu na-Eva endzaweni lelipharadisi, kodvwa abazange bamlalele Nkulunkulu futsi loko kwabenta bangasafaneleki kuhlala khona. Ngako, bona kanye netitukulwane tabo balahlekelwa lilungelo lekuhlala ePharadisi. (Gen. 3:23, 24) Nanobe bekungasahlali muntfu, kubonakala shengatsi lendzawo yachubeka ikhona kwaze kwafika Zamcolo wangesikhatsi saNowa. w18.12 3-4 ¶3-5

Batali balwela kufundzisa bantfwana babo timiso letinhle tekutiphatsa. Nangabe bantfwana bakhetsa kuphila ngendlela batali babo lababafundzise ngayo, ngeke bangene etinkingeni, ngeke bakhatsateke futsi batawukhona kwenta tincumo labangeke batisole ngato esikhatsini lesitako. Njengemtali lonelutsandvo, Jehova ufuna bantfu bakhe bajabule ekuphileni. (Isa. 48:18) Usinikete timiso tendlela lokufanele sitiphatse ngayo nendlela lokufanele siphatse ngayo labanye. Ufuna sifundze kuba nembono wakhe ngetintfo futsi siphile ngetimiso takhe. Loku akusho kutsi sesite inkhululeko, kodvwa kusisita sibe nembono lokahle ngetintfo. (Hla. 92:5; Taga 2:1-5; Isa. 55:9) Kuphindze kusisite sente tincumo letikahle letitasenta sijabule. (Hla. 1:2, 3) Kusisita kakhulu kucabanga ngendlela Jehova lacabanga ngayo. w18.11 19-20 ¶7-8

Kute sichubeke sihamba ecinisweni, akukafaneli sivumele bantfu basentise tintfo letingamjabulisi Nkulunkulu. Ngesikhatsi sicala kufundza emaciniso, kwaba nelushintjo ebuhlotjeni lebesinabo nebantfu labangasibo boFakazi kanye nemalunga emndeni. Labanye batemukela tinkholelo tetfu kodvwa labanye bavele basiphikisa. Emalunga emndeni, lesisebenta nabo kanye nalesifundza nabo bangahle betame kusenta kutsi sihlanganyele nabo nabagubha imikhosi letsite. Yini lengasisita sincobe silingo sekugubha imikhosi nemaholidi langamjabulisi Jehova? Singasitwa kuhlale sikhumbula kutsi lemikhuba ayimjabulisi Jehova. Kufanele siphindze sifundze tincwadzi tetfu letichaza ngemsuka wemaholidi bantfu labavame kuwagubha. Kutikhumbuta ngetizatfu letiseBhayibhelini letenta singawagubhi lamaholidi, kusenta siciniseke kutsi sihamba endleleni “leyemukelekako eNkhosini.” (Ef. 5:10) Angeke ‘sibesabe bantfu’ nangabe setsembela kuJehova kanye naseVini lakhe leliliciniso.—Taga 29:25. w18.11 11 ¶10, 12

Nangabe sibhekana netingucuko lesingakatilindzeli, kungaba melula kutsi sihlale sicabanga ngetinkinga lesinato. Bekungenteka lokufanako nakuJosefa. Kodvwa esikhundleni saloko, Josefa wakhetsa kwenta lokuhle nanobe bekabhekene nesimo lesimatima, futsi Jehova wambusisa. Nanobe abeboshiwe, Josefa bekatimisele kwenta noma ngabe ngumuphi umsebenti labewunikwa ngumgcinijele njengobe bekenta ngesikhatsi asebentela Photifari. (Gen. 39:21, 22) NjengaJosefa, singahle sitikhandze sisesimeni lapho khona kute lesingakwenta noma kukuncane kakhulu lesingakwenta kuze silungise simo. Nanobe kunjalo, nangabe sibeketela futsi sisebenta kamatima kunobe ngusiphi simo lesikuso, sisuke sinika Jehova sizatfu sekutsi asibusise. (Hla. 37:5) Kuliciniso kutsi ngaletinye tikhatsi singahle ‘sicakeke’ kodvwa sinayo “indlela yekuphuma.” (2 Khor. 4:8) Lamavi lashiwo nguPawula atawugcwaliseka nasesikhatsini salamuhla, ikakhulukati nangabe sihlale sinake umsebenti wekushumayela. w18.10 29 ¶11, 13

Utiva njani nangabe umuntfu lomatiko nalomhloniphako akhohlwa ligama lakho, noma angasakuboni sanhlobo? Loko kungakuvisa buhlungu kakhulu. Kungani? Kungoba njengoba sibantfu siyafisa kwemukelwa ngulabanye. Ecinisweni sifuna lokungetulu nje kwekumane basati kutsi sibobani. Sifuna basati kutsi sibantfu labanjani kanye naloko lesikufezile. (Num. 11:16; Jobe 31:6) Njengaletinye tifiso lesinato, sifiso setfu sekutsandvwa ngulabanye singaba yingoti nangabe singakanaki. Lelive laSathane lingasenta sifune kuba bantfu labadvumile noma lababalulekile. Loko kungasenta singamhloniphi Babe wetfu losezulwini Jehova futsi singamkhonti ngendlela lefanele.—Semb. 4:11. w18.07 7 ¶1-2

Ngako akusimangalisi kutsi Sathane kanye nemadimoni akhe benta bantfu labasetikhundleni kutsi ‘bakhulume emanga.’ (1 Thim. 4:1, 2) Emanga lakhulunywa baholi benkholo ayingoti kakhulu kubantfu. Kungani? Kungobe umuntfu angalahlekelwa kuphila lokuphakadze nangabe akholelwa timfundziso tabo letingemanga futsi enta tintfo Nkulunkulu latenyanyako. (Hos. 4:9) Jesu bekati kutsi baholi benkholo bangesikhatsi sakhe bebabadukisa bantfu, ngako wabatjela emehlweni watsi: “Maye kini nine tati temtsetfo nebaFarisi, batentisi! Ngobe nidzabula tilwandle kanye nemave kute nigucule bantfu bangene enkholweni yenu, bese kutsi nasebagucukile nibente bafanelwe yiGehena [kubhujiswa kwaphakadze] kakhulu kunani.” (Mat. 23:15) Jesu watsi labaholi benkholo labakhohlisako bebafana nababe wabo Develi, ‘longumbulali.’—Joh. 8:44. w18.10 7 ¶5-6

Bekasho kutsini Jesu? Waphindze watsi: “Jabulani nitfokote, ngenca yekutsi umvuzo wenu mkhulu ezulwini, ngobe nebaphrofethi baphatfwa ngaleyo ndlela.” (Mat. 5:12) Ngesikhatsi baphostoli bashaywa futsi batjelwa kutsi bayekele kushumayela, “besuka kuleNkantolo YemaJuda bajabulile.” Bebangajatjuliswa kushaywa, kodvwa bebajabula “ngobe bebakufanele kuhlazwa ngenca yelibito laJesu.” (Imis. 5:41) Lamuhla, tikhonti taJehova tiyajabula nangabe tibeketelela kuphatfwa kabi noma tivivinywa ngenca yeligama laJesu. (Jak. 1:2-4) Njengebaphostoli, asijatjuliswa kuhlushwa, kodvwa nasihlala setsembekile, Jehova utasisita asiphe sibindzi kute sibeketele nasivivinywa. Nangabe Jehova, ‘longuNkulunkulu lojabulako’ asitsandza, singajabula ngisho noma sishushiswa ngemalunga emindeni yetfu, sigula nome sesikhulile ngeminyaka.—1 Thim. 1:11. w18.09 21 ¶18-20

Ngenca yekutsi bantfu labanyenti ‘kuletikhatsi letibucayi’ babhekana nekucindzeteleka lokwehlukahlukene labanye sebaphelelwa litsemba. (2 Thim. 3:1-5) Luhlolo lukhombisa kutsi njalo ngemnyaka, bantfu labangetulu kwa-800 000 bayatibulala—loko kusho kutsi njalo ngemizuzwana lengu-40, kunemuntfu lotibulalako. Lokubuhlungu nakakhulu kutsi ngisho nemaKhristu ayabhekana nalokucindzeteleka futsi lamanye awo agcina asatibulele. Ngisho noma bazalwane betfu bangafisi kufa, kodvwa labanyenti babhekana netimo leticindzetelako futsi bayakudzinga kukhutsatwa kanye nekutsandvwa. Labanye babeketelela kushushiswa futsi kuhlekiswa ngabo emsebentini. Bahlala bakhatsele ngenca yekutsi basebenta imisebenti lematima futsi basebenta sikhatsi lesengetiwe. Labanye banetinkinga temndeni letimatima. Mhlawumbe ngenca yekutsi bashade nebantfu labangamkhonti Jehova, futsi labachubeka babaphikisa. Ngenca yaloku kanye naletinye tinkinga, bazalwane labanyenti bahlala bakhatsele futsi badvumatekile. w18.09 13 ¶3, 5

Batali labangemaKhristu basuke babambisana naJehova nangabe basita bantfwana babo kutsi batibekele imigomo yekukhonta Nkulunkulu. Batali labanyenti labakwentile loku babona bantfwana babo bangenela umsebenti wasikhatsi sonkhe ngisho nobe bawenta khashane nasekhaya. Labanye babo batitfunywa telivangeli, labanye bangemahlahlandlela lapho kunesidzingo lesikhulu khona, kani labanye basebenta e-Bethel. Nangabe bantfwana bakhashane nasekhaya kungenteka batali bangakhoni kucitsa sikhatsi lesinyenti nebantfwana babo ngendlela lebebangatsandza ngayo. Nobe kunjalo, batali labatidzelako bakhutsata bantfwana babo kutsi bachubeke benta umsebenti waJehova. Kungani? Kungobe kubajabulisa kakhulu futsi kuyabenetisa kwati kutsi bantfwana babo babeka uMbuso waNkulunkulu kucala. Kungenteka labatali bativa ngendlela Hana labetiva ngayo nakamikisa Samuweli ethempelini laJehova. Kubo kulilungelo lelikhulu kakhulu kusebenta naJehova ngalendlela.—1 Sam. 1:28. w18.08 24 ¶4

Jesu akazange atsi angeke sekwenteke. Waphindze watsi: “Niyajabula nine leneswele, ngobe uMbuso waNkulunkulu wenu.” (Luk. 6:20) Loko akusho kutsi bonkhe bantfu labaphuyile bebabusiswe ngalokukhetsekile futsi bonkhe bebatilalela timfundziso taJesu. Bantfu labanyenti labaphuyile bebangamlaleli. Liphuzu lelibalulekile kutsi akukafaneli sehlulele umuntfu ngenca yetintfo lanato. Kusibusiso kuba nebazalwane labanyenti labaphuyile nalabanjingile labatsandza Jehova futsi labamkhonta ngenhlitiyo yabo yonkhe. ImiBhalo itjela bantfu labanjingile kutsi ‘bangabeki litsemba labo emcebeni longatsembakali, kodvwa balibeke kuNkulunkulu.’ (1 Thim. 6:17-19) LiBhayibheli liphindze liyale bonkhe bantfu baNkulunkulu labanjingile nalabaphuyile kutsi bangayitsandzi imali. (1 Thim. 6:9, 10) Nangabe sibona bazalwane betfu ngendlela Jehova lababona ngayo, angeke sibehlulelele ngetintfo labanato. w18.08 10-11 ¶11-12

Asingabati kutsi sifuna kukhombisa Jehova kutsi siyambonga ngekusikhetsa kutsi sibe bofakazi bakhe. Siyati kutsi senta sincumo lesihlakaniphile nasinikela kuphila kwetfu kuJehova. Ngako sitimisele kungatenti tintfo Jehova latenyanyako. Siyabatsandza futsi siyabahlonipha bazalwane betfu ngobe siyati kutsi nabo babantfu baJehova. (Rom. 12:10) LiBhayibheli lisetsembisa kutsi: “Simakadze angeke asilahle sive sakhe.” (Hla. 94:14) Leso sicinisekiso lesingasetsemba. Noma kungentekani kitsi, Jehova utawuhlale anatsi. Ngisho nekufa ngeke kusehlukanise nelutsandvo lwaNkulunkulu. (Rom. 8:38, 39) “Ngako kutsi siyaphila nobe siyafa, sibaJehova.” (Rom. 14:8) Sisilindzele ngalabovu sikhatsi lapho khona Jehova atawuvusa bonkhe bangani bakhe labafa. (Mat. 22:32) Ngisho nanyalo sitfola tibusiso letinyenti. Njengobe liBhayibheli lisho, “sibusisiwe leso sive lesiNkulunkulu waso kunguSimakadze, sive latikhetsele sona kutsi sibe lifa lakhe.”—Hla. 33:12. w18.07 26 ¶18-19

Labanye bantfu bacabanga kutsi njengobe letinye tincumo kufanele batentele bona, banenkhululeko yekukhetsa loko labakufunako ekuphileni, nakutiwa endzabeni yemfundvo, umsebenti noma loko umuntfu lafisa kukwenta esikhatsini lesitako, yingci nje nangabe nembeza wabo ubavumela. Mhlawumbe bacabanga ngemavi aPawula lebekawabhalele emaKhristu aseKhorinte mayelana nekudla latsi: “Kungani inkhululeko yami kufanele yehlulelwe nganembeza walomunye umuntfu?” (1 Khor. 10:29) Kuliciniso kutsi sinenkhululeko yekutentela letincumo, kepha kufanele sikhumbule kutsi inkhululeko yetfu inemincele nekutsi tonkhe tincumo tetfu tinemiphumela. Ngaleso sizatfu, Pawula wabhala lamagama lakulombhalo welusuku walamuhla. Loku kusisita sibone kutsi ngisho noma sinenkhululeko yekutikhetsela tinyenti tintfo lokufanele sicabangisise ngato futsi tibalulekile kunaloko lesikutsandzako. w18.04 10 ¶10

UmKhristu angacabanga kutsi ukhonta Jehova ngesikhatsi lesifanako abe enta tintfo Jehova latenyanyako. (Juda 11) Angaya njalo ensimini nasemihlanganweni, kodvwa abe atiphatsa kabi, abukhali futsi enyanya bazalwane bakhe. (1 Joh. 2:15-17; 3:15) Kucabanga ngalendlela kungamenta kutsi one. Labanye bantfu abati kutsi yini lesiyicabangako noma lesiyentako, kepha Jehova ubona konkhe. Uyabona nangabe singakatinikeli ngalokuphelele kuye. (Jer. 17:9, 10) Jehova akasheshi asilahle ngisho noma senta emaphutsa. Nangabe umuntfu akhwesha kuye, Jehova umncenga atsi: “Buyela kimi.” Jehova ufuna simelane nalokubi ikakhulukati nangabe silwa kamatima kuze sincobe butsakatsaka betfu. (Isa. 55:7) Nasenta njalo, Jehova utawuba seluhlangotsini lwetfu futsi utasiniketa konkhe lesikudzingako kute ‘sincobe’ tifiso tetfu letimbi.—Gen. 4:7. w18.07 18 ¶5-6