August

Kungenteka Jesu bekasho emasotja emaRoma lambetsela elugodvweni. Jesu akazange avumele kuphatfwa kabi labhekana nako kumente atfukutsele futsi angabatsetseleli labo labamphatsa kabi. (1 Phet. 2:23) NjengaJesu, natsi kufanele sikulungele kutsetselela labanye. (Khol. 3:13) Labanye bantfu, lokufaka ekhatsi tihlobo tetfu, bangasiphikisa ngenca yekutsi abaticondzi tinkholelo tetfu nobe indlela lesiphila ngayo. Bangakhuluma emanga ngatsi, basihlaze embikwebantfu, badzabule tincwadzi tetfu, nobe basisongele ngekusilimata. Kunekutsi sihlale sitfukutsele, singacela Jehova asite labo labasiphikisako kutsi bemukele liciniso. (Mat. 5:44, 45) Ngaletinye tikhatsi singakutfola kumatima kutsetselela labanye, ikakhulukati nangabe basiphetse kabi kakhulu. Kodvwa nangabe sitawuhlale sitfukutsele futsi singabacoleli, sitilimata tsine. (Hla. 37:8) Nangabe sitsetselela, sisuke sikhetsa kungativumeli tintfo letimbi letenteke kitsi kutsi tisente sihlale sitfukutsele.​—Ef. 4:31, 32. w21.04 8-9 ¶3-4

Ukhona yini umuntfu lomtsandzako loyekelisiwe kuba nguFakazi? Loko kungakuvisa buhlungu kakhulu! Cabanga kutsi Jehova weva buhlungu kangakanani ngesikhatsi letinye tingilosi lebetingemalunga emndeni wakhe timshiya! (Juda 6) Cabanga nangebuhlungu labuva nakabona bantfu bakhe labatsandzako, lokungema-Israyeli, bamvukela tikhatsi letinyenti. (Hla. 78:41) Ciniseka kutsi Babe wetfu wasezulwini lonelutsandvo naye uva buhlungu nangabe umuntfu lomtsandzako ayekela kumkhonta. Uyabucondza buhlungu lobuvako. Ngemusa, utokukhutsata aphindze akusekele njengobe ukudzinga loko. Kuvamile kutsi nangabe indvodzana nobe indvodzakati ishiya Jehova, batali bacabange kutsi kufanele ngabe bente lokunyenti kuze basite umntfwana wabo achubeke akhonta Jehova. Lomunye umzalwane watsi: “Bengitisola. Bekungibangela emaphupho lamabi.” Lomunye dzadze naye lobekasesimeni lesifanako bekavame kucabanga: “Yini lengingakayenti kahle njengamake? Ngeva shengatsi ngehlulekile kunamatselisa liciniso endvodzaneni yami.” w21.09 26 ¶1-2, 4

Labanye beva shengatsi bantfu baJehova akukafaneli bafundzise ngeliBhayibheli ngobe abakayi etikolweni letatiwako letifundzisa ngenkholo. Kodvwa kufanele betame kutfola onkhe emaciniso endzaba. Nguloko Lukha longumbhali weliBhayibheli lakwenta. Watimisela kuhlolisisa tonkhe tintfo “ngekucophelela kusukela ekucaleni.” Bekafuna kutsi bantfu labafundza loko lakubhalile bati kutsi tintfo labativile ngaJesu tiliciniso. (Luk. 1:1-4) EmaJuda aseBheriya bekafana naLukha. Ngesikhatsi ativa kwekucala tindzaba letimnandzi letimayelana naJesu, aticatsanisa naloko lokushiwo yimiBhalo yesiHebheru kute aciniseke kutsi kuliciniso yini loko lebekakuvile. (Imis. 17:11) Ngendlela lefanako, bantfu lamuhla kufanele bawahlolisise emaciniso endzaba. Kufanele bacatsanise loko labafundziswa kona bantfu baNkulunkulu naloko lokushiwo yimiBhalo. Kufanele bafundze nangaloko lokwentiwe bantfu baJehova lamuhla. Nangabe bahlola yonkhe imininingwane, angeke bavumele loko labakuva ngebantfu kutsi kubadukise. w21.05 3 ¶7-8

Kukhona yini ebandleni lokulo longammema? EmaKhristu lesikanye nawo angajabula kakhulu nasingacitsa sikhatsi nawo. Kungaba matima ngalabanye kuba nemalunga emindeni yabo langasibo BoFakazi BaJehova nawagubha emaholidi. Labanye beva buhlungu kakhulu ngemalanga latsite, njengelilanga labashonelwa ngalo ngumuntfu labamtsandzako. Nangabe sicitsa sikhatsi nebazalwane nabodzadze lababhekene naletimo, sisuke sikhombisa kutsi sibakhatsalela mbamba. (Fil. 2:20) Tinyenti tizatfu letingenta umKhristu abe nesitunge. Nanobe kunjalo, kufanele sihlale sikhumbula kutsi Jehova uyayati indlela lesitiva ngayo. Etikhatsini letinyenti, usebentisa bazalwane betfu nabodzadze kuze basisite. (Mat. 12:48-50) Natsi sikhombisa kutsi siyabonga ngekutsi sente konkhe lesingakwenta kuze sisite bazalwane betfu nabodzadze ebandleni. Kunobe ngiyiphi indlela lesingahle sitive ngayo, asisodvwa ngobe Jehova uhlale anatsi! w21.06 13 ¶18-20

Jesu wahlale anembono lokahle futsi wachubeka ashumayela ngisho nobe labanye bebangafuni kulalela umlayeto wakhe. Kungani? Bekati kutsi bantfu bayakudzinga kufundza liciniso, futsi bekafuna kusita labanyenti kakhulu kutsi bemukele umlayeto weMbuso. Bekati nekutsi labanye bantfu batawucale bangalaleli, kodvwa balalele ngekuhamba kwesikhatsi. Cabanga ngalokwenteka emndenini wakubo. Eminyakeni lemitsatfu nehhafu Jesu ashumayela, kute ngisho namunye kubanakabo lowaba ngumfundzi wakhe. (Joh. 7:5) Kodvwa ngemuva kwekuvuswa kwakhe ekufeni baba ngemaKhristu. (Imis. 1:14) Asati kutsi ngubani lotawugcine awemukele emaciniso laseBhayibhelini lesiwafundzisako. Labanye batsatsa sikhatsi lesidze kutsi bawemukele umlayeto lesiwushumayelako kunalabanye. Ngisho nalabo labangafuni kusilalela, bayakubona kutiphatsa kwetfu lokuhle, nesimo setfu sengcodvo lesihle futsi kungenteka bagcine ‘bakhatimulisa Nkulunkulu.’ w21.05 18 ¶17-18

Ngesikhatsi Jesu alapha emhlabeni, wanika balandzeli bakhe umsebenti lonetincenye letimbili. Wabatjela kutsi bashumayele tindzaba letimnandzi teMbuso, wabakhombisa nekutsi bashumayele kanjani. (Luk. 8:1) Sibonelo saloko kutsi watjela bafundzi bakhe loko lokufanele bakwente nangabe bantfu bawulalela umlayeto weMbuso, naloko lokufanele bakwente nangabe bangawulaleli. (Luk. 9:2-5) Waphindze watsi bafundzi bakhe batawushumayela bantfu labanyenti, bashumayele nasetindzaweni letinyenti ngesikhatsi atsi ‘batawufakaza kuto tonkhe tive.’ (Mat. 24:14, umbhalo longentasi; Imis. 1:8) Ngetulu kwaloko, wabatjela kutsi bafundzise bantfu kugcina tonkhe tintfo lebekabatjele tona. Jesu watsi lomsebenti lobaluleke kakhulu bewutawuchubeka wentiwa kuze kube ngulamuhla, “kuze kube sekupheleni kwalelive.” (Mat. 28:18-20) Embonweni lawunika Johane, Jesu washo ngalokucacile kutsi bonkhe bafundzi bakhe kufanele basite labanye bafundze ngaJehova.​—Semb. 22:17. w21.07 2-3 ¶3-4

Bantfu labanyenti lamuhla banemoya wekuncintisana. Nasi sibonelo, ngenca yekutsi somabhizinisi ufuna kuba ncono kakhulu kunalabanye bosomabhizinisi, angahle ente tintfo letitawubalimata. Umdlali angase alimate lomunye umdlali walelinye licembu ngenhloso kuze nje licembu lakhe liphumelele. Umfundzi angahle akope nakubhalwa luhlolo kuze angene enyuvesi ledvumile. Njengobe singemaKhristu, siyati kutsi kwenta loko kubi, kuyincenye ‘yemisebenti yenyama.’ (Gal. 5:19-21) Nobe kunjalo, kungenteka yini kutsi letinye tinceku taJehova tikhutsate umoya wekuncintisana ebandleni tingakacondzi? Lona ngumbuto lobalulekile ngobe umoya wekuncintisana ungabulimata bunye belibandla. Ngako sitawube senta kahle ngekufundza ngetibonelo temadvodza nebafati labetsembekile lokukhulunywa ngabo eBhayibhelini labangazange bafune kuba ncono kunalabanye. w21.07 14 ¶1-2

Lutsandvo lolucotfo lusenta kutsi sisite labanye nabacindzetelekile. Bazalwane nabodzadze labanyenti futsi labanemusa, bayachubeka basita labo labeva buhlungu nobe labadvumatekile ebandleni. Bayabatsandza bazalwane babo nabodzadze, futsi batimisele kwenta nobe ngabe yini labangakhona kuyenta kuze babasite. (Taga 12:25; 24:10) Nguloko umphostoli Pawula lasikhutsata kutsi sikwente nakatsi: “Nikhulume ngendlela ledvudvutako nalabakhatsatekile, nisekele lababutsakatsaka, futsi nibeketelele bonkhe bantfu.” (1 Thes. 5:14) Ngalokuvamile, indlela lephumelelako yekusita umzalwane nobe dzadze lodvumatekile kutsi umlalele futsi umcinisekise ngekutsi uyamtsandza. Jehova ujabula kakhulu nakabona loko lokwentako kuze usite sikhonti sakhe lesiligugu kuye. Taga 19:17 titsi: “Umuntfu lowentela lophuyile umusa uboleka Jehova, futsi Nkulunkulu utamnika umvuzo ngenca yaloko lakwentako.” w21.11 10 ¶11-12

Yini lesingayenta nyalo kuze sitilungiselele loko lokutawenteka esikhatsini lesitako? Kufanele senetiseke futsi sijabule ngekutsi sinebuhlobo lobuhle naJehova. Nasimati kahle Nkulunkulu wetfu, sitawuciniseka kakhulu kutsi utasivikela nakuhlasela Gogi wakaMagogi. Lamavi alombhalo welusuku lwalamuhla asenta sibone kutsi kungani Davide beketsemba kutsi Jehova utamsita. Davide bekavame kwetsembela kuJehova, futsi Nkulunkulu wakhe akazange amdvumate nakancane. Ngesikhatsi asemusha futsi atokulwa nemFilitsi losidlakela lokutsiwa nguGoliyathi, Davide watsi: “Lamuhla, Jehova utakunikela esandleni sami.” (1 Sam. 17:46) Ngekuhamba kwesikhatsi, Davide waba sisebenti seNkhosi Sawula, leyetama kumbulala tikhatsi letinyenti. Kodvwa “Jehova abenaDavide.” (1 Sam. 18:12) Ngenca yekutsi Davide bekambonile Jehova amsita esikhatsini lesendlulile, bekati kutsi angetsembela kuye nakanetinkinga. w22.01 6 ¶14-15

Kuko konkhe Jehova lakwentako, utsatsa sikhatsi lasidzingako kutsi acedze umsebenti wakhe. Loko ukwenta kuze advumise libito lakhe futsi asite labanye. Nasi sibonelo, cabanga ngendlela Jehova lalungisa ngayo umhlaba kancane kancane kuze bantfu bahlale kuwo. LiBhayibheli nalichaza indlela Jehova ladala ngayo umhlaba lisitjela ngendlela ‘lakala ngayo bukhulu bawo’ nalasimisa ngayo “tinsika” tawo, waphindze wabeka “litje lekuwusimisa.” (Jobe 38:5, 6) Watinika nesikhatsi sekubukisisa umsebenti wakhe. (Gen. 1:10, 12) Cabanga ngendlela tingilosi letativa ngayo ngesikhatsi tibona tonkhe tintfo letinsha lebetidalwe nguJehova. Tajabula kakhulu! Ngenca yaloko, tacala “kumemeta tidvumisa.” Yini lesiyifundzako? Kwatsatsa tinkhulungwane teminyaka kutsi Jehova acedze kudala tonkhe tintfo, kodvwa watsi nasekabuka tonkhe tintfo lebekatentile watsi ‘tinhle kakhulu.’​—Gen. 1:31. w21.08 9 ¶6-7

Emfanekisweni waJesu, lenye indvodza beyitawutsatsa luhambo. Ngaphambi kwekutsi ihambe, yabita tisebenti tayo yatinika emathalenta kuze tente ibhizinisi ngawo. Lendvodza beyati kutsi letisebenti tayo tinemakhono langafani, ngako yanika sisebenti sekucala emathalenta lasihlanu, sesibili yasinika lamabili kantsi sesitsatfu yasinika linye. Tisebenti letimbili tasebenta kamatima kuze titalise lemali. Kodvwa sisebenti sesitsatfu asizange siyitalise lemali, futsi umphatsi waso wasicosha. Lesisebenti sekucala nalesesibili tawutsatsa njengalobaluleke kakhulu umsebenti lebetiwunikwe ngumphatsi wato futsi tasebenta kamatima kuze tiwufeze. Ngenca yaloko, tatalisa lamathalenta emphatsi wato ngalokuphindvwe kabili. Lomphatsi watinika umvuzo letisebenti ngenca yekusebenta kamatima. Akagcinanga nje ngekujabula, kodvwa watinika nalomunye umsebenti lomnyenti! w21.08 21 ¶7; 22 ¶9-10

Jehova ubeketele kakhulu kulamalanga ekugcina. Akafuni kubhujiswe ngisho namunye. (2 Phet. 3:9) Sonkhe usinikete litfuba lekutsi siphendvuke. Kodvwa angeke abeketele kuze kube phakadze. Labo labangafuni kusekela uMbuso waNkulunkulu batawubona saFaro wangemalanga aMosi. Jehova watsi kuFaro: “Nanyalo ngabe sengiselulile sandla sami, ngakushaya wena nebantfu bakho ngesishayo lesibulalako, futsi ngabe sengikucotfulile emhlabeni. Kodvwa ngikuyekele ngesizatfu sekutsi ngifuna kukukhombisa emandla ami, ngente nekutsi libito lami limenyetelwe kuwo wonkhe umhlaba.” (Eks. 9:15, 16) Ekugcineni, tonkhe tive titawukwati kutsi Jehova nguye kuphela Nkulunkulu weliciniso. (Hez. 38:23) Lokunyakatiswa lokukhulunywa ngako kulombhalo welusuku lwalamuhla, kusho kutsi labo labafana naFaro, labangafuni kubuswa nguJehova, batawubhujiswa phakadze. w21.09 18-19 ¶17-18

Uva buhlungu yini kutsi umuntfu lomtsandzako uyekelisiwe kuba nguFakazi? Yini longayenta nangabe labanye ebandleni basho tintfo letikwenta uve buhlungu kakhulu? Asikalindzeli kutsi bonkhe bahlale basho tintfo letikahle. (Jak. 3:2) Sonkhe sinesono, ngako ungamangali nangabe labanye bangati kutsi batsini nobe nabasho tintfo letikuvisa buhlungu bangakacondzi. Khumbula seluleko semphostoli Pawula lesitsi: “Chubekani nibeketelelana futsi nitsetselelana ngekukhululeka ngisho nobe umuntfu anesizatfu sekukhonona.” (Khol. 3:13) Chubeka usekela emalunga emndeni letsembekile. Aludzinga kakhulu lutsandvo lwakho nesikhutsato. (Heb. 10:24, 25) Ngaletinye tikhatsi, emalunga emndeni aloyo loyekelisiwe kuba nguFakazi ayanaka kutsi labanye ebandleni abasabakhulumisi, kube shengatsi nawo ayekelisiwe kuba boFakazi. Asifuni kubenta bative ngalendlela! Labasebasha labanebatali labayekele kukhonta Jehova bakudzinga kakhulu kunconywa nekukhutsatwa. w21.09 29 ¶13-14; 30 ¶16

Nangabe losakhulile nalosemusha bacoca, bobabili bayakhutsatana. (Rom. 1:12) Nine labasha, nitawuciniseka kakhulu kutsi Jehova uyabanakekela bantfu bakhe futsi lona losakhulile utawutiva atsandvwa. Utakujabulela kukucocela ngendlela Jehova lambusise ngayo. Ngalokuvamile buhle buyaphela njengobe iminyaka ihamba, kodvwa labo labetsembekile kuJehova baba bahle kakhulu umnyaka ngemnyaka. (1 Thes. 1:2, 3) Kungani kunjalo? Kungobe njengobe iminyaka ihamba, bavumele umoya waNkulunkulu kutsi ubaceceshe futsi ubasite babe nebuntfu lobuhle. Njengobe sichubeka sibati bazalwane betfu nabodzadze lasebakhulile sibahlonipha futsi sifundza kubo, sitawubatsatsa njengalabaligugu kakhulu! Libandla aligcini nje ngekucina nangabe labasebasha babatsatsa njengalabaligugu lasebakhulile, kodvwa liyacina nalapho lasebakhulile babatsatsa njengalababalulekile labasebasha. w21.09 7 ¶15-18

Kufanele sente konkhe lokusemandleni etfu kuze sigweme kuba bete luvelo futsi silwele kuba ‘nesihawu lesikhulu’ njengaNkulunkulu wetfu. (Ef. 2:4) Kuba nemusa akugcini nje ngekuvela labanye. Bantfu labanemusa basita labanye. Ngako sonkhe singabuka bantfu lesingabasita emindenini yetfu, ebandleni, nasendzaweni yangakitsi. Sitawutfola kutsi manyenti ematfuba ekukhombisa umusa! Ukhona yini lodzinga kudvudvutwa? Kukhona yini lesingamsita ngako njengekumupha kudla nobe kumsita ngaletinye tindlela? UmKhristu losandza kubuyiselwa kuba nguFakazi udzinga umngani lotamdvudvuta yini futsi amkhutsate? Singabacocela yini labanye tindzaba letimnandzi letidvudvutako? (Jobe 29:12, 13; Rom. 10:14, 15; Jak. 1:27) Nangabe sibona kutsi labanye bayakudzinga loko, sitawubona kutsi manyenti ematfuba ekukhombisa labanye umusa. Nasikhombisa umusa, simjabulisa kakhulu Babe wetfu wasezulwini, longuNkulunkulu ‘lonesihawu lesikhulu’! w21.10 13 ¶20-22

KuTihlabelelo 23, Davide wakhuluma ngetintfo letibaluleke kakhulu, njengetintfo letinhle Jehova lamuphe tona ngenca yekutsi uvumele Jehova waba nguMelusi wakhe. Jehova ‘umholela etindleleni tekulunga,’ futsi uyamsekela ngetikhatsi letimnandzi naletimatima. Davide uyavuma kutsi titawuba khona tinkinga nanobe aphila “emadlelweni laluhlata” aJehova. Ngaletinye tikhatsi utawudvumateka kube shengatsi uhamba “esigodzini lesimnyama tsu” futsi utawuba netitsa. Kodvwa njengobe Jehova anguMelusi wakhe, angeke ‘esabe lutfo lolubi.’ Kungani sitsi Davide akazange ‘eswele lutfo’? Bekanako konkhe lakudzingako kuze ahlale asondzelene naJehova. Bekangadzingi kuba netintfo letinyenti kuze ajabule. Davide bekenetiseka ngaloko lebekakunikwa nguJehova. Lebekubaluleke kakhulu kuye kutsi Nkulunkulu bekambusisa futsi amvikela. Lamavi aDavide asenta sibone kutsi yini leyenta kudzingeke sibe nembono lokahle ngetintfo lesinato. w22.01 3-4 ¶5-7

Kusukela kadzeni, tikhonti taJehova betisolo tishumayela bantfu labangalaleli. Nasi sibonelo, kwaphela iminyaka leminyenti Nowa ‘angumshumayeli wekulunga.’ (2 Phet. 2:5) Siyaciniseka kutsi beketsemba kutsi labanye batamlalela, kodvwa Jehova akazange atsi loko bekutawenteka. Kunaloko, ngesikhatsi Nkulunkulu atjela Nowa kutsi akhe umkhumbi, watsi: “Kufanele ungene kulomkhumbi, wena nemadvodzana akho, kanye nemfati wakho nabomalukatane bakho.” (Gen. 6:18) Ngesikhatsi Nkulunkulu amtjela kutsi akhe umkhumbi longakanani, kungenteka Nowa wabona kutsi bancane bantfu bebatawulalela ngobe bekutawuba bete sikhala sebantfu labanyenti. (Gen. 6:15) Njengobe sati, kute ngisho namunye lowalalela Nowa. (Gen. 7:7) Jehova wamtsatsa njengesehluleki yini? Cha! KuNkulunkulu, Nowa bekaphumelele emsebentini wakhe wekushumayela ngobe bekawente ngekwetsembeka umsebenti Jehova lebekamnikete wona.​—Gen. 6:22. w21.10 26 ¶10-11

Cabanga nje kutsi Ruthe wativa njani nakeva Nawomi asho lamavi! Bekente konkhe lokusemandleni kuze amsite. Ruthe bekakhale naye, wamdvudvuta, futsi wahamba naye emalanga lamanyenti. Ngetulu kwako konkhe loku, Nawomi watsi: “Jehova ungente ngabuya sengilengisa tandla.” Nanobe Ruthe bekeme eceleni kwaNawomi ngaleso sikhatsi, emavi aNawomi bekakhombisa kutsi akanendzaba naloko bekamentele kona. Kungenteka lamavi amvisa buhlungu kakhulu Ruthe! Nanobe kunjalo, wahlala naNawomi. (Rut. 1:3-18) Lamuhla, dzadze locindzetelekile kungenteka asho emavi lasivisa buhlungu, nanobe sente konkhe lokusemandleni etfu kuze simsite. Kodvwa siyetama kungatfukutseli. Asimlahli dzadzewetfu lodzinga lusito, futsi sicela Jehova kutsi asisite sibone kutsi singamdvudvuta njani. (Taga 17:17) Dzadze lodzinga lusito angacale ale kutsi simsite. Nanobe kunjalo, lutsandvo lolucotfo lutasenta kutsi sente konkhe lokusemandleni kuze singamlahli.​—Gal. 6:2. w21.11 11 ¶17-19

EBhayibhelini, ligama lelitsi “ngcwele” lisho kutiphatsa ngendlela lehlantekile nekukhonta Nkulunkulu ngendlela lehlantekile. Leligama lingaphindze lisho kuhlukaniselwa kukhonta Nkulunkulu. Ngalamanye emavi, sitawuba ngcwele nangabe sitiphatsa ngendlela lehlantekile, sikhonta Jehova ngendlela layemukelako futsi sinebuhlobo lobuhle naye. Kuyasijabulisa kucabanga ngekutsi singaba nebuhlobo lobuhle naNkulunkulu wetfu longcwele, ikakhulukati nasicabanga ngaloko liBhayibheli lelisifundzisa kona ngebungcwele bakhe. Jehova uhlanteke ngelizinga leliphakeme kakhulu. Loko sikubona kulokwashiwo ngemaserafi, lokutingilosi letisedvute kakhulu nesihlalo sakhe sebukhosi. Lamanye awo atsi: “Ungcwele! Ungcwele! Ungcwele! Jehova wemabutfo.” (Isa. 6:3) Letingilosi tinebuhlobo lobuhle naNkulunkulu wato longcwele ngobe nato tingcwele. w21.12 3 ¶4-5

Bantfu labasebasha bavame kukhatsateka ngekutsi nguyiphi indlela lekahle yekuphila. Bothishela nemalunga emndeni langasibo boFakazi, bangase babakhutsate kutsi baye enyuvesi kuze batfole umsebenti lokahle, lotabanika imali lenyenti. Loko kungadla sikhatsi sabo lesinyenti. Ngakulokunye, batali nebangani labasebandleni bangase bakhutsate labasebasha kutsi bacitse sikhatsi sabo benta umsebenti waJehova. Yini lengasita umuntfu losemusha futsi lotsandza Jehova kutsi ente sincumo lesikahle? Kungamsita kufundza umbhalo waKubase-Efesu 5:15-17 futsi azindle ngawo. Ngemuva kwekufundza lamavesi, umuntfu losemusha angatibuta: ‘Iyini “intsandvo yaJehova”? Ngusiphi sincumo lesitamjabulisa? Ngusiphi sincumo lesitangisita kutsi ngisisebentise kahle sikhatsi sami?’ Khumbula kutsi “emalanga mabi,” futsi lelive lelibuswa nguSathane litawubhujiswa ngekushesha. w22.01 27 ¶5

Wacala nini Jakobe kuba ngumlandzeli waJesu lowetsembekile? Ngemuva kwekutsi Jesu avuswe ekufeni, “wabonakala kuJakobe, wase ubonakala nakubo bonkhe baphostoli.” (1 Khor. 15:7) Ngemuva kwaloko, Jakobe waba ngumfundzi wakhe. Bekakhona ngesikhatsi baphostoli bamele kutfola umoya longcwele ekamelweni lelisetulu eJerusalema. (Imis. 1:13, 14) Ngekuhamba kwesikhatsi, Jakobe waba lilunga lesigungu lesibusako sangaleso sikhatsi. (Imis. 15:6, 13-22; Gal. 2:9) Ngaphambi kwa-62 C.E., waphefumulelwa kutsi abhale incwadzi lebeyiya kumaKhristu lagcotjiwe. Lencwadzi ilusito kitsi lamuhla ngisho sinelitsemba lekuphila ezulwini nobe emhlabeni. (Jak. 1:1) Ngekusho kwesati semlandvo lokutsiwa nguJosephus, Jakobe wabulawa ngemuva kwekutsi uMphristi Lophakeme wemaJuda lokutsiwa ngu-Ananias the Younger atsi akabulawe. Jakobe wachubeka etsembekile kuJehova kwaze kwaba ngulapho kuphila kwakhe kwasemhlabeni kuphela. w22.01 8 ¶3; 9 ¶5

Sifundvo lesingasitfola kulombhalo welusuku lwalamuhla kutsi akukafaneli silindzele Jehova kutsi asivikele etintfweni letivivinya kukholwa kwetfu. Njengobe kukholwa kwaJesu kwavivinywa kakhulu waze wafa, natsi kufanele sikulungele kukhombisa kutsi setsembekile kuze kube sekufeni nangabe kunesidzingo. (Mat. 16:24, 25) Nanobe kunjalo, siyaciniseka kutsi Nkulunkulu angeke avume silingwe ngetulu kwaloko lesingakhona kukwetfwala. (1 Khor. 10:13) Lesinye sifundvo lesisitfolako kutsi njengaJesu, natsi singaphatfwa kabi ngaphandle kwesizatfu. (1 Phet. 2:19, 20) Bantfu bayasiphikisa, hhayi ngobe kunalokubi lesikwentako, kodvwa ngenca yekutsi asisiyo incenye yalelive futsi sifakazela liciniso. (Joh. 17:14; 1 Phet. 4:15, 16) Jesu bekati kutsi kungani Jehova avumela kutsi ahlupheke. Kodvwa ngalesinye sikhatsi, tinceku taNkulunkulu letetsembekile tiyatibuta kutsi kungani Jehova avumele letinye tintfo kutsi tenteke. (Hab. 1:3) Nkulunkulu wetfu lonemusa futsi lobeketelako uyati kutsi loko akusho kutsi letinceku takhe tite kukholwa; kodvwa tidzinga yena kutsi atidvudvute.​—2 Khor. 1:3, 4. w21.04 11 ¶9-10

Jehova utakwemukela kukhonta kwetfu nangabe kuhambisana nenjongo yakhe, simtsandza futsi simhlonipha. Siyati kutsi Jehova kufanele akhontwe futsi sifuna kumkhonta ngendlela lencono kakhulu. Kuthantaza kungulenye indlela lesimkhonta ngayo Jehova. ImiBhalo ifananisa imithantazo yetfu nemphepho lelungiswe kahle lebeyinikelwa ethendeni lekukhontela futsi ngekuhamba kwesikhatsi yanikelwa ethempelini. Lemphepho beyimjabulisa Nkulunkulu. Ngendlela lefanako, imithantazo yetfu lesuka enhlitiyweni ‘iyamjabulisa’ Jehova ngisho nobe sisebentisa emagama lamelula. (Taga 15:8; Dut. 33:10) Jehova uyajabula nakasiva simtjela kutsi siyamtsandza futsi sibonga. Ufuna simtjele tintfo letisikhatsatako, litsemba lesinalo netintfo lesitifisako. Ngaphambi kwekutsi uthantaze cabanga kutsi utawutsini. Nawenta njalo, utawukhona kunikela ‘ngemphepho’ lemnandzi kuBabe wakho wasezulwini. w22.03 20 ¶2; 21 ¶7

Nge-Amagedoni, akusitsi lesitawuncuma kutsi bobani labatawutfola umusa waJehova nalabangeke bawutfole. (Mat. 25:34, 41, 46) Sitayetsemba yini indlela Jehova latawehlulela ngayo, nobe loko kutawenta kutsi siyekele kumkhonta? Kusebaleni kutsi kufanele simetsembe kakhulu nyalo Jehova kuze sitametsemba nasesikhatsini lesitako. Cabanga nje kutsi sitawujabula kanganani emhlabeni lomusha waNkulunkulu. Itawube seyingekho inkholo yemanga, tekutsengiselana nabohulumende lebebacindzetela labanye bantfu futsi babenta bahlupheka kuyo yonkhe leminyaka. Kugula, kuguga nekushona kwebantfu lesibatsandzako angeke kuphindze kusihluphe. Sathane nemadimoni batawuboshwa iminyaka leyinkhulungwane. Imiphumela yekuvukela kwabo itawube ingasekho. (Semb. 20:2, 3) Sitawujabula kakhulu ngekutsi besiyetsemba indlela Jehova lenta ngayo tintfo! w22.02 6-7 ¶16-17

Jesu bekakha kuthula nalabanye futsi bekakhutsata nalabanye kutsi balungise kungevani. Wabafundzisa kutsi kuze Jehova emukele kukhonta kwabo, bekufanele bakhe kuthula nalabanye. (Mat. 5:23, 24) Ngetulu kwaloko, bekachubeka ekhuta baphostoli bakhe kutsi bayekele kuphikisana ngekutsi ngubani lomkhulu emkhatsini wabo. (Luk. 9:46-48; 22:24-27) Nasikutsandza kuthula, kufanele singagcini nje ngekubalekela tintfo letitawubangela kungevani. Kufanele sakhe kuthula futsi sikhutsate bazalwane nabodzadze kutsi balungise kungevani. (Fil. 4:2, 3; Jak. 3:17, 18) Singatibuta: ‘Yini lengitimisele kuyidzela kuze ngakhe kuthula nalabanye? Nangabe umzalwane nobe dzadze angiphetse kabi, ngimbambela ligcubu yini? Ngimi yini lengiya kulomunye kuze ngiyowakha kuthula naye nobe ngimela kutsi kube ngulona lengicabanga kutsi ubange lenkinga kutsi ete kimi?’ w22.03 10 ¶10-11

LiBhayibheli lasho kutsi bantfu baNkulunkulu ‘bebatawutinikela ngekutitsandzela’ bente umsebenti waJehova bacondziswa yiNdvodzana yakhe. (Hla. 110:3) Lesiphrofetho siyagcwaliseka lamuhla. Njalo ngemnyaka, tinceku taJehova letikhutsele ticitsa tigidzi tema-awa tenta umsebenti wekushumayela. Loko tikwenta ngekutitsandzela futsi tisebentisa imali yato. Tiphindze tisite nebazalwane bato ngetintfo labatidzingako, tibakhutsate, tiphindze tibasite babe nebuhlobo lobucinile naJehova. Labadzala belibandla netinceku letisebentako bacitsa ema-awa lamanyenti balungiselela tinkhulumo futsi bavakashela bazalwane babo nabodzadze kuze babakhutsate. Yini lebenta bente lomsebenti lomkhulu kangaka? Kungenca yekutsi batsandza Jehova nabomakhelwane babo. (Mat. 22:37-39) Jesu wasibekela sibonelo lesihle sekubeka tidzingo talabanye kucala kunetakhe. Natsi senta konkhe lesingakwenta kuze simlingise. (Rom. 15:1-3) Sitawutfola imiphumela lemihle nasetama kumlingisa. w22.02 20 ¶1-2

Ka-Israyeli, bantfu labanyenti bebasebenta emasimini futsi bekufanele babhadalwe nakuphela lilanga. Nangabe sisebenti singabhadalwa imali yaso, besibabete imali yekondla umndeni waso ngalelo langa. Jehova watsi: “Weswele, futsi uyalidzinga leliholo kute aphile.” (Dut. 24:14, 15; Mat. 20:8) Lamuhla, tisebenti letinyenti tibhadalwa kanye ngenyanga nobe kabili. Nobe kunjalo, lesimiso lesikuLevithikhusi 19:13 sisasebenta. Labanye bacashi batiphatsa kabi tisebenti tabo ngekutibhadala imali lencane kakhulu kunaleyo lokufanele ngabe babanika yona. Bayati kutsi letisebenti kute letingakwenta futsi kungenteka tichubeke tisebenta kuze tingabulawa yindlala. Nabenta njalo, kufana nekutsi ‘bahlala neliholo lesisebenti.’ UmKhristu lonebhizinisi kufanele akusebentise loku lesikufundzako. w21.12 10 ¶9-10

AJesu besekome kakhulu ngemuva kwato tonkhe letintfo letimbi labhekana nato. Bekadzinga lokutsite langakunatsa kuze acedze koma. Jesu akazange acabange kutsi kukabi kuveta indlela lativa ngayo; futsi natsi akukafaneli sesabe kwenta njalo. Kungenteka ekuphileni kwetfu konkhe, timbalwa tikhatsi lesitjele ngato labanye tintfo lesitidzingako. Kodvwa nakwenteka sidzinga lusito, kufanele singesabi kucela labanye kutsi basisite. Sibonelo nje, nangabe sikhulile nobe sigula, singacela umngani kutsi asimikise esitolo nobe kudokotela. Nangabe sidvumatekile, singatjela lomdzala welibandla nobe umKhristu lovutsiwe indlela lesitiva ngayo, nobe simcele asitjele “emavi lamnandzi” latasikhutsata. (Taga 12:25) Kufanele sikhumbule kutsi bazalwane betfu nabodzadze bayasitsandza, futsi bafuna kusisita “ngesikhatsi sekuhlupheka.” (Taga 17:17) Kepha abayati indlela lesitiva ngayo nobe loko lesikucabangako. Kungenteka abati kutsi sidzinga lusito, ngako kufanele sibatjele. w21.04 11-12 ¶11-12

Kuba matima nangabe timo tishintja. Labanye lebebasemsebentini wasikhatsi sonkhe futsi bakuwo sikhatsi lesidze batfole tabelo letinsha. Labanye kudzingeke kutsi bashiye tabelo tabo lebebatitsandza ngenca yekukhula. Kuvamile kutsi sive buhlungu nakwenteka loku. Kumelula kwetayela timo letinsha nangabe sibuka tintfo ngendlela Jehova latibuka ngayo. Wenta tintfo letinkhulu lamuhla futsi sinelilungelo lelikhulu lekusebenta kanye naye. (1 Khor. 3:9) Indlela Jehova lasitsandza ngayo angeke ishintje. Ngako nangabe lushintjo lolwentiwe lukutsintsa, ungacitsi sikhatsi lesinyenti ucabanga ngetizatfu tekutsi lwentiwe leni. Kunekutsi ufise “emalanga akadzeni,” thantaza futsi ubuke lokuhle ngalolushintjo. (Shu. 7:10) Buka lokuhle kunobe ngusiphi simo. Loko kutasisita kutsi sihlale sijabulile futsi setsembekile ngisho nobe timo tetfu tishintja. w22.03 17 ¶11-12

Bobani Jehova labakhombisa lutsandvo lolucotfo? LiBhayibheli liyasho kutsi singatsandza tintfo letinyenti letifaka ekhatsi “kulima nekufuya,” “liwayini nemafutsa,” “kuyalwa,” “lwati,” “kuhlakanipha,” nasibala nje lokumbalwa. (2 Khr. 26:10; Taga 12:1; 21:17; 29:3) Nobe kunjalo, tintfo atitsandvwa ngelutsandvo lolucotfo; bantfu kuphela labakhonjiswa lolutsandvo. Kodvwa Jehova akalukhombisi lutsandvo lolucotfo kunobe ngubani. Ulukhombisa labo labanebuhlobo lobuhle naye. Nkulunkulu wetfu wetsembekile kubangani bakhe. Unenjongo lenhle ngabo, futsi angeke abalahle. Jehova ukhombise kutsi uyabatsandza bonkhe bantfu. Jesu watjela lenye indvodza lokutsiwa nguNikhodemu watsi: “Nkulunkulu walitsandza kakhulu live [bantfu] kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”​—Joh. 3:1, 16; Mat. 5:44, 45. w21.11 2 ¶3; 3 ¶6-7

Kumatima kuphila kulelive futsi kungenteka esikhatsini lesitako sitawubhekana netinkinga letinyenti letimatima. (Mat. 24:21) Silangatelela sikhatsi lapho khona tonkhe letinkinga titawuphela, sikhohlwe ngato futsi tingaphindzi tibe khona! (Isa. 65:16, 17) Kuyacaca kutsi kufanele sichubeke sicinicela. Kungani? Kungobe Jesu watsi: “Ngekucinisela kwenu, nitawusindzisa kuphila kwenu.” (Luk. 21:19) Sitawukhona kuchubeka sicinisela nasicabanga ngendlela labanye labatibeketelela ngayo tinkinga letifana netetfu. Ngubani losibonelo lesihle kakhulu sekucinisela? NguJehova Nkulunkulu. Iyakumangalisa yini lemphendvulo? Kungenteka, kodvwa nawucabanga ngayo ungacondza kutsi kungani sisho njalo. Lelive libuswa nguDeveli, futsi ligcwele tinkinga. Jehova unemandla ekulibhubhisa lelive kodvwa umele sikhatsi lesikahle sekukwenta loko. (Rom. 9:22) Kwanyalo, Nkulunkulu wetfu uyabeketela kuze kufike leso sikhatsi. w21.07 8 ¶2-4