September

Ngemalanga aJesu, labanye bebangenetiswa timfundziso takhe. Bebafuna kutsi ente lokunyenti. Kepha ngesikhatsi ala kubentela lesibonakaliso lebebasifuna, abazange bamemukela. (Mat. 16:4) Itsini imiBhalo? Umphrofethi Isaya wabhala loku mayelana naMesiya: ‘Angeke amemete nobe aphakamise livi lakhe, futsi angeke ente livi lakhe livakale esitaladini.’ (Isa. 42:1, 2) Ngesikhatsi Jesu ashumayela, bekangafuni kutsi kunakwe yena. Akazange akhe emathempeli lamakhulu nobe agcoke timphahla telikhetselo tenkholo nobe afune bantfu bambite ngeticu tenkholo letibalulekile. Ngesikhatsi kutekwa licala lakhe, Jesu wala kujabulisa iNkhosi Herodi ngekutsi ayentele simangaliso, nanobe kuphila kwakhe bekusengotini. (Luk. 23:8-11) Jesu bekatenta timangaliso, kodvwa lebekubaluleke kakhulu kuye bekukwenta umsebenti wekushumayela. Watjela bafundzi bakhe watsi: “Nguloko lengikutele.”​—Mak. 1:38. w21.05 4 ¶9-10

Sifuna labo ‘labatimisele kutfola kuphila lokuphakadze.’ (Imis. 13:48) Kuze sibasite babe bafundzi, kufanele sibasite kutsi (1) bakucondze, (2) bakwemukele, futsi (3) bakusebentise loko labakufundza eBhayibhelini. (Khol. 2:6, 7; 1 Thes. 2:13) Bonkhe ebandleni bangabasita labafundzelwa liBhayibheli ngekutsi babakhombise lutsandvo futsi babemukele nabete emihlanganweni. (Joh. 13:35) Ummemeteli lodadisha liBhayibheli nemfundzi kungahle kudzingeke acitse sikhatsi lesinyenti kanye nemandla akhe amsita kutsi ayekele tinkholelo kanye nemikhuba ‘lembelwe yacina’ kuye. (2 Khor. 10:4, 5) Kungahle kutsatse tinyanga letinyenti kusita umfundzi kutsi ente lolushintjo ekuphileni kwakhe kuze agcine abhajatisiwe. Kodvwa kwenta lolushintjo kuzuzisa kakhulu. w21.07 3 ¶6

Siciniseka mbamba yini kutsi sifundzisa liciniso nekutsi indlela BoFakazi BaJehova labakhonta ngayo Jehova lamuhla ngiyo kuphela lemjabulisako? Umphostoli Pawula bekaciniseka mbamba kutsi ulitfolile liciniso. (1 Thes. 1:5) Akazange akukholelwe loko ngenca nje yekutsi bekumenta ative ajabulile. Pawula bekangumfundzi lokhutsele weliVi laNkulunkulu. Bekakholelwa kutsi “yonkhe imiBhalo iphefumulelwe nguNkulunkulu.” (2 Thim. 3:16) Yini layifundza? Pawula watfola bufakazi lobucinile emiBhalweni bekutsi Jesu bekanguMesiya lowetsenjisiwe, lokubufakazi baholi benkholo yemaJuda labakhetsa kungabunaki. Bebatsi bafundzisa bantfu liciniso ngaNkulunkulu kepha bebenta tintfo latenyanyako. (Thit. 1:16) Ngalokwehlukile kubo, Pawula akazange akhetse kutsi ngutiphi tincenye teliVi laNkulunkulu bekatawutikholelwa. Bekatimisele ngekufundzisa nangekusebentisa “konkhe lokuyintsandvo yaNkulunkulu.”​—Imis. 20:27. w21.10 18 ¶1-2

Njengobe sihlanyela futsi sinisela, kufanele sikhumbule kutsi nguNkulunkulu lokhulisako. (1 Khor. 3:6, 7) KuJehova, bonkhe bantfu baligugu. Usinike lilungelo lekusebenta neNdvodzana yakhe ekuhlanganiseni bantfu ngaphambi kwekutsi kuphela kwalelive kufike. (Hag. 2:7) Umsebenti wetfu wekushumayela ungafaniswa nemsebenti wekutakula bantfu. Sifana nelicembu leliyotakula bantfu labavaleleke emayini. Nanobe bambalwa bantfu labatawutfolwa basaphila, kodvwa umsebenti walelicembu ubaluleke kakhulu. Loko kuyafana nemsebenti wekushumayela lesiwentako. Asati kutsi bangakhi bantfu labasetawutakulwa kulelive laSathane. Kodvwa Jehova angasebentisa nobe ngubani kitsi kuze abasite. Andreas, lohlala eBolivia, utsi: “Nangibona umuntfu afundza emaciniso laseBhayibhelini futsi abhajatiswa, ngiyati kutsi banyenti lababe nesandla kuze bamsite.” Shengatsi natsi singahlale sinembono lokahle ngemsebenti wekushumayela. Nasenta njalo, Jehova utasibusisa futsi sitawujabula kakhulu nasenta lomsebenti. w21.05 19 ¶19-20

Umuntfu lotingelako unemgomo munye​—kubamba silwane nobe kusibulala. Angasebentisa titsiyo nobe tingibe letehlukahlukene, njengobe kwaphawula lomunye webangani baJobe lababi lebebatsi bayamdvudvuta. (Jobe 18:8-10) Yini lona lotingelako layentako kuze lesilwane siye lapho kunelugibe khona? Uyasinakisisa. Uyanaka kutsi siya kuphi, sitsandza ini nekutsi angasebentisa luphi lugibe. Sathane ufana nalomtingeli. Uyasinaka. Unaka kutsi sentani, nekutsi sitsandza ini. Ngemuva kwaloko ubese usibekela lugibe lanelitsemba lekutsi lutasibamba singakanaki. Nobe kunjalo, liBhayibheli lisitjela kutsi nakwenteka sibanjwa, singakhona kuphunyula. Lisifundzisa nangaloko lesingakwenta kuze singabanjwa. Titsiyo taSathane letimbili letiphumelela kakhulu kutigcabha nekuba bukhali. Sekuphele tinkhulungwane teminyaka Sathane aphumelela nakasebentisa letitsiyo. Ufana nemuntfu locipha tinyoni asebentisa sitsiyo nobe linethi. (Hla. 91:3) Kodvwa singasindza futsi singabanjwa nguSathane. Kungani? Ngobe Jehova usivetele emachinga lawasebentisako.​—2 Khor. 2:11. w21.06 14 ¶1-2

Bazalwane betfu nabodzadze lasebakhulile baligugu. LiVi laNkulunkulu lifananisa timvu tabo enhloko nemchele. (Taga 20:29) Kodvwa kungaba melula kutsi singanaki kutsi baligugu. Labasebasha lababonako kutsi lasebakhulile baligugu bangatfola lokubaluleke kakhulu kwendlula umcebo. Lasebakhulile futsi labetsembekile baligugu kuJehova Nkulunkulu. Uyati kutsi babantfu labanjani futsi uyabutsandza buntfu babo lobuhle. Uyajabula nabendlulisela kuhlakanipha labakutfolile kuleminyaka leminyenti bamkhonta ngekwetsembeka. (Jobe 12:12; Taga 1:1-4) Jehova ukutsatsa njengalokuligugu nekucinisela kwabo. (Mal. 3:16) Babe nato tinkinga ekuphileni, kodvwa bachubekile banekukholwa lokucinile kuJehova. Litsemba labo ngelikusasa licine kakhulu kunangesikhatsi bacala kufundza liciniso. Jehova uyabatsandza ngobe bayachubeka bamemetela ngeligama lakhe “ngisho nobe sebakhulile.”​—Hla. 92:12-15. w21.09 2 ¶2-3

Kukahle kutsi sihle sihlola tisusa tetfu. Singahle sitibute: ‘Ngitikhandza ngingumuntfu yini nangicabanga kutsi ngincono kunalabanye? Ngisebenta kamatima yini ebandleni ngobe nje ngifuna kuba ncono kunalabanye nobe ngisebenta kamatima kuze ngijabulise Jehova?’ LiBhayibheli lisitjela kutsi kufanele singaticatsanisi nalabanye. Leni? Ngobe nasicabanga kutsi sincono kunemzalwane wetfu singahle sitigcabhe. Ngakulolunye luhlangotsi, nangabe siticatsanisa nalabanye singahle sidvumateke. (Rom. 12:3) Kufanele sikhumbule kutsi Jehova wasidvonsela kuye hhayi ngobe sibahle, sinelikhono lekukhuluma nobe sitsandvwa bantfu labanyenti, kodvwa wasidvonsa ngobe simtsandza futsi sifuna kulalela iNdvodzana yakhe.​—Joh. 6:44; 1 Khor. 1:26-31. w21.07 14-15 ¶3-4

Kuze siyente ibe yinsha indlela lesicabanga ngayo, kufanele sithantaze, sidadishe liVi laNkulunkulu futsi sizindle ngalo. Chubeka ukwenta loko futsi ucele Jehova akuphe emandla. Umoya wakhe longcwele utakusita kutsi uyekele kuticatsanisa nalabanye. Jehova utawuphindze akusite ubone nangabe sewunemona nobe sewutigcabha, futsi utakusita wente lushintjo ngekushesha. (2 Khr. 6:29, 30) Jehova uyayati indlela lesitiva ngayo. Uyati kutsi silwisana nemoya walelive kanye nemaphutsa lesiwentako. Nakasibona silwisana kamatima naletintfo, usitsandza kakhulu. Kuze Jehova avete indlela lasitsandza ngayo, usebentisa sibonelo selutsandvo lolusemkhatsini wamake nemntfwanakhe. (Isa. 49:15) Kusijabulisa kakhulu kwati kutsi Jehova usitsandza kakhulu nakasibona senta konkhe lesingakwenta kuze simentele lokuncono! w21.07 24-25 ¶17-19

Singajabula kakhulu nangabe siwenta ngekutimisela wonkhe umsebenti lesiniketwe wona emsebentini waJehova. ‘Bani matasatasa’ emsebentini wekushumayela futsi usebente ngekutimisela ebandleni. (Imis. 18:5; Heb. 10:24, 25) Yilungiselele kahle imihlangano kuze utawuniketa timphendvulo letakhako. Titsatse njengaletibalulekile tabelo loba nato emhlanganweni losekhatsi neliviki. Nangabe ucelwe kutsi wente umsebenti lotsite ebandleni, sibambe sikhatsi futsi wetsembeke. Ungacabangi kutsi umsebenti loniketwe wona awukabaluleki nekutsi akudzingeki kutsi ucitse sikhatsi sakho lesinyenti uwenta. Yetama kamatima kutfutfukisa emakhono akho. (Taga 22:29) Nangabe uwenta ngekutimisela umsebenti waJehova, utawuba ngumngani wakhe lomkhulu futsi ujabule kakhulu. (Gal. 6:4) Kutawuba melula nekutsi ujabule nangabe labanye batfola sabelo lebewusifuna.​—Gal. 5:26. w21.08 22 ¶11

Kufanele singatigcabhi, kodvwa sibe nesifiso sekufundziswa nguNkulunkulu. Njengobe kugula lokutsite kungenta kube matima ngenhlitiyo yemuntfu kutsi isebente kahle, kutigcabha kungenta kube matima kutsi silalele ticondziso taJehova. BaFarisi bavumela tinhlitiyo tabo taba lukhuni kangangekutsi bala kwemukela bufakazi lebebucacile lebebabukhonjiswa ngumoya longcwele. (Joh. 12:37-40) Loko labakwenta bekuyingoti ngobe kwabavimbela kutsi batfole kuphila lokuphakadze. (Mat. 23:13, 33) Kubaluleke kakhulu kutsi sichubeke sivumela liVi laNkulunkulu nemoya longcwele kutsi kushintje buntfu betfu futsi kutsintse indlela lesicabanga ngayo netincumo lesitentako! Ngenca yekutsi Jakobe bekatfobekile, wavumela Jehova kutsi amfundzise. Ngetulu kwaloko, ngenca yekutsi bekatfobekile, waba ngumfundzisi lophumelelako. w22.01 10 ¶7

Nangabe ‘siphikelela emthantazweni,’ singaciniseka kutsi Babe wetfu wasezulwini uyasiva. (Khol. 4:2) Nanobe kungahle kubonakale shengatsi kutsatsa sikhatsi kutsi imithantazo yetfu iphendvulwe, Jehova usetsembisa kutsi utayiphendvula “ngesikhatsi lesifanele.” (Heb. 4:16) Kungako kungakafaneli sisole Jehova nangabe intfo letsite ingenteki ngesikhatsi lesiyilindzele ngaso. Nasi sibonelo, sekuphele iminyaka bantfu labanyenti bathantazela uMbuso waNkulunkulu kutsi ubhubhise lelive lelibi. NaJesu washo kutsi sibokuthantazela loko. (Mat. 6:10) Kodvwa kungaba bulima nangabe umuntfu angaphelelwa kukholwa kuNkulunkulu ngenca yekutsi kuphela akukefiki ngesikhatsi lebesikulindzele ngaso! (Hab. 2:3; Mat. 24:44) Sikhombisa kutsi sihlakaniphile nangabe sichubeka silindzele Jehova futsi sithantaza kuye sinelitsemba lekutsi utayiphendvula imithantazo yetfu. Kuphela kutawufika ngesikhatsi lesifanele, ngobe Jehova sewuvele ulikhetsile ‘lilanga neli-awa’ lokutawufika ngalo. Leso kutawube kusikhatsi lesikahle kitsi sonkhe.​—Mat. 24:36; 2 Phet. 3:15. w21.08 10 ¶10-11

Lasebakhulile labatfobekile bayati kutsi njengobe bakhula babese abasakhoni kwenta lokunyenti kunangaphambili. Cabanga ngesibonelo sebabonisi betigodzi. Nasebaneminyaka lengu-70, babese bacelwa kutsi bente lomunye umsebenti. Loko kungahle kube matima. Bebasijabulela sabelo sabo. Kodvwa bayati kutsi kuncono kakhulu kutsi lomsebenti wentiwe bazalwane labasebasha. Banesimo sengcondvo lesifana nesemaLevi aka-Israyeli, ngobe nakaneminyaka lengu-50, bekubese kudzingeka kutsi ayekele kwenta umsebenti ethendeni lekukhontela. Bewajabula ngisho nobe enta muphi umsebenti. Bewenta konkhe langakhona kukwenta futsi bewasita nalabasebasha. (Num. 8:25, 26) Lamuhla, ngisho nobe labazalwane labake baba babonisi betigodzi bangasawavakasheli emabandla, kodvwa balusito emabandleni labakuwo. w21.09 8-9 ¶3-4

Jesu wacoca indzaba lekhutsatako lemayelana nendvodzana leyahamba ekhaya lebhalwe kuLukha 15:11-32. Lelijaha lavukela babe walo, lahamba ekhaya laya “eveni lelikhashane.” Nalilapho, latiphatsa kabi. Kodvwa kwatsi nasekumatima kuphila, lacabangisisa ngaloko belikwentile. Labona kutsi beliphila kahle ngesikhatsi lisahlala ekhaya. Njengobe Jesu asho, lelijaha ‘lasanguluka.’ Lancuma kubuyela ekhaya futsi licele kutsi babe walo alicolele. Bekubalulekile kutsi libone kutsi belente tincumo letinyenti letimbi. Bekufanele lishintje indlela lelenta ngayo tintfo! Lendvodzana yakhombisa kutsi beyiphendvuke mbamba ngaloko beyikwentile. Lendzaba ayigcini nje ngekusikhutsata. Ingabasita labadzala belibandla nangabe bafuna kubona kutsi umuntfu lowente sono lesikhulu uphendvuke mbamba yini. w21.10 5 ¶14-15

Yini lengeke inyakatiswe nobe isuswe? Umphostoli Pawula watsi: ‘Njengobe sitawutfola uMbuso longeke unyakatiswe, asichubeke senta umsebenti longcwele waNkulunkulu ngendlela leyemukelekako, ngekumesaba nangekumhlonipha.’ (Heb. 12:28) Ngemuva kwekunyakatiswa kwekugcina, nguMbuso waNkulunkulu kuphela longeke unyakatiswe. (Hla. 110:5, 6; Dan. 2:44) Sekusele sikhatsi lesincane kakhulu! Bantfu kufanele bakhetse: Batawuchubeka yini basekela lelive, lokutawuholela ekubhujisweni, nobe batawukhetsa kuphila ngekuvumelana nentsandvo yaNkulunkulu, lokutawuholela ekuphileni lokuphakadze? (Heb. 12:25) Umsebenti wetfu wekushumayela ungabasita bantfu kutsi bente lesincumo lesibalulekile. Shengatsi singahlala siwakhumbula nemavi lashiwo yiNkhosi yetfu Jesu latsi: “Letindzaba letimnandzi teMbuso titawushunyayelwa emhlabeni wonkhe, kuze tiviwe ngito tonkhe tive, bese-ke kuphela kuyefika.”​—Mat. 24:14. w21.09 19 ¶18-20

Nine labadzala belibandla, ninemsebenti lobalulekile wekudvudvuta tihlobo talabo labashiye Jehova. (1 Thes. 5:14) Kuze nibakhutsate, khulumani nabo ngaphambi kwekutsi kucale imihlangano nangemuva kwayo. Bavakasheleni emakhaya abo futsi nithantaze kanye nabo. Shumayelani nabo nobe nihle nibamema ekukhonteni kwenu kwemndeni. Labadzala belibandla kufanele babanakekele labo labacindzetelekile futsi bavelane nabo baphindze babatsandze. (1 Thes. 2:7, 8) Jehova “akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (2 Phet. 3:9) Ngisho nobe umuntfu angenta sono lesikhulu, kuphila kwakhe kuseligugu kuNkulunkulu. Khumbula kutsi Jehova wasitsenga ngelinani lelisetulu, lokukuphila kweNdvodzana yakhe layitsandzako. Ngemusa, Jehova wetama kusita labo labamshiyile kutsi babuyele kuye. Unelitsemba lekutsi batawubuya, njengobe sibona emfanekisweni waJesu lomayelana nendvodzana layahamba ekhaya.​—Luk. 15:11-32. w21.09 30-31 ¶17-19

Kutsiwani nangabe imphilo lebutsakatsaka yenta ungasakhoni kushumayela nekufundzisa tindzaba letimnandzi ngendlela lebewukwenta ngayo ngaphambili? Ungajabula ngaloko losakhona kukwenta. Cabanga ngalokwentiwa yiNkhosi Davide ngesikhatsi yona kanye nemadvodza lebeyihamba nawo bakhulula imindeni yabo futsi batsatsa netintfo tabo kuma-Amaleki. Emadvodza langu-200 bekadzinwe kakhulu kutsi angaya kuyokulwa, ngako asala agadza imitfwalo. Ngemuva kwekutsi bancobe kulemphi, Davide watsi abehlukaniselane bonkhe ngalokulinganako tintfo tema-Amaleki. (1 Sam. 30:21-25) Loku kuyafana nemsebenti wekwenta bafundzi lowentiwa emhlabeni wonkhe. Nangabe sonkhe senta lokusemandleni etfu emsebentini wekushumayela, siyajabula nakukhona lofundze ngaJehova futsi wabhajatiswa. Jehova uyakubona kutimisela kwetfu nekutsi simtsandza kangakanani futsi uyasibusisa. Uphindze asifundzise indlela yekutfola injabulo ngaloko lesikhona kukwenta emsebentini wekushumayela. (Joh. 14:12) Singaciniseka kutsi Nkulunkulu utasibusisa nangabe singapheli emandla! w21.10 28 ¶15-17

Njengobe sikhula, kungenteka sesabe kutsi angeke sisakhona kumentela lokunyenti Jehova njengasesikhatsini lesendlulile. Nanobe sesite emandla lebesinawo ngesikhatsi sisebasha, singasebentisa kuhlakanipha kanye nemakhono lesiwatfolile kuze sifundzise labasebasha kutsi babe lusito enhlanganweni yaJehova futsi bente imisebenti leminyenti. Lasebakhulile kufanele batfobeke nangabe bafuna kusita labasebasha. Umuntfu lotfobekile utsatsa labanye njengalabakhulu kunaye. (Fil. 2:3, 4) Lasebakhulile labatfobekile bayati kutsi kunetindlela letehlukene tekwenta intfo futsi letivumelana neliBhayibheli tiphindze tiphumelele. Ngako abalindzeli kutsi wonkhe muntfu ente tintfo ngendlela lebebatenta ngayo kadzeni. (Shu. 7:10) Nanobe banelwati lolunyenti labangalwendlulisela kulabasha, bayati kutsi “simo salelive siyashintja,” nekutsi kungahle kudzingeke bafundze tindlela letinsha tekwenta tintfo.​—1 Khor. 7:31. w21.09 8 ¶1, 3

Jehova akayuze acele tikhonti takhe kutsi tente tintfo letimbi. Ungcwele ngalokuphelele. Loko bekucaciswa nguloko bekubhalwe kungcwengcwe weligolide lobewuboshelwa emshuculweni wemphristi lophakeme. Kulongcwengcwe bekunemavi latsi: “Bungcwele ngebaJehova.” (Eks. 28:36-38) Lomlayeto lobewukulongcwengcwe bewutawucinisekisa nobe ngubani lobekawubona kutsi Jehova ungcwele. Kodvwa kutsiwani nangabe bekunemIsrayeli lobekangakhoni kubona longcwengcwe ngenca yekutsi bekangakhoni kubonana nemphristi lophakeme? Bekangeke yini aze awati lomlayeto lobalulekile? Cha! Onkhe ema-Israyeli bekawuva lomlayeto ngesikhatsi uMtsetfo ufundzelwa emadvodza, bafati nebantfwana. (Dut. 31:9-12) Nangabe umIsrayeli bekakhona lapho, bekataweva emavi latsi: “NginguJehova Nkulunkulu wenu . . . Kufanele nibe ngcwele, ngobe mine ngingcwele.” “Kufanele nibe ngcwele embikwami, ngobe mine Jehova ngingcwele.”​—Lev. 11:44, 45; 20:7, 26. w21.12 3 ¶6-7

Labanye bangahle bakhatsateke ngetintfo labatidzingako. Kungenteka bahlala eveni lapho khona bantfu labanyenti beswele futsi kulukhuni nekutfola umsebenti. Kungenteka kube matima kutsi batfole imali leyenele kuze banakekele imindeni yabo. Nobe kungenteka inhloko yemndeni seyashona, ngako emalunga emndeni lasele sekete imali leyenele yekunakekela tidzingo tawo. Kunekutsi sikhatsateke ngetinkinga tetfu, kufanele setsembe Jehova. Khumbula kutsi Babe wetfu lositsandzako Jehova, wetsembisa kutsi utatinakekela tidzingo tetfu nangabe senta kukhonta yena kute kucala ekuphileni kwetfu. (Mat. 6:32, 33) Bekasolo asigcina lesetsembiso sakhe. (Dut. 8:4, 15, 16; Hla. 37:25) Nangabe Jehova atinakekela tinyoni netimbali, kufanele singakhatsateki ngekutsi sitawudlani futsi sembatseni! (Mat. 6:26-30; Fil. 4:6, 7) Njengobe lutsandvo lwenta kutsi batali banike bantfwana babo loko labakudzingako, ngendlela lefanako, lutsandvo Babe wetfu wasezulwini lanalo ngatsi lwenta kutsi anakekele bantfu bakhe ngetintfo labatidzingako kuze baphile. w21.12 17 ¶4-5; 18 ¶8

Ukile yini waphatfwa kabi, mhlawumbe ngumzalwane nobe dzadze? Cabanga ngesibonelo saJosefa lowaphatfwa kabi bomnakabo. Wachubeka enta konkhe lokusemandleni akhe kuze akhonte Jehova, futsi Jehova wambusisa ngenca yekubeketela nekucinisela kwakhe. Ngekuhamba kwesikhatsi, Josefa wabacolela labo labamphatsa kabi futsi wayibona indlela Jehova labekambusise ngayo. (Gen. 45:5) NjengaJosefa, siyadvudvuteka nasisondzelana naJehova futsi silindzele yena kutsi alungise tintfo ngesikhatsi lesifanele. (Hla. 7:17; 73:28) Nangabe ubeketelela kuphatfwa kabi nobe lokunye nje, khumbula kutsi Jehova usedvute nalabo “labephuke tinhlitiyo.” (Hla. 34:18) Uyakutsandza ngenca yekutsi uyabeketela futsi ulahlela konkhe kukhatsateka kwakho kuye. (Hla. 55:22) UnguMehluleli wemhlaba wonkhe. Ubona konkhe lokwentekako. (1 Phet. 3:12) Nangabe unetinkinga letimatima longakhoni kuticatulula, khumbula kutsi kubalulekile kulindzela Jehova. w21.08 11 ¶14; 12 ¶16

Kungaba kuhlakanipha kusebentisa sikhatsi setfu kuze sijabulise Jehova. Kufanele sincume kutsi yini lebalulekile ekuphileni. Ngalesinye sikhatsi, kusebentisa kahle sikhatsi setfu kufaka ekhatsi kukhetsa emkhatsini wetintfo letimbili letingasitimbi. Loku sikubona kahle kulokwenteka ngesikhatsi Jesu avakashela Mariya naMata. Mata bekajabulile ngekuvakashelwa nguJesu, ngako waba matasa enta kudla lokunyenti. Kodvwa Mariya wahlala phasi, walalela Jesu njengobe afundzisa. Nanobe Mata bekanetisusa letinhle, kepha Mariya ‘wakhetsa lokuncono kakhulu.’ (Luk. 10:38-42) Kungenteka ngekuhamba kwesikhatsi Mariya wakhohlwa kutsi wadlani ngalelo langa, kodvwa siyaciniseka kutsi akazange akukhohlwe loko lakufundza kuJesu. Njengobe besibalulekile kuMariya sikhatsi lasicitsa naJesu, nakitsi sibalulekile sikhatsi lesisicitsa naJehova. w22.01 27 ¶5-6

Nanobe Ahabi atitfoba kuJehova, kodvwa ngekuhamba kwesikhatsi indlela lenta ngayo yakhombisa kutsi bekangakaphendvuki mbamba. Akazange etame kucedza kukhontwa kwaBhali embusweni wakhe. Ngetulu kwaloko, akazange akhutsate bantfu kutsi bakhonte Jehova. Ngemuva kwekufa kwa-Ahabi, Jehova wayiveta indlela lebekativa ngayo ngalendvodza. Umphrofethi waNkulunkulu lokutsiwa nguJehu watsi ‘bekamubi.’ (2 Khr. 19:1, 2) Cabanga nganaku: Kube Ahabi bekaphendvuke mbamba, lomphrofethi bekangeke asho kutsi bekayindvodza lembi leyenyanya Jehova. Kuyacaca kutsi nanobe Ahabi akhombisa kutisola, kodvwa bekangakaphendvuki mbamba. Yini lesingayifundza ku-Ahabi? Ahabi wacale watisola ngesikhatsi eva umlayeto lomubi wa-Elija lobewumelene nemndeni wakhe. Leyo bekuyintfo lenhle. Kodvwa loko lakwenta ngekuhamba kwesikhatsi kwakhombisa kutsi bekangakaphendvuki ngalokusuka enhlitiyweni. Ngako kuphendvuka kusho lokungetulu nje kwekumane sitisole ngalesikwentile. w21.10 3 ¶4-5, 7-8

Isaya bekangumphrofethi, futsi kungenteka nemkakhe bekanemisebenti lehambisana nekuprofetha ngobe bekabitwa ngekutsi ‘ngumphrofethikati.’ (Isa. 8:1-4) Kusebaleni kutsi Isaya nemkakhe bebanake kukhonta Jehova. Nalabashadene lamuhla bangenta konkhe labangakwenta kuze kukhonta Jehova kute kucala ekuphileni kwabo. Bangacinisa indlela labametsemba ngayo Jehova ngekudadisha tiphrofetho letiseBhayibhelini ndzawonye nangekubona indlela letihlale tigcwaliseka ngayo. (Thit. 1:2) Bangacabanga ngaloko labangakwenta kuze basite ekugcwaliseni tiphrofetho letiseBhayibhelini. Sibonelo saloko kutsi bangasita ekugcwaliseni siphrofetho saJesu lesitsi tindzaba letimnandzi titawushunyayelwa emhlabeni wonkhe ngaphambi kwekutsi kuphela kufike. Nangabe labashadene bachubeka baciniseka mbamba kutsi tiphrofetho letiseBhayibhelini tiyagcwaliseka, batawutimisela kakhulu kwentela Jehova lokunyenti. w21.11 16 ¶9-10

Jesu bekakhatsateke ngamake wakhe, lokungenteka besekangumfelokati. Ngenca yekutsi bekamtsandza Mariya futsi amkhatsalela, wacela Johane kutsi amnakekele ngobe bekati kutsi utamsita achubeke akhonta Jehova. Kusukela ngalelo langa, Johane waba njengendvodzana kuMariya, futsi wamnakekela kwaba shengatsi ngumake wakhe. Jesu wamkhombisa lutsandvo lolukhulu lomfati loligugu lowamnakekela kusukela atalwa futsi lebekeme eceleni kwakhe njengobe afa! Yini lesingayifundza emavini aJesu? Buhlobo lesinabo nebazalwane nabodzadze bungacina kwendlula buhlobo lesinabo nemalunga emindeni yetfu. Tihlobo tetfu tingasiphikisa nobe tisilahle, kodvwa njengobe Jesu asetsembisa, nasihlale sisondzelene naJehova nenhlangano yakhe, sitawutfola tihlobo “ngalokuphindvwe tikhatsi letingu-100” kunaletisilahlekele. Banyenti labatasitsandza, babe ngemadvodzana, emadvodzakati, bomake nobe bobabe kitsi. (Mak. 10:29, 30) Utiva njani ngekuba nebazalwane nabodzadze ebandleni labanebunye ngenca yekutsi banekukholwa nelutsandvo, futsi labatsandza Jehova?​—Khol. 3:14; 1 Phet. 2:17. w21.04 9-11 ¶7-8

Lutsandvo lolucotfo lwenta kutsi sente lokungetulu kwalokulindzelekile. Lamuhla, njengasesikhatsini lesendlulile, bazalwane betfu labanyenti nabodzadze bakhetse kukhombisa lutsandvo lolucotfo kubazalwane babo nabodzadze, ngisho nakulabo labangabati. Nasi sibonelo, nabeva kutsi kube nesehlakalo semvelo, ngekushesha bafuna kwati kutsi bangasita njani. Nangabe lotsite ebandleni aba netinkinga tetimali, betama kumsita ngaloko lakudzingako nangaletinye tindlela. NjengemaKhristu aseMasedoniya, benta lokungetulu kwalokulindzelekile. Badzela lokutsite, baphe ‘ngalokungetulu kwaloko labanako’ kuze basite bazalwane babo labadzinga lusito. (2 Khor. 8:3) Labadzala belibandla bayabancoma bazalwane nabodzadze nabababona basita labanye. Lesikhutsato lesifike ngesikhatsi singenta labazalwane nabodzadze kutsi bachubeke basita labanye.​—Isa. 32:1, 2. w21.11 11 ¶14; 12 ¶21

Sonkhe sihle sisidzinga seluleko. Ngaletinye tikhatsi singacela umuntfu lesimetsembako kutsi aseluleke. Ngaletinye tikhatsi, umzalwane lokhatsatekile ngatsi angeta kitsi atositjela kutsi sihamba ‘endleleni lengasiyo,’ lesitawutisola ngayo. (Gal. 6:1) Seluleko singasitfola nangemuva kwekwenta liphutsa lelikhulu. Ngisho nobe seluleko singasitfola ngatiphi tindlela, kufanele sisilalele. Kutasisita kwenta loko futsi kungasindzisa kuphila kwetfu! (Taga 6:23) Lombhalo welusuku lwalamuhla usikhutsa kutsi ‘silalelisise loko lokushiwo bantfu labahlakaniphile.’ Kute umuntfu lowati tonkhe tintfo, kuhlale kunalotsite lowati kancono kunatsi. (Taga 12:15) Ngako kulalela seluleko kukhombisa kutsi sitfobekile. Kukhombisa nekutsi siyati kutsi kunetintfo lesingakhoni kutenta kahle, siyati kutsi siyakudzinga kusitwa kuze sifinyelele imigomo yetfu. INkhosi Solomoni yabhala yatsi: “Emacebo . . . ayaphumelela nangabe kunebeluleki labanyenti.”​—Taga 15:22. w22.02 8 ¶1-2

Akukeneli kutsi umuntfu lowente sono atsi uyatisola ngesono lesikhulu lasentile. Kufanele ashintje indlela lacabanga ngayo, lativa ngayo nalenta ngayo tintfo. Kufanele ayekele kwenta lokubi futsi alalele timiso taJehova. (Hez. 33:14-16) Lokubaluleke kakhulu kumuntfu lowonile kutsi alungise buhlobo bakhe naJehova. Yini lokufanele uyente nawuva kutsi umngani wakho lomkhulu wente sono lesikhulu? Nangabe wetama kusifihla sono sakhe lesikhulu utawube uyamlimata. Loko angeke kuphumelele ngoba Jehova uyabona. (Taga 5:21, 22) Ungamsita umngani wakho ngekutsi umkhumbute kutsi labadzala belibandla bafuna kumsita. Nangabe angafuni kutjela labadzala ngesono sakhe, kufanele ubatjele ngobe nawenta njalo usuke ukhombisa kutsi ufuna kumsita mbamba. w21.10 7 ¶19-21

Sonkhe singamlingisa Jesu ngekutsi sibeke tidzingo talabanye kucala kunetetfu. LiBhayibheli litsi “waba njengesigcili.” (Fil. 2:7) Sigcili nobe sisebenti sivame kubuka kutsi singamjabulisa njani umphatsi waso. Ngenca yekutsi sitisebenti taJehova netebazalwane betfu, sifisa kuba lusito kakhulu kuJehova nakubazalwane betfu. Tibute: ‘Ngitimisela kanganani kusebentisa emandla ami nesikhatsi sami kuze ngisite labanye? Ngisukumela etulu yini nakunesidzingo salabatawuvolontiya nakuhlantwa indzawo yemhlangano nobe nakunakekelwa liHholwa leMbuso?’ Ase sitsi uyabona kutsi kudzingeka wente lushintjo lolutsite, kodvwa ute umdlandla wekulwenta. Thantaza kuJehova ngalokusuka enhlitiyweni. Mtjele indlela lotiva ngayo futsi umcele ‘akunike sifiso nemandla ekwenta intsandvo yakhe.’​—Fil. 2:13. w22.02 22-23 ¶9-11

Jesu wakhombisa kutsi unemusa ngekutsi abe nesineke futsi ayilalele imibono yalabanye ngisho nobe abhekene netimo letimatima. (Mat. 11:29, 30) Nasi sibonelo, ngesikhatsi umfati longumFenisiya amncenga kutsi elaphe umntfwana wakhe, Jesu wacale wala, kodvwa ngesikhatsi lomfati akhombisa kukholwa lokucinile, wamelapha lomntfwana wakhe. (Mat. 15:22-28) Nanobe Jesu bekanemusa, kepha bekasikhipha seluleko nakudzingekile. Ngaletinye tikhatsi wakhombisa kutsi unemusa ngekutsi angakuvumi konkhe lebekushiwo bantfu bekabatsandza. Nasi sibonelo, ngesikhatsi Phetro etama kwenta Jesu kutsi angayenti intsandvo yaJehova, Jesu wamekhuta embikwalabanye bafundzi. (Mak. 8:32, 33) Loku akakwentanga kuze ahlaze Phetro, kodvwa wakwenta kuze amceceshe futsi ecwayise nalabanye bafundzi kutsi bayati indzawo yabo. Siyaciniseka kutsi Phetro wahlazeka, kodvwa wasitakala ngaleseluleko. Ngaletinye tikhatsi, kuze ukhombise kutsi unemusa kulabo lobatsandzako kudzingeka ubatjele tintfo njengobe tinjalo. Nawukwenta loko, kufanele ulingise Jesu ngekutsi usekele seluleko sakho etimisweni letitfolakala eVini laNkulunkulu. w22.03 11 ¶12-13

Nasidvumisa Jehova sisuke simkhonta. (Hla. 34:1) Sisuke sidvumisa Jehova nasikhuluma kahle ngebuntfu bakhe lobuhle nangetintfo latentile. Sitawuba netizatfu letinyenti tekudvumisa Jehova nangabe sibonga ngetintfo lasentele tona. Nangabe sitinika sikhatsi sekuzindla ngato tonkhe tintfo lasentele tona, angeke siseswele sizatfu sekumdvumisa. Umsebenti wekushumayela usiniketa litfuba lelihle ‘lekunikela kuNkulunkulu umhlatjelo wekudvumisa, lokusitselo setindzebe tetfu.’ Njengobe kufanele sicabangisise ngekutsi sitawutsini kuJehova ngaphambi kwekutsi sithantaze, kufanele sicabangisise ngekutsi sitawutsini kulabo lesibashumayelako. Sifuna ‘umhlatjelo wetfu wekudvumisa’ ube nguloncono kakhulu, kungako nasishumayela labanye sikhuluma ngalokusuka enhlitiyweni. w22.03 21 ¶8