September

Nasisisebentisa kahle lesipho setfu sekukhuluma sisuke sikhombisa labanye kutsi sikhonta Jehova. Sifuna kubasita bawubone kahle umehluko ‘emkhatsini walokhonta Nkulunkulu naloyo longamkhonti.’ (Mal. 3:18) Nguloko lokwenteka kulomunye dzadze lokutsiwa nguKimberly. Wanikwa umsebenti wesikolwa lebekufanele awente nalomunye umfundzi. Ngemuva kwekuba sebacedzile kwenta lomsebenti wesikolwa, lomfundzi wabona kutsi Kimberly akafani nalabanye bafundzi. Bekangakhulumi kabi ngalabanye, kodvwa bekakhuluma kahle futsi angalusebentisi lulwimi lolubi. Lomfundzi wakutsandza loko lakubona kuKimberly futsi wasemukela sifundvo seliBhayibheli. Jehova ujabula kakhulu nakabona kutsi indlela lesikhuluma ngayo yenta labanye bafune kufundza ngaye! Sonkhe sifuna kukhuluma ngendlela letawudvumisa Jehova. w22.04 5-6 ¶5-7

Jesu wakhulula Mariya waseMagdala emadimonini langu-7. Wakhombisa kubonga kwakhe ngekutsi abe ngumlandzeli waJesu futsi amsekele emsebentini wakhe wekushumayela. (Luk. 8:1-3) Nanobe Mariya bekabonga kakhulu ngaloko Jesu lamentela kona, kungenteka bekangati kutsi kusenalokukhulu latamentela kona. Bekatawufela bonkhe bantfu, ‘kuze wonkhe umuntfu lokholwa nguye’ atfole kuphila lokuphakadze. (Joh. 3:16) Kodvwa Mariya wakhombisa kutsi uyabonga kuJesu ngekutsi etsembeke kuye. Ngesikhatsi Jesu asetinhlungwini elugodvweni, Mariya bekaseceleni kwakhe ngobe bekamkhatsalela futsi afuna kudvudvuta labanye lebebakhona lapho. (Joh. 19:25) Ngemuva kwekufa kwaJesu, Mariya kanye nalabanye bafati lababili baya nemakha ethuneni laJesu kuze bayogcobisa sidvumbu sakhe. (Mak. 16:1, 2) Mariya wabusiswa ngekutsi abone Jesu lebesekavusiwe futsi wakhuluma naye, lokulitfuba bafundzi labanyenti labangazange sebalitfole.​—Joh. 20:11-18. w23.01 27 ¶4

Akukafaneli sicabange kutsi loko lesimentele kona Jehova esikhatsi lesendlulile kwenele. Nanobe kungenteka kutsi asisakhoni kumentela loko besikhona kumentela kona ngaphambili, kodvwa kufanele sichubeke simatasatasa “emsebentini weNkhosi” futsi sihlale siphapheme kuze kube sekugcineni. (1 Khor. 15:58; Mat. 24:13; Mak. 13:33) Kufanele sihlale sinemdlandla futsi sikhonte Jehova ngenhlitiyo yetfu yonkhe. Umlayeto waJesu loya eLawodisiya bewuveta lenye inkinga. ‘Besebasivuvu’ ekukhonteni kwabo Nkulunkulu. Ngenca yekutsi besebete umdlandla, Jesu wabatjela kutsi ‘baselusizini futsi bekuhawukelwa.’ Bekufanele babe nemdlandla ekukhonteni Jehova. (Semb. 3:16, 17, 19) Yini lesiyifundzako? Nangabe sesiphelelwa ngumdlandla, kufanele sicabangisise ngato tonkhe tintfo letinhle Jehova kanye nenhlangano yakhe lebasentele tona. (Semb. 3:18) Asifuni kuba matasatasa sifuna kuphila kahle, bese kukhonta Jehova akuseti kucala ekuphileni kwetfu. w22.05 3-4 ¶7-8

Sekuphele tinkhulungwane teminyaka Jehova abhala incwadzi lebalulekile. Lencwadzi ibhalwe emagama ebantfu kusukela kufakazi wekucala lowetsembekile lokungu-Abela. (Luk. 11:50, 51) Kuyo yonkhe leminyaka, Jehova bekasolo engeta emagama ebantfu kulencwadzi, futsi lamuhla kunetigidzi temagama ebantfu kuyo. EBhayibhelini, lencwadzi ibitwa ngekutsi ‘yincwadzi yesikhumbuto,’ ‘yincwadzi yekuphila’ nangekutsi ‘ngumculu wekuphila.’ (Mal. 3:16; Semb. 3:5; 17:8) Lencwadzi lebalulekile icuketse onkhe emagama ebantfu labesaba Jehova nobe labamhloniphako, nalabatsandza libito lakhe. Basetfubeni lekutfola kuphila lokuphakadze. Lamuhla, emagama etfu angabhalwa kulencwadzi nangabe setama kuba nebuhlobo lobuhle naJehova ngesisekelo senhlawulo yeNdvodzana yakhe Jesu Khristu. (Joh. 3:16, 36) Sonkhe siyafuna kutsi emagama etfu abhalwe kulencwadzi, ngisho nobe sinelitsemba lekuphila ezulwini nobe emhlabeni. w22.09 14 ¶1-2

Incwadzi yeSembulo iphindze ichaze “drago lomkhulu, lobovu njengemlilo.” (Semb. 12:3) Lodrago ulwa naJesu kanye netingilosi takhe. (Semb. 12:7-9) Uhlasela bantfu baNkulunkulu futsi uniketa letilwane tesiganga emandla. (Semb. 12:17; 13:4) Ungubani lodrago? ‘Uyinyoka yekucala, lobitwa ngekutsi nguDeveli nangekutsi nguSathane.’ (Semb. 12:9; 20:2) Ulawula tonkhe titsa taJehova. Kutawentekani kulodrago? Sembulo 20:1-3 sitsi ingilosi itawujikijela Sathane emgodzini longenamkhawulo, lokutawufana nekutsi uboshiwe. Nasekakulomgodzi longenamkhawulo, Sathane angeke ‘asachubeka nekudukisa tive ize iphele iminyaka lengu-1 000.’ Ekugcineni, Sathane nemadimoni akhe batawujikwa “echibini lemlilo nesibabule,” lokusho kutsi batawubhujiswa ngalokuphelele. Asewucabange nje kutsi kutawuba njani kuphila angasekho Sathane nemadimoni akhe. Leso kuyawuba sikhatsi lesimnandzi mbamba! w22.05 14 ¶19-20

Jesu bekasisebenti lesikhutsele. Ngesikhatsi aselijaha, bekangumbati. (Mak. 6:3) Siyaciniseka kutsi batali bakhe bebajabula ngekutsi uyabasita njengobe bebetama kunakekela tidzingo temndeni wabo lomkhulu. Njengobe bekete sono, kungenteka tintfo bekatenta betitinhle kakhulu kangangekutsi bantfu labanyenti bebafuna ababatele! Jesu bekawutsandza umsebenti wakhe. Nanobe bekawenta ngekutimisela umsebenti wakhe, bekahlale asibekela eceleni sikhatsi sekwenta tintfo letiphatselene nekukhonta Nkulunkulu. (Joh. 7:15) Nasekacitsa sikhatsi lesinyenti enta umsebenti wekushumayela, weluleka labo bebamlalele watsi: “Ningabosebentela kudla lokuphelako, kodvwa sebentelani kudla lokuhlala kuze kube phakadze.” (Joh. 6:27) Ngetulu kwaloko, eNshumayelweni yakhe yaseNtsabeni, watsi: “Tibekeleni umcebo ezulwini.” (Mat. 6:20) Kuhlakanipha lokuvela kuNkulunkulu kusisita kutsi sibe nembono lokahle ngemsebenti. Njengobe singemaKhristu, sifundziswa kutsi ‘sisebente kamatima, sente lokuhle.’ w22.05 22 ¶9-10

Yunisi wambekela sibonelo lesihle Thimothi. Bekaciniseka kutsi tento tamake wakhe betikhombisa kutsi umtsandza mbamba Jehova, nekutsi kukhonta Jehova bekwenta make wakhe ajabule. Ngendlela lefanako, bomake labanyenti lamuhla basite emalunga emindeni yabo kutsi akhonte Jehova “ngaphandle kwemavi.” (1 Phet. 3:1, 2) Nawe ungenta lokufanako. Kanjani? Yenta kukhonta Jehova kute kucala ekuphileni kwakho. (Dut. 6:5, 6) Njengabomake labanyenti, udzela tintfo letinyenti. Udzela sikhatsi sakho, imali yakho, butfongo bakho naletinye tintfo kuze unakekele tidzingo tebantfwana bakho. Kodvwa akukafaneli ube matasatasa kakhulu uze ube bete sikhatsi sekucinisa buhlobo bakho naJehova. Hlale utibekela sikhatsi sekuthantaza, sekutidadishela liBhayibheli nesekuya emihlanganweni yelibandla. Nawenta njalo, utawucinisa buhlobo bakho naJehova futsi uwubekele sibonelo lesihle umndeni wakho kanye nalabanye. w22.04 16 ¶1; 19 ¶12-13

Siyajabula ngekutsi awukanikwa tsine lomsebenti lomatima wekuncuma kutsi bantfu behlulelwe njani! Njengobe Jehova anguMehluleli Lophakeme, utawenta lomsebenti lobaluleke kakhulu. (Rom. 14:10-12) Siyaciniseka kutsi utawuhlale ehlulela ngekuvumelana netimiso takhe letiphakeme talokulungile nalokungakalungi. (Gen. 18:25) Akayuze ente intfo lengakalungi! Siyasilangatelela sikhatsi lapho Jehova atawususa khona yonkhe imiphumela lebuhlungu yesono. Ngaleso sikhatsi, bonkhe buhlungu butawucedvwa ngalokuphelele. (Hla. 72:12-14; Semb. 21:3, 4) Angeke siphindze sibukhumbule. Njengobe sisalindze leso sikhatsi lesijabulisako, sibonga kakhulu ngekutsi Jehova usiphe likhono lekucolela njengaye. w22.06 13 ¶18-19

Umehluleli lokahle kufanele awati kahle umtsetfo. Kufanele akwati kahle lokulungile nalokungakalungi. Yini lenye ledzingekako ngemehluleli lokahle? Kufanele awati onkhe emaciniso endzaba ngaphambi kwekutsi ehlulele. Ngako Jehova unguMehluleli lokahle kakhulu ngobe uhlale awati onkhe emaciniso endzaba. Ngalokwehlukile kubehluleli lababantfu, Jehova uhlale awati kahle onkhe emaciniso endzaba. (Gen. 18:20, 21; Hla. 90:8) Akafani nebantfu labehlulela ngaloko labakuvako nobe labakubonako. Uyati kutsi loko umuntfu lakwentako kuya ngelufuto lalutfole kubatali bakhe, indlela lakhule ngayo, lapho akhulele khona, nekutsi utiva njani nangekutsi uphilile yini engcondvweni. Ngetulu kwaloko, Jehova ufundza inhlitiyo. Ukwati kahle loko lokwenta umuntfu ente intfo letsite. Kute lokufihlakele kuJehova. (Heb. 4:13) Ngako Jehova nakacolela umuntfu, usuke asati kahle simo lebekakuso. w22.06 4 ¶8-9

Kufanele siwanakisise emachinga Sathane lawasebentisa kuJobe ngobe usebentisa lafanako nakitsi lamuhla. Sathane utsi asimtsandzi mbamba Jehova Nkulunkulu nekutsi singamshiya nangabe loko kusho kusindzisa kuphila kwetfu. Sathane uphindze atsi Nkulunkulu akasitsandzi futsi akanendzaba nemetamo lesiyentako kuze simkhonte. Ngenca yekutsi siyati kutsi Sathane ufunani, angeke siwetsembe lamanga akhe. Kufanele sitsatse tinkinga lesibhekana nato njengelitfuba lekuhlola buntfu betfu. Kuvivinywa labhekana nako Jobe kwamsita wabona lapho bekabutsakatsaka khona futsi watfutfukisa. Sibonelo nje, wabona kutsi bekudzingeka etame kutfobeka kakhudlwana. (Jobe 42:3) Natsi singafundza lokutsite ngebuntfu betfu nasivivinywa. Nasesibona lapho sibutsakatsaka khona, kufanele setame kutfutfukisa. w22.06 23 ¶13-14

Jehova wetsembisa kutsi utasisita. Sibonelo nje, ngaphambi kwekutsi atsi: “Nine nibofakazi bami,” watsi: “Nawudzabula ekhatsi emantini, ngitawuba nawe, nawewela imifula, angeke ikukhukhule. Nawuhamba ekhatsi emlilweni, angeke ushe, nelilangabi angeke likuhashule.” (Isa. 43:2) Nasishumayela, sihle sibhekana netimo letifana netikhukhula futsi sihle sihlangana netinkinga letifana nemlilo. Nobe kunjalo, Jehova uyasisita kuze sichubeke sishumayela. (Isa. 41:13) Bantfu labanyenti lamuhla abawemukeli umlayeto lesiwuphetse. Kodvwa sihlale sikhumbula kutsi kungalaleli kwabo akusho kutsi asiwenti kahle umsebenti wekushumayela. Kuyasikhutsata futsi kusicinise kwati kutsi Jehova uyajabula nasichubeka siwenta ngekwetsembeka lomsebenti. Umphostoli Pawula watsi: “Nguloyo naloyo utawutfola umvuzo kuye ngemsebenti lawentile.”​—1 Khor. 3:8; 4:1, 2. w22.11 4 ¶5-6

Lamuhla, sibona kugcwaliseka kwetiphrofetho teliBhayibheli. Bantfu labavela “kuto tonkhe tilwimi netive” bafundza kukhuluma “lulwimi loluhlantekile” lweliciniso leliseBhayibhelini. (Zak. 8:23; Zef. 3:9) Bantfu labangetulu kwa-8 000 000 labavela emaveni langu-240 bayincenye yenhlangano yaJehova, futsi njalo ngemnyaka kubhajatiswa tinkhulungwane tebantfu! Lokubaluleke kakhulu kunaletinombolo kutsi labafundzi labasha sebanebuntfu bebuKhristu, futsi bagcoke “buntfu lobusha.” (Khol. 3:8-10) Labanyenti bayekele kutiphatsa kabi, kuba nebudlova, kubandlulula nekushisekela buve. Kugcwaliseka nesiphrofetho lesiku-Isaya 2:4 lesikhuluma ngekutsi ngeke ‘basaceceshelwa kulwa imphi.’ Ngenca yekutsi setama kamatima kugcoka buntfu lobusha, loko kwenta bantfu labanyenti bafune kutihlanganisa nenhlangano yaNkulunkulu, kuyakhombisa nekutsi silandzela Khristu Jesu umholi wetfu. (Joh. 13:35) Konkhe loku akukatentakaleli. Sisitwa nguJesu. w22.07 9 ¶7-8

Nasithantaza kuJehova, sifuna kumhlonipha kakhulu. Cabanga ngemibono leyabonwa ngu-Isaya, nguHezekeli, nguDanyela naJohane. Yonkhe beyiveta Jehova njengeNkhosi lenkhulu. Isaya wabona “Jehova ahleti esihlalweni sebukhosi lesisetulu nalesiphakanyisiwe.” (Isa. 6:1-3) Hezekeli wabona Jehova ahleti esihlalweni sakhe sebukhosi atungeletwe “kukhanya . . . lokufana nemushi wenkosazana.” (Hez. 1:26-28) Danyela wabona “Loyo Lobekaphila Kusukela Endvulo” agcoke tembatfo letimhlophe, sihlalo sakhe sebukhosi sivutsa emalangabi. (Dan. 7:9, 10) Johane wabona Jehova ahleti esihlalweni sebukhosi lesitungeletwe ngumushi wenkosazana lonjengesimaragidu. (Semb. 4:2-4) Kucabanga ngebukhulu baJehova kufanele kusikhumbute ngelilungelo lelihle lesiphiwe lona lekuthantaza kuye, nekutsi kufanele simhloniphe nasithantaza. w22.07 20 ¶3

Nine labasha, Sathane utawetama kunenta ningatfutfuki. Lenye indlela langakwenta ngayo loku kutsi akwente ungabate letinye timfundziso teliBhayibheli. Sibonelo nje, kungenteka uve ngemfundziso lengamhloniphi Nkulunkulu yekutigucukela kwemvelo. Kungenteka ngesikhatsi usemncane bewungacabangi ngayo, kodvwa kungenteka nyalo ufundziswa yona esikolweni. Loko bothishela bakho labakushoko ngekutigucukela kwemvelo kungabonakala kunengcondvo. Nobe kunjalo, kungenteka abakase babufune bufakazi bekutsi ukhona yini uMdali. Khumbula simiso lesitfolakala kuTaga 18:17, lesitsi: “Umuntfu lokhuluma kucala ecaleni ubonakala acinisile, kuze kube ngulapho lona lommangalele efika amphenyisise ngemibuto.” Kunekutsi umane nje ukwemukele konkhe lofundziswa kona esikolweni, kufanele utinike sikhatsi sekudadisha loko lokufundziswa liVi laNkulunkulu liBhayibheli netincwadzi tetfu. w22.08 2 ¶2; 4 ¶8

Sifuna kukucondza loko lesikufundza eVini laNkulunkulu, ngale kwaloko ngeke sisitakale ngalokugcwele. Sibonelo nje, cabanga ngaloko Jesu lakukhuluma nalenye “indvodza letsite lebeyati uMtsetfo.” (Luk. 10:25-29) Ngesikhatsi lendvodza imbuta kutsi kufanele yenteni kuze itfole kuphila lokuphakadze, Jesu wayisita kuze itfole imphendvulo eVini laNkulunkulu, wayibuta watsi: “Kantsi uMtsetfo utsini? Uwufundza njani?” Lendvodza yawuphendvula kahle lombuto ngekutsi icaphune imibhalo lekhuluma ngekutsandza Nkulunkulu nekutsandza makhelwane. (Lev. 19:18; Dut. 6:5) Kodvwa naka loko leyabese iyakusho, yatsi: “Ngubani vele longumakhelwane wami?” Loko kwakhombisa kutsi beyingakucondzi kahle loko leyakufundza. Ngenca yaloko, beyingati kutsi ingakusebentisa njani kahle loko lekufundzako ekuphileni kwayo. Sidzinga kusitwa nguJehova kuze sicondze imiBhalo. Ngako singamcela asiphe umoya wakhe longcwele kuze sikhone kunakisisa nasifundza. Loko kutakusita kutsi kungene loku lokufundzako. w23.02 9 ¶4-5

“Walitfola njani liciniso?” Kungenteka sewuwuphendvule tikhatsi letinyenti lombuto. Lona ngumbuto wekucala lesivame kuwubuta bazalwane betfu nabodzadze nasifuna kubati kancono. Siyatsandza kubeva basitjela kutsi bamati njani Jehova naloko lokwabenta bamtsandza. Natsi siyatsandza kubacocela kutsi yini leyasenta salitsandza liciniso. (Rom. 1:11) Kucoca ngaloku kusikhumbuta kutsi libaluleke kanganani liciniso kitsi. Kuphindze kusisite sitimisele kakhulu ‘kuchubeka sihamba ecinisweni,’ lokusho kuchubeka siphila ngendlela letawenta Jehova asibusise futsi asemukele. Sinetizatfu letinyenti tekulitsandza liciniso. Lesihamba embili kutsi siyamtsandza Jehova Nkulunkulu longuMtfombo weliciniso. EVini lakhe liBhayibheli, asigcini nje ngekufundza kutsi unguMdali lonemandla welizulu nemhlaba, kodvwa siphindze sifundze kutsi unguBabe wetfu wasezulwini lositsandzako nalosikhatsalela kakhulu.​—1 Phet. 5:7. w22.08 14 ¶1, 3

Umphostoli Pawula wakhutsata bazalwane bakhe nabodzadze kutsi bakhombise lutsandvo “ngemisebenti lemihle.” (Heb. 10:24) Akagcinanga nje ngekusita bazalwane bakhe ngaloko lebekakusho kodvwa bekabasita nangaloko lebekakwenta. Sibonelo nje, ngesikhatsi kunendlala eJudiya, Pawula wasita bazalwane bakhe nabodzadze ngetintfo lebebatidzinga. (Imis. 11:27-30) Ecinisweni, nanobe Pawula bekamatasatasa ashumayela futsi afundzisa, bekahlale afuna tindlela langabasita ngato labo labadzinga lusito. Ngekwenta njalo, bekasita bazalwane bakhe nabodzadze kutsi baciniseke kakhulu kutsi Jehova utawubanakekela. Lamuhla, sisuke sicinisa kukholwa kwebazalwane betfu nabodzadze nasinikela ngesikhatsi setfu, ngemandla nangemakhono kuze sisite nakuvele tehlakalo. Loku singakwenta nangekutsi sinikelele umsebenti lowentiwa emhlabeni wonkhe. Nasenta loku kanye nalokunye, sisuke sisita bazalwane betfu nabodzadze kutsi betsembe kutsi Jehova akayuze abalahle. w22.08 24 ¶14

LiBhayibheli linetiphrofetho letinyenti letagcwaliseka, letinye tato tagcwaliseka ngemuva kweminyaka lengemakhulu tibhaliwe. Umlandvo uyakhombisa kutsi letiphrofetho tagcwaliseka mbamba. Loko akusimangalisi ngobe siyati kutsi tonkhe tiphrofetho letiseBhayibhelini tivela kuJehova. Cabanga ngetiphrofetho letimayelana nekubhujiswa kweBhabhulona. Emkhatsini wa-778 B.C.E. na-732 B.C.E., umphrofethi Isaya waphrofetha kutsi lelidolobha lebelinemandla belitawuncotjwa. Washo nekutsi lelidolobha belitawuncotjwa ngulenye indvodza lokutsiwa nguKhuresi, wachaza nekutsi beyitawukwenta njani loko. (Isa. 44:27–45:2) Isaya waphrofetha nekutsi iBhabhulona beyitawubhujiswa futsi isale ingenamuntfu. (Isa. 13:19, 20) IBhabhulona yabhujiswa ngemaMediya nemaPheresiya nga-539 B.C.E., futsi lelidolobha lebelilikhulu nyalo litindzala. w23.01 4 ¶10

Jehova usikhetsile kuze sibe yincenye yemndeni wakhe losemhlabeni wonkhe. Lena yintfo lenhle, futsi sitfola tibusiso letinyenti ngaloko! (Mak. 10:29, 30) Emhlabeni wonkhe, sinebazalwane nabodzadze labatsandza Jehova njengatsi futsi labenta konkhe lokusemandleni abo kuze baphile ngetimiso takhe. Kungenteka lulwimi lesilukhulumako, emasiko etfu nendlela lesigcoka ngayo kwehlukile kunekwabo, kodvwa siyabatsandza ngisho sicala kubabona. Siyakutsandza kudvumisa Babe wetfu wasezulwini lositsandzako futsi simkhonte kanye kanye. (Hla. 133:1) Ngalesinye sikhatsi, bayasisita nasinetinkinga. (Rom. 15:1; Gal. 6:2) Baphindze basikhutsate kutsi sihlale simatasatasa emsebentini waJehova futsi sihlale sibangani bakhe. (Heb. 10:23-25) Cabanga nje kutsi ngabe siyini kube asivikelwa libandla, lelisisita kutsi silwe netitsa tetfu, lokunguSathane Develi nelive lakhe lelibi. w22.09 2-3 ¶3-4

Singakutfola kumatima kutibamba nasisebentisa tekuchumana. Nasingakanaki singatikhandza sesikhuluma tindzaba letiyimfihlo singakacondzi kubantfu labanyenti. Nasesiwusakatile umniningwane kutebuchwephesha, ngeke sisakhona kulawula indlela lotawusetjentiswa ngayo nobe kutsi unganani umonakalo lotawubanga. Kutibamba kuphindze kusisite kutsi sibindze nangabe labo labasiphikisako basebentisa bucili kuze betame kusenta kutsi sikhulume tintfo letingabeka bazalwane betfu nabodzadze engotini. Loku kungenteka nasiphenywa ngemaphoyisa nangabe sihlala eveni lapho umsebenti wetfu uvinjelwe khona. Kuletimo nakuletinye, singasebentisa simiso lesitsi: “Ngitawufaka sifonyo kute ngigadze umlomo wami.” (Hla. 39:1) Kufanele setsembeke kubo bonkhe bantfu, kungaba semndenini, kubangani, kubazalwane betfu nabodzadze nakulabanye nje bantfu. Kuze setsembeke, kudzingeka sitibambe. w22.09 13 ¶16

Kuze sijabule mbamba, kufanele sifundze futsi sidadishe liVi laNkulunkulu. Kungako Jesu atsi: “Umuntfu ngeke aphile ngesinkhwa sodvwa, kodvwa uphila ngawo onkhe emavi laphuma emlonyeni waJehova.” (Mat. 4:4) Ngako akukafaneli lishone singakalifundzi liVi laNkulunkulu liBhayibheli leliligugu. Ngenca yekutsi Jehova uyasitsandza, usikhombisile eBhayibhelini loko lesingakwenta kuze sijabule ekuphileni. Sifundza ngekutsi iyini injongo yakhe ngekuphila kwetfu. Sifundza nekutsi singasondzelana njani naye nekutsi yini lesingayenta kuze asicolele tono tetfu. Siphindze sifundze ngelitsemba letfu lelihle ngelikusasa. (Jer. 29:11) Lamaciniso lesiwatfola nasidadisha liBhayibheli asijabulisa kakhulu! Nakwenteka ucindzetelwa tinkinga ekuphileni, tinike sikhatsi ufundze liVi laJehova futsi ucabangisise ngalo. w22.10 7 ¶4-6

LiBhayibheli lisikhutsata kufanele kutsi singabi bantfu labete lwati. Lolwati silutfola ngekusebentisa timiso teliBhayibheli ekuphileni kwetfu. Kancane kancane sibese siyabona kutsi letimiso tisisita njani kutsi sigweme tinkinga futsi sente tincumo letihlakaniphile. Ngako kungaba kuhle kutsi sicabange ngetincumo lesitentile. Nangabe sesinesikhatsi sidadisha liBhayibheli futsi siba khona emihlanganweni, singahle sitibute kutsi yini lesibambile kutsi sitinikele kuJehova futsi sibhajatiswe. Nangabe sibhajatisiwe, siyatfutfuka yini endleleni lesishumayela ngayo nalesifundzisa ngayo tindzaba letimnandzi? Tincumo lesitentako tiyakhombisa yini kutsi sicondziswa timiso teliBhayibheli? Siyabukhombisa yini buntfu bebuKhristu endleleni lesiphatsa ngayo labanye? Nangabe sibona kutsi kufanele sitfutfukise, singacabanga ngaloko lesikukhunjutwa nguJehova njengobe ‘kubahlakaniphisa labete lwati.’​—Hla. 19:7. w22.10 20 ¶8

Hezekeli wabona kutsi umoya waNkulunkulu bewunemandla kangakanani. Embonweni, wabona umoya longcwele usita tingilosi letinemandla futsi uhambisa emasondvo lamakhulu enkalishi yasezulwini. (Hez. 1:21) Wenta njani nakabona loku? Naku lakusho. “Ngatsi nangikubona, ngaguca ngatsintsa ngebuso phansi.” Hezekeli wamangala kakhulu kangangekutsi waze waguca. (Hez. 1:28) Ngemuva kwesikhatsi, kungenteka njalo nje Hezekeli nakacabanga ngalombono bekaciniseka kakhulu kutsi umoya waNkulunkulu utamsita kuze awufeze kahle umsebenti wakhe. Naku Jehova lakutjela Hezekeli: “Ndvodzana yemuntfu, sukuma ume ngetinyawo ngitewukhuluma nawe.” Loko lokwashiwo nguJehova kanye nemoya wakhe longcwele kwamniketa emandla lebekawadzinga kuze asukume. (Hez. 2:1, 2) Kuso sonkhe lesikhatsi enta umsebenti wakhe, Hezekeli bekacondziswa “sandla” saNkulunkulu, lokungumoya longcwele waNkulunkulu.​—Hez. 3:22; 8:1; 33:22; 37:1; 40:1. w22.11 4 ¶7-8

Umphrofethi Isaya watsi Jehova ufana nemfundzisi lohamba ngemuva kwalabo labafundzisako, abatjele kutsi nguyiphi indlela lokufanele bahambe ngayo futsi abacondzise. Lamuhla siva liVi laNkulunkulu emvakwetfu. Kanjani? Emavi aNkulunkulu laphefumulelwe latfolakala eBhayibhelini abhalwa kadzeni, esikhatsini lesingemuva, sisengakabi khona. Ngako nasifundza liBhayibheli, kuba shengatsi siva liVi laNkulunkulu emvakwetfu. (Isa. 51:4) Yini lesingayenta kuze sizuze kakhulu kulesicondziso Jehova lasinika sona? Naka kutsi Isaya washo tintfo letimbili. Kwekucala watsi, “nayi indlela.” Kwesibili watsi, “hambani ngayo.” Akukeneli nje kwati ‘lendlela.’ Kodvwa kufanele ‘sihambe ngayo.’ LiVi laJehova lesilichazelwa yinhlangano yakhe, lisifundzisa loko lakulindzele kitsi. Siphindze sifundze kutsi singakusebentisa njani loko lesikufundzako. Kuze sikhone kucinisela sibe sijabulile emsebentini waJehova, kufanele sitente totimbili letintfo. Nasenta njalo, singaciniseka kutsi Jehova utasibusisa. w22.11 11 ¶10-11

Ngemuva nje kwekutsi linyenti lebaphostoli baJesu selifile, emaKhristu mbumbulu angena ebandleni. (Mat. 13:24-27, 37-39) Akhuluma “tintfo letisontsekile kuze advonse bafundzi kutsi bawalandzele.” (Imis. 20:30) Lokunye kwaloku ‘lokusontsekile’ lebekufundziswa ngulamaKhristu mbumbulu kutsi Jesu akazange anikele ngemtimba wakhe “kanye kuphela kuze etfwale tono talabanyenti,” njengobe liBhayibheli lisho, kodvwa atsi umhlatjelo wakhe kufanele wentiwe njalo njalo. (Heb. 9:27, 28) Lamuhla, bantfu labanyenti bayayikholelwa lemfundziso lengemanga. Baya esontfweni njalo ngeliviki, labanye baya onkhe malanga kuze babe nemkhosi labakhumbula ngawo kufa kwaJesu. Bakholelwa kutsi sinkhwa neliwayini kuyashintja kube yingati yaKhristu nemtimba wakhe mbamba. Bacabanga kutsi umtimba waJesu nengati yakhe kuba ngumhlatjelo ngaso sonkhe sikhatsi nawukudla. Letinye tinkholo atikugubhi njalo kufa kwaJesu, kodvwa aticondzi kahle kutsi umhlatjelo wakhe usho kutsini. w23.01 21 ¶5

Ngesikhatsi Sekubusa KwaJesu Kweminyaka Leyinkhulungwane, bantfu labafile batawuvuswa futsi labalalelako batawentiwa babe bete sono. Ngemuva kweluvivinyo lwekugcina, labo Jehova latabatfola balungile “batawudla lifa lemhlaba, futsi bahlale kuwo kuze kube phakadze.” (Hla. 37:10, 11, 29) Sijabula kakhulu ngekutsi “sitsa sekugcina lesitawucedvwa, kufa.” (1 Khor. 15:26) Litsemba letfu lekuphila phakadze lisekelwe eVini laNkulunkulu. Lelitsemba lingasisita kutsi sihlale setsembekile kulamalanga ekugcina lamatima. Kodvwa akusiso nje kuphela sifiso sekuphila phakadze lesisenta sifune kujabulisa Jehova. Sizatfu lesihamba embili sekuhlala setsembekile kuJehova nakuJesu kutsi sibatsandza kakhulu. (2 Khor. 5:14, 15) Lolutsandvo lusenta sibalingise futsi sicocele labanye ngelitsemba lesinalo. (Rom. 10:13-15) Njengobe sichubeka singaticabangeli tsine futsi sephane, Jehova utawufuna kuba bangani betfu kuze kube phakadze. w22.12 6-7 ¶15-16

Nasiphatfwa kabi, singalahlekelwa tintfo letinyenti letisenta sibe nekuthula. Singahle sikhatsateke, sesabe kutsi kutawentekani kitsi. Kuvamile kutiva ngalendlela. Nobe kunjalo, kufanele sicaphele. Jesu washo kutsi kuphatfwa kabi kungenta balandzeli bakhe baphelelwe kukholwa. (Joh. 16:1, 2) Nanobe Jesu asitjela kutsi silindzele kuphatfwa kabi, waphindze wasicinisekisa kutsi singahlala setsembekile. (Joh. 15:20; 16:33) Nangabe umsebenti wetfu uvinjelwe, singahle sitfole ticondziso letivela ehhovisi leligatja nobe kulabadzala belibandla. Leticondziso tentelwe kuvikela tsine nekutsi sichubeke sitfola imfundvo levela kuNkulunkulu siphindze sichubeke nemsebenti wekushumayela ngelizinga lesingakhona ngalo. Yenta konkhe lokusemandleni akho kuze ulalele sicondziso lositfolako. (Jak. 3:17) Ngetulu kwaloko, ungabatjeli labanye imininingwane lemayelana nebazalwane betfu nabodzadze lokungakafaneli bayati.​—Shu. 3:7. w22.12 20-21 ¶14-16

Lamuhla, Jesu uyachubeka nekucondzisa bafundzi bakhe njengobe bashumayela ngeMbuso waNkulunkulu emhlabeni wonkhe. Usifezile setsembiso sakhe. Usebentise inhlangano yaJehova kuze asiceceshe kutsi singashumayela njani futsi usiphe netintfo lesitidzingako kuze sikhone kusakata tindzaba letimnandzi. (Mat. 28:18-20) Sitawube senta loko Jesu lakulindzele kitsi nasisebenta kamatima sishumayela labanye futsi sibafundzise, nangekutsi sihlale sinakile njengobe silindzele Jehova kutsi aletse kuphela kwalelive. Nasisebentisa leseluleko lesiKumaHebheru 6:11, 12, sitawubambelela etsembeni letfu “kuze kube sekugcineni.” Jehova sewulibekile lilanga neli-awa latawuletsa ngalo kuphela kwalelive laSathane. Nalifika lelolanga, Jehova utawutigcwalisa tonkhe tiphrofetho letiseVini lakhe. Kodvwa kungenteka nyalo sibone ngatsi kukhashane kutsi kufike kuphela. Nobe kunjalo, lilanga laJehova ‘angeke lephute!’ (Hab. 2:3) Ngako shengatsi singatimisela ‘kuchubeka silindzele Jehova’ futsi ‘sibeketele, silindze Nkulunkulu longumsindzisi’ wetfu.​—Mik. 7:7. w23.02 19 ¶15-16

Umgomo wemuntfu locanca intsaba kutsi afike esicongweni sayo. Nobe kunjalo, kunetindzawo letinyenti langema kuto kuze abuke indzawo lenhle. Ngendlela lefanako, kufanele uhle uma futsi ucabange ngendlela Jehova lakusite ngayo ngisho ubeketelela simo lesimatima. Njalo nakuphela lilanga, tibute: ‘Jehova ungibusise njani lamuhla? Nanobe lenkinga isekhona, Jehova ungisita njani kuze ngiyibeketelele?’ Funa lokungenani kunye Jehova lakwentile kuze akusite. Kuliciniso kutsi kungenteka uthantazela kutsi inkinga lonayo iphele. (Fil. 4:6) Kodvwa kufanele sinake kutsi singatikhohlwa tibusiso lesinato nyalo. Ngetulu kwaloko, Jehova wetsembisa kutsi utasicinisa futsi asisite sicinisele. Ngako hlale ubonga ngekutsi Jehova uyakusita. Nawenta njalo, utayibona indlela Jehova lakusita ngayo kutsi uphumelele ngisho ubhekene netimo letimatima.​—Gen. 41:51, 52. w23.01 19 ¶17-18

Tibute: ‘Indlela lengiphila ngayo iyakhombisa yini kutsi ngiyacondza kutsi lelive lelibi litawuphela masinyane? Tincumo lengitentako letimayelana nemfundvo nemsebenti, tiyakhombisa yini kutsi kukhonta Jehova kubaluleke kakhulu ekuphileni kwami? Ngiyakholwa yini kutsi Jehova utawunakekela mine kanye nemndeni wami?’ Cabanga nje kutsi Jehova ujabula kangakanani nakasibona setama kuphila ngendlela levumelana nentsandvo yakhe. (Mat. 6:25-27, 33; Fil. 4:12, 13) Kufanele sihlale siyihlola indlela lesicabanga ngayo futsi sente lushintjo loludzingekako. Pawula watjela emaKhristu aseKhorinte watsi: “Chubekani nitihlola kutsi nisekukholweni yini; chubekani nihlola loko nine leningiko.” (2 Khor. 13:5) Ngako kufanele sichubeke sishintja tingcondvo tetfu ngekutsi sifundze liVi laNkulunkulu, sicabange ngendlela lacabanga ngayo, futsi sente nobe yini ledzingekile kuze simjabulise.​—1 Khor. 2:14-16. w23.01 9 ¶5-6