May

Kuze Jehova asisite siyati iNdvodzana yakhe, ngelutsandvo wasifakela emaVangeli lamane eVini lakhe. LamaVangeli akhuluma ngekuphila kwaJesu nangemsebenti wakhe. Letincwadzi tisitjela ngaloko Jesu lakwenta, lakusho nendlela bekativa ngayo. Tiphindze tisisite ‘sicabangisise’ ngesibonelo saJesu. Ecinisweni, tinetinyatselo Jesu lasishiyela tona. Ngako, nasidadisha lamaVangeli, singamati kancono Jesu. Ngenca yaloko, sitawukhona kulandzela tinyatselo takhe edvutane. Kuze sizuze kakhulu kulamaVangeli, kufanele sente lokungetulu nje kwekumane siwafundze. Kufanele sitinike sikhatsi siwadadishe ngekucophelelela futsi sicabangisise ngawo. (Catsanisa naJoshuwa 1:8.) Yenta tindzaba lotifundza emaVangelini tiphile. Sebentisa likhono lakho lekucabanga kuze ubone, ulalele futsi uve lebekwenteka. Cwaninga etincwadzini lesitinikwe yinhlangano yaJehova. w21.04 4-5 ¶11-13

Eminyakeni lengemakhulu ngaphambi kwekutsi Jesu ete emhlabeni, Jehova wasebentisa liVi lakhe kuze avete kutsi Mesiya bekatawutsengiswa ngetinhlavu telisiliva letingu-30. (Zak. 11:12, 13) Lona bekatamtsengisa bekutawuba ngumngani waJesu losedvute. (Hla. 41:9) Umphrofethi Zakhariya wabhalwa watsi: “Shaya umelusi futsi uyekele umhlambi wetimvu uhlakateke.” (Zak. 13:7) Kunekutsi bangamemukeli Jesu ngenca yaletintfo letenteka, bekufanele kucine kukholwa kwebantfu labanetinhlitiyo leticotfo nababona letiphrofetho tigcwaliseka kuJesu. Kunenkinga lefanako yini nalamuhla? Yebo. Etikhatsini tetfu, boFakazi labambalwa labatiwako bayekele kukhonta Jehova, babatihlubuki babese betama kudukisa nalabanye. Basakate imibiko lemibi ngaBoFakazi BaJehova ledukisako nalengemanga basebentisa emaphephandzaba, i-radio, i-TV kanye ne-Internet. Kodvwa loko akubadukisi bantfu labanetinhlitiyo leticotfo. Kunaloko, bayati kutsi liBhayibheli lasho kutsi tintfo letinjena betitawenteka.​—Mat. 24:24; 2 Phet. 2:18-22. w21.05 11 ¶12; 12-13 ¶18-19

LiBhayibheli likwenta kucace kutsi bantfu baNkulunkulu batawacondza kancono emaciniso njengobe sikhatsi sihamba. (Khol. 1:9, 10) Jehova usembulela kancane kancane liciniso, futsi kufanele silindze ngesineke kuze kube ngulapho silicondza kancono. Nangabe Sigungu LeSibusako sibona kutsi kudzingeka sishintje endleleni lesicondza ngayo nobe lesenta ngayo lokutsite, silwenta ngekushesha lolushintjo. Emasontfo lamanyenti enta lushintjo kuze ajabulise emalunga awo nobe kuze atsandvwe live, kodvwa inhlangano yaJehova yenta lushintjo kuze isisite sisondzelane naNkulunkulu futsi silandzele sibonelo saJesu sekukhonta Nkulunkulu ngendlela lekahle. (Jak. 4:4) Nasenta lushintjo, asilwenti ngobe imibono yebantfu balelive seyishintjile, kodvwa silwenta ngobe sesiyicondza kancono imiBhalo. Siyalitsandza liciniso!​—1 Thes. 2:3, 4. w21.10 22 ¶12

Yini longayenta nawunesitunge? Cabanga ngendlela Jehova lakusita ngayo. (Hla. 55:22) Loko kutakusita ubone kutsi awusiwedvwa. Cabanga nangendlela Jehova lasita ngayo bazalwane nabodzadze labanesitunge. (1 Phet. 5:9, 10) Lomunye umzalwane lokutsiwa nguHiroshi, lesekuphele iminyaka leminyenti kunguye yedvwa Fakazi emndenini wakhe, utsi: “Kwati kutsi sonkhe setama kamatima kukhonta Jehova kungabakhutsata labanye betfu labasemindenini lengasibo boFakazi.” Hlale uthantaza, ufundza liBhayibheli futsi uya emihlanganweni. Loku kufaka ekhatsi kutjela Jehova indlela lotiva ngayo. Kubalulekile kulifundza njalo liVi laNkulunkulu, uzindle ngetindzaba letikulo letikhombisa kutsi Jehova uyakutsandza. Lamanye emaKhristu ayibamba ngengcondvo imibhalo ledvudvutako lenjengeTihlabelelo 27:10 na-Isaya 41:10. Kulalela lokurekhodiwe nabalungiselela imihlangano nobe nabatifundzela liBhayibheli kuyabasita labanye kutsi bangasiva kakhulu situnge. w21.06 9-10 ¶5-8

Ushonelwe ngumuntfu lomtsandzako yini? Tinike sikhatsi ucinise litsemba lakho lekutsi labafile batawuvuka ngekutsi ufundze tindzaba letiseBhayibhelini letikhuluma ngalabavuswa ekufeni. Uselusizini yini ngenca yekutsi lilunga lemndeni wakho liyekelisiwe kuba nguFakazi? Dadisha kuze uciniseke mbamba kutsi indlela Nkulunkulu lasijezisa ngayo ihlale ikahle. Nobe nguyiphi inkinga lobhekene nayo, yitsatse njengelitfuba lekucinisa kukholwa kwakho. Thantaza utjele Jehova indlela lotiva ngayo. Ungatehlukanisi nalabanye, kodvwa hlala usondzelene nebazalwane nabodzadze. (Taga 18:1) Yenta tintfo letitakusita kutsi ucinisele, ngisho nobe ungahle ukhale nawukhumbula loko lokwenteke kuwe. (Hla. 126:5, 6) Chubeka uba khona njalo emihlanganweni nasemsebentini wekushumayela futsi uchubeke utidadishela liBhayibheli. Hlale unake tibusiso letinhle Jehova lakwetsembisa tona. Kukholwa kwakho kutawucina kakhulu njengobe ubona indlela Jehova lakusita ngayo. w21.11 23 ¶11; 24 ¶17

Nguyiphi indlela bafundzi baJesu labafana ngayo ‘nebantfwana’? Bobani lelive lelibatsatsa njengalababalulekile? Ngulabanjingile, labadvumile nalabasemagunyeni. Ngalokwehlukile, bafundzi baJesu babonakala bangakabaluleki, ‘banjengebantfwana’ labangasilutfo. (1 Khor. 1:26-29) Kodvwa Jehova akabatsatsi ngaleyo ndlela. Yini leyenta Jesu wakhuluma ‘ngalaba labanjengebantfwana’? Bafundzi bakhe bebambute umbuto lotsi: “Ngubani vele lomkhulu kunabo bonkhe eMbusweni wemazulu?” (Mat. 18:1) Ngaleso sikhatsi, emaJuda lamanyenti bekatsatsa sikhundla njengentfo lebaluleke kakhulu. Lesinye sati satsi: “Bantfu bebaphilela ludvumo, ligama, kwemukelwa nekuhlonishwa.” Jesu bekati kutsi emaJuda lamanyenti bekacabanga kutsi kubalulekile kuba ncono kunalabanye, nekutsi bafundzi bakhe bekufanele basebente kamatima kuze bashintje lendlela yabo yekucabanga. w21.06 20 ¶2; 21 ¶6, 8; 22 ¶9

Njengobe umphostoli Pawula bekangulomdzala welibandla, wasibekela sibonelo lesihle. Sibonelo nje, wabeluleka bazalwane baseThesalonika ngesikhatsi badzinga kwelulekwa. Nanobe kunjalo, etincwadzini lababhalela tona, Pawula wacale wabancoma ngemsebenti lebebawenta ngekwetsembeka, ngekutikhandla kwabo ngelutsandvo nangekucinisela kwabo. Wacabanga nangetimo lebebakuto, wavuma kutsi kuphila kwabo bekumatima nekutsi bebacinisela ngisho baphatfwa kabi. (1 Thes. 1:3; 2 Thes. 1:4) Waphindze wabatjela labazalwane kutsi basibonelo lesihle kulamanye emaKhristu. (1 Thes. 1:8, 9) Bajabula kakhulu ngalokunconywa nguPawula! Siyaciniseka kutsi Pawula bekabatsandza kakhulu bazalwane bakhe. Kungako akhona kuniketa leseluleko sakhe lesihle kuletincwadzi takhe letimbili lebetiya kubaseThesalonika.​—1 Thes. 4:1, 3-5, 11; 2 Thes. 3:11, 12. w22.02 15 ¶6

Sathane usebentisa baholi benkholo yemanga kuze atsi Jehova unelunya futsi nguye lobangela bantfu kutsi bahlupheke. Labanye baze batsi nakufa umntfwana, Nkulunkulu umtsetse ngobe udzinga tingilosi letinyenti ezulwini. Bamedzelela mbamba Nkulunkulu! Kodvwa tsine siyati kutsi Jehova unguBabe lonelutsandvo. Nangabe sigula kakhulu nobe sishonelwa ngulotsite lesimtsandzako asimsoli Nkulunkulu wetfu. Kunaloko, siyaciniseka kutsi ngalelinye lilanga utawelapha labagulako futsi avuse labafile. Singabatjela bonkhe labasilalelako kutsi Jehova unguNkulunkulu lonelutsandvo. Jehova angabese uyakhona kuphendvula loyo lomedzelelako. (Taga 27:11) Jehova unguNkulunkulu loneluvelo. Uva buhlungu kakhulu nakasibona sihlupheka, kungaba kutsi siphatfwa kabi, siyagula nobe senta emaphutsa. (Hla. 22:23, 24) Jehova uyabati buhlungu lesibuvako, uyafuna kubucedza futsi utabucedza.​—Catsanisa na-Eksodusi 3:7, 8; Isaya 63:9. w21.07 9-10 ¶9-10

Ngekushesha, bantfu labalalelako batawujabulela lilungelo lelikhulu kakhulu lekutsandza Jehova nelekumkhonta kuze kube phakadze! Jesu utawucatulula tonkhe tinkinga letabangwa ngu-Adamu na-Eva ngesikhatsi bancuma kushiya umndeni waNkulunkulu. Jehova utawuvusa tigidzi tebantfu labafa futsi atinike litfuba lekuphila phakadze emhlabeni lotawube sewulipharadisi, setiphile saka! (Luk. 23:42, 43) Nasebete sono, bonkhe bantfu labakhonta Jehova batawuba ‘neludvumo nekuhlonipheka’ Davide lakhuluma ngako. Nangabe ulilunga ‘lesicumbi lesikhulu,’ unelitsemba lelihle kakhulu. (Semb. 7:9) Nkulunkulu uyakutsandza futsi ufuna ube lilunga lemndeni wakhe. Ngako yenta konkhe lokusemandleni akho kuze umjabulise. Lilanga nelilanga hlale ucabanga ngetetsembiso taNkulunkulu. Litsatse njengalelibalulekile lilungelo lonalo lekukhonta Babe wetfu wasezulwini lesimtsandzako, futsi ulitsatse njengalelibalulekile litsemba lonalo lekumdvumisa kuze kube phakaze! w21.08 7 ¶18-19

Umphrofethi Jeremiya washumayela iminyaka leminyenti ngisho nobe bantfu bebangamlaleli futsi bamphikisa. Wadvumateka kakhulu ngenca yekutsi labo bebamphikisa ‘bebametfuka futsi bahlekisa ngaye’ kangangekutsi besekafuna kuwuyekela lomsebenti. (Jer. 20:8, 9) Kodvwa akazange aphele emandla! Yini leyamsita kutsi ancobe kudvumateka futsi ajabule emsebentini wakhe wekushumayela? Wanaka nati tintfo letimbili. Kwekucala, umlayeto waNkulunkulu lebekawutjela labantfu bewutawubanika ‘likusasa lelihle kanye nelitsemba.’ (Jer. 29:11) Kwesibili, Jehova bekakhetse Jeremiya kutsi endlulisele umlayeto wakhe kulabantfu. (Jer. 15:16) Natsi sishumayela ngemlayeto loletsa litsemba kulelive lelibi, futsi sibitwa ngelibito laNkulunkulu. Nangabe sikunaka loku, singajabula ngisho bantfu bangalaleli. Ngako ungadvumateki nobe uphele emandla nangabe kutsatsa sikhatsi lesidze kutsi labo lodadisha nabo liBhayibheli batfutfuke kunaleso bewusilindzele. Kwenta bafundzi kudzinga sineke.​—Jak. 5:7, 8. w21.10 27 ¶12-13

Ngisho nobe sinesikhatsi lesidze kangakanani sikhonta Jehova, kufanele sichubeke sakha kukholwa kwetfu kuye futsi sikucinisa. Kungani? Kungobe nasingakanaki, kukholwa kwetfu kungaba butsakatsaka. Khumbula kutsi kukholwa kusho kuciniseka ngetintfo letikhona mbamba letingakabonwa. Loko lesingakuboni singasheshe sikukhohlwe. Kungako Pawula atsi kuba bete kukholwa ‘kusono lesisigigela kamelula.’ Ngako yini lesingayenta kuze siciniseke kutsi kukholwa kwetfu kuhlala kucinile? (2 Thes. 1:3) Kwekucala, hlale uncenga Jehova kutsi akuphe umoya wakhe longcwele. Kungani? Ngobe kukholwa kusitselo semoya. (Gal. 5:22, 23) Angeke sibe nekukholwa lokucinile kuMdali nangabe singasitwa ngumoya wakhe longcwele. Nangabe sichubeka sicela umoya longcwele waJehova, utosipha. (Luk. 11:13) Singaze sithantaze sitsi: “Sisite sicinise kukholwa kwetfu.” (Luk. 17:5) Ngetulu kwaloko, hlale udadisha liVi laNkulunkulu.​—Hla. 1:2, 3. w21.08 18-19 ¶16-18

Kunyenti lokungentiwa ngulasebakhulile enhlanganweni yaJehova. Nanobe kungenteka kutsi sebete emandla lebebanawo, kodvwa banelwati lolunyenti labalutfole kuleminyaka leyendlulile. Jehova usengachubeka abasebentisa ngetindlela letehlukahlukene. Sibonelo nje, liBhayibheli lisitjela ngalabo labachubeka benta umsebenti waJehova ngekwetsembeka ngisho sebakhulile ngeminyaka. Nasi sibonelo, Mosi bekaneminyaka lecishe ibe ngu-80 ngesikhatsi acala kuba ngumphrofethi waJehova futsi aba ngumholi wesive saka-Israyeli. Ngesikhatsi Danyela aneminyaka lengaba ngu-90, Jehova wachubeka amsebentisa njengemphrofethi wakhe. Kungenteka nemphostoli Johane bekaneminyaka lengaba ngu-90 ngesikhatsi aphefumlelwa kutsi abhale incwadzi yeSembulo. Simeyoni lobekayindvodza “lebeyilungile futsi yesaba Nkulunkulu” kukhulunywa ngaye kancane eBhayibhelini kodvwa Jehova bekati kutsi ungubani, wamnika nelilungelo lekubona Jesu aseluswane nelekuphrofetha ngalomntfwana namake wakhe.​—Luk. 2:22, 25-35. w21.09 3-4 ¶5-7

Batali kufanele bacaphele bangamcatsanisi umntfwana nalomunye nobe balindzele kutsi ente lokungetulu kwalangakhona kukwenta. Nangabe batali bakwenta loku, bangabadvumata bantfwana babo. (Ef. 6:4) Lomunye dzadze lokutsiwa nguSachiko utsi: “Make bekafuna ngitfole konkhe nangibhala luhlolo, lokuyintfo lebengingeke ngikhone kuyenta. Nanobe ngasicedza kadzeni sikolwa, ngihle ngiva shengatsi Jehova akajabuli ngami ngisho ngenta konkhe lokusemandleni ami.” INkhosi Davide yatsi ‘beyingafisi kwenta tintfo letinkhulu kakhulu’ nobe kwenta tintfo lebeyingeke ikhone kutenta. Ngenca yekutsi beyitfobekile, yaba “nekuthula.” (Hla. 131:2) Yini batali labangayifundza kuloko lokwashiwo nguDavide? Kuze batali batfobeke, kufanele bangalindzeli lokungetulu kwaloko labangakhona kukwenta futsi bangalindzeli nekutsi bantfwana babo bente lokungetulu kwaloko labangakhona kukwenta. Batali bangamsita umntfwana wabo kutsi ative abalulekile ngekutsi bamente abone tintfo langakhona kutenta kahle nalangeke akhone kutenta kahle, bese bayamsita kutsi atibekele imigomo langakhona kuyifinyelela. w21.07 21-22 ¶5-6

Jehova unike ngamunye wetfu inkhululeko yekutikhetsela. Loko kusho kutsi singakhetsa kutsi sitamlalela yini nobe cha. Labanye batali bebangasiso sibonelo lesihle kubantfwana babo, kodvwa labantfwana bancume kukhonta Jehova futsi bahlala betsembekile kuye. Labanye batali basebente kamatima kuze bafundzise bantfwana babo kutsandza Jehova, kodvwa labantfwana babese bayamshiya nasebakhulile. Ngako ngamunye wetfu kufanele atikhetsele kutsi utamkhonta yini Jehova. (Josh. 24:15) Nine batali lelinemntfwana loyekele kukhonta Jehova, ningacabangi kutsi loko liphutsa lenu! Ngaletinye tikhatsi, umtali uyalishiya liciniso futsi ashiye nemndeni wakhe. (Hla. 27:10) Loko kungabavisa buhlungu kakhulu bantfwana lebebamhlonipha umtali wabo futsi bamtsandza. Nine lenisebasha, nangabe umtali wenu ayekelisiwe kuba nguFakazi, sinivela kakhulu! Sicela niciniseke kutsi Jehova uyabati buhlungu lenibuvako. Uyanitsandza futsi uyajabula ngekutsi niyachubeka nimkhonta ngekwetsembeka. Nani khumbulani kutsi akusilo liphutsa lenu. w21.09 27 ¶5-7

UmKhristu loyekelisiwe kuba nguFakazi singamfananisa nemvu lenesifo lesitsatselwanako lengasitselela letinye timvu. Ufana nemuntfu logulako ngobe buhlobo bakhe naJehova busuke bulimele. (Jak. 5:14) Njengobe nemuntfu logulako angabatselela labanye lokugula, kanjalo nemuntfu lolinyalelwe buhlobo bakhe naJehova, angenta labanye kutsi bente tintfo letimbi. Ngako ngaletinye tikhatsi kungahle kudzingeke kutsi umuntfu lonjalo ayekeliswe kuba nguFakazi. Lesijeziso siyindlela Jehova lakhombisa ngayo kutsi uyawutsandza umhlambi wakhe lowetsembekile futsi singahle sisite lona lowonile abone kutsi wente intfo lembi futsi aphendvuke. Nakaseyekelisiwe kuba nguFakazi, angaba khona emihlanganweni yelibandla, lapho angatfola khona ticondziso letiseBhayibhelini futsi aphindze acinise kukholwa kwakhe. Angatfola tincwadzi kuze atidadishele aphindze abukele neMsakato we-JW. Njengobe labadzala belibandla babona enta lushintjo, bangahle bamnikete seluleko nesicondziso lesingamsita kuze aphindze abe nebuhlobo lobuhle naNkulunkulu, kuze abuyiselwe abe nguFakazi waJehova. w21.10 10 ¶9, 11

Lamuhla, silandzela sibonelo semaKhristu ekucala endleleni lebekakhonta ngayo Nkulunkulu. Nasi sibonelo, sihleleke ngendlela emaKhristu ekucala bekahleleke ngayo, sinebabonisi betigodzi, labadzala bemabandla, netinceku letisebentako. (Fil. 1:1; Thit. 1:5) NjengalamaKhristu ekucala, sihlonipha umbono waJehova lomayelana nekuya ecansini kanye nemshado, loko Nkulunkulu lakushoko ngekusebentisa ingati futsi sivikela libandla kulabo labangafuni kulalela imitsetfo yaNkulunkulu. (Imis. 15:28, 29; 1 Khor. 5:11-13; 6:9, 10; Heb. 13:4) LiBhayibheli likwenta kucace kutsi ‘yinye inkholo’ leyemukelwa nguNkulunkulu. (Ef. 4:4-6) Sinelilungelo lelikhulu lekuba bantfu baJehova nelekwati liciniso ngaye nangetinjongo takhe! Shengatsi singachubeka siciniseka kutsi silitfolile liciniso. w21.10 22-23 ¶15-17

INkhosi Jehoshafati yabhekana nenkinga lenkhulu. Libutfo lelikhulu lema-Amoni, bakaMowabi kanye nemadvodza asesifundzeni lesinetintsaba saseSeyiri lasongela yona, nemndeni wayo kanye nesive sayo. (2 Khr. 20:1, 2) Wenta njani Jehoshafati? Wacela Jehova kutsi amsite futsi amuphe emandla. Umthantazo waJehoshafati loku-2 Tikhronike 20:5-12, uveta kutsi bekametsemba kakhulu Babe wakhe wasezulwini lonelutsandvo. Jehova wasebentisa umLevi lokutsiwa nguJahaziyeli kutsi ayokhuluma naJehoshafati, asho lamavi lakulombhalo welusuku lwalamuhla. Ngenca yekutsi Jehoshafati beketsembele ngalokuphelele kuNkulunkulu, wenta njengobe bekatjeliwe. Ngesikhatsi yena nebantfu bakhe bayohlangana nalesitsa, akazange awabeke ngembili emasotja akhe langemachawe kodvwa wabeka bahlabeleli lebebangakahlomi. Jehova akazange amdvumate Jehoshafati; wasincoba lesitsa.​—2 Khr. 20:18-23. w21.11 15-16 ¶6-7

Nangabe sibhekene nebumatima, singaciniseka kutsi Jehova utasisita kuze sihlale setsembekile kuye. (2 Khor. 4:7-9) Singaciniseka kutsi Jehova utawuchubeka asikhombisa lutsandvo lwakhe lolucotfo, njengobe nje umhlabeleli asicinisekisa nakatsi “liso laJehova libuke labo labamesabako, labo labetsembele elutsandvweni lwakhe lolucotfo.” (Hla. 33:18-22) Ngaphambi kwekutsi sicale kukhonta Jehova, bekasitsandza njengabo bonkhe bantfu. Kodvwa njengobe sitikhonti takhe, uphindze asikhombise lutsandvo lwakhe lolucotfo. Ngenca yekutsi usikhombisa lolutsandvo, usivikela ngetandla takhe. Utawuhlale asisondzeta kuye futsi afeze tonkhe tetsembiso takhe lasetsembise tona. Ufuna siphumelele! (Hla. 46:1, 2, 7) Ngako, ngisho singabhekana nabuphi bumatima, Jehova utasinika emandla lesiwadzingako kuze sihlale setsembekile kuye. w21.11 7 ¶17-18

Linyenti letfu kukhona lelimatiko lesekuphele iminyaka abambele lotsite emagcubu, kungaba ngulasebenta naye, lafundza naye, sihlobo sakhe nobe lilunga lemndeni! Khumbula kutsi bomnakaboJosefa labangu-10 bambambela emagcubu, futsi bagcine bente intfo lembi. (Gen. 37:2-8, 25-28) Kodvwa Josefa akazange abalingise! Ngesikhatsi sekasesikhundleni lesisetulu, bekangatiphindziselela kubomnakabo, kodvwa wabakhombisa umusa. Josefa akazange ababambele emagcubu. Kunaloko, wenta loko lokushiwo nguLevithikhusi 19:18. (Gen. 50:19-21) EmaKhristu lafuna kujabulisa Nkulunkulu kufanele alingise Josefa lowabacolela bomnakabo kunekutsi atiphindziselele. Jesu usikhutsata kutsi sicolele labo labasiphetse kabi. (Mat. 6:9, 12) Ngendlela lefanako, umphostoli Pawula wayala emaKhristu watsi: “Bazalwane labatsandzekako, ningatiphindziseleli.”​—Rom. 12:19. w21.12 11 ¶13-14

Ebusuku bangaNisani 14, 33 C.E., Jesu waya ensimini yaseGetsemane. Nakalapho, wathantaza kuJehova. (Luk. 22:39-44) Ngaleso sikhatsi Jesu “wancusa, . . . loku wakwenta ngekukhala lokukhulu nangetinyembeti.” (Heb. 5:7) Yini Jesu layithantazela kulobo busuku lobebungaphambi kwekufa kwakhe? Wathantazela emandla ekuhlala atsembekile kuJehova futsi ente intsandvo yakhe. Jehova wawuva umthantazo losuka enhlitiyweni weNdvodzana yakhe futsi watfuma ingilosi kuze imcinise. Jesu bekati kutsi kubaluleke kangakanani kutsi ahlale etsembekile futsi angcwelise libito laBabe wakhe. Jehova wamlalela Jesu ngesikhatsi athantaza ngalokusuka enhlitiyweni. Kungani? Kungobe Jesu bekakhatsateke kakhulu ngekuhlale etsembekile kuBabe wakhe futsi angcwelise libito lakhe. Nangabe sikhatsateka kakhulu ngekwenta lokufanako, Jehova utayiphendvula imithantazo yetfu.​—Hla. 145:18. w22.01 18 ¶15-17

Bantfu labanyenti lamuhla abasemukeli ngobe asifuni kungenela tepolitiki. Bafuna sivote nakunelukhetfo. Kodvwa nangabe sikhetsa kubuswa ngumuntfu, sisuke singamemukeli Jehova. (1 Sam. 8:4-7) Kungenteka bantfu bacabange kutsi kufanele sakhe tikolwa netibhedlela futsi sente naletinye tintfo letisita umphakatsi. Abawemukeli umlayeto wetfu ngobe sisebenta kamatima sishumayela kunekutsi setame kucatulula tinkinga talelive. Yini lesingayenta kuze singaphelelwa kukholwa kwetfu? (Mat. 7:21-23) Lokufanele kubaluleke kakhulu kitsi, kwenta umsebenti lesawunikwa nguJesu. Akukafaneli siphatanyiswe kwetama kucatulula tinkinga talelive. Siyabatsandza bantfu futsi sinendzaba netinkinga tabo, kodvwa siyati kutsi indlela lencono yekusita bomakhelwane betfu kutsi sibafundzise ngeMbuso waNkulunkulu futsi sibasite babe nebuhlobo naJehova. w21.05 7 ¶19-20

Ngisho nobe linyenti lebabusi betive lamuhla litsi likhonta Nkulunkulu, abafuni kuyekela kubusa. Njengobe kwenta babusi bangemalanga aJesu, babusi lamuhla bamelene naLogcotjiwe waJehova ngekuhlasela balandzeli bakhe labetsembekile. (Imis. 4:25-28) Yini Jehova layentako? Tihlabelelo 2:10-12 titsi: “Ngako-ke banini nekucondza nine makhosi; vumani kuyalwa, nine behluleli basemhlabeni. Khontani Jehova ngenhlonipho lenkhulu, futsi nimesabe nijabulile. Hloniphani indvodzana, ngale kwaloko Nkulunkulu utawutfukutsela futsi nitawushabalala endleleni, ngobe intfukutselo yakhe isheshe ivutse. Bayajabula bonkhe labakhosela kuye.” Jehova unemusa, futsi unika letive litfuba lekutsi tente sincumo lesikahle. Tisengashintja ingcondvo futsi temukele uMbuso waJehova. Kodvwa sikhatsi siyaphela. (Isa. 61:2) Kuphutfuma kakhulu kunakucala kutsi bantfu bati liciniso futsi bakhonte Jehova. w21.09 15-16 ¶8-9

Pawula utsi kufanele senetiseke nganobe yini lesinayo. (Fil. 4:12) Intfo leligugu kakhulu kitsi buhlobo betfu naNkulunkulu, hhayi tintfo lesinato. (Hab. 3:17, 18) Cabanga ngaloko Mosi lakutjela ema-Israyeli ngemuva kwekutsi kuphele iminyaka lengu-40 asehlane, watsi: “Jehova Nkulunkulu wenu unibusisile kuko konkhe lenikwentile. . . . Kuleminyaka lengu-40, Jehova Nkulunkulu wenu abesolo anani, futsi anikaze neswele lutfo.” (Dut. 2:7) Kuleminyaka lengu-40, Jehova wanika ema-Israyeli imana. Timphahla tawo laphuma nato eGibhithe atizange tiguge. (Dut. 8:3, 4) Jehova utawujabula kakhulu nasenetiseka futsi sibonga ngetintfo lasipha tona ngisho titincane, sititsatse njengesibusiso. w22.01 5 ¶10-11

Nine madvodza, kufanele ninakekele imindeni yenu, ngako nisebenta kamatima kuze niwuvikele futsi niwusekele. Naninetinkinga, ningahle nicabange kutsi ningakhona kuticatulula. Nanobe kunjalo, ningetsembeli emandleni enu. Kunaloko, thantazani kuJehova ninodvwa nimcele anisite. Ngetulu kwaloko, thantazani ngalokusuka enhlitiyweni nebafati benu. Funani sicondziso kuJehova ngekudadisha liBhayibheli kanye netincwadzi lesitinikwa yinhlangano yakhe, futsi nisebentise seluleko lenisitfolako. Labanye bangahle bangavumelani netincumo tenu letisekelwe eBhayibhelini lenitentako. Banganitjela nekutsi imali kanye netintfo leningatitsenga ngayo kungayivikela imindeni yenu. Kodvwa khumbulani sibonelo seNkhosi Jehoshafati. (2 Khr. 20:1-30) Beketsembele kuJehova futsi loko wakukhombisa ngetento. Jehova akazange ayilahle lendvodza leyetsembekile futsi nawe angeke akulahle.​—Hla. 37:28; Heb. 13:5. w21.11 15 ¶6; 16 ¶8

Nkulunkulu wasidala ngemfanekiso wakhe, ngako siyafisa kubona bantfu baphatfwa kahle. (Gen. 1:26) Nanobe kunjalo, ngenca yekutsi sinesono, singahle singehluleli kahle ngisho nobe sicabanga kutsi siwati onkhe emaciniso endzaba. Sibonelo nje, khumbula indlela Jona latfukutsela ngayo ngesincumo saJehova sekubakhombisa umusa bantfu baseNineve. (Jona 3:10–4:1) Kodvwa cabanga ngemphumela lowaba khona. Bantfu baseNineve labangetulu kwa-120 000 labaphendvuka basindza! Siyabona kutsi nguJona lowenta liphutsa, hhayi Jehova. Jehova akudzingeki asichazele kutsi yini lementa atsatse tincumo letitsite. Kuliciniso kutsi esikhatsini lesendlulile Jehova bekativumela tikhonti takhe kutsi tivete imibono yato ngetincumo bekatentile nobe ngaleto bekasetawutenta. (Gen. 18:25; Jona 4:2, 3) Ngaletinye tikhatsi bekachaza sizatfu lesimente watsatsa lesincumo. (Jona 4:10, 11) Nobe kunjalo, Jehova akaphoceleleki kutsi asho lokumente watsatsa sincumo lesitsite.​—Isa. 40:13, 14; 55:9. w22.02 3-4 ¶5-6

Sitiphatsa ‘njengalabancane’ ‘nasitsatsa labanye njengalabakhulu’ kunatsi. (Fil. 2:3) Nangabe sitimisela kucabanga ngalendlela, atawuba mancane ematfuba ekukhuba labanye. Ngandlela tsite, bonkhe bazalwane betfu nabodzadze bakhulu kunatsi. Kumelula kukubona loko nasinaka buntfu babo lobuhle. Kufanele sihlale sicabanga ngeseluleko umphostoli Pawula lasinika baseKhorinte lesitsi: “Ngubani lokwenta wehluke kulomunye? Ecinisweni yini lonayo longazange uphiwe yona? Nangabe wayiphiwa, utigabatiselani shengatsi awuzange uyiphiwe?” (1 Khor. 4:7) Kufanele sikubalekele kufuna labanye kutsi banake tsine nobe kutitsatsa njengalabakhulu kunalabanye. Nangabe umzalwane anelikhono lekubeka tinkhulumo nobe nangabe dzadze anelikhono lekucalisa tifundvo teliBhayibheli, kufanele kutsi lonkhe ludvumo ahlale alunika Jehova. w21.06 22 ¶9-10

BoFakazi labanyenti sebakutfola kumatima kakhulu kutfola bantfu emakhaya. Labanye bamemeteli kufanele bashumayele emakhaya lavikeleke kakhulu futsi lokumatima kungena kuwo. Kulamakhaya, kungenteka kube nemuntfu logadzako longabavumeli bantfu kutsi bangene ngaphandle kwemvume yalaba labahlala khona. Kantsi kuletinye tindzawo bamemeteli batfola bantfu labambalwa kakhulu emakhaya nobe bashumayela etindzaweni letinebantfu labambalwa. Labamemeteli bahamba libanga lelidze besuka kulomunye umuti baye kulomunye, futsi kuyenteka batfole kungenamuntfu! Nasihlangana netinkinga letinjalo, akukafaneli siphele emandla. Yetama kushumayela bantfu ngetikhatsi letehlukene. Sitawutfola bantfu labanyenti nasishumayela ngesikhatsi labatfolakala ngaso emakhaya. Ngetulu kwako konkhe, bonkhe bantfu bayabuyela emakhaya! Bazalwane nabodzadze labanyenti bashumayela entsambama nobe kusihlwa ngobe batfola bantfu labanyenti. Ngetulu kwaloko, banikati bemakhaya basuke baphumulile futsi bakulungele kucoca. w21.05 15 ¶5, 7

Kunenkinga lefanako yini nalamuhla? Yebo. Bantfu labanyenti bayatfukutsela nangabe BoFakazi BaJehova bangahlanganyeli nabo ekugubheni imikhosi lengakasekelwa eBhayibhelini, lefaka ekhatsi emalanga ekutalwa naKhisimusi. Labanye abajabuli nangabe BoFakazi BaJehova bangahlanganyeli emikhosini yelive nobe bangahlanganyeli emasikweni emingcwabo langahambisani neliVi laNkulunkulu. Labantfu bakholelwa kutsi bakhonta Nkulunkulu ngendlela layemukelako. Kodvwa angeke bamjabulise nangabe bakhetsa emasiko elive kunetimfundziso leticacile letitfolakala eBhayibhelini. (Mak. 7:8, 9) Yini lesingayenta kuze singaphelelwa kukholwa kwetfu? Kufanele siyitsandze kakhulu imitsetfo yaJehova netimiso takhe. (Hla. 119:97, 113, 163-165) Nangabe simtsandza Jehova, angeke siwagcine emasiko langamjabulisi. Kute lokutawubaluleka kakhulu kitsi kwendlula kutsandza Jehova. w21.05 6 ¶15-16

Singasisebentisa njani leseluleko semphostoli Pawula? Kufanele sihlale sicinisa kukholwa kwetfu ngekutsi silidadishe njalo liBhayibheli, sihlale sithantaza futsi sichubeke simatasatasa emsebentini Jehova lasinikete wona. (2 Thim. 4:4) Nangabe sinekukholwa, angeke setfuke nasiva imibiko lemibi ngaBoFakazi BaJehova. (Isa. 28:16) Lutsandvo lesinalo ngaJehova, ngeliVi lakhe nangebazalwane betfu, lutasisita kutsi singadukiswa ngulabo labayekele kukhonta Jehova. Ngesikhatsi saJesu, bantfu labanyenti bangabata futsi bangamemukeli. Nanobe kunjalo, labanyenti bamemukela. Lomunye wabo bekalilunga leNkantolo yemaJuda, futsi wemukelwa ‘nabaphristi labanyenti.’ (Imis. 6:7; Mat. 27:57-60; Mak. 15:43) Ngendlela lefanako, nalamuhla tigidzi tebantfu tikhetse kulandzela Jesu. Kungani? Ngobe tiyalati liciniso lelisemiBhalweni futsi tiyalitsandza. LiVi laNkulunkulu litsi: “Labo labatsandza umtsetfo wakho ngibo labanekuthula lokukhulu; kute lokutawubenta bagileke.”​—Hla. 119:165. w21.05 13 ¶20-21

Umphostoli Pawula bekati kutsi konkhe lakhona kukwenta emsebentini waJehova bekungenca yemandla aNkulunkulu hhayi akhe. Asebentisa umoya wakhe longcwele, Jehova wanika Pawula emandla ekuwenta kahle umsebenti wakhe wekushumayela nanobe bekaphatfwa kabi, aboshwa futsi abhekana naletinye tinkinga. Thimothi losemusha, lobekahamba naPawula naye kwadzingeka kutsi etsembele emandleni aNkulunkulu kuze awente kahle umsebenti wekushumayela. Thimothi bekahamba naPawula baye etindzaweni letikhashane bayowenta umsebenti wekushumayela. Ngetulu kwaloko, Pawula waphindze wamtfuma kutsi ayovakashela emabandla futsi awakhutsate. (1 Khor. 4:17) Kungenteka Thimothi bekeva shengatsi lomsebenti awukamfaneli. Mhlawumbe kungako Pawula atsi kuye: “Ungavumeli muntfu kutsi edzelele busha bakho.” (1 Thim. 4:12) Ngetulu kwaloko, ngaleso sikhatsi, Thimothi bekanelakhe linyeva enyameni, ‘bekagula kanyenti.’ (1 Thim. 5:23) Kodvwa bekati kutsi umoya longcwele waJehova bewutamnika emandla lawadzingako kuze ashumayele tindzaba letimnandzi futsi asite bazalwane bakhe.​—2 Thim. 1:7. w21.05 21 ¶6-7

Simiso lesibhalwe kuJakobe 1:19 siyasebenta kulabo labaniketa seluleko. Jakobe wabhala watsi: “Wonkhe umuntfu kufanele asheshe kulalela, ephute kukhuluma, ephute nekutfukutsela.” Lomdzala welibandla angase acabange kutsi uwati onkhe emaciniso endzaba, kodvwa uwati onkhe yini vele? Taga 18:13 titsi: “Loyo lophendvula indzaba letsite angakaweva emaciniso ayo usilima futsi utihlaza yena.” Kukahle kutfola onkhe emaciniso kumnikati wendzaba. Kuze uwatfole, kufanele ulalele ngaphambi kwekutsi ukhulume. Mbute: “Ihamba njani imphilo?” “Ngingakusita njani?” Nangabe labadzala belibandla batinika sikhatsi sekutfola onkhe emaciniso, bangabasita bazalwane babo nabodzadze futsi babakhutsate. Kuniketa seluleko lesikahle kusho lokungetulu nje kwekufundza imibhalo lembalwa nobe kusho imibono yakho. Bazalwane nabodzadze kufanele babone kutsi uyabatsandza, uyasicondza simo sabo nekutsi ufuna kubasita. w22.02 17 ¶14-15