May

Ngemuva kwekubona lelicembu lalabo labayophila ezulwini, Johane wabona “sicumbi lesikhulu.” Ngalokungafani nalabo labangu-144 000, kute umuntfu lowakhona kusibala lesicumbi lesikhulu. Yini lesiyifundzako ngaso? Naku Johane latjelwa kona: “Laba ngulabaphume ekuhluphekeni lokukhulu, labahlante tingubo tabo batenta taba mhlophe engatini yeliWundlu.” (Semb. 7:14) Ngemuva kwekusindza ekuhluphekeni lokukhulu, ‘lesicumbi lesikhulu’ sitawuphila lamhlabeni futsi sijabulele tibusiso letinhle. (Hla. 37:9-11, 27-29; Taga 2:21, 22; Semb. 7:16, 17) Siyatibona yini kuloku lokushiwo Sembulo sehluko 7 ngisho sinelitsemba lekuphila ezulwini nobe emhlabeni? Kufanele sitibone. Leso kuyobe kusikhatsi lesijabulisa mbamba etincekwini taNkulunkulu letingemalunga alamacembu lamabili! Sitawujabula kakhulu ngekutsi sikhetse kusekela kubusa kwaJehova. w22.05 16 ¶6-7

Nangabe kwake kwadzingeka kutsi wente sincumo lesibalulekile, kungenteka wathantaza, wacela kuhlakanipha ngobe bewati kutsi uyakudzinga. (Jak. 1:5) INkhosi Solomoni yabhala yatsi: “Kuhlakanipha kuyintfo lebaluleke kakhulu.” (Taga 4:7) Solomoni bekangakhulumi nganobe ngukuphi nje kuhlakanipha. Bekakhuluma ngekuhlakanipha lesikunikwa nguJehova Nkulunkulu. Kodvwa kuhlakanipha lokuvela kuNkulunkulu kungasisita yini kutsi sibeketelele tinkinga lesibhekana nato lamuhla? Kungasisita. Lenye indlela lesingakutfola ngayo kuhlakanipha mbamba kutsi sidadishe loko lokwafundziswa ngulamadvodza lamabili lebekahlakaniphe kakhulu futsi sikusebentise loko lakusho. Yekucala, nguSolomoni. LiBhayibheli litsi “Nkulunkulu wanika Solomoni kuhlakanipha, nekucondza lokukhulu.” (1 Khos. 4:29) Yesibili, nguJesu, lebekayindvodza lehlakaniphe kakhulu kwendlula onkhe lake aphila. (Mat. 12:42) Nasi siphrofetho lesashiwo ngaJesu: “Umoya waJehova uyawuhlala kuye, umoya wekuhlakanipha newekucondza.”​—Isa. 11:2. w22.05 20 ¶1-2

Kukhula ngeminyaka akusho kutsi ngeke sikhone kutibekela imigomo ekukhonteni Nkulunkulu futsi siyifinyelele. Cabanga ngesibonelo sadzadze lokutsiwa nguBeverley loneminyaka lengu-75. Bekagula kakhulu futsi angakhoni kuhamba. Kodvwa bekafuna kwenta lokunyenti emkhankasweni weSikhumbuto. Ngako watibekela imigomo lecacile. Beverley wajabula kakhulu nakayifinyelela lemigomo. Loko lakwenta kwakhutsata nalabanye kutsi batimisele emsebentini wekushumayela. Jehova ujabula kakhulu ngemsebenti lowentiwa bazalwane nabodzadze lasebakhulile, ngisho nobe timo tingasabavumeli kutsi bente lokunyenti. (Hla. 71:17) Tibekele imigomo longakhona kuyifinyelela. Yetama kuba nebuntfu lobutawujabulisa Jehova. Fundza emakhono latakwenta ube lusito kuNkulunkulu wetfu nasenhlanganweni yakhe. Buka tindlela longaba lusito ngato kakhudlwana kubazalwane bakho nakubodzadze. NjengaThimothi, Jehova angakusita kutsi ‘intfutfuko yakho ibonakale kahle kubo bonkhe bantfu.’​—1 Thim. 4:15. w22.04 27 ¶18-19

Kutsiwani nangabe lomunye webantfwana bakho akutjela kutsi akafuni kukhonta Jehova, ngisho nobe wente konkhe lokusemandleni akho kuze umsite? Ungacabangi kutsi usehluleki. Sonkhe Jehova usinike inkhululeko yekutikhetsela, lokufaka ekhatsi umntfwana wakho, lokulikhono lekutikhetsela kutsi sitamkhonta yini nobe cha. Chubeka wetsemba kutsi ngalelinye lilanga utawubuya. Khumbula umfanekiso wendvodzana leyahamba ekhaya. (Luk. 15:11-19, 22-24) Lendvodzana yenta tintfo letinyenti letimbi, kodvwa ekugcineni yabuya ekhaya. Batali, Jehova uniphe sipho lesihle kakhulu sekukhulisa situkulwane lesisha setikhonti takhe. (Hla. 78:4-6) Lona ngumsebenti lomatima, futsi sinibonga kakhulu ngako konkhe lenikwentako kuze nisite bantfwana benu! Nangabe nichubeka nenta konkhe leningakwenta kuze nisite bantfwana benu kutsi batsandze Jehova futsi nibafundzise kutsi bamlalele, ningaciniseka kutsi Babe wetfu wasezulwini lositsandzako utawujabula kakhulu.​—Ef. 6:4. w22.05 30-31 ¶16-18

Kuze sikhutsate kuthula nebunye ebandleni, ngamunye wetfu kufanele ente konkhe langakhona kukwenta. Cabanga ngesibonelo semaKhristu ekucala. Bewanemakhono langafani futsi enta imisebenti leyehlukene. (1 Khor. 12:4, 7-11) Kodvwa loko akuzange kuwente ancintisane nobe ehlukane ekhatsi. Kunaloko, Pawula wawakhutsata kutsi ente konkhe lebekudzingekile kuze ‘akhe umtimba waKhristu.’ Pawula wabhalela base-Efesu watsi: “Nangabe lilunga ngalinye lisebenta kahle, loku kuba nesandla ekukhuleni kwemtimba njengobe utakha ngelutsandvo.” (Ef. 4:1-3, 11, 12) Labo labakwenta loko lokwashiwo nguPawula bebakhutsata kuthula nebunye, lokutintfo lesitibonako emabandleni lesikuwo lamuhla. Timisele kutsi ungaticatsanisi nalabanye. Kunaloko, fundza kuJesu futsi wetame kamatima kulingisa buntfu bakhe. Ciniseka kutsi Jehova ‘ulungile, ngako ngeke awukhohlwe umsebenti wakho.’ (Heb. 6:10) Uyajabula nakakubona wenta konkhe longakhona kukwenta kuze umjabulise. w22.04 14 ¶15-16

Sijabula kakhulu ngekutsi awukanikwa tsine umsebenti wekuncuma kutsi Jehova utamcolela yini lowonile nobe cha. Nobe kunjalo, kukhona lokudzingeka sikwente. Kuyini? Kuletinye timo, umuntfu angasiphatsa kabi kakhulu futsi angahle acolise, acele kutsi simcolele. Kodvwa kuletinye timo angahle angacolisi. Nanobe kunjalo, singakhetsa kumcolela futsi setame kungamtfukutseleli. Kuliciniso kutsi loko kungahle kutsatse sikhatsi kanye nemetamo, ikakhulukati nangabe asivise buhlungu kakhulu. Sicongosekulindza saSeptember 15, 1994, sitsi: “Nawucolela umuntfu lowonile, loko akusho kutsi uyavumelana naloku lokubi lakwentile. KumKhristu, kucolela kusho kwetsemba Jehova futsi ushiyele tintfo kuye. Nguye uMehluleli lolungile wako konkhe lokukhona futsi utawehlulela ngesikhatsi lesikahle.” w22.06 9 ¶6-7

Jehova wetsembisa kutsi emalangeni etfu utawuhlanganisa bantfu labavela kuto tonkhe tive, tinhlanga kanye netilwimi kuze bamkhonte ngebunye. Lamuhla, lelicembu libitwa ngekutsi “sicumbi lesikhulu.” (Semb. 7:9, 10) Nanobe lelicembu lakhiwa ngemadvodza, bafati nebantfwana labehlukahlukene labavela emhlabeni wonkhe, kodvwa bangumndeni lonekuthula. (Hla. 133:1; Joh. 10:16) Bahlale bakulungele kucocela nobe ngubani lofuna kulalela ngelive lelisha lelincono kakhulu. (Mat. 28:19, 20; Semb. 14:6, 7; 22:17) Nangabe ulilunga lesicumbi lesikhulu, siyaciniseka kutsi lelitsemba lekutsi tintfo titawuba ncono kakhulu liligugu kuwe. Develi akafuni ube nelitsemba. Ufuna kukwenta ukholelwe kutsi Jehova angeke atifeze tetsembiso takhe. Nakangakhona kucedza litsemba letfu, singaphelelwa sibindzi futsi singahle siyekele kukhonta Jehova. w22.06 20-21 ¶2-3

Litsemba letfu lelicinile lisenta sehlise umoya nasibhekene netinkinga ngobe siyaciniseka kutsi timo titawuba ncono. Khumbula, Jesu wasecwayisa kutsi sitawuphatfwa kabi. (Joh. 15:20) Ngako kucabangisisa ngelitsemba letfu ngelikusasa kutawenta sichubeke sikhonta Jehova. Cabanga ngendlela litsemba lelamsita ngayo Jesu kutsi ahlale etsembekile nanobe bekatawubulawa kabuhlungu. NgeliPhentekhoste la-33 C.E., umphostoli Phetro wacaphuna siphrofetho lesisencwadzini yeTihlabelelo lesikuchaza kahle loko Jesu bekaciniseka ngako, satsi: “Ngitawuhlala ngikwetsemba, ngobe ngeke uze ungishiye eThuneni, futsi angeke uvumele kutsi lowetsembekile wakho abole. . . . kungemukela kwakho kutangenta ngijabule kakhulu.” (Imis. 2:25-28; Hla. 16:8-11) Jesu bekanelitsemba lelicinile lekutsi Nkulunkulu utamvusa futsi aphindze ajabule ngekuba naBabe wakhe ezulwini.​—Heb. 12:2, 3. w22.10 25 ¶4-5

Ngalelinye lilanga, baphostoli bakhe lababili, lokunguJakobe naJohane bacela make wabo kutsi ayobacelela kuJesu tikhundla letisetulu eMbusweni. (Mat. 20:20, 21) Loko lokwentiwa nguJakobe naJohane kwakhombisa kutsi bebatigcabha futsi bebafuna kuba ncono kunalabanye. (Taga 16:18) Akusuye Jakobe naJohane kuphela labakhombisa buntfu lobubi ngalelo langa. Naka loko lokwentiwa ngulalabanye baphostoli: “Laba labanye labangu-10 batsi nabeva ngaloko, babatfukutselela laba lababili.” (Mat. 20:24) Singawacabanga nje emavi lahlabako lebekaphuma kuJakobe, Johane nakulalabanye baphostoli. Yini Jesu layenta? Akazange atfukutsele. Akazange atsi utawufuna lamanye emadvodza lancono kutsi abe baphostoli bakhe, emadvodza latfobeke kakhudlwana nalatawuhlale akhombisana lutsandvo. Kunaloko, wabaphatsa kahle ngobe bekati kutsi bayafuna kwenta lokulungile. (Mat. 20:25-28) Wachubeka abakhombisa lutsandvo. w23.03 28-29 ¶10-13

Cabanga nje ngetintfo letinhle lesewutifezile. Kungenteka sekuphele iminyaka udadisha liBhayibheli ngekutimisela. Kulidadisha kwakho kukwente waciniseka kutsi liliVi laNkulunkulu. Ngetulu kwaloko, sewuyamati lomBhali walencwadzi lengcwele futsi sewuyamtsandza. Lutsandvo lwakho ngaJehova selukhule kakhulu kangangekutsi nyalo sewusikhonti sakhe lesitinikele futsi sabhajatiswa. Wente sincumo lesihle! Siyaciniseka kutsi ngaphambi kwekutsi ubhajatiswe, kukholwa kwakho kuvivinywe ngetindlela letinyenti letehlukene. Kodvwa njengobe ukhula, utawubhekana netinkinga letinyenti. Sathane utawetama kunciphisa lizinga lomtsandza ngalo Jehova, nekukuyekelisa kumkhonta. (Ef. 4:14) Ungacali ukuvumele loko kutsi kwenteke. Yini lengakusita kutsi uhlale wetsembekile kuJehova futsi ugcine setsembiso lowasenta nawutinikela? Kufanele ‘uchubeke’ wetama kamatima kuba ngumKhristu lovutsiwe.​—Heb. 6:1. w22.08 2 ¶1-2

Emndenini, lilunga ngalinye lemndeni kufanele liciniseke kutsi ligcina letinye tindzaba tasekhaya tiyimfihlo. Sibonelo nje, kungenteka dzadze wenta letinye tintfo letingasitinhle letiyihlekisako indvodza yakhe. Lendvodza ingakhuluma yini ngaye kulabanye futsi imhlaze? Angeke ikwente loko! Iyamtsandza umkayo futsi angeke yente tintfo letitamvisa buhlungu. (Ef. 5:33) Bantfwana labaseminyakeni yekutfomba bayakufuna kuhlonishwa, futsi batali kufanele bakwati loko. Ngako akukafaneli bahlaze bantfwana babo ngekutsi batjele labanye ngemaphutsa abo. (Khol. 3:21) Bantfwana kufanele bahlakaniphe, bangabatjeli labanye tintfo letingahlaza lamanye emalunga emndeni. Nangabe lilunga ngalinye lemndeni lenta konkhe lelingakwenta kuze ligcine letinye tindzaba temndeni tiyimfihlo, emalunga emndeni atawusondzelana. w22.09 10 ¶9

Jehova wakhuluma naJobe, wamkhumbuta ngekuhlakanipha kwakhe lokukhulu nangendlela latinakekela ngayo ngelutsandvo tintfo latidalile. Wakhuluma nangetilwane letinyenti letimangalisako. (Jobe 38:1, 2; 39:9, 13, 19, 27; 40:15; 41:1, 2) Jehova waphindze wasebentisa lelinye lijaha lebeletsembekile lokutsiwa ngu-Elihu kuze limcinise futsi limdvudvute. Elihu wamcinisekisa ngekutsi Jehova utiniketa umvuzo tinceku takhe nangabe ticinisela. Jehova waphindze wenta Elihu kutsi anikete Jobe seluleko lesikahle. Elihu wasita Jobe kutsi ayekele kucabanga kakhulu ngetinkinga takhe ngekutsi amkhumbute kutsi sibancane kakhulu nasicatsaniswa naJehova, longuMdali wako konkhe. Jehova waphindze waniketa Jobe umsebenti wekuthantazela bangani bakhe labatsatfu lebebonile. (Jobe 42: 8-10) Jehova usisita njani lamuhla nasibhekene netinkinga letimatima? Jehova akakhulumi natsi ngalokucondzile, ngendlela lakhuluma ngayo naJobe, kodvwa ukhuluma natsi asebentisa liVi lakhe liBhayibheli.​—Rom. 15:4. w22.08 11 ¶10-11

Ebandleni laseRoma, bekunemaKhristu langemaJuda nalawo lavela kuletinye tive. Ngesikhatsi uMtsetfo waMosi ungasasebenti, besekute sidzingo sekutsi lamaKhristu alalele umtsetfo lomayelana nekungadli lokunye kudla. (Mak. 7:19) Kusukela ngaleso sikhatsi, lamanye emaKhristu langemaJuda bekativa akhululekile kudla lonkhe luhlobo lwekudla. Nobe kunjalo, lamanye emaKhristu langemaJuda bekeva ngatsi akusikahle kudla lokudla. Ngenca yaloko, libandla lehlukana ekhatsi. Umphostoli Pawula wagcizelela kubaluleka kwekuba nekuthula. Ngako Pawula wasita bazalwane bakhe nabodzadze kuze babone kutsi lokungevani bekutawulimata bona kanye nelibandla. (Rom. 14:19, 20) Bekakulungele kushintja indlela lenta ngayo tintfo kuze angabakhubi labanye. (1 Khor. 9:19-22) Ngendlela lefanako, natsi singabakha labanye futsi sigcine kuthula ngekutsi singaphikisani ngetintfo umuntfu ngamunye lakhetsa kutenta letingashayisani nemtsetfo waNkulunkulu. w22.08 22 ¶7

Nangabe sifuna kufinyelela umgomo lotsite emsebentini waJehova, sichubeka sifaka emandla kuze siwufinyelele. Loku kuyafana nalapho sifuna kwenta lokulungile. Ngesineke, Jehova utasisita kutsi sichubeke sitfutfuka kancane kancane. (Hla. 84:5, 7) Jehova usikhumbuta ngelutsandvo kutsi kwenta tintfo letilungile akusiwo umtfwalo. (1 Joh. 5:3) Kunaloko kuyasivikela, futsi lesivikelo sisidzinga onkhe malanga. Khumbula tembatfo temphi lakhuluma ngato umphostoli Pawula. (Ef. 6:14-18) Ngusiphi sembatfo lebesivikela inhlitiyo yelisotja? “Sivikelo sesifuba lesikulunga,” lesimelela timiso taJehova letilungile. Njengobe sivikelo sesifuba lesikulunga sivikela inhlitiyo mbamba, netimiso taJehova tivikela inhlitiyo, lokungumuntfu lesinguye ngekhatsi. Ngako kubalulekile kutsi emkhatsini wetembatfo takho temphi, sibe khona nesivikelo sesifuba lesikulunga!​—Taga 4:23. w22.08 29 ¶13-14

Sekuphele tinkhulungwane teminyaka liVi laNkulunkulu linika emadvodza nebafati labetsembekile seluleko lesihlakaniphile. Kwenteke njani loku? Jehova waciniseka kutsi kuba nebantfu labatsite labakopa lemibhalo lengcwele. Nanobe labantfu lebebakopa imibhalo lengcwele bebanesono, kodvwa bawenta ngekucophelela lokukhulu lomsebenti. Lesinye sati sabhala naku mayelana nemiBhalo yesiHebheru: “Siyaciniseka kutsi kute lenye incwadzi yakadzeni leyakotjwa kahle kwendlula lena.” Kodvwa siyaciniseka kutsi emavi lesiwafundza kulo lamuhla endlulisela imicondvo yeMbhali walo, lokunguJehova. Jehova unguMtfombo wato “tonkhe tipho letinhle naletiphelele.” (Jak. 1:17) LiBhayibheli lingulesinye setipho letinhle kakhulu Jehova lasiphe sona. Sipho sisitjela lokutsite ngaloyo losiphe sona, sisitjela kutsi usati kahle nekutsi uyatati tidzingo tetfu. Loku kuyafana nangaLoyo losiphe liBhayibheli. Nasihlolisisa lesipho, sifundza lokunyenti ngaJehova. Sifundza kutsi usati kahle nekutsi uyatati tidzingo tetfu. w23.02 2-3 ¶3-4

Kutawube kulilanga lelimnandzi kakhulu lapho bantfu labafile bacala kuvuka emhlabeni ngesikhatsi Sekubusa KwaKhristu Kweminyaka Lengu-1 000! Bonkhe labashonelwe bantfu lababatsandzako bayakulangatelela kubabona. NaJehova uyakulangatelela kuphindze ababone. (Jobe 14:15) Cabanga ngenjabulo letawuba khona emhlabeni wonkhe lapho bantfu sebaphindze babonana nalabavusiwe lababatsandzako. Labo “labalungile” futsi emagama abo labhalwe encwadzini yekuphila “batawuvuselwa ekuphileni.” (Imis. 24:15; Joh. 5:29) Mhlawumbe linyenti lebantfu lesibatsandzako litawuba semkhatsini walabo labatawusheshe bavuswe. Ngetulu kwaloko, labo ‘labangakalungi,’ njengalabo labangazange balitfole litfuba lelenele lekufundza ngaJehova nobe lekumkhonta ngekwetsembeka ngaphambi kwekutsi bafe, ‘batawuvuselwa ekwehlulelweni.’ Bonkhe labo labatawuvuswa kutawudzingeka bafundziswe. (Isa. 26:9; 61:11) Kutawentiwa umsebenti lomkhulu wekufundzisa ngelizinga longazange sewentiwe ngalo emhlabeni wonkhe.​—Isa. 11:10. w22.09 20 ¶1-2

Jehova wakhombisa kutsi uphakeme kunawo onkhe emacembu ebabusi. Walwela ema-Israyeli, wawasita kutsi ancobe tindzawo letinyenti taseVeni Lesetsembiso. (Josh. 11:4-6, 20; 12:1, 7, 24) Jehova wakhombisa tikhatsi letinyenti kutsi unguNkulunkulu Lophakeme! Ngesikhatsi iNkhosi Nebukhadnezari yaseBhabhulona itigcabha ‘ngemandla ayo nebukhatikhati bebukhosi bayo’ kunekutsi ivume kutsi nguJehova lokufanele advunyiswe, Nkulunkulu wayenta yahanjelwa yingcondvo. Nasekaphilile, Nebukhadnezari ‘wadvumisa Losetikwako Konkhe’ futsi wavuma kutsi “[Jehova] utawubusa kuze kube phakadze.” Wengeta watsi: “Kute longamvimba.” (Dan. 4:30, 33-35) Umhlabeleli watsi: “Siyajabula sive Nkulunkulu waso lokunguJehova, bantfu labakhetfwe nguye kutsi babe lifa lakhe.” (Hla. 33:12) Leso sizatfu lesihle sekuhlala sicotfo kuJehova! w22.10 15-16 ¶13-15

Tiphrofetho letinyenti lesetigcwalisekile tisenta siciniseke kakhulu kutsi tetsembiso taNkulunkulu letimayelana nesikhatsi lesitako nato titawugcwaliseka. Sitiva ngendlela lativa ngayo umhlabeleli ngesikhatsi athantaza kuJehova atsi: “Ngiyakulangatelela kusindziswa nguwe, ngobe ngetsembele evini lakho.” (Hla. 119:81) EBhayibhelini, Jehova usinika ‘likusasa lelihle kanye nelitsemba.’ (Jer. 29:11) Litsemba letfu ngelikusasa lisekelwe etetsembisweni taJehova, hhayi kuloko bantfu labetama kukwenta. Shengatsi singachubeka senta lokusemandleni etfu kuze siletsembe kakhulu liVi laNkulunkulu ngekutsi sidadishe tiphrofetho talo. Lesinye sizatfu lesingasenta siletsembe liBhayibheli kutsi liyabasita bantfu nabasebentisa seluleko salo. (Hla. 119:66, 138) Sibonelo nje, labanye labashadene lebesebalungele kudivosa, nyalo bajabulile ngobe basebentise seluleko seliBhayibheli. Bantfwana babo bajabulile njengobe bakhulela ekhaya lelinelutsandvo futsi bativa bavikelekile. Ef. 5:22-29. w23.01 5 ¶12-13

Cabanga ngekutsi uzuze njani ngekugcwaliseka kwetetsembiso letiseVini laNkulunkulu. Sibonelo nje, Jesu wetsembisa kutsi Babe wakhe utakupha tintfo lotidzingile kuze uphile. (Mat. 6:32, 33) Jesu uphindze wakucinisekisa kutsi Jehova utakupha umoya wakhe longcwele nangabe uwucela. (Luk. 11:13) Jehova utifezile letetsembiso. Kungenteka nawe ucabanga ngaletinye tetsembiso lombone atifeza ekuphileni kwakho. Sibonelo nje, wetsembisa kukucolela, kukudvudvuta futsi akunike loko lokudzingako kuze uhlale usondzelene naye. (Mat. 6:14; 24:45; 2 Khor. 1:3) Nangabe ucabangisisa ngaloko Nkulunkulu lakwentele kona nyalo, utawuciniseka mbamba kutsi utakwenta loko lakwetsembise kona esikhatsini lesitako. Siyaciniseka kutsi Jehova utatifeza tetsembiso takhe. Umhlabeleli wabhala watsi “uyajabula . . . loyo lowetsembele kuJehova Nkulunkulu wakhe, . . . Yena uhlale etsembekile.”​—Hla. 146:5, 6. w22.10 27 ¶15; 28 ¶17

Lesiphrofetho lesimayelana nekubuyiselwa kwekukhonta lokuhlantekile siyasebenta yini lamuhla? Yebo! Kanjani? Kusukela nga-1919 C.E., tigidzi tebantfu tikhululekile ekugcilatweni yiBhabhulona Lenkhulu, lokungumbuso wemhlaba wenkholo yemanga. Ticondziswe endzaweni lencono kakhulu kuneLive Lesetsembiso lelanikwa ema-Israyeli. Ticondziswe epharadisi lelingumfanekiso. (Isa. 51:3; 66:8) Kusukela nga-1919 C.E., labagcotjiwe bebahlala epharadisi lelingumfanekiso. Njengobe sikhatsi sichubeka, nalabo labanelitsemba lekuphila emhlabeni, ‘lokunguletinye timvu,’ nabo babese bayahlala kulendzawo lengumfanekiso futsi batfola tibusiso letinyenti. (Joh. 10:16; Isa. 25:6; 65:13) Lelipharadisi lelingumfanekiso lisemhlabeni wonkhe. Lamuhla, ngisho nobe sihlala kuphi, singaba sepharadisi lelingumfanekiso nangabe nje sisekela kukhonta kweliciniso. w22.11 11-12 ¶12-15

Ukutfola kumatima yini kucondza kutsi Jehova bekasolo akhona “kuze kube phakadze”? (Isa. 40:28) Bantfu labanyenti bakutfola kumatima kukucondza loku. Naku Elihu lakusho ngaNkulunkulu: ‘Iminyaka yakhe angeke siyicondze.’ (Jobe 36:26) Kodvwa kungacondzi intfo letsite akusho kutsi ingemanga. Sibonelo nje, kusenekwenteka asicondzi kutsi kubakhona njani kukhanya, kodvwa loko kusho kutsi kute yini kukhanya? Cha! Ngendlela lefanako, kusenekwenteka tsine bantfu singacondzi kutsi kwenteka njani kutsi Jehova abekhona phakadze futsi achubeke akhona kuze kube phakadze. Kodvwa loko akusho kutsi Nkulunkulu akaphili kuze kube phakadze. Liciniso lelimayelana neMdali aliyi ngaloko lesikucondzako nobe lesingakucondzi. (Rom. 11:33-36) Ngetulu kwaloko, waba khona ngaphambi kwekutsi tibe khona letinye tintfo, lokufaka ekhatsi imitfombo yekukhanya, njengelilanga. Waba khona ngaphambi kwekutsi ‘endlale emazulu.’​—Jer. 51:15. w22.12 2-3 ¶3-4

Ngaletinye tikhatsi sihle sicelwa kutsi simelele labanye ngemthantazo. Sibonelo nje, dzadze lodadisha liBhayibheli nalotsite angahle acele lomunye dzadze lahamba naye kutsi athantaze. Ngenca yekutsi lodzadze akamati kahle lomfundzi, mhlawumbe angatsandza kuthantaza ekupheleni kwalesifundvo, ngaleyo ndlela utawube sekati kutsi yini langayisho emthantazweni mayelana nemfundzi. Umzalwane angahle acelwe kutsi athantaze emhlanganweni longaphambi kwekuyoshumayela nobe emhlanganweni welibandla. Bazalwane labanikwa lesabelo kufanele bakhumbule injongo yalomhlangano. Umthantazo akukafaneli usetjentiselwe kweluleka libandla nobe kusho timemetelo. Emihlanganweni yelibandla leminyenti, ingoma nemthantazo kufanele kutsatse imizuzu lesihlanu, ngako umzalwane lothantazako kufanele ‘angakhulumi tintfo letinyenti,’ ikakhulukati ekucaleni kwemhlangano.​—Mat. 6:7. w22.07 24 ¶17-18

Jesu watsi ngemalanga ekugcina kutawuba netifo letingumshayabhuce, nobe tifo letitsatselwanako “etindzaweni letehlukahlukene.” (Luk. 21:11) Kukwati loko kusisita njani kutsi sibe nekuthula? Asimangali nasibona kubhedvuka tifo. Siyabona kutsi kwenteka kona kanye loko Jesu latsi kutawenteka. Ngako sitawulalela seluleko Jesu lasinika labo labaphila emalangeni ekugcina lesitsi: “Akukafaneli nesabe.” Kungenteka kubhedvuka kwesifo kwente ungasakhoni kutenta kahle tonkhe letinye tintfo bewutenta, kodvwa ungakuvumeli kuphatamise luhlelo lwakho lwekutidadishela liBhayibheli nobe lwekubakhona emihlanganweni yelibandla. Tindzaba letenteke mbamba letitfolakala etincwadzini tetfu nakuma-video titakukhumbuta kutsi bazalwane bakho nabodzadze bayachubeka bakhonta Jehova ngekwetsembeka ngisho babhekene netimo letifana netakho. w22.12 17 ¶4, 6

Jakobe bekangafihli kutsi uyitsandza kakhulu indvodzana yakhe lenguJosefa. (Gen. 37:3, 4) Loko kwenta banakaboJosefa labadzala kutsi babe nemona. Batsi nabatfola litfuba, batsengisa Josefa kulelinye licembu lebakaMidiyani lebelibatsengisi. Labatsengisi bamtsatsa baya naye eGibhithe, lokuyindzawo lebeyikhashane ngemakhulu emakhilomitha. Nabefika lapho, bamtsengisa kuPhotifari, lobekayindvuna yabogadzi baFaro. Kuphila kwaJosefa kwashintja ngekushesha, kwasuka ekubeni yintsandvokati yababe wakhe, waba sigcili saseGibhithe! (Gen. 39:1) Singahle sibhekane netinkinga letehlela nalabanye bantfu, lokusho kutsi singaba netinkinga bonkhe bantfu lababa nato. (1 Khor. 10:13) Nobe singahlupheka ngenca yekutsi sibafundzi baJesu. Sibonelo saloko kutsi kungahlekiswa ngatsi, siphikiswe futsi singaze siphatfwe kabi ngenca yekukholwa kwetfu. (2 Thim. 3:12) Kunobe nguyiphi inkinga lobhekana nayo, Jehova angakwenta uphumelele. w23.01 14-15 ¶3-4

Ngalesinye sikhatsi singahle sibone ngatsi kufanele siyokhuluma nemzalwane nobe dzadze losiphetse kabi. Kodvwa ngaphambi kwekutsi sente njalo, kufanele sicale sitibute imibuto lenjengaletsi: ‘Nginawo onkhe yini emaciniso endzaba?’ (Taga 18:13) ‘Kusenekwenteka yini kutsi bekangakahlosi kungivisa buhlungu?’ (Shu. 7:20) ‘Ngikile yini nami ngalenta liphutsa lelifanako?’ (Shu. 7:21, 22) ‘Nangingetama kukhuluma naye, kusenekwenteka yini lenkinga ibe yinkhulu kakhulu?’ Nasitinika sikhatsi sekucabanga ngalemibuto, singahle sibone kutsi indlela lesimtsandza ngayo umzalwane wetfu nobe dzadze yenta singakunaki loku lokwentekile. Nguloyo naloyo kitsi uyakhombisa kutsi sibalandzeli baJesu nasibatsandza bazalwane betfu nabodzadze ngisho benta emaphutsa. Nasikhombisa lolutsandvo, labanye bangakhona kuyibona inkholo yeliciniso futsi bakhonte Jehova Nkulunkulu welutsandvo kanye natsi. Shengatsi singatimisela kuchubeka sikhombisa lutsandvo labonakala ngalo emaKhristu eliciniso. w23.03 31 ¶18-19

LiBhayibheli lisisita sibone kutsi buntfu baJehova lobuhamba embili lutsandvo. Ngenca yekutsi Jehova uyasitsandza, akazange asinike lwati lolunyenti kakhulu lolutawuba ngetulu kwetfu. (Joh. 21:25) Jehova uphindze wakhombisa kutsi uyasitsandza ngekutsi akhulume natsi ngendlela leveta kutsi uyasihlonipha. EBhayibhelini, akasiniki luhla loludze lwemitsetfo lwako konkhe lokufanele sikwente nalokungakafaneli sikwente. Kunaloko usebentisa tindzaba letenteke mbamba, tiphrofetho kanye neseluleko lesilusito kuze asisite sente tincumo letikahle. Ngaleyondlela, liVi laNkulunkulu lenta kutsi simtsandze futsi simlalele ngalokusuka enhlitiyweni. LiBhayibheli liveta kutsi Jehova usikhatsalela kakhulu. Kanjani? Linetindzaba letinyenti letiveta indlela bantfu labativa ngayo. Siyayicondza indlela lebebativa ngayo ngobe bebabantfu ‘labanemiva lefana neyetfu.’ (Jak. 5:17) Lokubaluleke kakhulu kutsi nasibona indlela Jehova labaphatsa ngayo, sibese sibona ngalokucacile kutsi “Jehova unelutsandvo lolukhulu futsi unemusa.”​—Jak. 5:11. w23.02 6 ¶13-15

Livesi lekucala encwadzini yekugcina yeliBhayibheli litsi: “Lesi sembulo saJesu Khristu, Nkulunkulu lamnika sona kuze akhombise tinceku takhe tintfo letitawenteka masinyane.” (Semb. 1:1) Ngako sinendzaba netintfo letentekako kulelive futsi siyafuna kwati kutsi tisigcwalisa njani siphrofetho seliBhayibheli. Ngetulu kwaloko, kungenteka siyakutsandza kucoca ngako nalabanye. Nangabe sicoca ngetiphrofetho teliBhayibheli kufanele sikugweme kucagela kutsi kutakwentekani. Leni? Ngobe asifuni kusho intfo letawukwenta kubebete bunye ebandleni. Sibonelo nje, kungenteka sive baholi bemave bakhuluma ngekutsi bangakucatulula njani kungevani lokutsite futsi baletse kuthula nekulondzeka. Kunekutsi sicagele kutsi emavi lanjalo agcwalisa siphrofetho lesiku-1 KubaseThesalonika 5:3, kufanele sihambisane nekwatiswa kwakamuva lokushicilelwe. Nangabe sicoca ngetintfo letishicilelwe yinhlangano yaJehova, sitawukwenta kutsi libandla lihlale ‘licabanga ngendlela lefanako.’​—1 Khor. 1:10; 4:6. w23.02 16 ¶4-5

Yini lekwenta umtsandze Jesu Khristu? Jesu uyalitsandza liciniso, kutfobeka nekulunga. Nangabe ulitsandza liciniso nekulunga, loko kusho kutsi uyamtsandza naJesu Khristu. Cabanga ngendlela Jesu lalimelela ngayo ngesibindzi liciniso nekulunga. (Joh. 18:37) Kodvwa yini lekhombisa kutsi uyakutsandza kutfobeka? Jesu ukhombise ngesibonelo sakhe kutsi utfobekile. Sibonelo nje, lonkhe ludvumo uluyisa kuBabe wakhe, akwenteki atidvumise yena. (Mak. 10:17, 18; Joh. 5:19) Utiva njani ngekutfobeka kwaJesu? Akukwenti yini kutsi uyitsandze leNdvodzana yaNkulunkulu futsi ufune kuba ngumlandzeli wayo? Siyaciniseka kutsi kunjalo. Yini leyenta Jesu atfobeke? Kungobe ulingisa Babe wakhe lotfobekile futsi uyamtsandza. (Hla. 18:35; Heb. 1:3) Loku akukwenti yini usondzelane naJesu lobuveta kahle buntfu baJehova? w23.03 3-4 ¶6-7

LiBhayibheli likhuluma ngemacembu lamabili ebantfu labatawuvuswa labanelitsemba lekuphila phakadze emhlabeni, ‘lokungulabalungile’ “nalabangakalungi.” “Labalungile” ngulabo labakhonte Jehova ngekwetsembeka basaphila. Kantsi ‘labangakalungi’ abazange bakhonte Jehova ngekwetsembeka. Kodvwa ngenca yekutsi omabili lamacembu atawuvuswa, loko kusho kutsi emagama abo abhaliwe yini encwadzini yekuphila? Emagama alabo “labalungile” abhalwa encwadzini yekuphila ngaphambi kwekutsi bafe. Asuswa yini encwadzini yekuphila nabafa? Cha, ngobe Jehova solo uyabakhumbula. Jehova “unguNkulunkulu walabaphilako, hhayi walabafile, ngobe ngekwembono wakhe bonkhe bayaphila.” (Luk. 20:38) Loko kusho kutsi nakuvuswa labalungile, emagama abo atawube abhaliwe kulencwadzi, kodvwa atawube abhalwe “ngempenseli.”​—Luk. 14:14. w22.09 16 ¶9-10

Jehova bekafuna kutsi Adamu ayijabulele indalo. Ngesikhatsi amdala, wamnika lipharadisi lelihle kutsi ahlale kulo, wamnika nemsebenti wekutsi alinakekele aphindze alandzise. (Gen. 2:8, 9) Cabanga nje kutsi Adamu bekajabula kangakanani nakabona tinhlanyelo tihluma netimbali tichakaza. Bekungumsebenti lokhetseke kakhulu kunakekela ingadze yase-Edeni! Jehova waphindze wamcela kutsi etse tilwane. (Gen. 2:19, 20) Jehova bekangatetsa letilwane kodvwa wawunika Adamu lomsebenti. Siyaciniseka kutsi ngaphambi kwekutsi atetse, Adamu bekatibukisisa kuze abone kutsi tibukeka njani nekutsi titenta njani tintfo. Siyaciniseka nekutsi Adamu bekawujabulela lomsebenti. Wamsita wacondza kutsi Jehova uhlakaniphe kakhulu nekutsi tintfo latidalile tiyakhanga futsi tinhle. w23.03 15 ¶3

Umbuso wemaNgisi nemaMelika lomelelwa tinyawo talesitfombe, ungumbuso wekugcina wemhlaba lokwaphrofethwa ngawo eBhayibhelini. (Dan. 2:31-33) Kute lomunye umbuso wemhlaba lotawulandzela. Kunaloko, nge-Amagedoni, uMbuso waNkulunkulu utawubhubhisa lombuso wemhlaba kanye nabo bonkhe bohulumende bebantfu. (Semb. 16:13, 14, 16; 19:19, 20) Sisisita njani lesiphrofetho? Siphrofetho saDanyela sisinika lobunye bufakazi bekutsi siphila emalangeni ekugcina. Eminyakeni lengetulu kwa-2 500 leyendlulile, Danyela waphrofetha kutsi ngemuva kweBhabhulona, bekutawuba nemibuso yemhlaba lemine lebeyitawubatsintsa ngalokucondzile bantfu baNkulunkulu. Ngetulu kwaloko, waveta kutsi uMbuso Wemhlaba wemaNgisi nemaMelika, bewutawuba ngumbuso wekugcina. Loku kuyasidvudvuta futsi kusinika litsemba lekutsi ngekushesha uMbuso waNkulunkulu utawubhubhisa bonkhe bohulumende bebantfu futsi kube ngiwo lobusa emhlabeni. w22.07 4 ¶9; 5 ¶11-12