July

Nkulunkulu wasenta sakhona kukhuluma. Kodvwa lesipho sekukhuluma sabese sisetjentiswa kabi. Sathane Develi wayenga-Eva futsi lamanga enta bantfu baba nesono. (Gen. 3:1-4) Ngesikhatsi Adamu ente liphutsa, wasisebentisa kabi lesipho ngesikhatsi asola Eva futsi wasola ngisho naJehova. (Gen. 3:12) Khayini wakhuluma emanga kuJehova ngemuva kwekubulala umnakabo Abela. (Gen. 4:9) Lamuhla, ema-movie lamanyenti agcwele lulwimi lolungcolile. Bantfwana besikolwa bavama kuva lulwimi lolubi esikolweni, kantsi labasebentako baluva lapho basebentela khona. Nasingakanaki, singakujwayela kuva lulwimi lolubi size natsi sicale kulusebentisa. Njengobe singemaKhristu, sifuna kujabulisa Jehova. Ngako akukafaneli kuphume lulwimi lolubi emilonyeni yetfu. Sifuna kusisebentisa kahle lesipho kuze sidvumise Nkulunkulu. w22.04 4 ¶1-3

Jesu bekanembono lokahle ngemali. Bekadla futsi anatsa. (Luk. 19:2, 6, 7) Ngalelinye lilanga wenta liwayini lelimnandzi kakhulu, leso bekusimangaliso sakhe sekucala. (Joh. 2:10, 11) Ngelilanga lafa ngalo, bekagcoke ingubo ledulile. (Joh. 19:23, 24) Kodvwa Jesu akazange ente imali ite kucala ekuphileni kwakhe. Jesu wafundzisa kutsi nasifuna kucala uMbuso, Jehova utawuciniseka kutsi siba nato tintfo lesitidzingako. (Mat. 6:31-33) Kubasitile bazalwane betfu nabodzadze labanyenti kusebentisa seluleko lesihlakaniphile lesivela kuNkulunkulu lesimayelana nemali. Cabanga ngesibonelo salomunye umzalwane longakashadi lokutsiwa nguDaniel. Utsi: “Nangiseminyakeni yekutfomba, ngancuma kutsi ngitawenta tintfo letiphatselene naNkulunkulu tite kucala ekuphileni kwami.” Ngenca yekutsi bekasolo aphila imphilo lemelula, Daniel ukhonile kwentela Jehova tintfo letinyenti letehlukene. Uyachubeka utsi: “Kute imali lengacatsaniswa netibusiso Jehova langanikete tona.” w22.05 21-22 ¶6-7

Singakhombisa kutsi siyalitsandza liciniso ngekutsi sidadishe liBhayibheli njalo kanye netincwadzi letisekelwe kulo. Ngetulu kwako konkhe, ngisho nobe sesinesikhatsi lesidze kangakanani sisecinisweni, kusekunyenti lesingakufundza. Kudadisha kungumsebenti kodvwa angeke utisole ngemetamo loyentako. Akusitsi sonkhe lesikutsandzako kufundza nekudadisha. Kodvwa Jehova usitjela kutsi ‘sichubeke sifuna’ futsi ‘sichubeke simba’ kuze sitalicondza kancono liciniso. (Taga 2:4-6) Sitawusitakala nasenta njalo. Nakakhuluma ngekufundza liBhayibheli, Corey utsi unaka livesi linye ngesikhatsi sinye. Utsi: “Ngifundza yonkhe imibhalo lengentansi, ngibuke onkhe emavesi lahambisana nalo ngiphindze ngicwaninge. . . . Ngifundza lokunyenti nangisebentisa lendlela!” Ngisho nobe sisebentisa lendlela nobe lenye, sisuke sikhombisa kutsi siyalitsandza liciniso nasisebentisa sikhatsi setfu nemandla kuze sidadishe.​—Hla. 1:1-3. w22.08 17 ¶13; 18 ¶15-16

Ngesikhatsi Jesu alamhlabeni, wasebentisa indalo kuze afundzise bafundzi bakhe ngaBabe wakhe. Cabanga nganasi lesinye sifundvo kulatifundzisa. Jehova ubatsandza bonkhe bantfu. ENshumayelweni yakhe yaseNtsabeni, Jesu wakhuluma nebafundzi bakhe ngelilanga nemvula, lokutintfo bantfu labanyenti labatitsatsela phansi. Kokubili loku kuyadzingeka kuze sichubeke siphila. Jehova bekangahlala angabaniki imvula nelilanga labo labangamkhonti. Kodvwa ngenca yekutsi ubatsandza bonkhe bantfu, uyabanika imvula nelilanga. (Mat. 5:43-45) Jesu wasebentisa lesifundvo kuze afundzise bafundzi bakhe kutsi Jehova ufuna sikhombise bonkhe bantfu kutsi siyabatsandza. Njalo nawubona buhle belilanga naliyotilahla kunina nobe nawubona imvula lecabulako, cabanga ngekutsi Jehova ubatsandza bonkhe bantfu. Sibonelo sakhe singasisita kutsi sikhombise lutsandvo lolufanako ngekutsi sishumayele bonkhe bantfu. w23.03 17 ¶9-10

Yini leleyamangalisa umphostoli Johane? Wabona umfati agibele silwane sesiganga lesibovu. Lomfati ‘uyingwadla lenkhulu’ futsi ubitwa ngekutsi “yiBhabhulona Lenkhulu.” ‘Ugwadla’ nemakhosi emhlaba. (Semb. 17:1-5) Iyini “IBhabhulona Lenkhulu”? Lomfati angeke amelele tinhlangano tepolitiki ngobe incwadzi yeSembulo itsi ugwadla nebaholi bemhlaba betepolitiki. (Semb. 18:9) Ecinisweni, njengobe agibele lesilwane sesiganga, loko kukhombisa kutsi wetama kulawula lababusi. Ngetulu kwaloko, angeke amelele tekutsengiselana letinebugovu letikulelive laSathane. Tekutsengiselana kukhulunywa ngato kulenye indzawo kuSembulo futsi tibitwa ngekutsi ‘batsengisi bemhlaba.’ (Semb. 18:11, 15, 16) EBhabhulona yasendvulo bekugcwele kukhonta kwemanga. Ngako iBhabhulona Lenkhulu imelela tonkhe tinhlobo tekukhonta kwemanga. Ngako lomfati ungumbuso wemhlaba wenkholo yemanga.​—Semb. 17:5, 18. w22.05 11 ¶14-16

Make angahle atibute kutsi bantfwana bakhe batawukhetsa kukhonta Jehova yini. Batali bayati kutsi lelive laSathane libacindzetela kanganani bantfwana babo. Ngetulu kwaloko, bomake labanyenti bakhulisa bantfwana babodvwa nobe utfole kutsi bayeni babo abamkhonti Jehova. Akusibo batali labashade nebantfu labangasibo boFakazi kuphela labanetinkinga tekusita bantfwana babo kutsi bakhonte Jehova. Ngisho nobe bobabili batali bakhonta Jehova, bangahle bakutfole kumatima kusita bantfwana babo kutsi bakhonte Jehova. Kunobe ngusiphi simo, ungakhatsateki kakhulu. Jehova utakusita. Ungabuta batali labaphumelele kukhulisa bantfwana babo kutsi bawasebentise njani emathulusi lakhona ekukhonteni kwemndeni? (Taga 11:14) Jehova angakusita nangekutsi ukhone kukhulumisana nebantfwana bakho. Mcele akusite utfole kutsi bacabangani nekutsi yini lesetinhlitiyweni tabo.​—Taga 20:5. w22.04 17 ¶4, 7; 18 ¶9

Ingakhula indlela lesimtsandza ngayo Jehova ngekutsi siyati kahle iNdvodzana yakhe, lebuveta kahle kakhulu buntfu baBabe wayo. (Heb. 1:3) Indlela lencono kakhulu yekutsi sati buntfu baJesu, kutsi sidadishe emaVangeli lamane. Nangabe usengakacali kufundza liBhayibheli onkhe malanga, kungaba njani ucale nyalo? Njengobe ufundza ngaJesu, naka kakhulu buntfu bakhe. Bekangeneka; bekabatsandza bantfwana aze abagone. (Mak. 10:13-16) Jesu bekanemusa futsi anebungani, bafundzi bakhe bebangesabi kumtjela indlela bebativa ngayo. (Mat. 16:22) Bekalingisa Babe wakhe losezulwini. NaJehova uyangeneka. Singathantaza kuye simtjele konkhe. Siyaciniseka kutsi angeke asisole. Uyasitsandza futsi uyasikhatsalela.​—1 Phet. 5:7. w22.08 3 ¶4-5

Njengobe Jehova anguMdali wetfu, wati konkhe ngatsi. Cabanga nje, uyati kutsi bonkhe bantfu labasemhlabeni bakheke njani. (Hla. 139:15-17) Uyawabona onkhe emaphutsa etfu, langumphumela wesono lesasitfola kubatali betfu. Ngetulu kwaloko, uyakwati loko lokwenteke ekuphileni kwetfu lokusente saba ngulabantfu lesingibo nyalo. Yini Jehova layentako ngenca yekutsi usati kahle? Usikhombisa umusa. (Hla. 78:39; 103:13, 14) Jehova ukhombisile kutsi ufuna mbamba kusicolela. Uyati kutsi sonkhe satfola umphumela wesono nekufa ngenca yaloko lokwentiwa ngu-Adamu. (Rom. 5:12) Bekute indlela yekutsi sitikhulule tsine nobe labanye esonweni nasekufeni. (Hla. 49:7-9) Nobe kunjalo, Nkulunkulu wetfu lositsandzako wasikhombisa luvelo futsi wenta lokutsite kuze sikhululeke. Umbhalo waJohane 3:16 usitjela kutsi Jehova watfumela iNdvodzana yakhe lekuphela kwayo kuze isifele.​—Mat. 20:28; Rom. 5:19. w22.06 3 ¶5-6

Jehova wakhombisa kutsi labo labacolelako nabo batawucolelwa endzabeni yenceku yakhe Jobe. Lendvodza leyetsembekile beyiviswe buhlungu ngemavi lahlabako a-Elifazi, Bildadi naSofari. Jehova watjela Jobe kutsi awathantazele lamadvodza. Ngemuva kwekutsi Jobe sekente njalo, Jehova wambusisa. (Jobe 42:8-10) Kuyingoti kuhlale utfukutsele. Kutfukutsela kufana nemtfwalo lowesindzako futsi Jehova ufuna siwulahle kuze sitfole kuthula. (Ef. 4:31, 32) Usicela kutsi siyekele ‘kutfukutsela nekuba nelulaka.’ (Hla. 37:8) Kukuhlakanipha kulalela leseluleko. Kuhlale sitfukutsele kungasilimata emtimbeni nasengcondvweni. (Taga 14:30) Nangabe sitfukutselele lotsite, loko akumlimati, njengobe nje angeke agule nangabe kungitsi lesinatse shevu. Ngako nasicolela labanye sisuke sitisita tsine. Siba nekuthula, futsi siyakhona kuchubeka sikhonta Jehova. w22.06 10 ¶9-10

Litsemba lesinalo linjengesigcoko sekutivikela, livikela tingcondvo tetfu futsi lisisite singaticabangeli tsine nje kuphela, ngobe loko bekungalimata buhlobo betfu naJehova. (1 Khor. 15:33, 34) Litsemba letfu lingaphindze lisivikele ekucabangeni kutsi akusiti ngalutfo kwetama kujabulisa Jehova. Khumbula kutsi Elifazi washo intfo lefanako kuJobe. Watsi: “Kungenteka njani kutsi umuntfu abe msulwa?” Waphindze watsi ngaNkulunkulu: “Nkulunkulu akatetsembi tingilosi takhe, futsi ngisho nemazulu awakahlanteki emehlweni akhe.” (Jobe 15:14, 15) Lawa ngemanga laluhlata klaba! Khumbula kutsi nguSathane lofuna ucabange kanjalo. Uyati kutsi nawuhlale ucabanga kanjalo, litsemba lakho litawuphela. Ngako melana nemanga lanjalo. Hlale uciniseka kutsi Jehova ufuna uphile phakadze futsi utakusita kutsi kwenteke loko.​—1 Thim. 2:3, 4. w22.10 25-26 ¶8-10

Sathane bekafuna Jobe akholelwe kutsi letintfo timehlele ngobe Jehova umtfukutselele. Sibonelo nje, Sathane wasebentisa umoya lomkhulu lowabhidlita lendlu lapho bonkhe bantfwana baJobe bebadla khona. (Jobe 1:18, 19) Waphindze wenta kutsi umlilo wehle uvela uzulwini futsi wabulala yonkhe imfuyo yaJobe kanye netisebenti lebetiyelusile. (Jobe 1:16) Lomoya nalomlilo bekuvela ezulwini; ngako Jobe wacabanga kutsi bekuvela kuJehova. Ngenca yaloko, wacabanga kutsi kukhona lebekakwentile lokwente Jehova wamtfukutselela. Nobe kunjalo, akazange ametfuke Babe wakhe wasezulwini. Wabona kutsi kuyo yonkhe leminyaka Jehova umentele tintfo letinyenti letinhle. Ngako waphetsa ngekutsi nangabe emukele lokuhle, bekufanele akulungele kwemukela nalokubi. Watsi: “Alichubeke lidvunyiswa libito laJehova.”​—Jobe 1:20, 21. w22.06 21 ¶7

Jesu wanika bafundzi bakhe secwayiso lesifanako, lesibhalwe kuJohane 17:14. Sikubonile kugcwaliseka kwalesiphrofetho, ikakhulukati kuleminyaka lengu-100 yakamuva. Kanjani? Ngekushesha nje ngemuva kwekutsi Jesu abe yiNkhosi lenguMesiya nga-1914, Sathane wacoshwa ezulwini. Nyalo uvaleleke lamhlabeni futsi ulindzele kubhujiswa kwakhe. (Semb. 12:9, 12) Kodvwa loko akusho kutsi uhleti nje akenti lutfo. Utfukutsele kakhulu futsi uhlasela bonkhe bantfu baNkulunkulu. (Semb. 12:13, 17) Kungako live laSathane selibazonda kakhulu bantfu baNkulunkulu kunakucala. Kodvwa kute sizatfu sekumesaba Sathane nebalandzeli bakhe. Kunaloko, natsi siyaciniseka ngaloko umphostoli Pawula bekaciniseka ngako, nakabhala atsi: “Nangabe Nkulunkulu angakitsi, ngubani longamelana natsi?” (Rom. 8:31) Singametsemba ngalokuphelele Jehova. w22.07 18 ¶14-15

Jesu akazange akhatsateke ngekutsi betitawuba tincane tisebenti ekupheleni kwalelive. Bekati kutsi atawugcwaliseka emavi emhlabeleli lasiphrofetho latsi: “Bantfu bakho batatinikela ngekutitsandzela mhlazana uhola libutfo lakho liya emphini.” (Hla. 110:3) Nangabe uwenta lomsebenti wekushumayela, usuke usekela Jesu nesisebenti lesetsembekile futsi ufaka sandla ekugcwalisekeni kwalesiphrofetho. Lomsebenti uyachubeka, kodvwa kunetinkinga. Kuphikiswa kungulenye inkinga lesibhekana nayo nasenta umsebenti wekushumayela. Tihlubuki, baholi benkholo nabosopolitiki batjele bantfu labanyenti emanga ngemsebenti wetfu. Nangabe tihlobo tetfu, labanye bantfu lesibatiko nalesisebenta nabo bawakholwa lamanga, bangahle basicindzetele kutsi siyekele kukhonta Jehova nekutsi siyekele kushumayela. Kulamanye emave, titsa tetfu tiyasisongela, tisihlasele, tibophe bazalwane betfu nabodzadze futsi tize tibavalele ejele. w22.07 8 ¶1; 9 ¶5-6

Jehova ulindzele kutsi sitinikete sikhatsi sekulifundza njalo liBhayibheli futsi sicabangisise ngaloko lesikufundzako. Nasikusebentisa loko lesikufundzako, kukholwa kwetfu kuyacina futsi sisondzelana kakhulu naBabe wetfu wasezulwini. Loko kuyasicinisa, kusente sikhone kubhekana netinkinga. Jehova uphindze abanikete umoya wakhe longcwele labo labetsembela eVini lakhe liBhayibheli. Lomoya ungasinika “emandla lamakhulu kakhulu” kuze sikhone kubhekana nanobe nguyiphi inkinga. (2 Khor. 4:7-10) Sisitwa nguJehova, ‘sisebenti lesetsembekile nalesihlakaniphile’ sisilungiselela tihloko letinyenti, ema-video nemculo lokusisita sibe nekukholwa lokucinile futsi sihlale sisondzelene naJehova. (Mat. 24:45) Jehova uceceshe bantfu bakhe kutsi batsandzane futsi badvudvutane nababhekene netikhatsi leticindzetelako. (2 Khor. 1:3, 4; 1 Thes. 4:9) Bazalwane betfu nabodzadze bayafuna kusisita kuze sihlale setsembekile nasibhekene nebumatima. w22.08 12 ¶12-14

Nangabe sikhuluma ngebuntfu lobuhle bebazalwane betfu nabodzadze, sitawenta kutsi babe nebunye, basondzelane, lokutakwenta kutsi emalunga elibandla abe nelutsandvo. Ngaletinye tikhatsi, ngisho nemaKhristu lavutsiwe kungenteka angavumelani ngetintfo letitsite nobe aphikisane. Loko kwenteka kumphostoli Pawula nakumngani wakhe lomkhulu Bhanabasi. Lamadvodza lamabili bekangavumelani ngekutsi ahambe naye yini Makho eluhambweni lwabo lolulandzelako njengobe bekatitfunywa telivangeli. “Bacabana kabi” futsi babese bayehlukana. (Imis. 15:37-39) Kodvwa boPawula, Bhanabasi naMakho bakulungisa lokungevani lobekusemkhatsini wabo. Ngekuhamba kwesikhatsi, Pawula wakhuluma kahle ngaBhanabasi nangaMakho. (1 Khor. 9:6; Khol. 4:10) Natsi kufanele silungise kungevani lokungenteka sibe nako nalabanye ebandleni futsi sichubeke sinaka buntfu babo lobuhle. Nasenta njalo, sitawube sikhutsata kuthula nebunye. w22.08 23 ¶10-11

Njengobe setama kamatima kuphila ngetimiso taJehova letilungile, kufanele sikugweme kwehlulela labanye nekutibona silunge kakhulu. Kufanele sikhumbule kutsi nguJehova ‘uMehluleli wemhlaba wonkhe.’ (Gen. 18:25) Jehova akawuniketi tsine umsebenti wekwehlulela. Cabanga ngesibonelo saJosefa, lebekayindvodza leyetsembekile. Wakugwema kwehlulela labanye, ngisho nalabo bebamphetse kabi. Bobhuti wakhe bamphatsa kabi, bamtsengisa kutsi abe sigcili futsi batjela babe wakhe kutsi ufile. Ngemuva kweminyaka, Josefa waphindze wahlangana nemndeni wakubo. Ngaleso sikhatsi, besekangumbusi lonemandla, ngako bekangabehlulela kamatima bobhuti wakhe futsi atiphindziselele. Nguloko kanye bobhuti wakhe lebebacabanga kutsi utawukwenta nanobe bebatisola mbamba ngaloko bebakwentile. Kodvwa Josefa wabacinisekisa watsi: “Ningesabi. Mine angeke ngitibeke endzaweni yaNkulunkulu.” (Gen. 37:18-20, 27, 28, 31-35; 50:15-21) Josefa watitfoba futsi wabona kutsi nguJehova kuphela lonelilungelo lekwehlulela bomnakabo. w22.08 30 ¶18-19

Bewati yini kutsi Jehova angakusebentisa kuze aphendvule umthantazo walotsite? Ungabasita labanye ngisho ungulomdzala welibandla, uyinceku lesebentako, ulihlahlandlela nobe ungummemeteli. Ungaphindze ubasite labanye ngisho umncane, umdzala nobe ungumzalwane nobe dzadze. Nangabe lotsite lotsandza Jehova acela lusito kuye, Nkulunkulu wetfu uvame kusebentisa labadzala belibandla kanye naletinye tinceku letetsembekile kuze tibe ‘yindvudvuto lenkhulu’ kuloyo muntfu. (Khol. 4:11) Sijabula kakhulu ngekukhonta Jehova ngaleyo ndlela nangekusita bazalwane betfu! Loko singakhona kukwenta nangabe kubhedvuke sifo, nakunesehlakalo nobe nasiphatfwa kabi. Singahle sifune kusita labanye, kodvwa loko kungaba matima nangabe emalunga emindeni yetfu nawo aludzinga lusito. Nanobe kunjalo, siyafuna kubasita bazalwane betfu nabodzadze futsi Jehova uyajabula nasenta konkhe lesingakwenta kuze sibasite.​—Taga 19:17. w22.12 22 ¶1-2

Lutsandvo lubalulekile kuze setsembane. Jesu watsi imitsetfo lemibili lemikhulu kakhulu ngulotsi sitsandze Jehova nalotsi sitsandze makhelwane wetfu. (Mat. 22:37-39) Ngenca yekutsi siyamtsandza Jehova, loko kusenta sifune kulingisa sibonelo sakhe lesihamba embili sekwetsembeka. Sibonelo saloko kutsi nasibatsandza bazalwane betfu nabodzadze, angeke sitikhulume tindzaba tabo letiyimfihlo. Akukafaneli nangalinye lilanga sikhulume tintfo letingabalimata, tibahlaze nobe tibavise buhlungu. Kutfobeka nako kutasisita kutsi setsembeke. UmKhristu lotfobekile aketami kujabulisa labanye ngekutsi afune indzaba iviwe ngaye kucala. (Fil. 2:3) Aketami kwenta labanye bambone abalulekile ngekubenta bacabange kutsi wati indzaba leyimfihlo. Kutfobeka kutasisita kutsi singasakati imibono yetfu mayelana netindzaba lokungakhulunywa ngato eBhayibhelini nobe etincwadzini tetfu. w22.09 12 ¶12-13

Ingilosi yatjela Danyela kutsi bantfu baNkulunkulu bebatawacondza kahle lamavi lakulencwadzi lasiphrofetho, kodvwa “kute ngisho namunye [lomubi] lotawuba nekucondza.” (Dan. 12:10) Nyalo sikhatsi sekutsi indlela lesiphila ngayo ikhombise kutsi asikho emkhatsini walababi. (Mal. 3:16-18) Jehova uhlanganisa labo labatsatsa ‘njengemphahla lekhetsekile,’ lokungulabo labaligugu kuye. Nakanjani sifuna kuba semkhatsini wabo. Nyalo siphila emalangeni lapho khona kwenteka tintfo letinyenti kakhulu. Kodvwa kusetakwenteka tintfo letinyenti letijabulisako. Ngekushesha sitawubona nakubhujiswa bonkhe bantfu lababi. Ngemuva kwaloko sitawubona kugcwaliseka kwesetsembiso Jehova lasitjela Danyela lesitsi: “Kepha nasesiphelile sikhatsi sekulindza kwakho, utawuvuka utfole sabelo sakho.” (Dan. 12:13) Uyalilangatelela yini lilanga lapho khona Danyela kanye nalabo lobatsandzako baphindze ‘bavuka’? Nangabe kunjalo, yenta konkhe lokusemandleni akho nyalo kuze uhlale wetsembekile, futsi ungaciniseka kutsi ligama lakho litawuhlale likhona encwadzini yaJehova yekuphila. w22.09 24 ¶17; 25 ¶19-20

Kungenteka lamavi amcinisa Hezekeli. Sisho ngani? Sisho ngobe kungenteka wakhumbula kutsi Jehova wasebentisa emavi lafanako ngesikhatsi atfuma Mosi na-Isaya kutsi babe baphrofethi bakhe. (Eks. 3:10; Isa. 6:8) Hezekeli bekati nekutsi Jehova bekabasite njani labaphrofethi lababili ngesikhatsi babhekene nebumatima. Ngako ngesikhatsi Jehova atjela Hezekeli tikhatsi letimbili atsi: ‘Ngiyakutfuma,’ lomphrofethi bekangetsemba kutsi Jehova utamsita. Ngetulu kwaloko, emavi latsi: “Livi laJehova lefika kimi,” avela tikhatsi letinyenti encwadzini yaHezekeli. (Hez. 3:16) Aphindze avele tikhatsi letinyenti emavi latsi: “Livi laJehova laphindze lefika kimi.” (Hez. 6:1) Hezekeli bekaciniseka kutsi utfunywe nguJehova. Ngetulu kwaloko, njengobe bekayindvodzana yemphristi, kungenteka babe wakhe bekamtjela kutsi Jehova bekasolo abacinisekisa baphrofethi bakhe kutsi utabasita. Sibonelo nje, Jehova watjela Isaka, Jakobe naJeremiya watsi: “Nginawe.”​—Gen. 26:24; 28:15; Jer. 1:8. w22.11 2 ¶3

Nanobe bo-Adamu na-Eva bona futsi baletsela bantfwana babo kufa, kodvwa Jehova akazange ayishintje ingcondvo mayelana nenjongo yakhe. (Isa. 55:11) Solo injongo yakhe ikutsi bantfu labetsembekile batfole kuphila lokuphakadze. Bufakazi baloko sibubona kuloko Jehova lakusho nalakwenta kuze afeze lenjongo yakhe. Jehova wetsembisa kutsi utawuvusa labafile futsi abente baphile kuze kube phakadze. (Imis. 24:15; Thit. 1:1, 2) Jobe lebekayindvodza leyetsembekile bekaciniseka kutsi Jehova uyakulangatelela kuvusa labafile. (Jobe 14:14, 15) Umphrofethi Danyela bekati kutsi bantfu batawuvuswa ekufeni banelitsemba lekuphila kuze kube phakadze. (Hla. 37:29; Dan. 12:2, 13) EmaJuda lebekaphila ngesikhatsi saJesu nawo bekati kutsi Jehova utawunika bantfu bakhe labetsembekile “kuphila lokuphakadze.” (Luk. 10:25; 18:18) Jesu wakhuluma ngalesetsembiso tikhatsi letinyenti, futsi kwanaye wavuswa ekufeni nguBabe wakhe.​—Mat. 19:29; 22:31, 32; Luk. 18:30; Joh. 11:25. w22.12 4-5 ¶8-9

Jehova usicela kutsi sisondzelane naye. (Jak. 4:8) Ufuna kuba nguNkulunkulu wetfu, Babe wetfu neMngani wetfu. Uyayiphendvula imithantazo yetfu futsi uyasisita nasibhekene netikhatsi letimatima. Usebentisa nenhlangano yakhe kuze asifundzise futsi asivikele. Singasondzelana naJehova ngekuthantaza kuye, ngekufundza liVi lakhe nangekucabangisisa ngaloko lesikufundzako kulo. Nasenta njalo, sitamtsandza kakhulu. Sitatimisela kumlalela futsi simnike ludvumo lolumfanele. (Semb. 4:11) Nasichubeka simati Jehova, sitametsemba kakhulu yena nenhlangano yakhe layisebentisako kuze isisite. Nobe kunjalo, Develi wetama kutsi kancane kancane singasametsembi Jehova nenhlangano yakhe. Kodvwa singakhona kumelana naloko. Nangabe kukholwa kwetfu kucinile, futsi simetsemba mbamba Jehova, angeke simshiye Nkulunkulu wetfu nenhlangano yakhe.​—Hla. 31:13, 14. w22.11 14 ¶1-3

EmaKhristu eliciniso lamanyenti adzele inkhululeko yawo futsi abeka kuphila kwawo engotini ngenca yekutsi atsandza Jehova njengobe anguMbusi wawo Lophakeme. LamaKhristu atimisele kuhlala etsembekile kuJehova. Afana nemaHebheru lamatsatfu lahlala etsembekile kuNkulunkulu Lophakeme, futsi lowabese uyawasindzisa emlilweni lomkhulu. Umhlabeleli Davide wabhala ngekubaluleka kwekuhlala sicotfo kuNkulunkulu, watsi: “Jehova utawehlulela bantfu. Awu Jehova, ngehlulele ngekuvumelana nekulunga kwami nangekuvumelana nebucotfo bami.” (Hla. 7:8) Waphindze wabhala watsi: “Shengatsi bucotfo bami nekulunga kwami kungangivikela.” (Hla. 25:21) Indlela lencono kakhulu yekuphila kutsi sihlale setsembekile kuJehova. Nasenta njalo, sitawutiva ngendlela umhlabeleli lativa ngayo nakabhala atsi: “Bayajabula labo labacotfo, labo labahamba ngemtsetfo waJehova.”​—Hla. 119:1, umbhalo longentasi. w22.10 17 ¶18-19

Tinyenti tincociswano Jobe laba nato nalabanye bantfu ekuphileni kwakhe, kodvwa lehamba embili ngulena laba nayo naJehova Nkulunkulu. Kuleyo ncociswano, Jehova watjela Jobe kutsi abuke letinye tintfo letimangalisako latidalile. Sibonelo nje, Nkulunkulu wakhumbuta Jobe kutsi uyatinakekela tilwane, ngako bekatamnakekela naye. (Jobe 38:39-41; 39:1, 5, 13-16) Ngekubuka indalo, Jobe wafundza lokunyenti ngebuntfu baNkulunkulu wakhe. Natsi singafundza lokunyenti ngaNkulunkulu wetfu ngekutsi sibukisise tintfo latidalile. Nanobe kunjalo, loko kungahle kungabi melula kukwenta. Nangabe sihlala edolobheni, ingahle ibe mbalwa kakhulu indalo lesiyibona onkhe malanga. Ngisho nobe sihlala dvute nendalo, singahle singasitfoli kahle sikhatsi sekuyibukisisa. Kodvwa kubalulekile kutinika sikhatsi sekubukisisa indalo nekutsi setame kukwenta loko. w23.03 15 ¶1-2

Jesu watsi kutawuba ‘nekutamatama lokukhulu kwemhlaba,’ kanye naletinye tehlakalo ngaphambi kwekutsi kufike kuphela. (Luk. 21:11) Waphindze wakhuluma ngekutsi ‘kutawandza bubi,’ futsi loko kuyenteka njengobe sibona bugebengu, budlova kanye nekuhlasela kwetidlamlilo. (Mat. 24:12) Jesu akazange atsi letintfo titawehlela kuphela labo labashiywe nguJehova. Ecinisweni, linyenti lebantfu baJehova labetsembekile libhekene netehlakalo. (Isa. 57:1; 2 Khor. 11:25) Jehova angeke asivikele ngalokusimangaliso kuto tonkhe tehlakalo, kodvwa utasinika nobe yini lesiyidzingako kuze sihlale sehlise umoya futsi sinekuthula. Sitakutfola kumelula kuhlale sehlise umoya nakuvela simo lesiphutfumako nangabe sitilungiselele kusenesikhatsi ngaphambi kwekutsi senteke. Kutilungiselela sehlakalo kusho kutsi asimetsembi yini Jehova? Cha. Ecinisweni, kutilungiselela sehlakalo kukhombisa kutsi siyetsemba kutsi Jehova utasinakekela. Kanjani? LiVi laNkulunkulu lisikhutsata kutsi sitilungiselele tehlakalo letingahle tenteke. w22.12 18 ¶9-10

Ngesikhatsi Josefa asejele, Jehova wenta kutsi inkhosi yaseGibhithe iphuphe emaphupho lamabili layihlupha. Ngesikhatsi lenkhosi iva kutsi Josefa unelikhono lekuchaza emaphupho, yatsi akalandvwe. Ngekusitwa nguJehova, Josefa wakhona kuwachaza lamaphupho futsi Faro wajabula ngaleseluleko lamnika sona. Ngenca yekutsi Faro wabona kutsi Jehova bekanalelijaha, walibeka kutsi lengamele kudla kwaseGibhithe. (Gen. 41:38, 41-44) Ngekuhamba kwesikhatsi, kwaba nendlala lenkhulu eGibhithe naseKhenani, lokuyindzawo lapho umndeni wakuboJosefa bewuhlala khona. Nyalo Josefa besekangakhona kusita umndeni wakubo futsi avikele luhla lwekutalwa kwaMesiya. Kusebaleni kutsi nguJehova lowenta Josefa waphumelela kuko konkhe lebekakwenta. Nanobe banakaboJosefa bebafuna kumbulala, Jehova washintja lesimo kuze afeze intsandvo yakhe. w23.01 17 ¶11-12

Umuntfu loticaphelako uhlale agadze ingoti lengalimata buhlobo bakhe naJehova futsi wenta lokutsite kuze ayigweme. Nakenta njalo, uhlale atsandvwa nguNkulunkulu. (Taga 22:3; Juda 20, 21) Umphostoli Pawula watjela emaKhristu kutsi aticaphele. Sibonelo nje, watjela emaKhristu ase-Efesu watsi: “Caphelisisani kutsi indlela lenihamba ngayo ayifani neyebantfu labangakahlakaniphi kodvwa ifana neyebantfu labahlakaniphile.” (Ef. 5:15, 16) Buhlobo betfu naJehova buhlale buhlaselwa, ngako liBhayibheli liseluleka kutsi ‘sichubeke sicondza kutsi iyini intsandvo yaJehova’ kuze sitivikele ekuhlaselweni nguSathane. (Ef. 5:17) Kuze sente tincumo letihlakaniphile kufanele sicondze nobe sibone “intsandvo yaJehova.” Loku singakwenta ngekutsi sihlale sidadisha liVi laNkulunkulu futsi sicabangisisa ngaloko lesikufundzako. Nasichubeka siyicondza intsandvo yaJehova futsi setama kuba ‘nemicabango yaKhristu,’ manyenti ematfuba ekutsi sihambe ‘njengebantfu labahlakaniphile’ ngisho nobe kute imitsetfo lecondzile lengasicondzisa.​—1 Khor. 2:14-16. w23.02 16-17 ¶7-9

Uvame kuyihlanta kangakhi indlu yakho? Mhlawumbe ngaphambi kwekutsi uhlale kuyo wayihlantisisa. Kodvwa bekungentekani kube wagcina ngalelo langa kuyihlanta? Beyingagcwala tintfuli futsi ingcole. Kuze uyigcine ihlobile, kufanele uhlale uyihlanta. Ngendlela lefanako, natsi kufanele sichubeke sishintja indlela lesicabanga ngayo kanye nebuntfu betfu. Kuliciniso kutsi ngaphambi kwekutsi sibhajatiswe, senta konkhe lebesingakhona kukwenta kuze sishintje kuphila kwetfu kuze ‘sitihlante kuko konkhe kungcola kwenyama.’ (2 Khor. 7:1) Kodvwa nyalo kufanele silalele seluleko semphostoli Pawula lesitsi: “Nichubeke niyenta ibe yinsha indlela lenicabanga ngayo.” (Ef. 4:23) Ngobe ngekushesha umoya walelive ungasenta singahlanteki embikwaJehova. Kuze sikugweme loko futsi sihlale sijabulisa Jehova, kufanele sihlale sihlola loko lesikucabangako, buntfu betfu kanye netifiso tetfu. w23.01 8 ¶1-2

Cabanga nje kutsi bekunjani kulalela Jesu nakafundzisa. Bekavame kucaphuna imiBhalo Lengcwele lebeyisengcondvweni yakhe! Ngesikhatsi Jesu abhajatiswa futsi agcotjwa ngemoya longcwele, kwabuya konkhe engcondvweni yakhe kuphila kwakhe asesezulwini. Wawacaphuna emiBhalweni emavi ekucala labhalwe eBhayibhelini lawasho ngemuva kwekubhajatiswa nemavi ekugcina lawasho ngaphambi kwekutsi afe. (Dut. 8:3; Hla. 31:5; Luk. 4:4; 23:46) Kuleminyaka lemitsatfu nehhafu, Jesu bekavame kufundza imiBhalo embikwebantfu, ayicaphune futsi ayichaze. (Mat. 5:17, 18, 21, 22, 27, 28; Luk. 4:16-20) Kusasele iminyaka ngaphambi kwekutsi Jesu acale kushumayela, bekavame kufundza liVi laNkulunkulu futsi bekavame kuva nalifundvwa. Siyaciniseka kutsi ekhaya bekeva Mariya naJosefa bacaphuna imiBhalo. (Dut. 6:6, 7) Jesu bekaya esinagogeni njalo ngeliSabatha anemndeni wakubo. (Luk. 4:16) Nakalapho, bekalalelisisa nakufundvwa imiBhalo. w23.02 8 ¶1-2

Tinyenti tizatfu letenta simtsandze Jehova. Sibonelo nje, sewufundzile kutsi ‘ungumtfombo wekuphila’ futsi ungumuphi wato “tonkhe tipho letinhle naletiphelele.” (Hla. 36:9; Jak. 1:17) Tonkhe tintfo letinhle lonato tivela kuNkulunkulu wetfu lositsandzako futsi lowephanako. Inhlawulo isipho lesihle kakhulu lesisiphiwe nguJehova. Sisho ngani? Cabanga ngebudlelwane lobuhle lobukhona emkhatsini waJehova neNdvodzana yakhe. Jesu watsi: ‘Babe uyangitsandza’ futsi “ngiyamtsandza Babe.” (Joh. 10:17; 14:31) Budlelwane babo bacina kakhulu ngesikhatsi bacitsa tigidzigidzi teminyaka bandzawonye. (Taga 8:22, 23, 30) Ngako cabanga ngekutsi Nkulunkulu weva buhlungu lobungakanani ngekuvumela iNdvodzana yakhe kutsi ihlupheke futsi ife. Jehova ubatsandza kakhulu bantfu, lokufaka ekhatsi nawe, kangangekutsi waze wanikela ngeNdvodzana yakhe layitsandzako kuze ibe ngumhlatjelo lowenta kutsi wena kanye nalabanye bantfu nibe nelitsemba lekuphila kuze kube phakadze. (Joh. 3:16; Gal. 2:20) Lesi sizatfu lesihamba embili lesenta simtsandze Nkulunkulu. w23.03 4-5 ¶11-13

Kufanele sitigweme timfundziso tetihlubuki. Jesu wekhuta labanye ebandleni lasePhegamu lebebabangela kwehlukana. (Semb. 2:14-16) Wancoma labanye eThiyathira lebebagweme “tintfo letijulile letivela kuSathane” futsi wabakhutsata kutsi ‘babambelele’ ecinisweni. (Semb. 2:24-26) EmaKhristu labenekukholwa lokubutsakatsaka lebekemukela timfundziso tetihlubuki bekufanele aphendvuke. Kutsiwani ngatsi lamuhla? Natsi kufanele sitigweme timfundziso letiphambene nemicabango yaJehova. Tihlubuki ‘tibonakala shengatsi tiyamhlonipha Nkulunkulu’ kodvwa ‘indlela letiphila ngayo ayikukhombisi loko.’ (2 Thim. 3:5) Kumelula kubona timfundziso tetihlubuki nekutigwema nangabe sikukhutsalele kufundza liVi laNkulunkulu. (2 Thim. 3:14-17; Juda 3, 4) Kufanele sente lokutsite kuze siciniseke kutsi kukhonta kwetfu kuyemukeleka kuJehova. Nangabe senta lokutsite lokungenta kukhonta kwetfu kungasemukeleki kuye, kufanele sente lushintjo ngekushesha.​—Semb. 2:5, 16; 3:3, 16. w22.05 4 ¶9; 5 ¶11