August

Nawucabanga, yini leyenta Jehova kutsi abhale ‘encwadzini yesikhumbuto’ emagama alabo labakhombisa kutsi bayamesaba ngendlela labakhuluma ngayo futsi bacabangisise ngelibito lakhe? Lesikukhulumako kuveta loko lokusenhlitiyweni yetfu. Jesu watsi: “Umlomo ukhuluma loko lokugcwele enhlitiyweni.” (Mat. 12:34) Jehova ufuna kutsi labo labamtsandzako baphile kuze kube phakadze emhlabeni lomusha. Indlela lesikhuluma ngayo itawuncuma kutsi Jehova uyakwemukela yini kukhonta kwetfu. (Jak. 1:26) Labanye bantfu labangamtsandzi Nkulunkulu bakhuluma ngendlela lekhombisa kutsi batfukutsele, bete umusa nekutsi bayatigcabha. (2 Thim. 3:1-5) Asifuni kufana nabo. Sifuna kutsi indlela lesikhuluma ngayo imjabulise Jehova. Angajabula yini Jehova nangabe sikhuluma kahle emihlanganweni yebuKhristu nobe emsebentini wekushumayela, kodvwa siwakhulumise kabi emalunga emindeni yetfu nangabe kute losibonako nobe losivako?​—1 Phet. 3:7. w22.04 5 ¶4-5

Nkulunkulu ukufake enhlitiyweni yaletimphondvo letingu-10 kanye nalesilwane sesiganga kutsi tibhubhise iBhabhulona Lenkhulu. Jehova utawubangela kutsi tive tisebentise lesilwane sesiganga lesibovu, lokunguMhlabuhlangene, kutsi sihlasele umbuso wemhlaba wenkholo yemanga futsi siwucedze nya! (Semb. 18:21-24) Loku kusho kutsini kitsi? Kufanele sigcine “kukhonta lokuhlantekile nalokungakangcoli embikwaNkulunkulu” wetfu. (Jak. 1:27) Asifuni kungenwa ngumoya walelive lofaka ekhatsi timfundziso temanga, imikhosi yebantfu labangamkhonti Nkulunkulu, timiso tekutiphatsa letilite kanye nemikhuba yekusebentelana nemimoya leyentiwa yiBhabhulona Lenkhulu! Ngetulu kwaloko, sitawuchubeka secwayisa bantfu kutsi “baphume kuyo” kuze Nkulunkulu angabatfoli banencenye etonweni tayo.​—Semb. 18:4. w22.05 11 ¶17-18

Batali, bukani ematfuba ekufundzisa bantfwana benu ngaJehova nangetintfo letinyenti letinhle lakwentele tona. (Dut. 6:6, 7) Kubaluleke kakhulu kutsi ukwente loku nawungakhoni kufundza nebantfwana bakho ekhaya ngenca yekutsi usemndenini lonetinkholo letingafani. Lomunye dzadze lokutsiwa nguChristine utsi: “Bekamancane ematfuba ekutsi ngikhulume ngaJehova ngako bengiwasebentisa onkhe ematfuba lengiwatfolako.” Ngetulu kwaloko, khuluma kahle ngenhlangano yaJehova nangebazalwane nabodzadze. Ungakhulumi kabi ngalabadzala belibandla. Loko lokushoko ngabo kutawuncuma kutsi bantfwana bakho batakuya yini kubo nabadzinga lusito. Yenta kutsi kube nekuthula ekhaya. Hlale ukhombisa kutsi uyayitsandza indvodza yakho nebantfwana bakho. Khuluma kahle ngendvodza yakho futsi uceceshe bantfwana bakho kutsi nabo bente lokufanako. Nawenta njalo, kungaba melula kutsi bantfwana bakho bafundze ngaJehova.​—Jak. 3:18. w22.04 18 ¶10-11

Umlayeto waJesu lebewuya ebandleni lase-Efesu, bewuveta kutsi bebabeketele nekutsi bebachubeka bakhonta Jehova nanobe babhekana netinkinga letehlukene. Nanobe kunjalo, besebete lolutsandvo bebanalo ekucaleni. Bekufanele baluvusetele lolutsandvo, nabangenti njalo Nkulunkulu abengeke akwemukele kukhonta kwabo. Ngendlela lefanako, nalamuhla akukafaneli nje sigcine ngekubeketela, kodvwa kudzingeka sibeketele sinetizatfu letinhle. Nkulunkulu wetfu akagcini nje ngekuba nendzaba naloko lesikwentako kodvwa unendzaba nangekutsi sikwentelani. Tizatfu tetfu tekwenta lokutsite tibalulekile kuye ngenca yekutsi ulindzele kutsi simkhonte ngobe simtsandza ngenhlitiyo yetfu yonkhe futsi simbonga. (Taga 16:2; Mak. 12:29, 30) Kufanele sihlale siphapheme futsi silindzile. Emalunga elibandla laseSadesi bekanenkinga leyehlukile. Nanobe bekamentele lokunyenti Jehova esikhatsini lesendlulile, kodvwa besekaphelelwa ngumdlandla wekumkhonta. Jesu wawatjela kutsi ‘aphaphame.’ (Semb. 3:1-3) Kuliciniso kutsi Jehova angeke awukhohlwe umsebenti lesimentele wona.​—Heb. 6:10. w22.05 3 ¶6-7

Solomoni wabita injabulo lesiyitfola ngekusebenta kamatima ngekutsi “sipho lesivela kuNkulunkulu.” (Shu. 5:18, 19) Solomoni bekati kutsi ukhuluma ngani. Bekasisebenti lesikhutsele! Wakha tindlu, walima emasimu emagilebisi, wakha tingadze nema-pool. Waphindze wakha nemadolobha. (1 Khos. 9:19; Shu. 2:4-6) Loyo bekungumsebenti lomatima futsi siyaciniseka kutsi wamenta wajabula. Kodvwa Solomoni bekati kutsi kuze ajabule mbamba bekufanele ente naleminye imisebenti. Waphindze wentela Jehova tintfo letinyenti. Sibonelo nje, wengamela umsebenti wekwakhiwa kwelithempeli lelihle lekukhontela Jehova, lokungumsebenti lowatsatsa iminyaka lengu-7. (1 Khos. 6:38; 9:1) Ngemuva kwekutsi Solomoni sekente imisebenti leminyenti leyehlukahlukene, wabona kutsi intfo lebaluleke kakhulu kutsi umuntfu ente umsebenti waJehova. Wabhala watsi: “Siphetfo sendzaba sitsi: Yesaba Nkulunkulu weliciniso futsi ugcine imiyalo yakhe.”​—Shu. 12:13. w22.05 22 ¶8

LiBhayibheli linetibonelo letinyenti tebantfu labacolelwa nguJehova. Ngubani lomkhumbulako? Kungenteka ucabanga ngeNkhosi Manase. Lendvodza lembi yamvisa buhlungu kakhulu Jehova. Beyihola ekukhonteni kwemanga. Yabulala bantfwana bayo, yanikela ngabo kubonkulunkulu bemanga. Ayigcinanga lapho, yenta lokubi kakhulu ngesikhatsi ibeka sithico sankulunkulu wemanga ethempelini lelingcwele laJehova. Nalikhuluma ngaye, liBhayibheli litsi: “Wenta lokubi emehlweni aJehova ngelizinga lelikhulu kuze amvise buhlungu.” (2 Khr. 33:2-7) Kodvwa ngesikhatsi Manase aphendvuka ngalokusuka enhlitiyweni, Jehova wamcolela. (2 Khr. 33:12, 13) Kungenteka ucabanga nangeNkhosi Davide, leyenta tono letinkhulu letifaka ekhatsi kuphinga nekubulala. Nobe kunjalo, ngesikhatsi Davide aphendvuka mbamba futsi alivuma liphutsa lakhe, Jehova wamcolela naye. (2 Sam. 12:9, 10, 13, 14) Ngako, singaciniseka kutsi Jehova ufuna mbamba kusicolela. w22.06 3 ¶7

Akusimelula kuhlala unelitsemba lelicinile. Kungenteka sive shengatsi sekuphele sikhatsi lesidze solo silindzele Nkulunkulu kutsi afeze tetsembiso takhe. Kodvwa ngenca yekutsi Jehova bekasolo akhona, loko lokubonakala kusikhatsi lesidze kitsi, kuye sikhatsi lesifishane. (2 Phet. 3:8, 9) Utawukwenta loko lasetsembise kona, kodvwa kungenteka angakwenti ngesikhatsi tsine lesikulindzele ngaso. Yini lengasisita kutsi sihlale sinelitsemba lelicinile njengobe silindze ngesineke kutsi Nkulunkulu afeze tetsembiso takhe? (Jak. 5:7) Hlale usondzelene naJehova, ngobe nguye lotawenta litsemba letfu lifezeke. Ecinisweni, kuze sibe nelitsemba kufanele sikholwe kutsi Jehova ukhona nekutsi “ubanika umvuzo labo labamfuna ngekutimisela.” (Heb. 11:1, 6) Nangabe sikholwa mbamba kutsi Jehova ukhona, sitawuciniseka kakhulu kutsi utawukwenta konkhe lakwetsembisile. Kuze sibe nelitsemba lelicinile, kufanele sithantaze kuJehova futsi sifundze liVi lakhe. Nanobe singamboni Jehova, kodvwa singasondzela kuye. Singakhuluma naye sisebentisa umthantazo, siciniseke kutsi utasilalela.​—Jer. 29:11, 12. w22.10 26-27 ¶11-13

Sibone ngeliso lengcondvo lesimo. Jobe uhleti emlotseni, uva buhlungu lobungapheli. (Jobe 2:8) Bangani bakhe solo bayachubeka batsi akasuye umuntfu lokahle futsi konkhe lakwentile lokuhle akukabaluleki. Simo labhekene naso simesindza kuhle kwemtfwalo, futsi buhlungu bekushonelwa bantfwana bakhe bumephula inhlitiyo. Wacale wathula. (Jobe 2:13) Nangabe lamadvodza bekacabanga kutsi kuthula kwaJobe kusho kutsi utawulahla Jehova, bekashaye phasi. Jobe waphakamisa inhloko, wabuka labangani bakhe mbumbulu, wabese utsi: “Ngitawuze ngife solo ngingakabulahli bucotfo bami!” (Jobe 27:5) Yini leyasita Jobe waba nesibindzi futsi wacina nanobe abhekene nato tonkhe letinkinga? Ngisho nangesikhatsi advumateke kakhulu, akazange alilahle litsemba lekutsi Nkulunkulu wakhe lonelutsandvo utawugcine amsitile. Bekati kutsi ngisho angafa, Jehova utamvusa.​—Jobe 14:13-15. w22.06 22 ¶9

UMdali welizulu nemhlaba usiphe sipho lesiligugu​—uyasivumela kutsi sithantaze kuye. Cabanga nje: Singatfulula tinhlitiyo tetfu kuJehova nganobe ngusiphi sikhatsi, sisebentisa nobe nguluphi lulwimi. Singathantaza kuye sisesibhedlela nobe sivalelwe ejele, sibe siciniseka kutsi Babe wetfu lonelutsandvo utasilalela. Asisitsatseli phansi lesipho lesiligugu. Umthantazo bewuligugu eNkhosini Davide. Yahlabela, idvumisa Jehova yatsi: “Shengatsi umthantazo wami ungafana nemphepho lelungiswe kahle leletfwa embikwakho.” (Hla. 141:1, 2) Ngesikhatsi saDavide, imphepho lengcwele lebeyisetjentiswa ngumphristi ekukhonteni kweliciniso beyilungiswa ngekucophelela. (Eks. 30:34, 35) Lokutsi Davide akhulume ngemphepho bekukhombisa kutsi bekafuna kucabangisisa ngaloko latawukusho kuBabe wakhe wasezulwini. Natsi nguloko lesifuna kukwenta. Sifuna imithantazo yetfu imjabulise Jehova. w22.07 20 ¶1-2; 21 ¶4

Kuphindzisela kwaJehova. Jehova akasiniketi imvume yekutiphindziselela kulotsite nakasiphetse kabi. (Rom. 12:20, 21) Njengobe sinesono, angeke sikhone kwehlulela kahle njengaNkulunkulu. (Heb. 4:13) Ngalesinye sikhatsi, indlela lesitiva ngayo ingasidukisa futsi isente singakuboni lokulungile lokufanele sikwente. Jehova waphefumulela Jakobe kutsi abhale atsi: “Intfukutselo yemuntfu ayikuletsi kulunga kwaNkulunkulu.” (Jak. 1:20) Singaciniseka kutsi Jehova utawukwenta lokulungile futsi utawuciniseka kutsi wehlulela kahle. Nasicolela sisuke sikhombisa kutsi siyetsemba kutsi Jehova wehlulela kahle. Nasishiyela tintfo kuJehova, sisuke sikhombisa kutsi siyaciniseka kutsi utawulungisa wonkhe umonakalo lobangelwe sono. Eveni lakhe lelisha lasetsembise lona, tintfo letibuhlungu letenteke kitsi ‘angeke sisatikhumbula futsi angeke tisasivisa buhlungu.’​—Isa. 65:17. w22.06 10-11 ¶11-12

Lokutsi nje siphatfwa kabi, kubufakazi bekutsi Jehova uyasemukela. (Mat. 5:11, 12) Develi nguye lobangela kutsi siphatfwe kabi. Kodvwa Jesu unemandla kunaye! Ngenca yekutsi sisitwa nguJesu, bantfu bato tonkhe tive bayativa letindzaba letimnandzi. Cabanga nganabu lobunye bufakazi. Lenye inkinga lesibhekana nayo lamuhla nasishumayela kutsi bantfu bakhuluma tilwimi letingafani. Embonweni lowanikwa umphostoli Johane, Jesu watsi emalangeni etfu tindzaba letimnandzi betitawuchubeka tishunyayelwa ngisho kunalenkinga. (Semb. 14:6, 7) Kanjani? Sinika bantfu labanyenti litfuba lekuwuva lomlayeto weMbuso. Lamuhla, bantfu emhlabeni wonkhe bangatfola tintfo letisekelwe eBhayibhelini ngetilwimi letingetulu kwa-1 000 ku-website yetfu letsi jw.org! Sigungu Lesibusako savuma kutsi incwadzi letsi Jabulela Kuphila Kuze Kube Phakadze! ihunyushwe ngetilwimi letingetulu kwa-700, lokuyincwadzi leyinhloko lesetjentiswako kuze kwentiwe bafundzi. w22.07 9 ¶6-7

Jesu bekabavela bantfu. Umphostoli Matewu wabhala: “Watsi nakabona sicumbi sebantfu, wabahawukela, ngobe bebaphetfwe kabi futsi bahlakatekile njengetimvu letite umelusi.” (Mat. 9:36) Utiva njani Jehova? Jesu watsi: ‘Babe losezulwini akafisi kutsi kubhubhe ngisho namunye kulaba labanjengebantfwana.’ (Mat. 18:14) Lamavi asijabulisa kakhulu! Njengobe simati kancono Jesu, lutsandvo lesinalo ngaJehova luyakhula. Yetama kukhombisa lutsandvo kakhudlwana futsi utfutfuke ngekutsi ucitse sikhatsi nebazalwane bakho nabodzadze labavutsiwe. Naka indlela labajabule ngayo. Abatisoli ngesincumo sabo sekukhonta Jehova. Bacele bakucocele ngaloko lokwentekile ekuphileni kwabo njengobe bebasolo bakhonta Jehova. Cela seluleko sabo nawufuna kwenta sincumo lesibalulekile. Khumbula kutsi bantfu “bayaphumelela nangabe kunebeluleki labanyenti.” w22.08 3 ¶6-7

Sonkhe sitawubhekana netinkinga. Kodvwa angeke sibhekane nato sisodvwa. Njengababe lonelutsandvo, Jehova uhlale asinakile. Uhlale anatsi, futsi uhlale akulungele kusilalela nasicela lusito, ngetulu kwaloko ufuna mbamba kusisita. (Isa. 43:2) Siyaciniseka kutsi singakhona kubhekana netinkinga ngobe Jehova usinike konkhe lesikudzingako kuze sikhone kucinisela. Usiphe sipho lesingumthantazo, liBhayibheli, imfundvo lenyenti levela kuye kanye nebazalwane nabodzadze labasitsandzako kutsi basisite nasibhekene netimo letimatima. Sibonga kakhulu ngekuba naBabe wasezulwini lohlale asinakile! “Tinhlitiyo tetfu tiyajabula ngaye.” (Hla. 33:21) Singakhombisa kutsi siyabonga ngendlela lasinakekela ngayo ngelutsandvo ngekutsi sitisebentise tonkhe tintfo lasinika tona kuze asisite. Natsi kufanele sidlale indzima yetfu kuze Jehova ahlale asinakekela. Ngalamanye emavi, nangabe sichubeka senta konkhe lesingakwenta kuze simlalele futsi sente lokulungile, utawuhlale asinakile kuze kube phakadze! w22.08 13 ¶15-16

Bantfu labanyenti lamuhla ababetsembi labanye bantfu. Abati kutsi ngubani lokufanele bametsembe. Bayatibuta kutsi bantfu lababahloniphako njengabosopolitiki, bososayensi nabosomabhizinisi banendzaba yini vele nabo. Ngetulu kwaloko, ababahloniphi baholi benkholo labatsi bangemaKhristu. Kungako kungasimangalisi kutsi bantfu labanyenti abaletsembi liBhayibheli, lokuyincwadzi labaholi benkholo labatsi bayayihlonipha. Njengobe sitikhonti taJehova, siyaciniseka kutsi ‘unguNkulunkulu weliciniso’ nekutsi uhlale asifunela lokuhle. (Hla. 31:5, umbhalo longentasi; Isa. 48:17) Siyati kutsi singakwetsemba loko lesikufundza eBhayibhelini. Siyavumelana naloko lokwashiwo ngulesinye sati seliBhayibheli lesabhala satsi: “Kute ngisho nalokuncane lokushiwo nguNkulunkulu lokungemanga nobe lokungeke kwenteke. Bantfu baNkulunkulu bangakwetsemba loko lakushoko ngobe bayametsemba Nkulunkulu losho letintfo.” w23.01 2 ¶1-2

Sisuke sakha bazalwane betfu nabodzadze nasibasita babe nekukholwa lokucinile kuJehova. Labanye baphatfwa kabi ngulabo labangasibo boFakazi. Labanye bagula kakhulu nobe baselusizini. Kantsi labanye sekuphele sikhatsi lesidze solo balindze kutsi lelive libhujiswe. Letimo tingakuvivinya kukholwa kwemaKhristu. EmaKhristu ekucala abhekana netimo letifanako. Umphostoli Pawula wasebentisa imiBhalo kuze acinise kukholwa kwebazalwane bakhe nabodzadze. Nasi sibonelo, kungenteka lamanye emaKhristu langemaJuda bewangati kutsi awaphendvule njani emalunga emindeni yawo langasiwo emaKhristu lebekatsi inkholo yebuJuda ingetulu kwenkholo yebuKhristu. Siyaciniseka kutsi incwadzi yaPawula layibhalela emaHebheru yawacinisa kakhulu lamaKhristu. (Heb. 1:5, 6; 2:2, 3; 9:24, 25) Bekangawasebentisa lamavi akhe lanengcondvo kuze akhone kuphendvula labo lebebawaphikisa. w22.08 23-24 ¶12-14

Bantfu abasetsembi muntfu kulelive laSathane. Bahlale badvunyatwa bosomabhizinisi, baholi bepolitiki nabaholi benkholo. Labanye badvunyatwa bangani babo, bomakhelwane babo, baze badvunyatwe ngisho nangemalunga emndeni. Loku akusimangalisi. LiBhayibheli latsi: ‘Emalangeni ekugcina . . . , bantfu . . . ngeke betsembeke, . . . batawunyundzela, . . . batsengise ngalabanye.’ Loku kusho kutsi bantfu batawufana naSathane, longunkulunkulu walelive longeke uze umetsembe. (2 Thim. 3:1-4; 2 Khor. 4:4) Nobe kunjalo, njengobe singemaKhristu, siyati kutsi singametsemba ngalokuphelele Jehova. Siyaciniseka kutsi uyasitsandza nekutsi ‘angeke aze abashiye’ bangani bakhe. (Hla. 9:10) Singametsemba naKhristu Jesu ngobe wanikela ngekuphila kwakhe ngenca yetfu. (1 Phet. 3:18) Ngetulu kwaloko, sitibonele ngewetfu kutsi liBhayibheli lisiniketa ticondziso lesingatetsemba.​—2 Thim. 3:16, 17. w22.09 2 ¶1-2

Injabulo mbamba ayisiyo nje yesikhashana. Umuntfu angajabula kuphila kwakhe konkhe. Kanjani? Jesu wachaza eNshumayelweni yakhe yaseNtsabeni nakatsi: “Bayajabula labo labanakisisa tintfo letiphatselene naNkulunkulu.” (Mat. 5:3) Jesu bekati kutsi bantfu badalwe baba nesifiso lesikhulu sekwati nesekukhonta uMdali wabo, lokunguJehova Nkulunkulu. Loku kutsiwa ‘kunakisisa tintfo letiphatselene naNkulunkulu.’ Njengobe Jehova ‘anguNkulunkulu lojabulako,’ nalabo labamkhontako bangajabula. (1 Thim. 1:11) Singajabula kuphela nangabe tintfo tisihambela kahle yini ekuphileni? Cha. ENshumayelweni yakhe, Jesu watsi bangajabula “labo labalilako.” Jesu waphindze watsi bayajabula labo “labaphetfwe kabi ngenca yekulunga.” (Mat. 5:4, 10, 11) Jesu bekasifundzisa kutsi injabulo ayiyi ngetimo lesibhekene nato ekuphileni, kodvwa singayitfola nasinakisisa tintfo letiphatselene naNkulunkulu futsi sisondzelane naye.​—Jak. 4:8. w22.10 6 ¶1-3

Kucondza kutawusita umKhristu ati kutsi kunesikhatsi “sekubindza nesikhatsi sekukhuluma.” (Shu. 3:7) Labanye bantfu batsi: “Kukahle kukhuluma, kodvwa kukahle kakhulu kubindza.” Ngalamanye emagama, kunetikhatsi lapho khona kuncono kubindza kunekukhuluma. Cabanga nganasi sibonelo. Lomunye umzalwane losekanesikhatsi lesidze angulomdzala welibandla uvame kucelwa ngulamanye emabandla kutsi awasite ngetinkinga tawo letimatima. Naka naku lokushiwo ngulomunye lomdzala welibandla lanaye ebandleni: “Uhlale enta konkhe langakwenta kuze angatikhulumi tindzaba letiyimfihlo takulamanye emabandla.” Kucondza kwalomzalwane kwente kutsi labanye labadzala lanabo esigungwini salabadzala bamhloniphe. Bayaciniseka kutsi angeke atikhulume tindzaba tabo letiyimfihlo. Kwetsembeka kubalulekile kuze labanye bakwetsembe. Siyametsemba umuntfu lowetsembekile ngobe siyati kutsi utawuhlale akhuluma liciniso.​—Ef. 4:25; Heb. 13:18. w22.09 12 ¶14-15

Labanyenti abakunaki kuhlakanipha lokungiko ‘lokumemeta esitaladini.’ (Taga 1:20) Ngekusho kweliBhayibheli, kunemacembu lamatsatfu ebantfu labangakufuni kuhlakanipha, ‘lokubantfu labete lwati,’ “labaphukutanako” kanye ‘netilima.’ (Taga 1:22-25) “Bantfu labete lwati” ngulabo labakukholelwa konkhe labakuvako futsi labasheshe badukiseke. (Taga 14:15) Nasi sibonelo, cabanga ngetigidzi tebantfu letidukiswa baholi benkholo nobe betepolitiki. Labanye bayamangala nababona kutsi labaholi babadukisile. Kodvwa labantfu lesikhuluma ngabo kuTaga 1:22 batikhetsele kuhlala bete lwati ngoba bayakutsandza loko. (Jer. 5:31) Abafuni kufundza loko lokushiwo liBhayibheli nobe kulalela imitsetfo yalo. Asifuni kufanana nebantfu labakhetsa kubabete lwati!​—Taga 1:32; 27:12. w22.10 19 ¶5-7

Inhlangano yaNkulunkulu isiniketa ticondziso kuze isivikele. Sihlale sikhunjutwa kutsi sinike labadzala belibandla imininingwane yetfu yakamuva kuze batawukhona kuchumana natsi nakuvela simo lesiphutfumako. Singahle sitfole sicondziso mayelana nekuhlala emakhaya singaphumi, nekubaleka emakhaya etfu, nangendlela yekutfola tintfo lesitidzingako nobe letimayelana nekutsi singabasita njani labanye nekutsi nini. Nangabe singalaleli, singabeka kuphila kwetfu nekwalabadzala belibandla engotini. (Heb. 13:17) Bazalwane labanyenti nabodzadze labashiye emakhaya abo ngenca yesahlakalo nobe imphi nobe budlwangudlwangu, bente konkhe labangakhona kukwenta kuze bavumelane nesimo lesisha futsi benta umsebenti waNkulunkulu bangaphotisi maseko. NjengemaKhristu ekucala lahlakateka etindzaweni letehlukahlukene ngenca yekuphatfwa kabi, nabo “bashumayela tindzaba letimnandzi telivi laNkulunkulu.” (Imis. 8:4) Kushumayela kubasita kutsi bahlale banake uMbuso kunekunaka timo letimatima lababhekene nato. Ngenca yaloko, bahlala bajabulile futsi banekuthula. w22.12 19 ¶12-13

Jehova unendzaba nemuntfu ngamunye. Ngaphambi kwekutsi Jesu atfume bafundzi bakhe kutsi bayoshumayela, wabasita kutsi bancobe kwesaba kuphikiswa. (Mat. 10:29-31) Loko wakwenta ngekutsi akhulume nabo ngenyoni lebeyivamile ka-Israyeli, lokungujolwane. Ngaleso sikhatsi, lenyoni beyingakabaluleki kangako. Kodvwa watjela bafundzi bakhe watsi: “Ngisho munye wabo angawela emhlabatsini, Babe wenu ngeke ahlale angamboni.” Wengeta watsi: “Nine nibaluleke kwendlula bojolwane labanyenti.” Ngalamavi, Jesu wacinisekisa bafundzi bakhe kutsi Jehova unendzaba nemuntfu ngamunye ngako bekute sizatfu sekutsi besabe kuphatfwa kabi. Kusenekwenteka labafundzi bebakhumbula emavi aJesu nababona bojolwane nabasashumayela emadolobheni nakuletinye tindzawo. Ngaso sonkhe sikhatsi nawubona inyoni lencane, khumbula kutsi Jehova unendzaba nawe ngobe ‘ubaluleke kwendlula bojolwane labanyenti.’ Ngekusitwa nguye, ungakhona kubeketelela nobe ngukuphi kuphikiswa ngesibindzi. w23.03 18 ¶12

Ngaletinye tikhatsi siyabhekana netinkinga, njengekuphikiswa emndenini nobe kuphelelwa ngumsebenti. Nangabe sekuphele sikhatsi lesidze sinetinkinga, singaphelelwa ngemandla futsi sicindzeteleke. Sathane uyalisebentisa lelitfuba futsi etame kusenta sicabange kutsi Jehova akasasitsandzi. Develi ufuna sicabange kutsi nguJehova nenhlangano yakhe labasibangele letinkinga. Kwenteka intfo lefanako kulamanye ema-Israyeli eGibhithe. Acale etsemba kutsi Jehova ukhetse Mosi na-Aroni kutsi bawakhulule ebugcilini. (Eks. 4:29-31) Kodvwa ngesikhatsi Faro enta kuphila kwawo kuba matima, asola Mosi na-Aroni ngebumatima lebekabhekene nabo. (Eks. 5:19, 20) Ema-Israyeli asola tikhonti taNkulunkulu letetsembekile. Loko kwaba kubi! Nangabe sekuphele sikhatsi lesidze ubeketelela tinkinga, tjela Jehova indlela lotiva ngayo futsi wetsembele kuye kutsi akusite. w22.11 15 ¶5-6

Jehova unguMnikikuphila, futsi unemandla ekwenta bantfu kutsi baphindze baphile. Wanika umphrofethi Elija emandla ekuvusa indvodzana yemfelokati waseSarefathi. (1 Khos. 17:21-23) Ngekuhamba kwesikhatsi, asitwa nguNkulunkulu, umphrofethi Elisha wavusa indvodzana yemfati longumShunemu. (2 Khos. 4:18-20, 34-37) Loku kanye nalabanye labavuswa kuyakhombisa kutsi Jehova unemandla ekuvusa bantfu ekufeni. Ngesikhatsi Jesu alamhlabeni, wakhombisa kutsi Babe wakhe umnikete emandla ekukwenta loko. (Joh. 11:23-25, 43, 44) Nyalo Jesu usezulwini futsi unikwe “lonkhe ligunya ezulwini nasemhlabeni.” Ngako angakhona kufeza setsembiso sekutsi “bonkhe labasemathuneni” batawuvuswa ekufeni futsi babe nelitsemba lekuphila kuze kube phakadze.​—Mat. 28:18; Joh. 5:26-29. w22.12 5 ¶10

Ngenca yekutsi labantfu abazange bamlalele Hezekeli, bekufana nekutsi abalaleli Jehova. Lamavi langumbhalo welusuku lwalamuhla acinisekisa Hezekeli kutsi kungalaleli kwalabantfu bekungeke kusho kutsi wehlulekile kwenta umsebenti wakhe njengobe angumphrofethi. Jehova waphindze wacinisekisa Hezekeli kutsi nasekwenteka loko bekakumemetela, labantfu “batawukwati kutsi bekunemphrofethi emkhatsini wabo.” (Hez. 2:5; 33:33) Siyaciniseka kutsi lamavi aniketa Hezekeli emandla ekwenta umsebenti wakhe. Natsi sinesibindzi ngobe siyati kutsi sitfunywe nguJehova kutsi sishumayele. Ukhombise kutsi uyasitsandza ngekutsi asibite ngekutsi ‘sibofakazi’ bakhe. (Isa. 43:10) Loko kusijabulisa kakhulu! Njengobe Jehova atjela Hezekeli watsi: ‘Ungesabi,’ natsi uyasitjela utsi: “Ningesabi.” (Hez. 2:6) Yini lesenta singabesabi labo labasiphikisako? NjengaHezekeli, natsi sitfunywe nguJehova, futsi utasisita.​—Isa. 44:8. w22.11 3-4 ¶4-5

Lamuhla, sijabula kakhulu ngekuba nalabadzala belibandla netinceku letisebentako lesingatetsemba. Labazalwane labetsembekile bayasinakekela futsi siyambonga Jehova ngekusipha bona! Kodvwa ngutiphi letinye tindlela lesingakhombisa ngato kutsi setsembekile? Siyabatsandza bazalwane betfu nabodzadze futsi sinendzaba nabo. Nobe kunjalo, kufanele sibahloniphe. Ngesikhatsi semaKhristu ekucala, labanye ebandleni ‘bebahleba, batifake etindzabeni tebantfu, bakhulume nangetintfo letingakafaneli.’ (1 Thim. 5:13) Asifuni kufana nabo. Kodvwa ase sitsi lotsite usicocela tindzaba takhe, asicele kutsi singatjeli muntfu. Sibonelo nje, dzadze angasitjela ngekugula kwakhe nobe ngenkinga labhekene nayo futsi asicele kutsi singabatjeli labanye. Kufanele sikwente loko lakucelako. w22.09 10 ¶7-8

Ligama lesiGriki lelihunyushwe ngekutsi “nishintje tingcondvo tenu” lingaphindze lihunyushwe ngekutsi “nilungise tingcondvo tenu.” Ngako, loku akusho kutsi kufanele sente tintfo letimbalwa nje letinhle. Kunaloko, kufanele sitihlolisise kutsi sibantfu labanjani futsi sente lushintjo loludzingekako kuze silalele timiso taJehova. Loku kufanele singakwenti kanye nje kuphela, kepha kufanele sichubeke sikwenta. Nasesite sono, sitawukhona kuhlale senta tintfo letijabulisa Jehova. Kodvwa kwanyalo, kufanele sichubeke silwa kamatima kuze sijabulise Jehova. Embhalweni waKubaseRoma 12:2, Pawula watsi kufanele sishintje tingcondvo tetfu kuze sititfolele tsine loko lokuyintsandvo yaNkulunkulu. Kunekutsi sivumele lelive lelibi lilawule indlela lesenta ngayo tintfo, kufanele sicale sitihlole kuze sibone kutsi simvumela kangakanani Nkulunkulu kutsi alawule indlela lesicabanga ngayo, imigomo yetfu netincumo tetfu, kunekutsi sivumele lelive. w23.01 8-9 ¶3-4

Jehova ulawula tonkhe timo lesibhekana nato yini? Ucondzisa tonkhe tintfo letenteka ekuphileni kwetfu yini kuze tonkhe tintfo letimbi tenteke ngesizatfu lesihle? Cha, liBhayibheli alikufundzisi loku. (Shu. 8:9; 9:11) Nobe kunjalo, naku lesikwatiko: Nasibhekene nenkinga, Jehova uyabona futsi uyeva nasicela lusito. (Hla. 34:15; Isa. 59:1) Ngetulu kwaloko, Jehova angasisita kutsi sikhone kubeketelela bumatima. Kanjani? Lenye indlela Jehova lasisita ngayo kutsi uyasidvudvuta futsi asikhutsate ngesikhatsi lesifanele. (2 Khor. 1:3, 4) Sikhona yini sikhatsi lapho Jehova ake wakusita khona ngekutsi akudvudvute futsi akukhutsate ngesikhatsi lobewukudzinge ngaso? Sivame kubona sekwengcile kutsi Jehova usisite kangakanani kuze sibeketelele simo lesimatima. w23.01 17-18 ¶13-15

Lesilwane sesiganga siphose sifanane nalesi lesinetinhloko letingu-7 kodvwa umehluko kutsi sona sibovu. Sibitwa ngekutsi ‘ngumfanekiso wesilwane sesiganga’ futsi sichazwa ngekutsi “yinkhosi yesi-8.” (Semb. 13:14, 15; 17:3, 8) Kutsiwa ‘lenkhosi’ yavela, yanyamalala, yaphindze yavela. Loku kumchaza kahle Mhlabuhlangene, losekela tepolitiki emhlabeni wonkhe! Ekucaleni bewubitwa ngekutsi yi-League of Nations. Kodvwa wanyamalala ngeMphi Yelive Yesibili. Ngemuva kwesikhatsi, waphindze wavela sekutsiwa nguMhlabuhlangene. Letilwane tesiganga nobe labohulumende, basebentisa tindzaba letingemanga kuze bamelane naJehova kanye nebantfu bakhe. Ngemcondvo longumfanekiso, babutsela ndzawonye ‘emakhosi emhlaba wonkhe’ emphini ye-Amagedoni “yelilanga lelikhulu laNkulunkulu Somandla.”​—Semb. 16:13, 14, 16. w22.05 10 ¶10-11

Jesu wafundza kutifundzela yena imiBhalo Lengcwele, akagcinanga nje ngekuyati kahle imiBhalo, kepha waphindze wayitsandza futsi wayivumela kutsi itsintse tento takhe. Sibonelo nje, khumbula loko lokwenteka ngesikhatsi Jesu asethempelini futsi aneminyaka lengu-12 budzala. Bafundzisi lebebawati kahle uMtsetfo waMosi “bebamangaliswa timphendvulo [taJesu] kanye nendlela lebekacondza ngayo tintfo.” (Luk. 2:46, 47, 52) Natsi singalati liVi laNkulunkulu futsi silitsandze nangabe silifundza njalo. Singafundza kuloko Jesu lakusho kulabo lebebati uMtsetfo, lokufaka ekhatsi tati temtsetfo, baFarisi kanye nebaSadusi. Labaholi benkholo bebavame kuyifundza imiBhalo, kepha bekungabasiti loko bebakufundza. Jesu waveta tintfo letintsatfu lebekufanele ngabe lamadvodza ayatenta kuze asitakale nawafundza imiBhalo. Loko lakusho kutasisita kutsi sitfutfukise indlela (1) lesikucondza ngayo loko lesikufundzako, (2) sitfole umcebo loseVini laNkulunkulu, futsi (3) sivumele liVi laNkulunkulu kutsi lisibumbe. w23.02 8-9 ¶2-3

Letinye tintfo lokufanele singatenti tifaka ekhatsi kudlala ngelutsandvo, kunatsa kakhulu tjwala, kudla ngalokwecile, inkhulumo lelimatako, kanye nekubuka tintfo letikhombisa budlova, kungcola kanye naletinye tintfo letifana naleti. (Hla. 101:3) Develi uhlale afuna ematfuba ekulimata buhlobo betfu naJehova. (1 Phet. 5:8) Nangabe singakanaki, Sathane angafaka etingcondvweni tetfu nasetinhlitiyweni tetfu umona, kungetsembeki, bugovu, inzondo, kutikhukhumeta kanye nentfukutselo lengalawuleki. (Gal. 5:19-21) Nangabe singatisusi ngekushesha, titawuchubeka tikhula kuhle kwesihlahla lesinashevu futsi tibange ingoti. (Jak. 1:14, 15) Lenye ingoti lebhacile kutihlanganisa nebantfu lababi. Kufanele sikhumbule kutsi labo lesikhetsa kucitsa sikhatsi nabo batayitsintsa indlela lesenta ngayo tintfo. (1 Khor. 15:33) Nangabe siticaphela, sitakugwema kutihlanganisa ngalokungenasidzingo nebantfu labangaphili ngetimiso taJehova. (Luk. 21:34; 2 Khor. 6:15) Sitayibona iseta ingoti futsi siyibalekele. w23.02 16 ¶7; 17 ¶10-11

Indlela lomtsandza ngayo Jehova seyikhulile njengobe sewufundze lokunyenti ngaye. Uyafuna kusondzelana naye nyalo nekusondzelana naye kuze kube phakadze. Loko kungenteka. Ngemusa uyakukhutsata kutsi wente inhlitiyo yakhe ijabule. (Taga 23:15, 16) Loko ungakwenta ngaloko lokushoko nangaloko lokwentako. Indlela lophila ngayo nyalo itawukhombisa kutsi umtsandza mbamba Jehova. Loyo ngumgomo loncono kakhulu longatibekela wona ekuphileni kwakho. Ungakhombisa njani kutsi uyamtsandza Jehova? Kwekucala, thantaza utinikele kuNkulunkulu weliciniso. (Hla. 40:8) Ngemuva kwaloko, khombisa nalabanye kutsi utinikele kuye ngekutsi ubhajatiswe. Leso sikhatsi lesijabulisa kakhulu nalesibalulekile ekuphileni kwakho. Ucala imphilo lensha, ungasatiphileli wena kodvwa uphilele Jehova. (Rom. 14:8; 1 Phet. 4:1, 2) Leso sincumo lesikhulu. Sikuvulela litfuba lekuphila imphilo lencono kakhulu. w23.03 5-6 ¶14-15