July

Kuyekelisa umuntfu kuba nguFakazi kuyincenye yelilungiselelo laJehova. Kusita wonkhe muntfu, lokufaka ekhatsi nalona lowonile. Labanye ebandleni bangahle batsi akukentiwa sincumo lesikahle ngekuyekelisa umuntfu kuba nguFakazi. Kodvwa khumbula kutsi bantfu labakanjalo abakavami kukusho lokubi lokwentiwe ngulomuntfu lowonile. Kalula nje, site onkhe emaciniso ngalendzaba. Kukuhlakanipha kubetsemba labadzala belibandla labente lesincumo njengobe bente konkhe labangakwenta kuze basebentise timiso letiseBhayibhelini futsi ‘bamelele Jehova’ nabehlulela. (2 Khr. 19:6) Kusekela sincumo salabadzala belibandla sekuyekelisa umuntfu lomtsandzako kuba nguFakazi kungamsita kutsi abuyele kuJehova. Elizabeth utsi: “Bekumatima kakhulu kungachumani nendvodzana yetfu lendzala. Kodvwa ngemuva kwekutsi seyibuyele kuJehova, yavuma kutsi bekusincumo lesihle kutsi iyekeliswe kuba nguFakazi. Ngekuhamba kwesikhatsi, yatsi ifundze tifundvo letinyenti letinhle.” w21.09 28-29 ¶11-12

Cabanga ngalomfelokati. Siyaciniseka kutsi bekafuna kupha Jehova lokunyenti. Ngako wenta konkhe langakwenta; wanika Jehova lokuncono kakhulu. Jesu bekati kutsi umnikelo walomfelokati bewuligugu kuBabe wakhe. Nasi sifundvo lesibalulekile lesingasifundza: Jehova ujabula kakhulu nangabe simupha lokuncono kakhulu lesinako, lokukumkhonta ngenhlitiyo yetfu yonkhe nangemphefumulo wetfu wonkhe. (Mat. 22:37; Khol. 3:23) Jehova uyajabula nakasibona senta konkhe lokusemandleni etfu! Sikhatsi kanye nemandla lesikucitsa sikhonta Jehova, lokufaka ekhatsi nasishumayela nalapho sisemihlanganweni, kufanele kube ngulokuncono kakhulu lesingakhona kukwenta. Ungasisebentisa njani sifundvo lesisendzabeni yemfelokati? Cabanga ngalabatsite labadzinga kucinisekiswa kutsi Jehova uyajabula ngaloko labamentela kona. Kungaba ngudzadze lomatiko losakhulile, lobutsakatsaka, futsi lokungenteka utiva angakabululeki ngenca yekutsi kuncane lesekakhona kukwenta emsebentini wekushumayela. w21.04 6 ¶17, 19-20

Jehova uyasati sikhatsi lesikahle sekubhubhisa lelive lelibi. Ngenca yekutsi uyabeketela, bantfu labanyenti sebayamati futsi nyalo kunesicumbi lesikhulu lesakhiwa tigidzi tebantfu labamkhontako. Bonkhe bayajabula ngekutsi Jehova ubeketele baze batalwa, bafundza kumtsandza futsi batinikela kuye. Nasekunetigidzi tebantfu leticinisele kwaze kwaba sekugcineni, kutawuba sebaleni kutsi Jehova wenta sincumo lesihle ngekukhetsa kubeketela! Ngetulu kwabo bonkhe buhlungu nekuhlupheka lokubangelwe nguSathane, Jehova uhlale ‘anguNkulunkulu lojabulako.’ (1 Thim 1:11) Natsi singahlala sijabulile njengobe silindzele Jehova ngesineke kutsi angcwelise libito lakhe, angcwelise bukhosi bakhe, acedze bonkhe bubi futsi acedze nato tonkhe tinkinga lesinato nyalo. Shengatsi singatimisela kucinisela futsi kusidvudvute kwati kutsi naBabe wetfu losezulwini uyacinisela. w21.07 13 ¶18-19

Bantfu labanyenti lebebaphila ngesikhatsi saJesu bebangamemukeli. Kubo bekamane nje ayindvodzana yembati lophuyile. BekawaseNazaretha, lokulidolobha lebebacabanga kutsi alikabaluleki kangako. Ngisho naNathanayeli lowagcine angumfundzi waJesu, wacale watsi: “Kukhona yini lokuhle lokungavela eNazaretha?” Kungenteka bekacabanga ngesiphrofetho lesikuMikha 5:2, lesitsi Jesu bekatawutalelwa eBhetlehema, hhayi eNazaretha. Umphrofethi Isaya waphrofetha kutsi titsa taJesu betingeke tiyinake ‘imininigwane yesitukulwane [saMesiya].’ (Isa. 53:8) Kube labantfu batinika sikhatsi sekuhlola yonkhe lemininingwane, bebatawubona kutsi Jesu watalelwa eBetlehema nekutsi usitukulwane seNkhosi Davide. (Luk. 2:4-7) Ngako Jesu watalelwa endzaweni lebekuphrofethwe ngayo kuMikha 5:2. Beyikuphi-ke inkinga? Bantfu bashesha kwenta sincumo. Bebete onkhe emaciniso endzaba. Ngenca yaloko, abazange bamemukele Jesu. w21.05 2-3 ¶4-6

LiBhayibheli linetibonelo letinhle talabo lababusiswa ngenca yekwemukela seluleko. Cabanga ngaloku, nanobe Jobe bekamesaba Nkulunkulu, kodvwa bekawenta emaphutsa. Ngesikhatsi acindzeteleke kakhulu, washo tintfo letikabi. Ngenca yaloku, Elihu naJehova, bamniketa seluleko. Wenta njani Jobe? Watsi: “Ngikhulumile, kodvwa bengingacondzi . . . kungako ngikuhocisa loko lengikushito, futsi ngiphendvuka ngiselutfulini nasemlotseni.” (Jobe 42:3-6, 12-17) Wakhombisa kutsi utfobekile ngekutsi asemukele seluleko lasinikwa ngu-Elihu, nanobe Elihu bekamncane kakhulu kunaye. (Jobe 32:6, 7) Kutfobeka kutasisita kutsi sisisebentise seluleko ngisho nobe sicabanga kutsi asisidzingi, nobe ngisho lona losinika sona amncane kunatsi. Sonkhe sidzinga kutiveta kakhudlwana titselo temoya futsi sibe bafundzisi labancono betindzaba letimnandzi. w22.02 11 ¶8; 12 ¶12

Bonkhe ebandleni kufanele bente libandla libe yindzawo lenekuthula, futsi batsandze bonkhe bazalwane kuze kubebete lotiva anesitunge. Lesikwentako nalesikushoko kungabakhutsata kakhulu labanye! Yini longayenta kuze usite labo labanemindeni lengasibo boFakazi kutsi bative bayincenye yelibandla? Yetama kwakha bungani nalabasandza kuba boFakazi. Singacala ngekubemukela ngemusa ebandleni bantfu labasandza kuba boFakazi. (Rom. 15:7) Kodvwa asifuni nje kugcina ngekubabingelela ngemusa. Njengobe sikhatsi sichubeka, sifuna bungani betfu bucine. Ngako bani nemusa, futsi ukhombise kutsi unendzaba nalabo labasandza kuba boFakazi. Yetama kwati tinkinga lababhekana nato, kodvwa ungababuti imibuto letababangela emahloni. Kungaba matima ngalabanye kutsi bakutjele indlela labativa ngayo, ngako ungabacindzeteli kutsi bakhulume. Kunaloko, babute ngekuhlakanipha imibuto letobenta bavete indlela labativa ngayo futsi ubalalele ngesineke njengobe bakuphendvula. Sibonelo nje, ungababuta kutsi balitfole njani liciniso. w21.06 11 ¶13-14

Silitsatsa njengalelibaluleke kakhulu lilungelo lekukhonta Jehova ngebunye ‘singumhlambi munye’ ngephansi ‘kwemelusi munye’! Incwadzi letsi “Ukuhlelelwa Ukwenza Intando KaJehova” ekhasini 165, itsi: “Njengobe ubujabulela lobunye, kufanele udlale indzima yakho ekubulondvoloteni.” Ngako kufanele “sifundze kubuka bazalwane betfu nabodzadze ngendlela Jehova lababuka ngayo.” KuJehova, sonkhe ‘sinjengebantfwana’ labaligugu. Nguleyo yini indlela lobatsatsa ngayo bazalwane bakho nabodzadze? Jehova uyakunaka futsi ukutsatsa njengalokubalulekile konkhe lokwentako kuze ubasite futsi ubanakekele. (Mat. 10:42) Siyabatsandza bazalwane betfu nabodzadze. Ngako ‘sitimisele kutsi singenti tintfo letingakhuba umzalwane wetfu nobe timphambukise.’ (Rom. 14:13) Sitsatsa bazalwane betfu nabodzadze njengalabakhulu kunatsi, futsi sifuna kubacolela ngalokusuka enhlitiyweni. Shengatsi singete savuma kutsi labanye basikhube. Kunaloko, “asenteni konkhe lokusemandleni etfu kuze sibe nekuthula nalabanye futsi sakhane.”​—Rom. 14:19. w21.06 24 ¶16-17

Nangabe sidadisha liVi laNkulunkulu ngekutimisela, futsi sisebentise seluleko sakhe lesisitfola enhlanganweni yakhe, kancane kancane singaba nebuntfu bebuKhristu. Sitawuphindze simati kancono Nkulunkulu. Jesu wasebentisa umfanekiso kuze achaze indlela umlayeto weMbuso lofana ngayo nenhlanyelo lencane lekhula kancane kancane etinhlitiyweni talabatsandza lokulungile. Watsi: “Lenhlanyelo iyamila futsi ikhule, kodvwa [lona lohlanyele] usuke angati kutsi kwenteka njani loko. Umhlabatsi utivetela wona titselo, kucale kube likhaba, bese kuyashakata, ekugcineni kube ngematimba.” (Mak. 4:27, 28) Jesu bekachaza kutsi njengobe nalokuhlanyelwe kukhula kancane kancane, kanjalo-ke nemuntfu lowemukela umlayeto weMbuso kutsatsa sikhatsi kutsi ente lushintjo. Nasi sibonelo, njengobe umuntfu lesidadisha naye liBhayibheli asondzelana naJehova, sibese sicala kubona lushintjo lolunyenti loluhle lalwentile. (Ef. 4:22-24) Kodvwa kufanele sikhumbule kutsi nguJehova lowenta lenhlanyelo lencane kutsi ikhule. w21.08 8-9 ¶4-5

Singayitfola injabula nangabe siyifuna endzaweni lekahle. Umuntfu lonaka ‘tintfo latibona ngemehlo’ uyenetiseka ngaloko lanako, uyenetiseka ngesimo lakuso ngaleso sikhatsi. Ngalokwehlukile, umuntfu lofisa tintfo langeke abe nato uhlale afisa kuba netintfo langeke atitfole. Yini lesiyifundzako? Kuze sijabule, kufanele sinake tintfo lesinato hhayi tintfo lesingeke sikhone kuba nato. Ungakhona yini vele kwenetiseka ngaloko lonako? Bantfu labanyenti bacabanga kutsi loko angeke kwenteke ngobe siyatsandza kuchubeka sifundza tintfo letinsha. Kodvwa loko kungenteka. Singatijabulela mbamba tintfo lesinato nyalo. Singakwenta njani loko? Kuze sitfole imphendvulo, cabanga ngemfanekiso waJesu lomayelana nemathalenta, lotfolakala kuMatewu 25:14-30, unake kutsi yini lesingayenta kuze sijabule futsi sijabule kakhulu ngaloko lesinako nyalo. w21.08 21 ¶5-6

Jehova unendzaba mbamba nalabo “labephukile nalabanemoya lophansi.” Akusibo nje labadzala belibandla kuphela labangakhutsata bazalwane nabodzadze, kodvwa sonkhe singabakhutsata. Lenye indlela lesingabakhutsata ngayo kutsi sibakhombise kutsi siyabakhatsalela. Jehova ufuna sibakhombise kutsi ubatsandza kakhulu. (Taga 19:17) Singaphindze sibasite bazalwane nabodzadzewetfu ngekutsi sitfobeke. Asifuni kwenta kutsi labanye banake tsine ngobe loko kungenta kutsi labanye basidlele umona. Kunaloko, sifuna kusebentisa emakhono etfu kanye nelwati lwetfu kuze sikhutsate labanye. (1 Phet. 4:10, 11) Singafundza lokunyenti mayelana nekuphatsa labanye nasicabanga ngendlela Jesu laphatsa ngayo balandzeli bakhe. Bekangumuntfu lobaluleke kakhulu lowake waphila. Kodvwa ‘bekanemoya lophansi futsi atfobekile.’ (Mat. 11:28-30) Ngesikhatsi afundzisa bantfu, bekasebentisa emagama lamelula nemifanekiso lokumelula kuyicondza futsi watsintsa tinhlitiyo tebantfu labaphansi.​—Luk. 10:21. w21.07 23 ¶11-12

Akube nguwe lotsatsa sinyatselo kucala sekucoca nalasebakhulile. Kungenteka abasaboni kahle emehlweni, sebahamba kancane futsi sebakhulumela phasi kodvwa solo bayafuna kwentela Jehova lokunyenti futsi batakhele “ligama lelihle” naye. (Shu. 7:1) Khumbula kutsi kungani baligugu kuJehova. Chubeka ubahlonipha. Lingisa Elisha. Wetama ngato tonkhe tindlela kuze abe na-Elija ngelilanga labo lekugcina bandzawonye. Elisha washo tikhatsi letintsatfu watsi: “Angeke ngikushiye.” (2 Khos. 2:2, 4, 6) Khombisa kutsi unendzaba mbamba nalasebakhulile ngekutsi ubabute imibuto ngemusa. (Taga 1:5; 20:5; 1 Thim. 5:1, 2) Babute imibuto lenjenganayi: “Ngesikhatsi usemncane, yini leyakwenta waciniseka kutsi sewulitfolile liciniso?” “Tintfo letenteke kuwe tikusite njani kutsi usondzelane naJehova?” “Yini lekusitile kutsi uhlale ujabulile ekukhonteni Jehova?” (1 Thim. 6:6-8) Ngemuva kwaloko, balalele njengobe bakucocela. w21.09 5 ¶14; 7 ¶15

Nangabe wenta konkhe lokusemandleni akho kuze ulalele umyalo wekushumayela newekwenta bafundzi, ukhombisa kutsi uyamtsandza Nkulunkulu. (1 Joh. 5:3) Cabanga nganaku: Ushumayela bantfu ngobe uyamtsandza Jehova. Bekumelula yini kutsi ulalele lomyalo? Kungenteka bekulukhuni. Ngesikhatsi uyoshumayela kwekucala, bewesaba yini? Yebo! Kodvwa bewati kutsi lona ngumsebenti Jesu lafuna kutsi uwente futsi wawulalela lomyalo. Kungenteka kutsi njengobe sikhatsi sihamba, sewukutfola kumelula kushumayela. Kodvwa utiva njani ngekudadisha liBhayibheli nemuntfu? Nawucabanga ngako, ufikelwa kwesaba yini? Kungenteka. Kodvwa nangabe ucela Jehova kutsi akusite uncobe kwesaba futsi ube nesibindzi sekucela lotsite kutsi udadishe naye liBhayibheli, Jehova angakusita uchubeke unesifiso sekwenta bafundzi. w21.07 3 ¶7

Kadzeni, tigcili betibekwa luphawu kuze kubonakale kutsi ngubani umphatsi wato. Ngendlela lefanako, bonkhe bantfu lamuhla kutawudzingeka bakhombise kutsi basekela bani. Indlela labacabanga ngayo kanye netento tabo kutawukhombisa kutsi basekela labohulumende. Sitalwemukela yini loluphawu futsi sisekele bohulumende? Labo labangeke balwemukele loluphawu batawubhekana netinkinga futsi babe sengotini. Incwadzi yeSembulo itsi: ‘Kutawuba bete lotsengako nobe lotsengisako, ngaphandle kwemuntfu lonaloluphawu.’ (Semb. 13:17) Kodvwa bantfu baNkulunkulu bayakwati loko latawukwenta kulabo labanaloluphawu lokukhulunywa ngalo kuSembulo 14:9, 10. Kunekutsi balwemukele, kutawuba shengatsi babhale etandleni tabo kutsi, “NgiwaJehova.” (Isa. 44:5) Nyalo sikhatsi sekuciniseka kutsi setsembeke mbamba kuJehova. Nangabe setsembekile, Jehova utawujabula futsi atsi sibakhe! w21.09 18 ¶15-16

Kuze siwente kahle umsebenti wetfu wekushumayela, singazuza ngekutfola lusito kulabanye. Umphostoli Pawula wafundzisa Thimothi kushumayela kanye nekufundzisa, futsi wamkhutsata kutsi naye asite labanye. (1 Khor. 4:17) NjengaThimothi, natsi singafundza kulabanye ebandleni lasebanesikhatsi bashumayela. Ngetulu kwaloko, kufanele sithantaze kuJehova simcele asisite. Njalo nawuyoshumayela, cela Jehova kutsi akusite. Siyawudzinga umoya wakhe longcwele kutsi usisite kuko konkhe lesikwentako. (Hla. 127:1; Luk. 11:13) Nawuthantaza kuJehova, mcele ngalokucondzile kuloku lofuna akusite kuko. Nasi sibonelo, mcele akucondzise kumuntfu lofuna kufundza ngaye nalokulungele kulalela. Kufanele futsi sitinike sikhatsi sekutidadishela liBhayibheli. LiVi laNkulunkulu litsi: ‘Titfoleleni nine loko lokuyintsandvo yaNkulunkulu, nikwati lokuhle, lokwemukelekako nalokuphelele.’ (Rom. 12:2) Nasitidadishela liBhayibheli, sitawumati kancono Nkulunkulu, futsi nasicocela labanye ngaye batawubona kutsi sikholelwa mbamba kuloko lesikushoko. w21.05 18 ¶14-16

Kutsiwani nangabe wenta konkhe longakwenta futsi umthantazela umuntfu lodadisha naye liBhayibheli kodvwa angatfutfuki, futsi kudzingeke kutsi uyekele kudadisha naye? Nobe kutsiwani nangabe ungazange sewudadishe liBhayibheli nemuntfu aze abhajatiswe? Kufanele ucabange kutsi lelo liphutsa lakho yini, nobe ucabange kutsi Jehova akawubusisi umsebenti wakho? Jehova uncuma njani kutsi umsebenti wetfu uyaphumelela? Ubuka imetamo yetfu nekucinisela kwetfu. Jehova uyajabula nasishumayela ngekutimisela ngobe simtsandza ngisho nobe bantfu bangasilaleli. Pawula wabhala watsi: “Nkulunkulu ulungile, ngako ngeke awukhohlwe umsebenti wenu nelutsandvo lenibe nalo ngelibito lakhe, ngekutsi benibasita labangcwele futsi niyachubeka nibasita.” (Heb. 6:10) Jehova ukhumbula umsebenti wetfu nelutsandvo lesilukhombisile ngisho nobe kute umuntfu lesidadishe naye liBhayibheli waze wabhajatiswa. Ngako kungakusita loko Pawula lakusho njengobe kuvetwe kuulombhalo welusuku lwalamuhla. w21.10 25 ¶4-6

Umusa waJesu nelutsandvo lebekanalo kwabonakala ngendlela laphatsa ngayo bafundzi bakhe. Bekati kutsi banemakhono langafani nekutsi timo tabo atifani. Ngako bebangeke bonkhe bente umsebenti lofanako nobe lolinganako nabashumayela. Kodvwa wajabula ngekutsi nguloyo naloyo bekenta langakukhona. Kucabangela kwaJesu kwabonakala kulomfanekiso wemathalenta. Kulomfanekiso, inkhosi yaniketa sisebenti ngasinye ‘lokulingene emandla aso.’ Sinye kuletisebenti letimbili letikhutsele satfola lokunyenti kunalelesinye. Kodvwa lenkhosi yancoma letisebenti ngemavi lafanako, yatsi: “Wente kahle sisebenti lesihle nalesetsembekile!” (Mat. 25:14-23) Jesu uhlale asiphatsa ngemusa nangelutsandvo. Uyati kutsi sinemakhono lehlukene netimo tetfu atifani, futsi uyajabula nasenta lokuncono lesingakhona kukwenta. Kufanele silingise Jesu. w21.07 23 ¶12-14

INkhosi Davide beyihle iba bete umusa. Nasi sibonelo, Nabali, lebekayindvodza lengakalungi, futsi leyedzelelako, wala kunika Davide nemadvodza lebekahamba nawo kudla. Davide watfukutsela wabila futsi wafuna kubulala yena kanye nawo onkhe emadvodza lebekasemndenini wakhe. Kodvwa Abigayili, lobekangumfati waNabali, bekanemusa futsi anesineke, ngako ngekushesha walungiselela Davide kudla. Davide wabese akasambulali Nabali kanye nemadvodza lebekasemndenini wakhe. (1 Sam. 25:9-22, 32-35) Naka kutsi ngesikhatsi Davide atfukutsele kakhulu, wancuma kubulala Nabali nawo onkhe emadvodza lebekasemndenini wakhe. Ngekuhamba kwesikhatsi, Davide watsi lendvodza lesemfanekisweni waNathani bekufanele ibulawe. Kuloku kwesibili, singahle sitibute kutsi kungani indvodza lenemusa njengaye beyingakhipha sehlulelo lesite luvelo ngalendlela. Cabanga ngendlela Davide lebekativa ngayo. Ngaleso sikhatsi, bekativa anelicala. Nangabe umuntfu ete luvelo nakehlulela labanye, loko kukhombisa kutsi buhlobo bakhe naJehova bulimele. w21.10 12 ¶17-18; 13 ¶20

Kulamavi lakulombhalo welusuku lwalamuhla siyafundza kutsi singakhona kumlingisa Jehova, losibonelo lesihamba embili sekuba ngcwele. Kufanele sibe ngcwele kuko konkhe kutiphatsa kwetfu. Loko kungabonakala kungeke kwenteke njengobe sinesono. Umphostoli Phetro wenta emaphutsa lamanyenti; kodvwa sibonelo sakhe sikhombisa kutsi singaba ngcwele. Bantfu labanyenti nabacabanga ngemuntfu longcwele, bacabanga ngemuntfu longajabuli, lohlala agcoke timphahla tenkholo, futsi longahleki. Kodvwa loko akusilo liciniso. Jehova ungcwele, uchazwa ngekutsi ‘nguNkulunkulu lojabulako.’ (1 Thim. 1:11) Labo labamkhontako kutsiwa “bayajabula.” (Hla. 144:15) Jesu wabasola labo lebebagcoka timphahla tenkholo futsi lebebenta shengatsi balungile embikwebantfu. (Mat. 6:1; Mak. 12:38) EmaKhristu eliciniso ayati kutsi kusho kutsini kuba ngcwele ngenca yaloko lakufundze eBhayibhelini. Siyaciniseka kutsi Nkulunkulu wetfu lonelutsandvo angeke asinike umyalo lesingeke sikhone kuwulalela. w21.12 2 ¶1, 3

Kuto tonkhe tintfo lesitiphiwe nguNkulunkulu, kungenteka lesinye setipho lesikhulu kakhulu lilungelo lekumkhonta. Sikhombisa Jehova kutsi siyamtsandza ngekutsi “sigcine imiyalo yakhe.” (1 Joh. 5:3) Lomunye umyalo Jehova lafuna kutsi siwulalele ngulowo lowashiwo nguJesu wekutsi sente bantfu babe bafundzi futsi sibabhabhatise. (Mat. 28:19) Waphindze wasiyala kutsi sitsandzane. (Joh. 13:35) Jehova utawenta labo labagcina imiyalo yakhe kutsi babe ngemalunga emndeni wakhe losemhlabeni wonkhe. (Hla. 15:1, 2) Khombisa kutsi uyabatsandza labanye. Lutsandvo lubuntfu baJehova lobuhamba embili. (1 Joh. 4:8) Jehova wakhombisa kutsi uyasitsandza ngaphambi kwekutsi simati. (1 Joh. 4:9, 10) Sisuke simlingisa nasikhombisa kutsi siyabatsandza labanye. (Ef. 5:1) Lenye indlela lekahle yekukhombisa kutsi siyabatsandza bantfu, kubafundzisa ngaJehova litfuba lisekhona. (Mat. 9:36-38) Nasenta njalo, sisuke sibanika litfuba lekufundza kutsi yini labangayenta kuze babe ngemalunga emndeni waNkulunkulu. w21.08 5-6 ¶13-14

Jesu bekamtsandza kakhulu Jehova futsi loko kwenta kutsi atidzele ngenca yakhe nangenca yetfu. (Joh. 14:31) Jesu wakhombisa kutsi bekabatsandza kakhulu bantfu ngendlela lebekaphila ngayo nakalamhlabeni. Bekahlale anelutsandvo neluvelo ngisho nobe labanye bamphikisa. Indlela lehamba embili lakhombisa ngayo kutsi uyabatsandza bantfu kubafundzisa ngeMbuso waNkulunkulu. (Luk. 4:43, 44) Jesu waphindze wakhombisa kutsi uyamtsandza Nkulunkulu kanye nebantfu ngekutsi avume kuhlushwa bantfu labanesono futsi bambulale kabuhlungu. Loko lakwenta kwasivulela litfuba lekutsi sitfole kuphila lokuphakadze. Satinikela kuJehova futsi sabhajatiswa ngobe siyamtsandza Babe wetfu wasezulwini. NjengaJesu, indlela lesibaphatsa ngayo labanye kufanele ikhombise kutsi siyamtsandza Jehova. Umphostoli Johane wabhala watsi: “Loyo longamtsandzi umzalwane wakhe lambonile, ngeke amtsandze Nkulunkulu langakamboni.”​—1 Joh 4:20. w22.03 10 ¶8-9

Siyakutsandza kucitsa sikhatsi naJehova, kodvwa akusimelula ngaso sonkhe sikhatsi. Sihlale simatasatasa, ngako singahle singasitfoli sikhatsi sekwenta tintfo letiphatselene nekukhonta Nkulunkulu. Umsebenti wetfu wekutiphilisa, umsebenti wasekhaya, naletinye tintfo lokufanele sitente, kungatsatsa sikhatsi setfu lesinyenti, kangangekutsi singeva shengatsi site sikhatsi sekuthantaza, sekudadisha nobe sekuzindla. Kunalokunye lokungadla sikhatsi setfu. Nasingakanaki, singavumela letinye tintfo letingasitimbi kutsi tidle sikhatsi setfu lokufanele ngabe sisisebentisela kusondzelana naJehova. Cabanga nje ngekutijabulisa. Sonkhe siyasidzinga sikhatsi sekuphumula. Kodvwa ngisho nekutijabulisa lokukahle kungasidla sikhatsi lokufanele ngabe sisisebentisela kwenta tintfo letiphatselene nekukhonta Jehova. Kudzingeka silinganisele nasitijabulisa.​—Taga 25:27; 1 Thim. 4:8. w22.01 26 ¶2-3

Ngesikhatsi Jehova atjela ema-Israyeli kutsi atsandze labanye bantfu, bekangasho kutsi atsandze bantfu besive sakubo kuphela. Atjelwa nekutsi atsandze bantfu bekuhamba lebekahlala nabo. Nguloko lokushiwo nguLevithikhusi 19:33, 34. Ema-Israyeli bekufanele atsandze umuntfu wekuhamba njengobe bekatsandza ‘umuntfu wakubo’ futsi ‘amtsandze’ ngendlela latitsandza ngayo. Nasi sibonelo, ema-Israyeli bekufanele avumele bantfu bekuhamba nalabeswele kutsi babutse kudla lokusele nakuvunwa. (Lev. 19:9, 10) Lesimiso lesimayelana nekutsandza bantfu bekuhamba siyasebenta nakumaKhristu lamuhla. (Luk. 10:30-37) Kanjani? Kunetigidzi tebantfu labesuka kulamanye emave, futsi kungenteka labanye babo bahlala edvute nawe. Kufanele siwahloniphe lamadvodza, bafati nebantfwana futsi sibaphatse kahle. w21.12 12 ¶16

Nasetsembela kuJehova nyalo kutsi asicondzise, sitawuciniseka kakhulu kutsi utawukhona kusikhulula esikhatsini lesitako. Kudzingeka sibe nekukholwa futsi sitimisele kwetsembela kuJehova kuze sicele umcashi wetfu kutsi asiphe sikhatsi sekuya emhlanganweni wesigodzi nobe wesifundza, nobe asiphe sikhatsi sekuya kuyo yonkhe imihlangano yelibandla nasemsebentini wekushumayela. Asesitsi umcashi uyala futsi siphelelwe ngumsebenti. Siyakholwa yini kutsi Jehova akayuze asishiye futsi utawuhlale asipha tintfo lesitidzingako? (Heb. 13:5) Labanyenti labasemsebentini wasikhatsi sonkhe bangakucocela indlela Jehova labasite ngayo nabamdzinga kakhulu. Jehova wetsembekile. Nangabe Jehova anatsi, site sizatfu sekwesaba lokutakwenteka esikhatsini lesitako. Nkulunkulu wetfu akayuze asishiye, kuphela nje nangabe senta kukhonta yena kute kucala ekuphileni kwetfu. w22.01 7 ¶16-17

Ngusiphi simo lesingasivivinya kutsi siyabetsemba yini labadzala belibandla? Kutsiwani nangabe umuntfu loyekelisiwe kuba nguFakazi angumngani wetfu? Kungenteka sikhatsateke ngekutsi labadzala abakawabuki onkhe emaciniso endzaba, nobe sitibute kutsi bamehlulele ngendlela Jehova bekatamehlulela ngayo yini. Yini lengasisita kutsi sisemukele sincumo sabo? Kufanele sikhumbule kutsi kuyekelisa umuntfu kuba nguFakazi kulilungiselelo laJehova futsi kusita libandla kanye nalona lowente sono. Nangabe soni lesingaphendvuki besingavunyelwa kutsi sichubeke siyincenye yelibandla, besingenta nalabanye kutsi bente sono. (Gal. 5:9) Ngetulu kwaloko, kungenteka angaboni kutsi wente sono lesikhulu, futsi angatimiseli kushintja indlela lacabanga ngayo nalenta ngayo kuze aphindze emukelwe nguJehova. (Shu. 8:11) Kufanele siciniseke kutsi labadzala belibandla bawutsatsa njengalobalulekile umsebenti wabo wekuncuma kutsi umuntfu kufanele ayekeliswe yini kuba nguFakazi nobe cha. w22.02 5-6 ¶13-14

Kuba nesineke nekuba nemusa kuyadzingeka nangabe lotsite angafuni kwemukela seluleko lesivela eBhayibhelini. Lomdzala welibandla akukafaneli atfukutsele nangabe umzalwane nobe dzadze angasemukeli ngekushesha seluleko nobe angasisebentisi. Ngako nakatithantazela, lomdzala welibandla angacela Jehova asite lona lodzinga seluleko kutsi acondze sizatfu lesenta adzinge leseluleko nekutsi asisebentise. Kungenteka lomzalwane lonikwa seluleko udzinga sikhatsi sekutsi acabange ngaloko latjelwe kona. Nangabe lomdzala welibandla anesineke futsi anemusa, kutawuba melula kutsi lomzalwane lowelulekwako anake lomlayeto hhayi indlela lelulekwa ngayo. Kodvwa ngaso sonkhe sikhatsi, seluleko kufanele sisekelwe eVini laNkulunkulu. Umgomo wetfu akusiko nje kuniketa seluleko lesilusito kodvwa sifuna nekutsi ‘sente inhlitiyo ijabule.’​—Taga 27:9. w22.02 18 ¶17; 19 ¶19

Nangabe sithantaza sicela emandla ekubeketelela inkinga lesibhekene nayo, nobe sicela lusito kuze siyekele kwenta intfo Jehova langayitsandzi, singahle sive shengatsi Jehova utsatsa sikhatsi lesidze kuphendvula imithantazo yetfu. Kungani Jehova angayiphendvuli ngaleso sikhatsi imithantazo yetfu? Nasithantaza, uyabona kutsi sinekukholwa kuye. (Heb. 11:6) Jehova ufuna kubona kutsi sitimisele kangakanani kuphila ngekuvumelana nemithantazo yetfu nekwenta intsandvo yakhe. (1 Joh. 3:22) Ngako, nasicela Jehova kutsi asisite siyekele kwenta intfo langayitsandzi, singahle sidzinge kubeketela futsi sente konkhe lokusemandleni etfu kuze sente lushintjo. Jesu wasenta sabona kutsi leminye imithantazo yetfu angeke iphendvulwe ngekushesha. Watsi: “Chubekani nicela, nitawuphiwa; chubekani nifuna, nitawutfola; chubekani ninconcotsa, nitawuvulelwa; ngobe wonkhe umuntfu locelako uyaphiwa, nawo wonkhe umuntfu lofunako uyatfola, futsi wonkhe umuntfu lonconcotsako utawuvulelwa.”​—Mat. 7:7, 8. w21.08 8 ¶1; 10 ¶9-10

Kuze ucinise kukholwa kwakho kuMdali, kufanele uchubeke udadisha liVi laNkulunkulu. (Josh. 1:8) Naka tiphrofetho letiseBhayibhelini kanye nendlela babhali balo bebavumelana ngayo. Nawenta njalo, kungacina kukholwa kwakho kutsi sadalwa nguMdali lonelutsandvo nalohlakaniphile nekutsi waphefumulela liBhayibheli. (2 Thim. 3:14; 2 Phet. 1:21) Nawudadisha liVi laNkulunkulu, naka kutsi seluleko salo singakusita njani. Nasi sibonelo, kusukela kadzeni liBhayibheli lecwayisa kutsi kutsandza imali kuyingoti nekutsi kubangela “buhlungu lobunyenti.” (1 Thim. 6:9, 10; Taga 28:20; Mat. 6:24) Ngako silusito kakhulu leseluleko seliBhayibheli lesisecwayisa ngekutsandza imali! Tikhona yini letinye teluleko teliBhayibheli letikusitile? Nasicabanga ngato tonkhe teluleko letiseBhayibhelini, sitawubona kutsi uMdali wetfu lositsandzako uyakwati lokusilungelako futsi sitawuhlale setsembela kuye kuze sitfole seluleko. (Jak. 1:5) Ngenca yaloko, kuphila kwetfu kutawuba mnandzi.​—Isa. 48:17, 18. w21.08 17-18 ¶12-13

Nangabe sewukhulile ngeminyaka, ciniseka kutsi Jehova uyawukhumbula umsebenti lowentile esikhatsini lesendlulile. Uwente ngekutimisela umsebenti wekushumayela. Ucinisele nawubhekene netinkinga ngisho naleto letikuvise buhlungu kakhulu, utilalele timiso letilungile letiseBhayibhelini futsi wente imisebenti lebalulekile enhlanganweni yaJehova waphindze wacecesha labanye. Wente konkhe lokusemandleni akho kuze uhambisane nenhlangano yaJehova lehamba ngesivinini lesisetulu. Ubasekele labo labasemsebentini wasikhatsi sonkhe waphindze wabakhutsata. Jehova Nkulunkulu ukutsandza kakhulu ngobe wetsembekile. Wetsembisa kutsi “angeke abalahle labetsembekile kuye”! (Hla. 37:28) Uyakucinisekisa utsi: “Utawuze ube netimvu enhloko solo ngikwetfwele.” (Isa. 46:4) Ngako ungacabangi kutsi njengobe sewukhulile ngeminyaka awusasiligugu enhlanganweni yaJehova. Ubaluleke kakhulu! w21.09 3 ¶4

Jehova ukhombisa umusa ngenca yekutsi uhlakaniphe kakhulu. LiBhayibheli litsi “kuhlakanipha lokuvela ezulwini” kugcwele “umusa netitselo letinhle.” (Jak. 3:17) Njengemtali lonelutsandvo, Jehova uyati kutsi umusa wakhe uyabazuzisa bantfwana bakhe. (Isa. 49:15) Umusa waNkulunkulu ubanika litsemba ngisho banesono. Ngenca yekutsi uhlakaniphe kakhulu, ngaso sonkhe sikhatsi uba nemusa nakunesidzingo. Ngesikhatsi lesifanako, Jehova uyati kutsi kunini lapho kungakafaneli khona abe nemusa. Ngenca yekutsi uhlakaniphile, akawukhombisi umusa nangabe abona kutsi kwenta kanjalo kutawenta kubonakale shengatsi uvumela bubi. Asesitsi sikhonti saNkulunkulu sincuma kutiphatsa kabi ngemabomu. Yini tsine lokufanele siyente? Pawula waphefumulelwa kutsi abhale atsi: ‘Yekelani kutihlanganisa naye.’ (1 Khor. 5:11) Labo labonile futsi bangaphendvuki bayayekeliswa kuba BoFakazi BaJehova. Loko kubalulekile kuze kuvikelwe bazalwane nabodzadze labetsembekile futsi kukhombisa kutsi tindlela taJehova tingcwele. w21.10 9-10 ¶7-8

Sisuke sikhonta Jehova nasinikela kuze sisekele umsebenti weMbuso. Ema-Israyeli bekungakafaneli aye embikwaJehova alengisa tandla. (Dut. 16:16) Bekufanele aphatse lokutsite kuye ngetimo tawo. Nawenta njalo, bewakhombisa kutsi ayabonga ngako konkhe Jehova lawentela kona. Singakhombisa njani kutsi siyamtsandza Jehova nekutsi siyabonga ngako konkhe lasentela kona? Lenye indlela kutsi sinikele ngemali kuze sisekele libandla kanye nemsebenti wemhlaba wonkhe kuye ngetimo tetfu. Umphostoli Pawula watsi: “Kupha ngalokusuka enhlitiyweni kuyamjabulisa Nkulunkulu, ngobe ufuna umuntfu aphe ngaloko lanako, hhayi ngaloko lete kona.” (2 Khor. 8:4, 12) Jehova uyajabula ngeminikelo lesiyentako ngisho ingakanani.​—Mak. 12:42-44. w22.03 24 ¶13

Labadzala belibandla angeke bakhone kuticedza tonkhe tinkinga tebantfu baJehova. Nobe kunjalo, Jehova ufuna kutsi labadzala belibandla bente konkhe labangakhona kukwenta kuze bakhutsate bantfu bakhe, baphindze babavikele. Njengobe labadzala bahlala bamatasa, bangasitfola njani sikhatsi sekusita labanye? Lingisa sibonelo saPawula. Pawula bekahlale afuna ematfuba ekuncoma bazalwane bakhe nabodzadze futsi abakhutsate. Labadzala belibandla bangasilingisa sibonelo sakhe ngekutsi babaphatse kahle bantfu baJehova. (1 Thes. 2:7) Pawula wacinisekisa bazalwane bakhe nabodzadze kutsi uyabatsandza nekutsi Jehova uyabatsandza. (2 Khor. 2:4; Ef. 2:4, 5) Bekacitsa sikhatsi nabo futsi abatsatsa njengebangani bakhe. Wakhombisa kutsi uyabetsemba ngekutsi abacocele ngetintfo lebetimkhatsata nangebutsakatsaka bakhe. (2 Khor. 7:5; 1 Thim. 1:15) Nobe kunjalo, akazange anake tinkinga takhe kodvwa bekafuna kusita bazalwane bakhe nabodzadze. w22.03 28 ¶9-10