June

Jobe bekanebuhlobo lobuhle naJehova. Bekanemndeni lomkhulu, lonebunye futsi anjinge kakhulu. (Jobe 1:1-5) Kodvwa ngelilanga linye nje, Jobe walahlekelwa cishe ngiko konkhe lebekanako. Wacale walahlekelwa yimfuyo yakhe. (Jobe 1:13-17) Ngemuva kwaloko, washonelwa ngibo bonkhe bantfwana bakhe. Cabanga ngekumangala, buhlungu lobukhulu nekudvumateka lokukhulu Jobe nemkakhe labakuva ngesikhatsi batjelwa kutsi bonkhe bantfwana babo labangu-10 bashonile. Bekafutile Jobe kudzabula ingubo yakhe alila nekuguca emhlabatsini! (Jobe 1:18-20) Sathane wenta Jobe waba nesifo lesibuhlungu nalesamenta walahlekelwa sitfunti. (Jobe 2:6-8) Ngaphambi kwaloku, Jobe bekahlonishwa endzaweni. Bantfu bebacela kuye seluleko. (Jobe 31:18) Kodvwa nyalo besebambalekela. Bekangasafunwa ngisho nabomnakabo, bangani bakhe labakhulu kanye netisebenti takhe!​—Jobe 19:13, 14, 16. w22.06 21 ¶5-6

Ngemuva kwekubhajatiswa, sonkhe kufanele sisilalele seluleko semphostoli Pawula lasinika base-Efesu. Wakhutsata lamaKhristu kutsi ‘akhule ngalokwenele.’ (Ef. 4:13) Bekufana nekutsi utsi: ‘Chubekani nitfutfuka.’ Umtsandza kakhulu Jehova. Kodvwa indlela lomtsandza ngayo ingachubeka ikhula. Kanjani? Umphostoli Pawula wakhuluma ngalenye indlela KubaseFiliphi 1:9. Pawula wathantazela kutsi lutsandvo lwemaKhristu aseFiliphi “lukhule kakhulu.” Ngako ingakhula indlela lesimtsandza ngayo Jehova. Loko singakwenta ngekutsi sitfole ‘lwati lolungulonalona nekucondza lokuphelele.’ Nasichubeka simati Jehova, sitamtsandza kakhulu futsi sitawubonga ngebuntfu bakhe nangendlela lenta ngayo tintfo. Sitawuba nesifiso lesikhulu sekumjabulisa futsi sitawukwenta konkhe lesingakwenta kuze singamdvumati. Sitawusebenta kamatima kuze sati intsandvo yakhe futsi siyente. w22.08 2-3 ¶3-4

Tintfo letibhalwe encwadzini yeSembulo atikabhalelwa bonkhe bantfu, kodvwa tibhalelwe tinceku taNkulunkulu. Njengobe sibantfu baNkulunkulu, akukafaneli kusimangalise kutsi sinencenye ekugcwalisekeni kwaletiphrofetho letikulencwadzi. Umphostoli Johane washo kutsi letiphrofetho titawugcwaliseka nini. Watsi: “Ngekuphefumulelwa ngumoya, ngaba selangeni leNkhosi.” (Semb. 1:10) Ngesikhatsi Johane abhala lamavi ngabo-96 C.E., ‘lilanga leNkhosi’ belisekhashane kakhulu. (Mat. 25:14, 19; Luk. 19:12) Kodvwa ngekusho kwesiphrofetho seliBhayibheli, lelilanga lacala nga-1914 ngesikhatsi Jesu abekwa kutsi abe yiNkhosi ezulwini. Kusukela ngaloyo mnyaka, tiphrofetho letikuSembulo letitsintsa bantfu baNkulunkulu tacala kugcwaliseka. Nyalo ‘siselangeni leNkhosi’!​—Semb. 1:3. w22.05 2 ¶2-3

Lesilwane sesiganga kanye nemphrofethi wemanga, bobabili bajikwa basaphila echibini lemlilo lelivutsa sibabule. Letitsa taNkulunkulu titawubhujiswa phakadze tisabusa. Kusho kutsini loku kitsi? Njengobe singemaKhristu, kufanele setsembeke kuNkulunkulu naseMbusweni wakhe. (Joh. 18:36) Kuze sente njalo, kufanele singatingeneli tindzaba tepolitiki talelive. Kodvwa kungahle kube matima loko ngobe bohulumende balelive bayasiphocelela kutsi sibasekele ngalesikushoko nangalesikwentako. Labo labavuma kusekela labohulumende babekwa luphawu lwesilwane sesiganga. (Semb. 13:16, 17) Kodvwa Jehova angeke abemukele labo labemukela loluphawu, futsi angeke bakutfole kuphila lokuphakadze. (Semb. 14:9, 10; 20:4) Ngako kubalulekile kutsi ngamunye wetfu angatingeneli tindzaba tepolitiki ngisho nobe sicindzetelwa kangakanani! w22.05 10-11 ¶12-13

Lomunye umgomo longatibekela wona kufundza likhono lelilusito. Nangabe setama kutfutfukisa emakhono etfu, sitawukhona kwenta naleminye imisebenti. Cabanga kutsi kudzingeka tisebenti letinyenti kanganani kuze kwakhiwe takhiwo taseBethel, emaHholwa eMhlangano nemaHholwa eMbuso. Linyenti laletisebenti lifundze lamakhono ngekusebenta nebazalwane lasebanesikhatsi benta lomsebenti. Labazalwane nalabodzadze bafundza emakhono ladzingekako kuze banakekele emaHholwa eMhlangano nemaHholwa eMbuso. Jehova Nkulunkulu, ‘loyiNkhosi yaphakadze’ naKhristu Jesu, ‘loyiNkhosi . . . yemakhosi,’ bafeza lokunyenti ngaletindlela kanye naletinye basebentisa tisebenti letinelikhono. (1 Thim. 1:17; 6:15) Sifuna kusebenta kamatima futsi sisebentise emakhono etfu kuze sidvumise Jehova hhayi kutsi sitifunele tsine ludvumo.​—Joh. 8:54. w22.04 24 ¶7; 25¶11

Solomoni bekanjinge kakhulu futsi bekaphila ntofontofo. (1 Khos. 10:7, 14, 15) Ngalokwehlukile, Jesu bekanetintfo letimbalwa futsi bekete likhaya lelitsi wele yena. (Mat. 8:20) Nobe kunjalo, omabili lamadvodza bekanembono lokahle ngemali ngobe kuhlakanipha kwawo bekuvela kuJehova Nkulunkulu. Solomoni wavuma kutsi ngemali siyakhona kutsenga tintfo lesitidzingako, naletinye tintfo lesitifunako. Nanobe Solomoni bekanjingile, wabona kutsi kunaletinye tintfo letibaluleke kakhulu kunemali. Sibonelo nje, wabhala watsi: “Kuncono kuba neligama lelihle [nobe ‘lidvumela lelihle,’ umbhalo longentasi] kunekutsi unjinge kakhulu.” (Taga 22:1) Solomoni waphindze wabona kutsi bantfu labatsandza imali abakavami kujabula ngaloko labanako. (Shu. 5:10, 12) Ngetulu kwaloko, wecwayisa kutsi singalibeki lonkhe litsemba letfu emalini ngobe imali ingasheshe iphele.​—Taga 23:4, 5. w22.05 21 ¶4-5

Nasicabangisisa ngetintfo Jehova lasibusisa ngato nyalo, buhlobo betfu naye butawucina. Ngetulu kwaloko, nasicabangisisa ngetibusiso latawusipha tona esikhatsini lesitako, loko kutawulenta licine litsemba letfu lekumkhonta kuze kube phakadze. Konkhe loku kutawenta kutsi sichubeke sikhonta Jehova sibe sijabulile nyalo. Jehova “utawusukuma” futsi avikele bantfu bakhe nakabhubhisa lelive lelibi. Siyaciniseka kutsi Jehova, ‘longuNkulunkulu lowehlulela ngekulunga,’ angeke avume kutsi lelive laSathane lengce sikhatsi lasibekile, angeke avume kutsi lengce nangelilanga linye. (Isa. 25:9) Lelilanga lekukhululwa sililindzele ngesineke sikanye naJehova kutsi lifike. Njengobe sisengakefiki leso sikhatsi, sitimisele kuchubeka sithantaza, sidadisha liVi laNkulunkulu futsi sikusebentisa loko lesikufundzako, ngetulu kwaloko sicabangisise ngetibusiso lesititfolako. Nasenta njalo, Jehova utasisita kutsi sicinisele sibe sijabulile ekumkhonteni. w22.11 13 ¶18-19

Nanobe liBhayibheli lingasitjeli ngekubhajatiswa kwaThimothi, kodvwa siyaciniseka kutsi make wakhe lokunguYunisi, wajabula kakhulu ngalelo langa. (Taga 23:25) Yunisi waphumelela kufundzisa indvodzana yakhe kutsi itsandze Jehova kanye naJesu Khristu, nanobe bekulukhuni. Batali baThimothi bebasetinkholweni letingafani. Babe wakhe bekangumGriki, kani makwakhe nagogo wakhe bebangemaJuda. (Imis. 16:1) Kungenteka Thimothi bekaseminyakeni yekutfomba ngesikhatsi Yunisi naLowisi baba ngemaKhristu. Kodvwa babe wakhe akazange abe ngumKhristu. Bekatawukhetsa yiphi inkholo Thimothi? Ngendlela lefanako, bomake labangemaKhristu lamuhla bayayitsandza imindeni yabo. Bakufuna kakhulu kusita bantfwababo kutsi babe nebuhlobo lobuhle naJehova. Nkulunkulu uyajabula ngemetamo yabo. (Taga 1:8, 9) Jehova usite bomake labanyenti kutsi bafundzise bantfwana babo kutsi bamtsandze nekutsi bamkhonte. w22.04 16 ¶1-3

Ngekushesha Jehova utakufaka etinhlitiyweni talabohulumende kutsi ‘bente injongo yakhe.’ Utawuba yini umphumela? Labohulumende, ‘lokungemakhosi langu-10,’ batawuhlasela tinhlangano tetinkholo temanga futsi baticedze nya! (Semb. 17:1, 2, 12, 16) Sati njani kutsi kubhujiswa kweBhabhulona Lenkhulu sekusedvute? Kuze siphendvule lombuto, kungasisita kukhumbula kutsi iBhabhulona yasendvulo beyivikelwe nangemanti eMfula lomkhulu iYufrathe. Incwadzi yeSembulo ifananisa tigidzi tebantfu labasekela iBhabhulona Lenkhulu ‘nemanti’ lasivikelo. (Semb. 17:15) Iphindze ivete kutsi lamanti ‘atawusha,’ lokukhombisa kutsi bantfu labanyenti batawuyekela kusekela lombuso wemhlaba wenkholo yemanga. (Semb. 16:12) Lamuhla, lesiphrofetho siyagcwaliseka ngobe bantfu labanyenti abasayi emasontfweni futsi sebatifuna kuletinye tindzawo tisombululo tetinkinga tabo. w22.07 5-6 ¶14-15

Nasicolela sisuke sikhombisa kutsi siyabonga. Kulomunye umfanekiso, Jesu wafananisa Jehova nenkhosi leyasula sikweleti lesikhulu sesisebenti sayo lebesingasakhoni kusibhadala. Nanobe kunjalo, lesisebenti sehluleka kukhombisa umusa lesinye sisebenti lebesisikweleta imali lencane. (Mat. 18:23-35) Yini Jesu lebekasifundzisa yona? Nangabe sibonga mbamba ngemusa lomkhulu Jehova lasikhombisa wona, natsi sitabacolela labanye. (Hla. 103:9) Eminyakeni leminyenti leyendlulile, Sicongosekulindza satsi: “Ngisho nobe singabacolela tikhatsi letinyenti kangakanani labanye, loko akuyoze kulingane nendlela Nkulunkulu lasicolela ngayo nalasikhombisa ngayo umusa ngaKhristu.” Labo labacolelako nabo batawucolelwa. Jehova ubakhombisa umusa labo labanemusa. (Mat. 5:7) Jesu wakwenta kwacaca loko ngesikhatsi afundzisa bafundzi bakhe kuthantaza.​—Mat. 6:14, 15. w22.06 10 ¶8-9

Jesu weta emhlabeni angumuntfu, futsi wabuveta kahle buntfu baBabe wakhe. (Joh. 14:9) Ngaye, sesiyamati Jehova Nkulunkulu futsi sesiyamtsandza. Kuphindze kusisite loko lakufundzisa nendlela lacondzisa ngayo libandla lebuKhristu lamuhla. Usifundzisile kutsi singaphila njani ngendlela letawenta semukelwe nguJehova. Ngenca yekutsi Jesu wafa, sonkhe siyazuza kuko. Ngesikhatsi sekavusiwe, wanikela ngengati yakhe yaba ngumhlatjelo lote sono ‘lesihlanta kuto tonkhe tono.’ (1 Joh. 1:7) Nyalo uyiNkhosi lekhatimulako lengeke ife. Ngekushesha, Jesu utawufihlita inhloko yenyoka. (Gen. 3:15) Bantfu baNkulunkulu batawujabula kakhulu nakubhujiswa Sathane! Kodvwa njengobe kusengakenteki loko, ungalilahli litsemba. Nkulunkulu wetfu wetsembekile. Utawuletsela “tonkhe tive temhlaba” tibusiso letinyenti kakhulu. w22.07 18 ¶13; 19 ¶19

Kufanele silungele nobe yini nasitibekela imigomo. Leni? Ngobe angeke sikhone kutilawula ngalokuphelele timo tetfu. Nasi sibonelo, umphostoli Pawula wasita ekusunguleni libandla eThesalonika. Kodvwa labo labaphikisako baphocelela Pawula kutsi ahambe kulelidolobha. (Imis. 17:1-5, 10) Kube wahlala, bekatawubeka bazalwane bakhe engotini, kodvwa akazange aphele emandla. Kunaloko wavumelana nalesimo. Ngekuhamba kwesikhatsi, watfumela Thimothi kutsi ayosita lamaKhristu lebekasemasha aseThesalonika kutsi abe nekukholwa lokucinile. (1 Thes. 3:1, 2) LamaKhristu ajabula kakhulu! Singafundza lokutsite kuloko lokwenteka kuPawula eThesalonika. Kungenteka sitibekele umgomo lotsite, kodvwa timo letingetulu kwemandla etfu tiyasivimbela kutsi siwufinyelele. (Shu. 9:11) Nangabe usesimeni lesinjalo, tibekele lomunye umgomo longakhona kuwufinyelela. w22.04 25-26 ¶14-15

Jehova uyasidvudvuta ngekutsi asinikete litsemba ngelikusasa. Cabanga nganaku lokushiwo liBhayibheli lokungasidvudvuta nasibhekene netinkinga. EmiBhalweni, Jehova uyasicinisekisa kutsi kute ‘lokungasehlukanisa nelutsandvo lwakhe,’ ngisho netinkinga letimatima imbala. (Rom. 8:38, 39) Uphindze asicinisekise kutsi ‘usedvute nabo bonkhe labambita’ ngemthantazo. (Hla. 145:18) Jehova usitjela kutsi nasetsembela kuye, sitawukhona kubeketelela nobe ngabe nguyiphi inkinga futsi sijabule. (1 Khor. 10:13; Jak. 1:2) LiVi laNkulunkulu liphindze lisikhumbute kutsi tinkinga lesibhekana nato tesikhashana naticatsaniswa netibusiso lesitatitfola kuze kube phakadze. (2 Khor. 4:16-18) Jehova uyasicinisekisa kutsi utawususa loku lokusibangela letinkinga, lokunguSathane Develi nalabo lababi njengaye. (Hla. 37:10) Akhona yini emavesi ladvudvutako laseBhayibhelini lowabambe ngenhloko latakusita ukhone kubhekana netinkinga esikhatsini lesitako? w22.08 11 ¶11

Kuyenteka yini utibute kutsi utawukhona yini kuchubeka uphila ngetimiso taJehova letilungile lilanga nelilanga, umnyaka nemnyaka? Jehova wasetsembisa kutsi kulunga kwetfu kutawufana “nemagagasi elwandle.” (Isa. 48:18) Ase uticabange ume elusentseni lwelwandle ubuka emagagasi njengobe ahamba, lelinye ngemuva kwalelinye. Njengobe usemile futsi ubuka, kungenteka yini ukhatsateke ngekutsi ngalelinye lilanga angeke abe khona lamagagasi? Cha! Uyati kutsi akuyuze kwenteke kutsi angabi khona. Kulunga kwakho kungafana nemagagasi elwandle! Kanjani? Nakufanele wente sincumo, cale utibute kutsi yini Jehova lafuna kutsi uyente. Bese uyakwenta. Ngisho nobe kumatima kangakanani kwenta lesincumo, Babe wakho wasezulwini lokutsandzako utawuhlale akulungele kukunika emandla futsi akusite kutsi uchubeke wenta lokulungile onkhe malanga.​—Isa. 40:29-31. w22.08 30 ¶15-17

Sathane utawukhululwa nakuphela iminyaka lengu-1 000. Utawubese wetama kudukisa bantfu labete sono. Ngaleso sikhatsi, bonkhe bantfu lebete sono emhlabeni batawuba nelitfuba lekukhombisa ngalokucacile kutsi bayalihlonipha yini libito laNkulunkulu nekutsi bayakusekela yini kubusa kwakhe. (Semb. 20:8-10) Indlela bantfu labatawenta ngayo ngaleso sikhatsi itawukhombisa kutsi emagama abo angabhalwa yini nge-inki encwadzini yekuphila. LiBhayibheli lisitjela kutsi labanye angeke betsembeke futsi batawulingisa bo-Adamu na-Eva, nabo angeke bakwemukele kubuswa nguJehova. Yini letakwenteka kubo? Sembulo 20:15 sitsi: “Nobe ngubani lobekangakabhalwa encwadzini yekuphila wajikwa kulelichibi lemlilo.” Ngako bantfu labatawuvukela batawubhujiswa ngalokuphelele. Kodvwa linyenti lebantfu labete sono litawetsembeka kuJehova ngesikhatsi sekuvivinywa kwekugcina. w22.09 23-24 ¶15-16

Labanye kumaKhristu ekucala bebatsi bantfu betive labagucukele enkholweni yebuKhristu kufanele basoke kuze emaJuda angamelani nabo. (Gal. 6:12) Umphostoli Pawula bekangavumelani mbamba nalombono, kodvwa kunekutsi aphocelele labazalwane kutsi bente tintfo ngendlela lebekabona ngayo, watitfoba futsi wendlulisela lendzaba kubaphostoli nakulabadzala belibandla eJerusalema. (Imis. 15:2) Loko kwenta kutsi lamaKhristu achubeke ajabulile futsi kwachubeka kunekuthula ebandleni. (Imis. 15:30, 31) Nangabe kuba nekungevani, singetama kugcina kuthula ngekutsi sifune sicondziso kulabo Jehova lababeke kutsi banakekele libandla. Etikhatsini letinyenti, seluleko lesisekelwe eBhayibhelini singasitfola etincwadzini tetfu nobe sisitfole nasifundza ticondziso letivela enhlanganweni. Sitawube sikhutsata kuthula ebandleni nangabe silalela leticondziso kunekutsi siphocelele labanye kutsi bente loko lesikushoko. w22.08 22 ¶8-9

Ngaletinye tikhatsi sihle sidzinga kutfulula sifuba setfu kumngani wetfu lomkhulu. Kodvwa loko kungahle kube matima. Kungenteka asikakwetayeli kubhobokela labanye futsi kungasivisa buhlungu kakhulu kuva kutsi lomngani ubese ucocela labanye loko lesimtjele kona. Nobe kunjalo, siyajabula nangabe lotsite angayitjeli muntfu indzaba lesimtjele yona! Labadzala belibandla labatiwa ngekutsi bayakhona kugcina imfihlo ‘banjengendzawo yekukhosela nakunemoya.’ (Isa. 32:2) Siyati kutsi singakhululeka sikhulume nalabazalwane ngobe siyaciniseka kutsi loko lesitawubatjela kona batakugcina kuyimfihlo. Asetami kubacindzetela kutsi basitjele tintfo lokungakafaneli basitjele tona. Ngetulu kwaloko, siyababonga bafati balabadzala belibandla labangetami kugubha tindzaba kubayeni babo. Kuyintfo lenhle kutsi umfati walomdzala welibandla angatjelwa tindzaba letiyimfihlo tebazalwane bakhe nabodzadze. w22.09 11 ¶10-11

Siyaciniseka kutsi Jehova utawusindzisa tinceku takhe letetsembekile ‘ngekuhlupheka lokukhulu.’ (Mat. 24:21; Dan. 12:1) Loko utawukwenta ngesikhatsi tive letihlangene, lokutsiwa nguGogi wakaMagogi tihlasela tikhonti takhe letetsembekile emhlabeni wonkhe. Ngisho kungatsiwa kuhlangene onkhe emalunga langu-193 aMhlabuhlangene, atawuba lite nakacatsaniswa naNkulunkulu Lophakeme nelibutfo lakhe lasezulwini! Naku Jehova lasetsembisa kona: “Nakanjani ngitawutenta ngibe mkhulu futsi ngitingcwelise ngiphindze ngitente ngatiwe embikwemehlo etive letinyenti; futsi titawukwati kutsi mine nginguJehova.” (Hez. 38:14-16, 23) Kuhlasela kwaGogi kutawuholela emphini ye-Amagedoni lapho Jehova atawubhubhisa khona ‘emakhosi emhlaba wonkhe.’ (Semb. 16:14, 16; 19:19-21) Nobe kunjalo, “ngulabacotfo bodvwa labatawuhlala emhlabeni, futsi ngulabamsulwa labatawusala kuwo.”​—Taga 2:21. w22.10 16-17 ¶16-17

Asikhoni kufundza tinhlitiyo; ‘nguJehova kuphela lohlolisisa tisusa temuntfu.’ (Taga 16:2) Utitsandza tonkhe tinhlobo tebantfu, nalabakhule ngetindlela letingafani futsi labanemasiko langafani. Ngetulu kwaloko, Jehova usikhutsata kutsi ‘sivule tinhlitiyo tetfu.’ (2 Khor. 6:13) Setama kubatsandza bonkhe bazalwane betfu nabodzadze, hhayi kubehlulela. Loko kusho kutsi akukafaneli sibehlulele nalabo labangasibo boFakazi. Ungasehlulela yini sihlobo sakho ngekutsi utsi: “Lona akayuze alemukele liciniso”? Cha, nawenta njalo utawube wenta umsebenti lokungakafaneli uwente, utawube utibona ulunge kakhulu kunalabanye. Jehova usanike “bantfu kuto tonkhe tindzawo” litfuba lekutsi baphendvuke. (Imis. 17:30) Hlale ukhumbula kutsi labo labatibona balunge kakhulu kunalabanye, abakalungi. Shengatsi indlela lesititsandza ngayo timiso taJehova talokulungile kungasenta sijabule, kukhutsate labanye futsi kubasite basondzelane natsi naNkulunkulu wetfu. w22.08 31 ¶20-22

Singalindzela kutsi labanye bantfu basiphikise nasenta umsebenti wekushumayela. Kungenteka siphikiswe kakhulu esikhatsini lesitako. (Dan. 11:44; 2 Thim. 3:12; Semb. 16:21) Nobe kunjalo, singaciniseka kutsi Jehova utasisita. Yini lesenta sisho njalo? Jehova bekasolo atisita tinceku takhe kutsi tente imisebenti latinikete yona, ngisho nobe beyilukhuni kanganani. Ase sicoce ngemphrofethi Hezekeli, lowashumayela emaJuda lebekatfunjwe eBhabhulona. Bebanjani bantfu bebashunyayelwa nguHezekeli? Jehova watsi ‘bebanenkhani,’ ‘banetinhlitiyo letilukhuni’ futsi ‘bavukela.’ Bebafana nemanyeva futsi bayingoti njengabofecela. Kungako Jehova atjela Hezekeli tikhatsi letinyenti watsi: ‘Ungesabi’! (Hez. 2:3-6) Hezekeli wakhona kwenta umsebenti wakhe ngobe (1) bekatfunywe nguJehova, (2) umoya waNkulunkulu bewumniketa emandla futsi (3) emavi aNkulunkulu acinisa kukholwa kwakhe. w22.11 2 ¶1-2

Tonkhe tintfo letiphilako letadalwa nguJehova emhlabeni betitawugcine tifile, ngaphandle kwebantfu. Wabanika litsemba lelihle lekungafi. Jehova waphindze wadala bantfu baba nesifiso lesikhulu sikuchubeka baphila. LiBhayibheli nalikhuluma ngebantfu litsi Nkulunkulu “ufake . . . nebuphakadze etinhlitiyweni tabo.” (Shu. 3:11) Lesi ngulesinye sizatfu lesenta kufa kube sitsa setfu. (1 Khor. 15:26) Nasigula, sivele semukele lesimo yini futsi singenti lutfo? Cha. Sivame kuya kubodokotela futsi ngalesinye sikhatsi sinatse imitsi kuze selaphe lokugula. Ecinisweni, senta konkhe lesingakhona kukwenta kuze singafi. Ngetulu kwaloko, nakwenteka umuntfu lesimtsandzako ashona, ngisho amncane nobe amdzala, siva buhlungu lobukhulu futsi lobungasheshi kuphela. (Joh. 11:32, 33) Kusebaleni kutsi uMdali wetfu lositsandzako bekangeke asinike sifiso kanye nendlela yekuchubeka siphila kube bekungasiyo injongo yakhe kutsi bantfu baphile kuze kube phakadze. w22.12 3 ¶5; 4 ¶7

Bazalwane betfu labanyenti kungenteka bagule, besabe nobe bative babodvwa kuletikhatsi letimatima. Yetama kukhuluma nebazalwane bakho nabodzadze. Kubhedvuka kwesifo kungahle kudzinge kutsi ukhweshelane nalabanye libanga lelitsite, ngisho unebazalwane bakho nabodzadze. Esimeni lesikanjalo, ungahle utive ngendlela umphostoli Johane lativa ngayo. Bekafuna kubona umngani wakhe Gayusi buso nebuso. (3 Joh. 13, 14) Kodvwa Johane wabona kutsi bekutawuphela sikhatsi lesitsite angakhoni kumbona. Ngako wenta lebekangakhona kukwenta; wabhalela Gayusi incwadzi. Nangabe ungakhoni kuvakashela bazalwane bakho nabodzadze, yetama kuchumana nabo ngaletinye tindlela. Nawuchumana nebazalwane bakho nabodzadze, utawutiva ungasiwedvwa futsi unekuthula. Nawukhatsatekile, khuluma nalabadzala belibandla futsi uvume bakukhutsate.​—Isa. 32:1, 2. w22.12 17-18 ¶6-7

LiBhayibheli liveta kutsi kwaphela sikhatsi tinyawo taJosefa tiboshwe ngetinketane futsi intsamo yakhe iboshwe ngetinsimbi. (Hla. 105:17, 18) Simo saJosefa besiya ngekuba sibi kakhulu. Wasuka ekubeni sigcili lesetsenjwako, waba siboshwa lesibukelwa phansi. Ukile yini waba sesimeni lesibonakala siya ngekuba sibi kakhulu, ngisho nobe uthantaza ngalokuphindzaphindziwe? Kungenteka loko. Jehova akasivikeli kutsi singabhekani netinkinga kulelive lelibuswa nguSathane. (1 Joh. 5:19) Nobe kunjalo, naku longaciniseka ngako: Jehova uyakwati loko lobhekene nako, futsi unendzaba nawe. (Mat. 10:29-31; 1 Phet. 5:6, 7) Ngetulu kwaloko, wetsembisile watsi: “Ngeke ngize ngikushiye, futsi ngeke ngize ngikulahle.” (Heb. 13:5) Jehova angakusita kutsi ubeketelele simo lobhekene naso ngisho nobe kubonakala kute litsemba. w23.01 16 ¶7-8

ImiBhalo iyasicinisekisa kutsi Nkulunkulu wetfu angeke aze asilahle nakwenteka senta emaphutsa. Ema-Israyeli bekona kuJehova tikhatsi letiphindzaphindziwe, kodvwa bekatsi nakaphendvuka mbamba Nkulunkulu awacolele. EmaKhristu ekucala nawo bewati kutsi Nkulunkulu uwatsandza kakhulu. Umphostoli Pawula aphefumulelwe, wakhutsata emaKhristu kutsi ‘atsetselele futsi advudvute’ umuntfu lobekente sono lesikhulu kepha lobesekaphendvukile. (2 Khor. 2:6, 7; 1 Khor. 5:1-5) Kusijabulia kakhulu kutsi Jehova bekangabalahli bantfu bakhe ngenca yekutsi bente emaphutsa! Kunaloko, bekabasita ngelutsandvo, abalungise futsi bekabemukela kutsi baphindze babe bangani bakhe. Wetsembisa kwenta lokufanako nalamuhla kuto tonkhe toni letiphendvukako. (Jak. 4:8-10) LiBhayibheli liveta kuhlakanipha kwaNkulunkulu, kulunga kanye nelutsandvo lwakhe. LiBhayibheli likhombisa kutsi Jehova ufuna simati. Ufuna sibe bangani bakhe. w23.02 7 ¶16-17

Sinetizatfu letivakalako letisenta sibe nendzaba nekutsi lokwentekako kulelive kusigcwalisa njani siphrofetho seliBhayibheli. Sibonelo nje, Jesu washo tintfo lebetitawukwenteka lebetitasisita sibone kutsi kubhujiswa kwalelive laSathane sekusedvute. (Mat. 24:3-14) Umphostoli Phetro wasikhutsata kutsi sinake kugcwaliseka kwesiphrofetho kuze kukholwa kwetfu kuhlale kucinile. (2 Phet. 1:20, 21) Usisita kutsi sibe nembono lokahle nasicabanga ngesiphrofetho seliBhayibheli. Usikhutsata kutsi “sihlale sikukhumbula kuba khona kwelilanga laJehova.” (2 Phet. 3:11-13) Leni? Sizatfu saloko akusiko kutsi sifuna kwati ‘lilanga neli-awa’ Jehova latawuletsa ngalo i-Amagedoni, kodvwa kungenca yekutsi sifuna kusebentisa sikhatsi lesisele kuze ‘kutiphatsa kwetfu kube ngcwele futsi sikhombise kutsi sitinikele kuNkulunkulu.’ (Mat. 24:36; Luk. 12:40) Sifuna kutiphatsa kahle futsi siciniseke kutsi konkhe lesikwentela Jehova sikwenta ngobe simtsandza kakhulu. Kuze sikhone kukwenta loku, kufanele sihlale siticaphele. w23.02 16 ¶4, 6

Kunetintfo lokufanele batente labo labangemalunga ‘aletinye timvu’ kuze bakufanele kuphila ePharadisi. Kufanele sikhombise kutsi sitiva njani ngaJesu. Sibonelo nje, siyakhombisa kutsi simtsandza kangakanani ngendlela lesibaphatsa ngayo banakaboJesu labagcotjiwe. Jesu watsi utawehlulela timvu kuye ngekutsi tibaphetse njani bomnakabo. (Mat. 25:31-40) Singabasekela banakaboKhristu ngekutsi sikhutsale emsebentini wekushumayela newekwenta bafundzi. (Mat. 28:18-20) Kute sidzingo sekutsi silindze size siphile ePharadisi ngaphambi kwekutsi sibe bantfu labafunwa nguJehova eveni lelisha. Kwanyalo singakhombisa kutsi setsembekile ngaloko lesikukhulumako nangaloko lesikwentako, futsi silinganisele kuko konkhe lesikwentako. Singetsembeka kuJehova, kulesishade nabo nakulamanye emaKhristu. Nangabe silalela Jehova nyalo kulelive lelibi, kutawuba melula kumlalela nasesiphila ePharadisi. Ngetulu kwaloko, singafundza emakhono kuze sikhombise kutsi silungela kuyophila ePharadisi. w22.12 11-12 ¶14-16

Njengobe Jesu ayiNkhosi yetfu, siyamtsandza ngobe unguMbusi lokahle kakhulu. NguJehova matfupha lowacecesha iNdvodzana yakhe futsi wayikhetsa kutsi ibe yiNkhosi. (Isa. 50:4, 5) Cabanga nangekutidzela kwaJesu kuze akhombise kutsi uyasitsandza. (Joh. 13:1) Njengobe Jesu ayiNkhosi yakho, kufanele kutsi umtsandze. Wachaza kutsi labo labamtsandza mbamba, lokungulabo lababita ngekutsi bangani bakhe, bakhombisa kutsi bayamtsandza ngekutsi balalele imiyalo yakhe. (Joh. 14:15; 15:14, 15) Kuyintfo lenhle kakhulu kuba ngumngani weNdvodzana yaJehova! Uyati kutsi utfobekile nekutsi umlingisa ncamashi Babe wakhe. Ufundzile kutsi wabapha kudla labalambile, wadvudvuta lebebacindzetelekile futsi waze welapha ngisho nalabagulako. (Mat. 14:14-21) Uyibonile indlela lacondzisa ngayo libandla lamuhla. (Mat. 23:10) Uyati nekutsi utawukwenta tintfo letinyenti esikhatsini lesitako njengobe ayiNkhosi yeMbuso waNkulunkulu. Ungakhombisa njani kutsi uyamtsandza Jesu? Ngekutsi ulingise sibonelo sakhe. Ungacala kukwenta loku ngekutsi utinikele kuJehova futsi ubhajatiswe. w23.03 4 ¶8, 10

Jehova udale tonkhe tintfo letisezulwini naletisemhlabeni naselwandle futsi tonkhe letintfo tiyasifundzisa ngaye. (Hla. 104:24, 25) Cabanga nje nangendlela Nkulunkulu lasidale ngayo. Usente sakhona kutijabulela tintfo letinhle letisendalweni. Usiphe nelikhono lekubona, lekuva, lekutsintsa, lekunambitsa nelekuhogela, lokutintfo lesitidzingako kuze siyijabulele indalo. LiBhayibheli lisitjela ngalesinye sizatfu lesibalulekile sekubukisisa indalo. Isifundzisa ngebuntfu baJehova lobehlukahlukene. (Rom. 1:20) Sibonelo nje, buka tintfo letidalwe nguJehova futsi ubone kutsi tentiwe ngendlela lemangalisako. Atikuveti yini kuhlakanipha kwaNkulunkulu? Cabanga nangekudla lokwehlukahlukene lesikujabulelako. Kubufakazi lobusebaleni bekutsi uyabatsandza bantfu. Nasibona buntfu baJehova etintfweni latidalile, simati kancono futsi sisondzelana kakhulu naye. w23.03 16 ¶4-5

Njengobe lelive liya ngekuba libi kakhulu, kutawuvivinyeka kuletsemba kwetfu liVi laNkulunkulu. Labanye bantfu bangahle betame kusenta singabate kutsi liBhayibheli liliciniso nobe singabate kutsi Jehova ukhetse sisebenti lesetsembekile nalesihlakaniphile kutsi sicondzise bantfu bakhe lamuhla. Kodvwa nangabe siciniseka kutsi akwenteki liVi laJehova lishaye phansi, sitawukhona kumelana nalokuhlaselwa kwekukholwa kwetfu. ‘Sitawutimisela kulalela imiyalo [yaJehova], sitawuhlale siyilalela size siyokufa.’ (Hla. 119:112) ‘Angeke sibe nemahloni’ ekucocela labanye ngeliciniso nekubakhutsata kutsi baphile ngekuvumelana nalo. (Hla. 119:46) Ngetulu kwaloko, sitawukhona kubeketelela netimo letimatima kakhulu, lokufaka ekhatsi kuphatfwa kabi, loko sikwente ‘ngekubeketela nangenjabulo.’ (Khol. 1:11; Hla. 119:143, 157) Leliciniso lisenta sime sicine, sibe nenjongo ekuphileni, futsi liyasicondzisa kulelive lelididekile naleligcwele siphitsiphitsi. Lisinika litsemba lekutsi sitawuba nelikusasa lelihle nasekubusa uMbuso waNkulunkulu. w23.01 7 ¶16-17

Ngebusuku lobungaphambi kwekufa kwakhe, Jesu wathantaza sikhatsi lesidze athantazela bafundzi bakhe, acela Babe wakhe kutsi ‘abavikele ngenca yalomubi.’ (Joh. 17:15) Loku bekukhombisa kutsi Jesu bekabatsandza kakhulu! Nanobe besekusele kancane kutsi avivinywe kamatima, kodvwa bekakhatsateke ngebaphostoli bakhe. Sisuke silingisa Jesu nasingacabangi nje kuphela ngaloko lokudzingwa ngitsi, futsi sihlale sibathantazela bazalwane betfu nabodzadze. Nasenta njalo, sisuke silalela umyalo waJesu wekutsi sitsandzane, futsi sisuke sikhombisa Jehova kutsi sibatsandza kakhulu bazalwane betfu nabodzadze. Sisuke singadlali ngesikhatsi nasithantazela bazalwane betfu nabodzadze. LiVi laNkulunkulu litsi “kuncusa kwemuntfu lolungile kunemandla kakhulu.” (Jak. 5:16) Kufanele sibathantazele bazalwane betfu nabodzadze ngobe babhekana netimo letinyenti letimatima. w22.07 23-24 ¶13-15